Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Wukani!  |  Na. 4 2016

Tunyumba twakuchemeka yurts mu Dambo la Tash Rabat

 VYARU NA ŴANTHU

Charu cha Kyrgyzstan

Charu cha Kyrgyzstan

CHARU cha Kyrgyzstan chili ku Central Asia ndipo chili kupakana na charu cha Kazakhstan, Uzbekistan, Tajikistan, na China. Chili na mapiri ghanandi agho kanandi ghakuŵa na chiwuvi tuu. Chigaŵa chikuru chomene cha charu ichi ntchamapiri. Charu cha Kyrgyzstan chili na mapiri gha Tian Shan, agho ngakutumphuka mamita 7,439. Chigaŵa icho chili na makuni ntchichoko chomene mu charu ichi. Ntheura ntchakuzizika kuti ku Kyrgyzstan ndiko kuli thengere likuru chomene pa charu chapasi la skaŵa zamuthondo zakuchemeka walnut.

Ŵakaboni ŵa Yehova ŵakusambizga ŵanthu ŵanandi Baibolo mu Kyrgyzstan

Ŵanthu ŵa ku Kyrgyzstan ŵakutemwa kupokelera ŵalendo ndipo mbantchindi. Pakuyowoya na munthu mulara ŵakuti “imwe” ndipo ŵakumulekera malo para ŵali mu basi panji matola. Kweniso pa nyengo ya chakurya, ŵakumukhalika pa malo ghakuzirwa.

Ŵanthu aŵa ŵakutemwa kuŵa na ŵana ŵatatu panji kujumphirapo. Kanandi mwana mwanalume muchoko chomene pa wose ndiyo wakukhala na ŵapapi  ŵake, nanga wangatora. Wakuŵapwelelera mu uchekuru wawo wose.

Ŵasungwana ŵakusambizgika tumaluso utu na utu kufuma pa wanichi kuti ŵazakaŵe ŵanakazi ŵawemi pa nyumba zawo. Para ŵafika vyaka 15 panji 16 ŵakuŵa kuti ŵakumanya makora chomene kupwelelera pa nyumba. Para msungwana wakutengwa ŵakumunozgera vyawanangwa vinandi. Ŵakumupa vyakugonera vyakupambanapambana, vyakuvwara, na makalipeti agho ŵakuluka. Mwanalume wakupeleka maloworo, ndipo wangapeleka ndalama panji viŵeto.

Pa vikondwelero na pa nyifwa, ŵakukoma mberere panji hachi. Nyama iyi ŵakuyidumura mapisimapisi, ndipo munthu waliyose ŵakumupa pisi ilo likumwenelera. Mulendo waliyose wakupika pisi lake kuyana na msinkhu kweniso udindo wake. Ŵakuchita nthena chifukwa cha ntchindi. Chakurya icho ŵanthu ŵanandi ŵakutemwa kurya chikuchemeka beshbarmak.

Komuz ntchakwimbira chakumanyikwa chomene