Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA FEBRUARY 2014

 ŴAŴAZGI ŴITHU ŴAKUFUMBA KUTI . . .

Cifukwa Wuli Ciuta Wakulekelera Ŵamazaza Kusuzga Ŵanthu Ŵapasi?

Cifukwa Wuli Ciuta Wakulekelera Ŵamazaza Kusuzga Ŵanthu Ŵapasi?

Mu Baibolo muli nkhani zinyake izo zikulongosora kuti ŵanthu ŵamazaza, ŵakalyeranga masuku pa mutu ŵanthu ŵapasi. Wonani ivyo vikacitikira Naboti. * Themba la Israyeli Ahabu, likazomerezga muwoli wake Yezebeli kuti wakome Naboti pamoza na ŵana ŵake mwakuti ilo litore munda wampheska. (1 Mathemba 21:1-16; 2 Mathemba 9:26) Cifukwa wuli Ciuta wakazomerezga vinthu viheni ivi kuti vicitike?

“Ciuta . . . wangateta cara.”—Tito 1:2

Tiyeni tiwone cifukwa cimoza cakuzirwa: Ciuta wangateta cara. (Tito 1:2) Kasi fundo iyi yikukolerana wuli na nkhani iyi? Cakuti timanye nchakuti, pakwamba Ciuta wakacenjezga Adamu na Eva kuti usange ŵalekenge kumupulikira, ŵafwenge. Ndipo ŵakafwa nadi, nakuti nyifwa yawusa pakati pithu kwamba apo ucigaluka ukacitikira mu munda wa Edeni. Munthu wakwamba kufwa wakaŵa Abelu. Kweni wakafwa cifukwa cakuti mukuru wake wakamucitira nkhaza.—Genesis 2:16, 17; 4:8.

Kwamba kale, Baibolo likuti munthu wakupweteka munyake pa kumuwusa. (Mupharazgi 8:9) Ivyo Baibolo likuyowoya ndivyo vikucitika. Yehova wakacenjezgerathu mtundu wa Israyeli kuti ŵanthu awo ŵaŵawusenge ŵaŵasuzgenge na kwamba kulilira kwa iyo. (1 Samuel 8:11-18) Nanga ni Themba lavinjeru Solomoni nalo likasuzganga ŵanthu kuti ŵapelekenge msonkho wa zanimuwone. (1 Mathemba 11:43; 12:3, 4) Pakaŵaso mathemba ghanyake ghaheni comene agho ghakasuzganga ŵanthu. Yumoza wawo ni Ahabu.Ghanaghanirani fundo iyi: Ciuta wakanizgenge mathemba ghose agha kuleka kusuzga ŵanthu, asi mphanyi wakawoneka kuti ni mutesi?

Munthu wakupweteka munyake pa kumuwusa.—Mupharazgi 8:9

Kumbukaniso kuti Satana nayo wakuti ŵanthu ŵakusopa Ciuta pakawa yayi. (Job 1:9, 10; 2:4) Ntheura usange Ciuta wangavikilira ŵanthu ŵake ku masuzgo ghose, asi viwonekenge nga Satana wakuneneska? Kweniso usange Ciuta wangavikilira waliyose ku masuzgo, asi ivyo wakuyowoya mphanyi vikuwoneka kuti ni vyautesi? Ciuta wacitenge nthena, mphanyi ŵanthu ŵakuwona kuti ŵangajiwusa makora waka kwambura iyo. Kweni Baibolo likuti ŵanthu ŵangajiwusa ŵekha yayi. (Yeremiya 10:23) Para Ufumu wa Ciuta wiza, vinthu vyambura urunji vyose vizamumalira penepapo.

Kasi cikung’anamura kuti Ciuta vikumukhwaska yayi para ŵamazaza ŵakuticitira viheni? Vikumukhwaska comene. Wonani vinthu viŵiri ivyo wakucita. Cakwamba iyo wakuwona vyose ivyo vikucitika. Lekani Baibolo likulongosora vyose ivyo Yezebeli wakacita kuti wakome Naboti. Kweniso Baibolo likuvumbura kuti pali munthu munyake wankhongono uyo wakucitiska ŵanthu kuti ŵacitenge vinthu viheni. (Yohane 14:30; 2 Ŵakorinte 11:14) Baibolo likuti munthu uyu ni Satana Dyabulosi. Pakuti tamanya uyo wakukhuŵilizga ŵanthu kuti ŵacitenge viheni kweniso kuyungwiska ŵanyawo, vikutovwira kuti ise tileke kucitako. Ntheura, tikulindilira kuzakakondwa na umoyo uwemi munthazi.

Caciŵiri, Ciuta wali kulayizga kuti wazamumazga viheni vyose ivyo ŵanthu ŵakucitira ŵanyawo. Umo wakavumbulira viheni ivyo Ahabu, Yezebeli na ŵanyake wose ŵakacita kweniso cilango ico wakaŵapa, vikutipa cigomezgo kuti walekelerenge yayi wose awo ŵakucita viheni. (Salmo 52:1-5) Ciuta walayizga kuti wazamunozga vyose ivyo vyanangika cifukwa ca masuzgo agha. Ntheura ŵanthu awo ŵakumutemwa ŵazamusuzgikaso yayi. * Nakuti munthu wakugomezgeka Naboti pamoza na ŵana ŵake ŵazamukhala mu paradiso pa caru capasi umo vinthu viheni vyose vizamuŵa kuti vyafumamo.—Salmo 37:34.

^ ndime 3 Wonani nkhani ya mutu wakuti: “Londezgani Cipulikano Cawo,” mu magazini yeneyiyi.