Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA NOVEMBER 2015

Kasi Mukumanya?

Kasi Mukumanya?

Chifukwa wuli Yosefe wakameta dankha pambere wandalute kukawonana na Faro?

Chithuzithuzi cha munthu wakumeta mu Eguputo wakale

Buku la Genesis likutiphalira kuti Faro wakachemeska Yosefe kufuma mu jele mwaluŵiro. Faro wakakhumbanga kuti Yosefe wamuphalire ng’anamuro la maloto agho ghakamusuzganga. Yosefe wakakhala mu jele vyaka vinandi. Faro wakakhumbanga kuti Yosefe wize luŵiro, kweni Yosefe wakachedwerako kuti wamete dankha. (Genesis 39:20-23; 41:1, 14) Uyo wakalembanga nkhani iyi wakwenera kuti wakamanyanga makora ivyo Ŵaeguputo ŵakachitanga. Lekani wakalemba mazgu ghakuti Yosefe wakameta dankha. Kweni fundo iyi ŵanyake ŵangawona nga njambura kuzirwa.

Mitundu yinandi yakale, kusazgapo Ŵahebere, yikasunganga mwembe. Kweni buku linyake likuti ‘Ŵaeguputo pera ndiwo ŵakakanizganga kusunga mwembe.’

Kasi Yosefe wakameta mwembe pera? Magazini yinyake yikusachizga kuti mitheto yinyake ya Ŵaeguputo yikatenge munthu wakwenera kunozgeka kukawonekera pamaso pa Faro nga umo wangachitira pakukanjira mu tempile. Ntheura Yosefe wakenera kumeta thupi lose.

Buku la Milimo likuti awiske Timote ŵakaŵa Ŵagiriki. Kasi ichi chikung’anamura kuti ŵakafuma ku Greece?

Viŵi yayi. Nyengo zinyake mpositole Paulosi wakazunuranga Ŵayuda na Ŵagiriki, panji kuti Ŵahelene. Wakazunuranga Ŵagiriki kwimira ŵanthu wose awo ŵakaŵa Ŵayuda yayi. (Ŵaroma 1:16; 10:12) Chifukwa chake ntchakuti mu malo ghanandi umo Paulosi wakapharazganga, ŵanthu ŵakatolera chiyowoyero na kakhaliro ka Ŵagiriki.

Kasi ŵanthu ŵakale ŵakatenge Mugiriki wakuŵa wuli? M’ma 300 B.C.E., munthu munyake wa ku Ateni wakayowoya kuti kakhaliro ka Ŵagiriki kakathandazgikanga mu charu. Iyo wakati ivi vikachitiska kuti ‘wose awo ŵakaŵa na mwaŵi wakusambirako masambiro gha Ŵagiriki nawo ŵachemekenge Ŵagiriki, nanga ŵangaŵa kuti mba ku Greece yayi.’ Ntheura awiske Timote na ŵanyake awo Paulosi wakaŵachema kuti Ŵagiriki ŵakaŵa Ŵagiriki chifukwa cha kutolera waka kakhaliro ka Ŵagiriki, kuti ŵakababika Ŵagiriki yayi.Milimo 16:1.

Manyani Vinandi

“Pulikani Loto Ili”

Mazuŵa ghano ŵanthu awo ŵali mu mbumba izo muli ŵapapi na ŵana ŵamusangapo ŵangasambirako kanthu ku mbumba yambura kukolerana iyo Yosefe wakakuliramo.

“Mwana Wane Wakutemweka na Wakugomezgeka mu Fumu”

Kasi ntchivichi chikawovwira Timote kuti waleke soni na kuŵa mulaŵiliri muwemi?