A tāgata a‵vaga mo fāfine a‵vaga kolā e tausi ki olotou feagaiga i te taimi ne a‵vaga ei latou e ‵kilo atu ki ei e pelā me se fesokotakiga telā e tumau faeloa, telā e ati aka ei se vā fealofani i te vā o lāua. E tali‵tonu lāua me ka āva te tino ki te suā tino ki te lā feagaiga tenā, ke oko foki eiloa ki taimi faiga‵ta.

Nisi tauavaga ne faimālō atu fua ke ‵nofo tasi ona ko fakamalosiga mai i olotou kāiga, taugasoa mo tino. Kae e ui i ei, a te mea telā e tāua atu, ko te lagonaga telā e maua mai i te feagaiga ne fai telā e fakavae mai i te alofa mo te āva o te tino ki te suā tino.

FAKATAKITAKIGA MAI TE TUSI TAPU: “Kae e se ‵tau o tiaki ne te tagata tena avaga.”—1 Kolinito 7:11.

“Kafai ko oti ne fai ne koe tau feagaiga i te avaga, ko talia eiloa ne koe a so se losiga ‵se e fai atu ki a koe. Ke vave o fakamagalo kae fakatoese atu. E kilo atu koe ki fakalavelave e pelā me ne mea faiga‵ta, kae e se pelā me se pogai ke nofo mavae‵vae koulua.”—Micah.

I te taimi e fe‵paki ei mo fakalavelave, e masani sāle o fai atu a taki tauavaga kolā e seai ne feagaiga ne fai ne latou, penei, ‘Kāti māua ne seki ‵tau o avaga’ kae ‵sala atu ki auala kolā ke tala aka ei te avaga.

“Tokoukega o tino e a‵vaga me mafau‵fau latou me e isi se ‘suā palani mai tua māfai e se manuia latou’—ko te ‵talaga o te avaga. Ko leva eiloa ne mafau‵fau latou me kafai ko oti ne a‵vaga e mafai faeloa o ‵tala te avaga, tela la a olotou feafaiga ne fai ne ‵se faeloa mai i te kamataga.”—Jean.

KE TOFOTOFO AKA KOE KI EI

Kafai koulua e kinau. . .

• E mata, ka salamo koe me ne avaga koe ki tou soa?

• E mata, e mafaufau sāle koe me moi penei e avaga koe mo te suā tino?

• E mata, e fai atu ne koe a pati penei, “Ka tiakina ne au a koe” io me “Au ka fano o ‵sala se tino telā e alofa mai ki a au”?

Kafai tau tali se ao ki se fesili e tasi io me uke atu mai luga nei, tenei eiloa te taimi ke fakamalosi aka tau feagaiga ne fai.

KE SAU‵TALA KI EI FAKATASI MO TAU AVAGA

• E mata, te malosi o te feagaiga ne fai ne tāua i te taimi ne avaga ei ko gasolo o matafitafi atu? Kafai e penā eiloa, kaia la?

• Ne a mea e mafai o fai nei ko te mea ke fakamalosi aka te feagaiga ne fai ne tāua?

NISI MANATU FESOASOANI

• E mafai o tusi atu ne koe se tusi ki tau avaga ke fakaasi atu ei tou alofa ki a ia

• Fakamalosi aka te lua feagaiga mai te faka‵tu ne ata o tau avaga i luga i tau taipola i tou koga galue

• Ke telefoni atu ki tau avaga i aso katoa mai i tou koga galue io me māfai e nofo atu koe i se koga ‵mao

FAKATAKITAKIGA MAI TE TUSI TAPU: “Tela la, a lāua kolā ko oti ne fakatasi ne te Atua e se mafai eiloa o ‵tala ne se tino.”—Mataio 19:6.