• AUSAGA NE FANAU I EI: 1971

  • FENUA: FALANI

  • TENA TALA FAKASOLOPITO: NE AOFIA I AMIOGA SOLITULAFONO MATAGĀ, FAIFAIGA FAKATAUAVAGA SE ‵TAU, MO VAILAKAU TAPU

TOKU OLAGA MUA:

Ne ‵nofo atu toku kāiga i Tellancourt, se fa‵kai i te feitu ki matū saegala o Falani. A toku tamana se tino Falani kae ko toku mātua se tino Italia. I te taimi ko valu ei oku tausaga, ne olo atu matou ki se koga galue telā e se lasi a ‵togi o tino ga‵lue i ei, i se tamā fa‵kai mativa o Loma, i Italia. Ne faigata te olaga faka-te-kāiga i konā. Ne kinau faeloa oku mātua ona ko lā fakalavelave i mea tau tupe.

I te taimi ko 15 ei oku tausaga, ne fakamalosi mai toku mātua ke fano sāle au ki tua mo te fale kae fai ne oku taugasoa. Tela la, ne kamata o tiakina sāle ne au a te fale mo se vaitaimi leva. E seki leva kae ne maua ne au ne taugasoa ma‵sei. I te aso e tasi, ne vau se tagata e tokotasi telā ne foliga mai me se tino ‵lei. Ne ofo mai ne ia ne vailakau tapu kolā ne talia ne au ona ko toku fia matua. Ne vave ‵ki toku aofia i se lalolagi e ‵fonu i vailakau tapu mo faifaiga fakatauavaga sē ‵tau. I taimi e uke, ne maneanea valevale au i faifaiga fakatauavaga sē ‵tau. Ne kamata o se tāua ki a au a te ola; ne ‵pau fua ki a au a te ola mo te mate. Ne mafatia au ona ko toku nofo tokotasi. I te taimi ko 16 ei oku tausaga, ne taumafai au o fakamate mai te inuga o se fagu malosi kae lele atu ki te namo. Ne pakia au kae ne takato au mo aso e tolu e aunoa mo se mea e iloa.

Ne kamata o fakatāua ne au te ola, kae koi fai foki ne au a amioga fakasaua kae faitogafiti. E masani o ofo atu ne au ki tino a amioga fakatauavaga, ‵suki ki a latou a vailakau tapu i olotou fale, ka oti ko kaisoa ei so se kope tāua. E fakaaoga sāle au ne potukau solitulafono ‵lasi ke aveave olotou vailakau tapu i loto i Italia kātoa. E masani o ‵poa sāle au ne pulisimani. Ne foliga sē aoga a toku olaga kae ko se mafai o pule faka‵lei atu ki ei. Kae ne talitonu au me isi se pogai ‵lei ne ola ei au. Ne ‵talo atu ei au ki te Atua o akai atu ke tuku mai aka se tausaga e tasi o te filemu mo te fiafia.

TE AUALA NE ‵FULI EI TOKU OLAGA NE TE TUSI TAPU:

I te taimi ko 24 ei oku tausaga, ne fakaiku aka ne au ke fanatu au ki Egelani. Ona ko aku galuega mo tino fai vailakau tapu, ne tu toku ola i se tulaga fakamataku. A koi tuai o tiakina ne au a te fenua, ne āsi atu au ki toku mātua kae ne poi au ke lavea atu ne au se tagata e igoa ki a Annunziato Lugarà e faipati atu ki tou fafine e uiga ki te Tusi Tapu. *  A te iloa atu o tena tala fakasolopito, ne kamata au o mataku kae fesili atu ki te pogai e nofo ei a ia i konā. Ne fakamatala mai ne ia a ‵fuliga lasi ne fai ne ia ki tena olaga ko te mea ke fai a ia e pelā me se Molimau a Ieova, kae ne fai foki ne ia au ke tauto me ka faipati atu eiloa au ki Molimau māfai ko oko atu au ki Egelani. Ne fiafia eiloa au ke fai penā. Kae e tiga te feitu tenā, i te taimi eiloa ne oko ei au ki konā, ne foki fakavave au ki toku olaga mua.

I te aso e tasi, ne fetaui au mo se Molimau telā ne tufatufa ne ia a mekesini ko Te Faleleoleo Maluga mo te Awake! i te auala e tokouke a tino kae fakalavelave o Lonitona. Ne masaua ne au taku tautoga ne fai ki a Annunziato, ne fakamolemole atu ei au ki te Molimau me mafai o fai taku akoga faka-te-Tusi Tapu.

Ne ofo masei eiloa au i aku mea ne tauloto mai loto i te Tusi Tapu. E pelā mo te otia o toku loto i pati kolā e maua i te 1 Ioane 1:9, telā e faipati mai e uiga ki te Atua: “Kafai e fakaasi ‵tonu atu ne tatou a ‵tou agasala, e fakamaoni eiloa a ia kae e amiotonu ke fakamagalo ne ia a ‵tou agasala.” Ne lasi ‵ki te fakamalosiga o te fuaiupu tenā ki a au me ne maua ne au se lagonaga lailai ona ko toku olaga. Ne kamata o kau atu au ki fakatasiga i te Fale Tapuaki o Molimau a Ieova. Ne fakafetaui mai a Molimau mo te atafai ki a au. I te taimi ne lavea ne au te ‵pili o te lotou va fakataugasoa—se mea ko leva ne manako malosi au ki ei—ne manako au ke aofia i te lotou fakapotopotoga telā e fai pelā me se kāiga.

E tiga eiloa ne faigofie ki a au a te tiakina o vailakau tapu mo toku olaga finalalolagi, ne faigata eiloa ki a au ke ‵fuli aku amioga. Ne lavea ne au me ne ‵tau o fakaasi atu ne au te āva mo te atafai ki tino. A ko te ‵tonuga loa, koi taua eiloa au ki oku nisi uiga ma‵sei. Kae fakatasi mo te fesoasoani o Ieova ne mafai o gasolo au ki mua i aku taumafaiga. I loto i se ono masina ne kamata ei o tauloto au ki te Tusi Tapu, ne papatiso au e pelā me se tokotasi o Molimau a Ieova. A te tausaga tenā ko te 1997.

TE AUALA NE MAUA EI NE AU A MEA AOGA:

Mai tua ifo a taku papatisoga, ne avaga au ki se tamafine e igoa ki a Barbara telā ne toa fai mo fai se Molimau a Ieova. I te taimi ne lavea ne se tokotasi o oku taugasoa a te lasi o te ‵fuliga ne fai ne au, ne kamata foki tou tagata o sukesuke ki te Tusi Tapu. Fakamuli ifo, ne fai a ia mo tena tuagane mo fai ne Molimau. Ne kamata foki a te taina o toku tupuna fafine telā ko silia mo te 80 tausaga tena matua, o sukesuke kae ne papatiso tou fafine a koi tuai o mate.

Ko tavini atu nei au e pelā me se toeaina i taku fakapotopotoga, a māua mo taku avaga ne tino talai tumau, kae e fesoasoani atu māua o akoako atu a te Tusi Tapu ki tino kolā e faipati faka-Italia i Lonitona. I nisi taimi, e loto vāivāi au ona ko toku olaga mua, kae ne lasi ‵ki te fesoasoani o Barbara ki a au. Ko maua nei ne au se olaga faka-te-kāiga fiafia telā ne manako malosi au ki ei, kae ko maua foki ne au se Tamana alofa telā ne manako faeloa au ki ei. Ne fakamolemole au ki te Atua mō se tausaga e tasi o te filemu mo te fiafia, kae ne tuku mai ne ia a mea e uke atu!

Ko maua nei ne au se olaga faka-te-kāiga fiafia telā ne manako malosi au ki ei, kae ko maua foki ne au se Tamana alofa telā ne manako faeloa au ki ei

^ pala. 10 Ke onoono ki te mataupu “E ‵Fuli ne te Tusi Tapu a Olaga o Tino—Ne Seki Fano Au ki se Koga e Aunoa mo Taku Fana,” ne fakamatalagina ne Annunziato Lugarà i te lōmiga o Te Faleleoleo Maluga o Iulai 1, 2014, i te itulau e 8-9.