Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Wukani!  |  Na. 6 2017

Zina la Chiuta mu vilembo Vyachihebere likasangikanga mu mipukutu yinandi ya Baibolo

 IVYO BAIBOLO LIKUYOWOYA PA NKHANI YA

Zina la Chiuta

Zina la Chiuta

Ŵanthu ŵanandi para ŵakuyowoya na Chiuta, ŵakuzunura mazina ghaudindo nga lakuti Fumu, Wamuyirayira, Allah panji Chiuta. Ndipouli, Chiuta wali na zina. Kasi mukwenera kulizunura?

Kasi zina la Chiuta ni njani?

IVYO ŴANTHU ŴANYAKE ŴAKUYOWOYA

 

Ŵanthu ŵanandi awo ŵakuti Mbakhristu, ŵakugomezga kuti zina la Chiuta ni Yesu. Kweni ŵanyake ŵakuti pakuti Chiuta Wankhongono zose njumoza pera, ipo ntchakwenelera yayi kuzunura zina lake. Kweniso ŵanyake ŵakususka kuti ŵanthu ŵazunurenge zina la Chiuta.

IVYO BAIBOLO LIKUYOWOYA

 

Zina la Chiuta Wankhongono zose ni Yesu yayi, chifukwa Yesu ni Chiuta Wankhongono zose yayi. Nakuti Yesu wakaphalira ŵalondezgi ŵake kuti ŵalombenge kwa Chiuta kuti: “Adada, zina linu lituŵiskike.” (Luka 11:2) Yesu nayo wakalomba kwa Chiuta, wakati: “Adada, chindikani zina linu.”Yohane 12:28.

Chiuta wakuti: “Ine ndine Yehova. Ili ndilo zina lane, uchindami wane nkhupeleka kwa munyake chara.” (Yesaya 42:8) Zina lakuti “Yehova” lili kufuma ku vilembo vinayi Vyachihebere (YHWH) ivyo vikwimira zina lake. Mu Malemba Ghachihebere *, zina ili likusangika mu malo ghakujumpha 7,000. Zina ili likusangika mu malo ghanandi chomene kuluska mazina ghanyake nga “Chiuta,” “Wankhongono zose,” “Fumu,” panji mazina gha ŵanthu nga ni Abrahamu, Mozesi na Davide.

Mu Baibolo, palije apo Yehova wakuti tingazunuranga yayi zina lake. M’malo mwake, Malemba ghakulongora kuti ŵateŵeti ŵa Chiuta ŵakalizunuranga zina ili. Mazina ghanyake agho ŵakathyanga ŵana ŵawo, ng’anamuro lake likayowoyanga za Yehova. Mwachiyelezgero, zina lakuti Eliya likung’anamura kuti “Chiuta Wane Ni Yehova,” ndipo zina lakuti Zekariya likung’anamura kuti “Yehova Wanikumbuka.” Kanandi ŵakazunuranga zina lakuti Yehova para ŵakudumbiskana nkhani zinyake.—Rute 2:4.

Chiuta wakukhumba kuti tizunurenge zina lake. Baibolo likutichiska kuti ‘tiwongenge Yehova na kuchema pa zina lake.’ (Salimo 105:1) Yehova wakukondwa chomene na wose awo “ŵakughanaghanira zina lake.”—Malaki 3:16.

“Ŵanthu ŵamanye kuti imwe, mwaŵeneimwe zina linu ni Yehova, ndimwe mwekha Wapachanya Nkhanira pa charu chose chapasi.”—Salimo 83:18.

 Kasi zina la Chiuta likung’anamurachi?

Ŵakaswiri ŵanyake ŵakugomezga kuti mu Chihebere zina lakuti Yehova likung’anamura kuti “Wakuchitiska Kuŵako.” Ng’anamuro la zina ili likulongora kuti Yehova wangachita chilichose panji wangagwiliskira ntchito chilengiwa chake kuti wafiske khumbo lake. Ni Yehova pera, Mlengi Wankhongono zose uyo wangachita ivi.

UWEMI WAKUMANYA ZINA LA YEHOVA

 

Para mwamanya zina la Chiuta vingamovwirani kuti mumuwonenge mwakwenelera. Chizamumuŵirani chipusu kusendelera kwa iyo na kuŵa nayo paubwezi. Nakuti vingachitika yayi kuti munthu waŵe paubwezi na munthu uyo wakumumanya yayi. Pakuti Chiuta wali kutiphalira zina lake, ipo wakukhumba kuti timumanye na kusendelera kwa iyo.—Yakobe 4:8.

Para mwamumanya makora, muzamuwona kuti Yehova nyengo zose wakuchita vinthu kuyana na ng’anamuro la zina lake. Lekani Baibolo likuyowoya kuti: “Awo ŵakumanya zina linu ŵamuthembaninge.” (Salimo 9:10) Muzamwamba kumuthemba para mwamanya kuti zina la Yehova likukolerana na makhaliro ghake nga nkhugomezgeka, lusungu, chiwuravi, na urunji. (Ekisodo 34:5-7) Ntchakukondweska chomene kumanya kuti para Yehova wakufiska ivyo walayizga, wakuchitaso kuyana na makhaliro ghake.

Nadi, ni mwaŵi ukuru chomene kumanya zina la Chiuta Wankhongono zose. Lingamovwirani kuti mutumbikike sono kweniso munthazi. Chiuta wakulayizga kuti: “Nimuvikilirenge chifukwa wakumanya zina lane.”—Salimo 91:14.

“Waliyose uyo wakuchema pa zina la Yehova wazamuponoskeka.”—Joyeli 2:32.

Zina la Chiuta mu viyowoyero vyakupambanapambana

^ ndime 9 Mu Mabaibolo ghanandi, ŵali kuwuskamo zina la Chiuta na kuŵikamo zina laudindo lakuti “FUMU,” ndipo ŵakulilemba mu vilembo vikuruvikuru. Kweni ŵanyake ŵakulemba zina la Chiuta ili mu mavesi ghachoko waka panji mu mazgu ghamusi. Mu Baibolo la Malemba Ghakupatulika mu Mang’anamuliro gha Charu Chiphya ŵali kuwezgeramo zina la Chiuta mu malo ghake.