CHARU cha Spain chili na ŵanthu ŵakupambanapambana. Chigaŵa chikuru cha charu ichi chili na minda ya tirigu, mpheska, na makuni gha maolive. Kumwera kwa charu ichi kuli nyanja iyo yikugaŵa charu ichi na Africa pa mtunda wa makilomita 14.

Ŵagiriki na ŵanthu ŵanyake ŵa ku Fonike na Carthage ŵakasamukira mu charu ichi. Ŵaroma ŵathereska malo agha cha m’ma 300 B.C.E, ndipo ŵakaghathya kuti Hispania. Pamasinda, ŵanthu ŵa mtundu wa Visigoth na Moors ndiwo ŵakamba kukhala ku mu malo agha, ndipo ŵakaleka mitheto yawo.

Mu 2015 ŵanthu ŵakujumpha 68 miliyoni ŵakafikako ku Spain. Ŵanandi ŵakizanga ku charu ichi chifukwa cha kukopeka na nyanja zakutowa, kweniso kukawona vinthu  vyakale na vinyake. Ŵalendo ŵanandi ŵakukopeka na chakurya. Vinyake mwa vyakurya ivyo vikusangika ku malo agha ni somba na vinyake vya mu nyanja, nyama yakunozgeka mwapadera, saladi na mphangwe iyo ŵakuphikira mafuta ya olive. Vyakurya vya ku Spain nga ni omelet, paella, na tapas ni vyakumanyikwa pa charu chose chapasi.

Ŵanandi ŵakutemwa chakurya cha Mariscada

Ŵanakazi ŵakuvina flamenco

Ŵanthu ŵa ku Spain ŵakumanyikwa na kupokelera ŵalendo. Ŵanandi mu cha charu ichi Mbakatolika, ndipouli mbachoko chomene awo ŵakuchita Misa. Ŵanthu ŵanyake ŵa ku Africa, Asia, na Latin America ŵasamira ku Spain. Ŵanandi mwa ŵanthu aŵa ŵakutemwa kuphalira ŵanyawo mitheto na ivyo ŵakugomezga. Ŵakaboni ŵa Yehova ŵakudumbiskana nawo ŵanthu aŵa na kuŵawovwira kumanya ivyo Baibolo likusambizga pa nkhani zinandi.

Mu chaka cha 2015, Ŵakaboni ŵa Yehova ŵakujumpha 10,500 ŵakajipeleka kuzenga na kunozga malo 70 ghakusoperako agho ghakumanyikwa kuti Nyumba za Ufumu. Ndipo boma likupeleka malo kwa Ŵakaboni ŵa Yehova mwawanangwa kuti ŵazengenge malo ghakusoperako. Ŵakaboni ŵa Yehova ku Spain ŵakuchita maungano ghawo mu viyowoyero vyakujumpha 30 kuti ŵawovwire ŵanthu awo ŵakusamukira mu charu ichi. Mu 2016 ŵanthu ŵakujumpha 186,000 mu charu ichi ŵakasangika pa ungano wapadera wa Ŵakaboni ŵa Yehova kuti ŵakumbukire nyifwa ya Yesu Khristu.