Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Wukani!  |  Na. 6 2017

Ivyo ŵasayansi ŵakuyowoya kuti charu chimarenge mbutesi chifukwa Chiuta walayizga kuti vinthu viŵenge makora kunthazi

 NKHANI YA PACHIKOPI | KASI CHARU CHILI PAFUPI KUMARA?

Kasi Charu Chili Pafupi Kumara?—Kasi Baibolo Likuti Wuli?

Kasi Charu Chili Pafupi Kumara?—Kasi Baibolo Likuti Wuli?

VINTHU vyakofya ivyo vikuchitika mazuŵa ghano vikayowoyekerathu mu Baibolo. Ndipouli Baibolo likuyowoyaso kuti panthazi apa vinthu viŵenge makora chomene. Mbuchindere kususka ivyo Baibolo likuyowoya, chifukwa vyose ivyo likayowoyerathu vikufiskika mazuŵa ghano.

Mwachiyelezgero wonani mauchimi agha:

  • “Pakuti mtundu uzamuwukirana na mtundu unyake, ufumu na ufumu unyake. Kweniso kuzamuŵa njara na vindindindi mu malo na malo.”—Mateyu 24:7.

  • “Kweni umanye ichi, kuti mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa, ŵakutemwa ndalama, ŵakujiŵikamo, ŵakujikuzga, ŵakuyuyura Chiuta, ŵambura kupulikira ŵapapi, ŵambura kuwonga, ŵambura kugomezgeka, ŵambura chitemwa, ŵanonono, ŵakusesa, ŵambura kujikora, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura na kunotha, ŵakutemwa vyakusanguluska m’malo mwa kutemwa Chiuta.”—2 Timote 3:1-4.

Mauchimi agha ghakulongosora umo vinthu viliri mu charu pasono icho ŵanyake ŵakuti chiparanyikenge. Kuyowoya unenesko, charu chanangika nadi nakuti ŵanthu ŵangachinozgaso yayi. Kuyana na ivyo Baibolo likuyowoya, ŵanthu ŵalije nkhongono panji mahara ghakuti ŵasinthire vinthu pa charu. Fundo iyi yikusangika mu malemba agha:

  • “Pali nthowa iyo yikuwoneka yakwenelera kwa munthu, kweni umaliro wake ni nyifwa.”—Zintharika 14:12.

  • “Munthu wakuwusa munyake na kumupweteka.”—Mupharazgi 8:9.

  • “Munthu . . . wangalongozga yayi mendero ghake.”—Yeremiya 10:23.

Para ŵanthu ŵangalutilira kuchita waka chilichose icho ŵakhumba, mbwenu charu chose chingaŵa pangozi yikuru. Kweni ivi vingachitika yayi, chifukwa Baibolo likuyowoya kuti:

  • Chiuta “wakhazika charu chapasi pa malufura ghake. Chisezgekengepo chara pa malo ghake muyirayira swii.”—Salimo 104:5.

  • “Muwiro umoza ukuluta, muwiro unyake ukwiza, kweni charu chapasi chikukhalilira muyirayira.”—Mupharazgi 1:4.

  • “Ŵarunji ŵazamuhara charu chapasi, ndipo ŵazamukhala mwenemumo muyirayira.”—Salimo 37:29.

  • “Muzamuŵa vyakurya vinandi mu charu. Vizamuŵa na pachanya pa mapiri.”—Salimo 72:16.

 Ivyo Baibolo likuyowoya apa ni vyakupulikikwa makora. Ŵanthu ŵazamufwaso yayi chifukwa cha kunangika kwa charu, kusoŵa chakurya na maji panji chifukwa cha matenda. Charu chiparanyikenge na vilwero vya nyukiliya yayi. Chiuta wachitengepo kanthu kuti vinthu viŵe makora. Pasono Chiuta wazomerezga kuti ŵanthu ŵaŵe na wanangwa wakusankha, na kuvuna ivyo ŵamija. (Ŵagalatiya 6:7) Charu chili nga ni tireni iyo yikutondeka kuyima chifukwa chakuti yili pa sipidi yakofya yayi. Charu chinangikirengethu yayi chifukwa Chiuta wali kuŵaŵikira mphaka ŵanthu.—Salimo 83:18; Ŵahebere 4:13.

Chiuta wachitengepo kanthu. Wazamwiziska “mtende ukuru.” (Salimo 37:11) Vinthu viwemi ivyo vyayowoyeka mu nkhani iyi ni vimoza mwa vinthu vichoko waka ivyo Ŵakaboni ŵa Yehova ŵanandi ŵakulindizga.

Ŵakaboni ŵa Yehova ŵali pa charu chose chapasi ndipo ŵakufuma mu mitundu yose. Ŵakusopa Chiuta waunenesko yekha, uyo Baibolo likuti zina lake ni Yehova. Ŵakufipa mtima yayi na vyamunthazi chifukwa Baibolo likuti : “Ichi ndicho Yehova wakuyowoya, Mlengi wa kuchanya, Chiuta waunenesko, mweneuyo wakawumba charu chapasi, wakachipanga na kuchikhozga, uyo wakachilenga waka yayi, kweni wakachipanga kuti ŵanthu ŵakhalengemo, wakuti: “Ine ndine Yehova, kulije munyake.’”—Yesaya 45:18.

Nkhani iyi yalongosora vinyake mwa ivyo Baibolo likusambizga pa nkhani ya ivyo vichitikirenge charu na ŵanthu. Kuti mumanye vinandi, wonani sambiro 5 mu kabuku ka Chiuta Wakutiphalira Uthenga Uwemi! Kabuku aka kakupharazgika na Ŵakaboni ŵa Yehova ndipo kakusangikaso pa www.jw.org

Mungawoneleraso vidiyo ya mutu wakuti Chifukwa Wuli Chiuta Wakalenga Charu? Vidiyo iyi yikusangikaso pa www.jw.org. (Wonani pa MABUKU > MAVIDIYO)