Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA OCTOBER 2015

 BAIBOLO LIKUSINTHA UMOYO WA ŴANTHU

Sono Nkhuwona Kuti Ningawovwira Ŵanji

Sono Nkhuwona Kuti Ningawovwira Ŵanji
  • CHAKA ICHO WAKABABIKIRA: 1981

  • CHARU ICHO WAKABABIKIRA: GUATEMALA

  • MBIRI YAKE: VINTHU VYAKOFYA VIKAMUWIRA PA WANICHI

UMO NKHAŴIRA KALE:

Nkhababikira mu tawuni ya Acul, ku mapiri ghakumanjiliro gha dazi kwa Guatemala. Nili wa fuko la Ixil, la ŵanthu ŵakuchemeka Ŵamaya. Nkhuyowoya Chisipanishi, kweniso chiyowoyero chakukwithu. Apo nkhaŵa mwana, mu Guatemala mukaŵa nkhondo ya pa wenenawene iyo yikatora vyaka 36. Ŵanthu ŵakwithu ŵanandi ŵali kufwa pa nkhondo iyi.

Apo nkhaŵa na vyaka vinayi, mukuru wane wa vyaka 7 wakaseŵereskanga bomba, ndipo likaphuntha. Ngozi iyi yili kunikoma maso. Chachitima ntchakuti mukuru wane wakafwira papo. Kufuma apo, nkhamba kukhala ku sukulu ya ŵana ŵachibulumutira mu Guatemala City, ndipo nkhasambira vilembo vya Braille. Ku sukulu kura ŵakanikanizga kuchezga na ŵana ŵanyane ndipo ŵanyane ŵakanigeganga nangauli nkhamanyanga yayi chifukwa chake. Nyengo zose nkhakhalanga waka nekha, ndipo nkhadokeranga kuluta ku holide ya myezi yiŵiri pa chaka kuti nkhachezgenge na amama. Amama ŵakaŵa ŵalusungu. Chachitima ntchakuti ŵakafwa nili na vyaka 10. Mtima wane ukasweka chomene pakumanya kuti nkhataya munthu uyo wakanitemwanga.

Nkhawelera kukaya apo nkhaŵa na vyaka 11, ndipo nkhamba kukhala na mukuru wane mwana wa adada ŵalara. Ŵakanipanga vyose, kweni pakaŵavya uyo wakanipembuzgako. Nyengo zinyake nkhaliranga kwa Chiuta kuti: “Chifukwa wuli amama ŵali kufwa? Chifukwa wuli maso ghane ghali kufwa?” Ŵanthu ŵakaniphaliranga kuti vyose ivi ni khumbo la Chiuta. Ntheura nkhatenge Chiuta ngwankhaza. Mphanyi nkhajikoma, kweni nthowa yakuti nijikomere nkhaŵavya.

Chifukwa chakuti nkhuwona yayi, ŵanthu ŵakanigololeranga na kunichitira nkhaza. Apo nkhaŵa mwana, ŵanthu ŵakanigonapo kanandi. Nkhaphara yayi ku polisi chifukwa nkhawonanga kuti palije uyo wanganovwira. Ŵanthu ŵakayowoyanga nane viŵi yayi, ndipo nkhachezganga na munthu waliyose yayi. Nkhakhalanga waka panekha, ndipo nkhagomezganga munthu yayi.

UMO BAIBOLO LIKASINTHIRA UMOYO WANE:

Apo nkhaŵa na vyaka 13, Ŵakaboni ŵa Yehova ŵaŵiri (pa ufumu na uwoli) ŵakiza kwa ine pa nyengo yakuseŵera ku sukulu. Amadamu  ndiwo ŵakaŵapempha kuti ŵazakachezge nane. Amadamu aŵa ndiwo ŵakanichitiranga chitima. Ŵakaboni ŵakaniphalira ivyo Baibolo likuyowoya vyakuti ŵakufwa ŵazamuwuka kweniso kuti awo mbachibulumutira ŵazamulaŵiskaso. (Yesaya 35:5; Yohane 5:28, 29) Ivyo ŵakanisambizganga vikaŵa viwemi kwa ine, kweni chikaniŵira chakusuzga kuti niyowoyengepo, chifukwa nkhazgoŵera yayi vyakuyowoya. Nangauli nkhakhalanga waka chete, iwo ŵakachita mphwayi yayi, ŵakizanga na kunisambizga Baibolo. Ŵanthu aŵa ŵakendanga mtunda wa makilomita 10 kukwera mapiri kuti ŵakafike uko nkhakhalanga.

Pakuti nkhuwona yayi, mukuru wane wakaniphalira kuti ŵanthu aŵa ŵakuvwara makora nangauli mbasambazi yayi. Nyengo zose ŵanthu aŵa ŵakanipanga vyawanangwa, kulongora kuti ŵakunitemwa. Nkhamanya kuti Ŵakhristu ŵaunenesko ŵekha ndiwo ŵangajipeleka nthena.

Nkhasambira Baibolo na mabuku gha Braille. Nangauli ivyo nkhasambiranga nkhavipulikiskanga, kweni vinthu vinyake nkhavigomezganga yayi. Nkhagomezganga yayi kuti Chiuta wakunitemwa ine panekha kweniso kuti ŵanthu nawo ŵanganitemwa nga ndiyo. Nkhapulikiska chifukwa icho Chiuta wazomerezgera uheni, kweni vikanisuzga kugomezga kuti iyo ni Dada wachitemwa. *

Pachokopachoko, nkhamba kusintha chifukwa cha ivyo nkhasambiranga mu Baibolo. Nkhasambira kuti Chiuta wakuchitira chitima awo ŵakusuzgika. Pakuyowoya vya ŵanthu ŵake awo ŵakasuzgikanga, Chiuta wakati: ‘Nadi ndawona visuzgo vya ŵanthu ŵane, nkhumanya vitima vyawo.’ (Exodus 3:7) Nkhati namanya kuti Yehova wakuchitira chitima ŵanthu, nkhajipeleka kwa iyo. Mu 1998, nkhabatizika.

Nili na mubali uyo nkhukhala pa nyumba yake

Pakati pajumpha pafupifupi chaka chimoza kufuma apo nkhabatizikira, nkhamba kosi ya ŵanthu ŵachibulumutira kufupi na msumba wa Escuintla. Mulara yumoza mu mpingo wakamanya kuti nkhusuzgikira kufika ku maungano. Chifukwa ntchakuti mpingo wapafupi ukaŵa ku Phiri uko kukakhalanga Ŵakaboni ŵaŵiri awo ŵakanisambizganga Baibolo. Ntheura pakaŵa pakusuzga kuti nende kukafika ku maungano. Mulara munyake wakanovwira. Wakasanga Ŵakaboni ŵanyake ku Escuintla awo ŵakazomera kukhala nane pa nyumba yawo na kunovwira kuti nifikenge ku maungano. M’paka sono, ŵachali kunipwelelera nga ni mwana wawo.

Ningayowoya vinandi vyakulongora kuti ŵabali mu mpingo ŵakunitemwa nadi. Nakuti vyose ivyo ŵakunichitira vikunipa chigomezgo chakuti nili pakati pa Ŵakhristu ŵaunenesko.—Yohane 13:34, 35.

UMO NASANGIRA CHANDULO:

Nili kuleka kujiwona wawakawaka kweniso kuti namara kale. Pasono nkhumanya chifukwa icho niliri wamoyo. Pakuŵa Kaboni wa Yehova, mtima wane wose uli pa kusambizga ŵanthu Baibolo m’malo mwa kughanaghana vya kulemara kwane. Kweniso nili mulara mu mpingo ndipo nkhusambizga. Naŵaso na mwaŵi wa kusambizga pa maungano ghakurughakuru.

Nkhusambizga na Baibolo la vilembo vya Braille

Mu 2010, nkhanjira Sukulu Yakusambizga Uteŵeti (iyo sono yikuchemeka Sukulu ya Ŵapharazgi ŵa Ufumu) iyo yikachitikira ku El Salvador. Sukulu iyi yili kunovwira kuti nichitenge makora milimo yane mu mpingo. Sukulu iyi yili kunovwiraso kuwona kuti Yehova Chiuta wakunichindika na kunitemwa chomene.

Yesu wakati: “Muli kukondwa kukuru mu kupeleka kuluska mu kupokera.” (Milimo 20:35) Ningayowoya kuti sono nili wakukondwa, ndipo nkhuwona kuti ningawovwira ŵanji nangauli pakwamba nkhawonanga kuti vingachitika yayi. ▪

^ ndime 13 Kuti mumanye vifukwa vinyake ivyo Chiuta wazomerezgera uheni kuchitika, wonani mutu 11 mu buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova.