Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

WUKANI! NA. 1 2017

“Tikakondwa Chomene na Chitemwa Icho Ŵakatilongora”

“Tikakondwa Chomene na Chitemwa Icho Ŵakatilongora”

PA Chisulo, Epulero 25, 2015, chindindindi chankhongono chomene chikasunkhunya charu cha Nepal, icho chili kumpoto kwa India. Chindindindi ichi chikasunkhunya chomene msumba wa Kathmandu. Ndipo chikakoma ŵanthu ŵakujumpha 8,500. Aka kakaŵa kakwamba kuti ŵanthu ŵanandi ŵafwe nthena ku Nepal. Nyumba zakujumpha 500,000 zikasakazikirathu. Ku Nepal kuli Ŵakaboni ŵa Yehova 2,200 ndipo ŵanandi ŵakakhalanga ku malo agha. Kaboni yumoza na ŵana ŵake ŵaŵiri ndiwo ŵakafwa pa nyengo iyi.

Kaboni wa Yehova munyake zina lake Michelle wakati: “Apo chindindindi chikachitikanga, Ŵakaboni ŵa Yehova ŵanandi ŵakaŵa ku maungano ghawo. Chichitikenge pa nyengo ya maungano yayi, mphanyi Ŵakaboni ŵa Yehova ŵanandi ŵakafwa.” Chifukwa wuli awo ŵakaŵa ku maungano ŵakapona? Chifukwa ntchakuti Nyumba za Ufumu zikuzengeka zakukhora.

“PASONO ŴAMANYA UWEMI WAKE”

Ku Nepal Ŵakaboni ŵa Yehova ŵakuzenga Nyumba za Ufumu zakukhora chomene kuti vindindindi vileke kuwiska. Man Bahadur uyo wakuzengako Nyumba za Ufumu wakati: “Ŵanthu ŵakafumbanga chifukwa icho tikuzengera fawundeshoni zakukhora chomene, kweni pasono ŵamanya uwemi wake.” Chindindindi chikati chachitika, Nyumba za Ufumu zikazomerezgeka kusungiramo ŵanthu. Nangauli yikaŵa nyengo yakusuzga, kweni Ŵakaboni ŵa Yehova na ŵazengezgani ŵawo ŵakaŵa na pakukhala.

Ŵakaboni ŵa Yehova na ŵazengezgani ŵawo ŵasanga malo ghakukhala mu Nyumba ya Ufumu

Mwaluŵiro, ŵalara Ŵachikhristu ŵakawoneseska kuti waliyose walipo. Kaboni wa Yehova munyake zina lake Babita wakati: “Ŵalara ŵakaŵika mtima chomene kuti ŵapwelelere Ŵakhristu ŵanyawo. Tikakondwa chomene chifukwa cha chitemwa chawo.” Pakati pajumpha zuŵa limoza kufuma apo ivi vikachitikira, Ŵakhristu ŵatatu ŵa mu komiti iyo yikulaŵilira ntchito ya Ŵakaboni ŵa Yehova ku Nepal na Ŵakhristu ŵanyake awo ŵakwendera mipingo, ŵakamba kwendera mipingo kuti ŵamanye awo ŵakukhumbikwira wovwiri.

Gary Breaux, wiza ku Nepal kufuma ku likuru la Ŵakaboni ŵa Yehova kuzakawona ŵanthu awo ŵakhwaskika na chindindindi

Pati pajumpha mazuŵa 6 kufuma apo chindindindi ichi chikachitikira, Gary Breaux na muwoli wake Ruby ŵakiza ku Nepal kufuma ku likuru la Ŵakaboni ŵa Yehova ku United States. Reuben yumoza mwa awo ŵali mu komiti yakulaŵilira ntchito ya Ŵakaboni ŵa Yehova ku Nepal, wakati: “Tikakayikanga usange Breaux wafikenge nadi chifukwa chakuti tuvindindindi tukaŵa kuti tuchali kuchitika ku Kathmandu. Kweni wakakhumbisiska kuti wafike ku Nepal ndipo wakafika nadi. Ŵakaboni ŵa Yehova ŵakakondwa chomene Gary Breaux wati wafika.”

‘UBWEZI WITHU UKAKHORA’

Silas uyo wakugwira ntchito pa ofesi ya Ŵakaboni ŵa Yehova ku Nepal wakati: “Mafoni ghati ghambaso kukora, tikamba kwimbirana na ŵabali ŵithu muhanya na usiku wuwo. Ŵakaboni ŵanyithu ŵa mu vyaru vinyake nawo ŵakatifipiranga mtima. Nangauli tikapulikanga yayi ivyo ŵakayowoyanga, kweni mazgu ghawo ghakalongoranga kuti ŵakutitemwa chomene ndipo ŵakaŵa ŵakukhumbisiska kutovwira.”

Ŵakaboni ŵa Yehova ŵa ku Europe awo ni madokotala ŵakovwira ŵanyawo ku Nepal

Ŵakaboni ŵa Yehova ŵakizanga na vyakurya ku Nyumba za Ufumu kuti ŵawovwire ŵanyawo awo ŵalije. Kweniso Komiti Yakovwira pa Nyengo  ya Suzgo yikakhazikiskika ndipo tikamba kupokera katundu munandi chomenechomene kufuma ku Bangladesh, India, na Japan. Kweniso madokotala ghankhondi agho Mbakaboni ŵa Yehova ŵakafika mu Nepal ndipo ŵakamba kugwira ntchito yawo pa Nyumba ya Ufumu yinyake. Mwaluŵiro, ŵakamba ntchito yawo yakovwira ŵanthu nanga ni awo ŵakaŵa na suzgo la maghanoghano.

Mwanakazi munyake zina lake Uttara wakalongosora umo ŵanthu ŵanandi ŵakajipulikiranga pa nyengo iyi. Iyo wakati: “Chikaŵa chindindindi cha maseŵera chaa! Kweni mu nyengo yichoko waka, tikamba kujipulika kuti tili nadi banja limoza lauzimu ilo likutemwana.” Nangauli kukachitika chindindindi chakofya ichi, kweni tikalutilira kutemwa Yehova na kutemwana yumoza na munyake. Kweniso chindindindi ichi chikawovwira kuti tiŵe ŵakukhora na kulutilira kutemwana.

Manyani Vinandi

Kasi Ŵakaboni ŵa Yehova Ŵakovwirapo Para Kwachitika Masoka?

Manyani umo ntchito yakovwira Ŵakaboni ŵa Yehova na ŵanthu ŵanyake yikwendera para kwachitika masoka.