Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

GONGWE LA MULINDA AUGUST 2014

 ŴAŴAZGI ŴITHU ŴAKUFUMBA KUTI . . .

Kasi Ni Njani Wakalenga Ciuta?

Kasi Ni Njani Wakalenga Ciuta?

Tiyelezgere kuti dada wakuphalira mwana wake msepuka wa vyaka 7 kuti: “Kale comene Ciuta wakalenga caru capasi na vyose ivyo vilimo. Ndipo wakalengaso dazi, mwezi na nyenyezi.” Mwana uyu wakughanaghanirapo ndipo wakufumba kuti, “Adada, so ni njani uyo wakalenga Ciuta?”

Ŵawiske ŵakuzgora kuti: “Palije uyo wakalenga Ciuta. Iyo wakaŵako kwamba kale comene.” Pa nyengo iyi mwana wakhorwa na zgoro la adada ŵake. Kweni apo wakukura fumbo ili licali kumusuzga nipera. Ndipo wakujifumba kuti, ‘Kasi munthu wangaŵako wuli yekha apo vinthu vyose vikacita kulengeka? Kasi Ciuta uyu wakaŵako wuli?’

Kasi Baibolo likuti wuli? Ivyo likuyowoya vikuyanako waka na ivyo dada wa mu ciyelezgero cithu ici wakuzgora. Baibolo likuti: “A Yehova, . . . ghacali ghandababike mapiri, para mundawumbe caru ca pano pasi, kufuma ku muyirayira na kuya ku muyirayira ndimwe Ciuta.” (Salmo 90:1, 2) Nchimi Yesaya nayo yikati: “Kasi mulije kumanya? Kasi mulije kupulika? Yehova ndi Ciuta wamuyirayira, Mlengi wa mphelerekezgo za caru.” (Yesaya 40:28) Mwakuyana waka, buku la Yuda nalo likuti Ciuta waŵako “muyirayira wose.”—Yuda 25.

Malemba agha ghakulongora kuti Ciuta ni “Themba lamuyirayira” nga umo Paulosi wakayowoyera. (1 Timote 1:17) Ici cikung’anamura kuti palije nyengo iyo Ciuta kukaŵavya. Ndipo nyengo zose waŵengeko. (Uvumbuzi 1:8) Ntheura, fundo njakuti Ciuta Wankhongonozose waŵengeko muyirayira.

Cifukwa wuli fundo iyi njakusuzga kupulikiska? Cifukwa nchakuti umoyo withu ngufupi, ntheura umo ise tikuwonera nyengo tikupambana comene na umo Yehova wakuwonera. Yehova ngwamuyirayira, ntheura vyaka 1,000 kwa iyo vili nga ni zuŵa limoza. (2 Petrosi 3:8) Kuti tipulikiske fundo iyi, tiyeni tiwone ciyelezgero ici: Kasi mphazi iyo para yakhala umoyo utali comene ni mazuŵa 50, yingapulikiska kuti taŵanthu tikufika vyaka 70 panji 80? Yayi. Kweni Baibolo likuti taŵanthu tili nga ni mphazi pakuyaniska na Mlengi withu. Nakuti mahara ghithu ngacoko comene pakuyaniska na ghake. (Yesaya 40:22; 55:8, 9) Lekani nchakusuzga kuti tipulikiske vyakukhwaskana na Yehova pa nkhani ya umo wakaŵirako.

Nchakupulikikwa kuti tingapulikiska vyose yayi vya Yehova uyo ngwamuyirayira. Usange walipo uyo wakalenga Ciuta, ipo munthu uyo mphanyi ndiyo ni Mlengi. Kweni Baibolo likulongosora makora kuti Yehova ndiyo ‘wakalenga vinthu vyose.’ (Uvumbuzi 4:11) Kweniso tikumanya kuti nyengo yinyake kukaŵavya caru, kucanya na vinthu vyose. (Genesis 1:1, 2) Kasi vikaŵako wuli pera? Pakeneranga kuŵa dankha Mlengi. Ndipo Mlengi uyu wakaŵako pambere cilengiwa cilicose cindaŵeko. Iyo wakaŵako pambere Mwana wake na ŵangelo ŵandaŵeko. (Job 38:4, 7; Ŵakolose 1:15) Apa nchakuwonekerathu kuti pakwamba kukaŵavya cilicose, kukaŵa waka Ciuta yekha. Ntheura palije ico mphanyi cikamulenga.

Pakuti ise tiliko na cilengiwa cose ici, mbukaboni wakuti Ciuta ngwamuyirayira. Ciuta wali kunozga kuti cilicose cicitenge vinthu mu ndondomeko yake. Fundo iyi yikulongora kuti iyo waŵako kwa nyengo zose. Cifukwa cakuti iyo wakaŵako kale, lekani wali kupa umoyo ku vyamoyo vyose.—Job 33:4.

Manyani Vinandi

Kasi Baibolo Likusambizgachi Chomenechomene?

Unenesko Wakuyowoya za Chiuta

Kasi mukuwona kuti Chiuta wakumupwelerani imwe pamwekha? Sambirani mikhaliro yake kweniso umo wangaŵira mubwezi winu.