Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda  |  August 2014

 NKHANI ZAKWAMBILIRA | KASI CIUTA WAKUMUGHANAGHANIRANI?

Ciuta Wangamukhozgani

Ciuta Wangamukhozgani

“Ciuta, uyo wakusangu luska ŵakusokwa, wakatisanguluska.”—2 ŴAKORINTE 7:6.

“Mwana wa Ciuta . . . wakanitemwa ndipo wakajipeleka iyomwene cifukwa ca ine.”—ŴAGALATIYA 2:20

CIFUKWA WULI ŴANJI ŴAKUKAYIKA?: Ŵanyake para ŵafyenyeka, ŵakuwona kuti nchambura kwenelera kulomba Ciuta kuti waŵawovwire. Raquel wakati: “Para nkhuwona umo ŵanthu ŵakusuzgikira, nkhuwona kuti suzgo yane njicoko ndipo palije cifukwa ca kulombera wovwiri kwa Ciuta.”

IVYO BAIBOLO LIKUSAMBIZGA: Ciuta wali kuticitira kale cinthu capadera kuti watovwire na kutikhozga. Waliyose pa caru wali kuhara kwananga ndipo wakutondeka kucita ndendende umo Ciuta wakukhumbira. Ndipouli, Ciuta “wakatitemwa na kutuma Mwana wake kuŵa sembe yakuphepiskira zakwananga zithu.” (1 Yohane 4:10) Sembe iyi yikovwira kuti zakwananga zithu zigowokereke, kuti tiŵe na njuŵi yiwemi, kweniso kuti tizakasange umoyo wamuyirayira. * Sembe ya Yesu yikugwira nchito pa mtundu wose wa ŵanthu, kweniso yikulongora kuti Ciuta wakumughanaghanirani pamwekha.

Wonani ivyo vikacitikira Paulosi. Wakakhwaskika comene na sembe ya Yesu, ndipo wakati: “Umoyo uwo nkhukhala sono, nkhukhalira cipulikano ico cili mwa Mwana wa Ciuta, uyo wakanitemwa ndipo wakajipeleka iyomwene cifukwa ca ine.” (Ŵagalatiya 2:20) Yesu wakafwa pambere Paulosi wandazgoke Mkhristu. Kweni Paulosi wakawonanga kuti sembe iyi nchawanangwa ico Ciuta wakapeleka kwa iyo.

Sembe ya Yesu nchawanangwa ico Ciuta wali kumupani imwe. Ici cikulongora kuti muli ŵakuzirwa comene kwa Ciuta. Sembe iyi yingamupani “cisangulusko camuyirayira na cigomezgo ciwemi,” kweniso “kumukhozgani mu mulimo wose uwemi na mazgu.”—2 Ŵatesalonika 2:16, 17.

Sono pajumpha vyaka 2000 kufuma apo Yesu wakapelekera umoyo wake. Kasi pali ukaboni wuli wakuti Ciuta wakukhumba kuŵa namwe paubwezi mazuŵa ghano?

^ ndime 5 Kuti mumanye vinandi vya sembe ya Yesu, wonani cipaturo 5 mu buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova.