A TE LOGO‵MAE ONA KO TE GALO ATU O SE TINO PELE I TE MATE SE TASI O MATAUPU E LASI TE SUKE‵SUKE KI EI FAKAMULI NEI. Kae e pelā mo te mea ne fakaasi atu muamua, a te ‵toe manatu fesoasoani ‵lei e fetaui ‵lei faeloa mo te poto telā e maua i te Tusi Tapu. E fakasino atu loa te mea tenei ki te ‵lei o te takitakiga mai te Tusi Tapu. Kae e uke atu a nisi manatu fesoasoani aoga e maua i te Tusi Tapu. E maua i ei a fakamatalaga kolā e se mafai o maua i se isi koga aka, kae e mafai o maua mai i ei a fakamafanafanaga sē fakanafagina mō tino kolā e fanoa‵noa.

• Fakatalitonuga me i ‵tou tino pele kolā ko ‵mate atu e se logo‵mae

  “Kae ko tino ‵mate e seai eiloa se lotou mea e iloa,” ko pati a te Tusi Tapu i te Failauga 9:5. Ka “fakagata i ei [olotou] mafaufauga.” (Salamo 146:4) E tonu eiloa te mea tenei, me e fakatusa ne te Tusi Tapu a te mate ki te moe filemu.—Ioa. 11:11.

• A te talitonu malosi e uiga ki te Atua alofa e aumai ne ia a fakamafanafanaga

  E fai mai te Tusi Tapu i te Salamo 34:15: “A mata o Ieova * e kilo atu ki tino amio‵tonu, kae ko ana taliga e fakalogologo ki olotou ‵tagi mō se fesoasoani.” A te fakaasi atu o ‵tou lagonaga ki te Atua e auala i ‵talo, e sili fakafia atu i te ‵lei i lō a fakamafanafanaga e maua ne tatou mai te faipati atu ki se tino, io me se auala ke pule faka‵lei atu ki mea e mafau‵fau tatou ki ei. E mautinoa eiloa me e fesoasoani mai ke ati aka ne tatou se fesokotakiga totino mo te ‵tou Mafuaga, telā e mafai o fakaaoga tena malosi ke fakamafanafana i ei tatou.

• Olioli ki se olaga ‵lei i aso mai mua

  Ke fakaataata aka la se taimi i aso mai mua māfai ko toe‵tu mai a tino ‵mate i loto i tanuga ki te ola i te lalolagi nei! E faipati faeloa te Tusi Tapu ki te taimi tenā. Mai te fakamatala mai te vaegā fakanofonofoga i luga i te lalolagi, e fai mai te Tusi Tapu me i te Atua “ka ‵solo kea‵tea ne ia a loimata katoa mai i [‵tou] mata, kae ka se toe ai se mate, ka se toe ai foki se fanoanoa, se tagi io me se ‵mae. Ko palele atu a mea mua.”—Fakaasiga 21:3, 4.

A te tokoukega kolā e tali‵tonu ki a Ieova, te Atua ne aumai ne ia te Tusi Tapu, e mafai eiloa o kufaki i te fanoanoa mai te tali‵tonu ki te fakamoemoega ke toe fetaui mo olotou tino pele kolā ko oti ne ‵mate atu. E pelā me se fakaakoakoga, ne fai mai a Ann, telā ne galo atu tena avaga kae ko 65 ana tausaga, penei: “E fakatalitonu mai te Tusi Tapu ki a au me i ‵tou tino pele e se logo‵mae kae ka toe faka‵tu aka ne te Atua a latou katoa kolā e masaua ne ia. E masaua faeloa ne au a manatu konei māfai ko kamata o mafaufau au ki taku avaga pele telā ko galo atu, kae ko te ikuga, ko mafai nei ne au o kufaki i te ‵toe mea masei tenei ne tupu ki a au!”

A Tiina, telā ne taku atu muamua i te fakasologa o mataupu konei, e fai mai penei: “Talu mai te taimi ne mate i ei a Timo, ne lagona ne au te fesoasoani o te Atua. Ne lagona ne au te lima fesoasoani o Ieova i taimi o oku puapuaga. Kae ne fai eiloa te folafolaga i te Tusi Tapu e uiga ki te toetuga e pelā me se mea tonu ki a au. Ne fakamalosi ne ia au ke tumau i te gasolo ki mua ke oko eiloa ki te aso ka toe fetaui ei au mo Timo.”

E masaua faeloa ne te fia miliona o tino kolā e tali‵tonu ki te fakatuagagina o te Tusi Tapu a lagonaga konei. Kafai foki loa e mafaufau koe me e se ‵tonu a fakamatalaga a te Tusi Tapu io me se moemiti fua, e ‵tau eiloa o fai ne koe se sukesukega ki fakamaoniga me i pati fakatonutonu mo folafolaga e maua i ei e fakatalitonugina. E mafai eiloa o kilo atu koe ki te Tusi Tapu e pelā me ko te ‵toe fesoasoani sili mō latou kolā e fanoa‵noa.

Ke onoono ki nisi vitio kolā e fetaui ‵lei i te motou fakatuatusi ko te jw.org

 SE A TE TULAGA O TINO ‵MATE?

E FIAFIA KOE KI TALA ‵LEI?