Te tali mai te Tusi Tapu

 Ikai, a te Malo o te Atua e sē se mea fua telā e maua i loto o Kelisiano. a E fakaasi mai i te Tusi Tapu a te koga e tu i ei me e fakasino atu ki ei e pelā me ko “te Malo o te lagi.” (Mataio 4:​17, Tusi Tapu, Tuvalu) Mafaufau ki te auala e fakaasi mai ei ne te Tusi Tapu me se pulega tonu, telā e pule mai i te lagi.

•   A te Malo o te Atua e isi ne ana tino pule, tino kolā e pule atu ki ei, tulafono, mo fakatonuga ne fakatoka ke fai te loto o te Atua i te lagi mo te lalolagi.​—Mataio 6:​10; Fakaasiga 5:​10.

•   A te pulega, io me ko te Malo o te Atua, ka pule atu ki “tino, atufenua mo ‵gana katoa” i te lalolagi. (Tanielu 7:​13, 14) E maua eiloa te malosi o te lotou pulega mai te Atua, kae e se mai tino kolā e pule atu latou ki ei​—Salamo 2:​4-6; Isaia 9:7.

•   Ne fai atu a Iesu ki ana apositolo fakamaoni me ka ‵kau fakatasi latou i te Malo i te lagi “kae sagasaga i nofogaaliki.”​—Luka 22:28, 30.

•   E isi ne fili o te Malo, kolā ka fakaseai atu ne ia.​—Salamo 2:​1, 2, 8, 9; 110:​1, 2; 1 Kolinito 15:25, 26.

 E se akoako mai te Tusi Tapu me i te Malo o te lagi se mea i tou loto telā e fakauiga me ko pule atu ki te loto o se tino. Kae e fakaasi mai i ei me i te “muna e uiga ki te Malo” io me ko “te tala ‵lei tenei o te Malo” e mafai kae e ‵tau foki o pokotia i ei ‵tou loto.​—Mataio 13:19; 24:14.

Se a te mea e fakauiga ki ei me i “te malo o te Atua tenā eiloa i loto i a koutou”?

 Ne ‵numi a nisi tino e uiga ki te koga e tu i ei te Malo mai te ‵fuliga o te Luka 17:21 i nisi Tusi Tapu. E pelā mo te Tusi Tapu Tuvalu, e fai mai i ei me i “te malo o te Atua tenā eiloa i loto i a koutou.” Ke malamalama tonu tatou i te uiga o te fuaiupu tenei, e ‵tau o mafau‵fau tatou ki te mataupu kātoa.

 Ne faipati atu a Iesu ki te kau Falesaio, se potukau o takitaki lotu kolā ne ‵teke atu kae taumafai ke tamate a ia. (Mataio 12:14; Luka 17:20) E mata, se mea ‵lei ke mafaufau me i te Malo se mea e maua i olotou loto ma‵keke? Ne fai atu a Iesu ki a latou: “I loto i a koutou e ‵fonu i te ‵pelo mo amioga solitulafono.”​—Mataio 23:27, 28.

 E ‵fuli tonu mai ne nisi Tusi Tapu a pati a Iesu i te Luka 17:21, penei: “A te malo o te Atua tenā e ‵nofo mo koutou.” (I a matou a mataimanu ‵kese; Contemporary English Version) “A te Malo o te Atua tenā e ‵nofo tasi mo koutou.” (Te ‵Fuliga a te Lalolagi Fou, fakamatalaga mai lalo) A te Malo o te lagi ne ‵nofo “mo” io me “‵nofo tasi” mo te kau Falesaio, me i a Iesu, te tino ne ‵tofi aka ne te Atua ke fai mo Tupu, ne tu atu i mua o latou.​—Luka 1:​32, 33.