Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) NOVEMBER 2015

Yehova Ni Chiuta Wachitemwa

Yehova Ni Chiuta Wachitemwa

“Chiuta ntchitemwa.”—1 YOH. 4:8, 16.

SUMU: 18, 91

1. Zunurani mukhaliro ukuru wa Chiuta, ndipo imwe mukukhwaskika wuli?

BAIBOLO likutiphalira kuti: “Chiuta ntchitemwa.” (1 Yoh. 4:8, 16) Kasi mazgu agha ghakung’anamurachi? Chiuta wali na mikhaliro yinandi yiwemi, kweni mukhaliro wake ukuru chomene ntchitemwa. Yehova wali waka na chitemwa yayi, kweni iyo ndiyo ntchitemwa. Vyose ivyo wakuchita, wakuchita chifukwa cha chitemwa. Yehova wali kulenga chilichose chifukwa cha chitemwa, ntheura tikumuwonga chomene.

2. Kasi Yehova wazamuŵachitira vichi ŵanthu awo ŵakumupulikira? (Wonani chithuzi chakwamba.)

2 Yehova wakutemwa chilengiwa chake. Chitemwa icho Chiuta wakutilongora chikutisimikizgira kuti wafiskenge khumbo lake mu nthowa yakwenelera. Paumaliro, wose awo ŵakumupulikira ŵazamukondwa chomene. Mwachiyelezgero, chifukwa cha chitemwa, Yehova “watema zuŵa, ilo wakukhumba kweruzgira charu mu urunji kwizira mwa [Yesu Khristu] munthu uyo wimika.” (Mil. 17:31) Tikugomezga kuti zuŵa la cheruzgo ili lizenge  nadi. Zuŵa ili lizamuŵa lakukondweska kwa wose awo ŵakumupulikira chifukwa ŵazamupokera umoyo wamuyirayira.

IVYO MUDAUKO UKULONGORA

3. Kasi umoyo withu wate uŵenge wuli Yehova waŵavyenge chitemwa?

3 Yehova waŵavyenge chitemwa, mphanyi tilije chigomezgo chakuti munthazi vinthu vizamuŵa makora. Nakuti ŵanthu ndiwo ŵate walutilirenge kulamulira ŵanyawo mwakulongozgeka na Satana, uyo ni chiuta wambura chitemwa ndiposo wankhaza. (2 Kor. 4:4; 1 Yoh. 5:19; ŵazgani Chivumbuzi 12:9, 12.) Fundo iyi yikulongora kuti Yehova waŵavyenge chitemwa, masuzgo ghate ghamarenge yayi.

4. Chifukwa wuli Yehova wazomerezga ŵakugaluka kuti ŵalamulire?

4 Satana wakati wagalukira Chiuta, wakanyenga Adamu na Eva kuti nawo ŵagalukire Chiuta. Satana wakasuska Ufumu wa Chiuta. Satana wakati wangawusa makora ŵanthu kuluska Chiuta. (Gen. 3:1-5) Ntheura Yehova wamupa nyengo Satana kuti walongore usange iyo wangalamulira nadi makora ŵanthu. Kweni ivyo vikuchitika mu charu, vikulongora makora kuti Satana pamoza na ŵanthu ŵake ŵatondeka.

5. Kasi ivyo vikuchitika mu charu vikulongorachi?

5 Mazuŵa ghano, vinthu vikulutilira kuhenipa mu charu. Mu vyaka 100 ivyo vyajumpha, ŵanthu ŵakujumpha 100 miliyoni ŵafwa chifukwa cha nkhondo. Baibolo likuti mu “mazuŵa ghaumaliro,” “ŵanthu ŵaheni na ŵakupusika ŵalutilirenge kuŵa ŵaheni.” (2 Tim. 3:1, 13) Baibolo likuyowoyaso kuti: ‘A Yehova, nkhumanya kuti nthowa ya munthu yili mwa iyo yekha chara. Munthu uyo wakwenda wangalongozga yayi mendero ghake.’ (Yer. 10:23) Ivyo vikuchitika mu charu vikulongora kuti mazgu agha ngaunenesko nadi. Yehova wakalenga ŵanthu kuti ŵajiwusenge ŵekha yayi.

6. Chifukwa wuli Yehova wazomerezga uheni kuchitika?

6 Ivyo vyachitika mu nyengo iyo Yehova wazomerezgera vinthu viheni mu charu, vyalongora kuti Ufumu wake pera ndiwo ngwakwenelera kuwusa. Sonosono apa, Yehova waparanyenge ŵaheni wose. Kufuma apo, usange munyake wazamususkaso Ufumu wake, Yehova wazamuchitapo kanthu nyengo yeneyiyo. Viheni ivyo vikuchitika mazuŵa ghano, mbukaboni wakukwana wakuzakaparanyira waliyose uyo wangazakagaluka kunthazi. Yehova wazamulekeleraso viheni chara.

YEHOVA WALONGORA CHITEMWA CHAKE

7, 8. Kasi Yehova walongora wuli chitemwa chake?

7 Yehova walongora chitemwa chake mu nthowa zinandi. Ghanaghanirani waka za ukuru na kutowa kwa ivyo wali kulenga. Yehova wali kulenga mabiliyoni ghanandi gha vipingausiku, ndipo chipingausiku chilichose chili na nyenyezi mabiliyoni ghanandi chomene ndiposo mapulaneti. Zuŵa nalo lili mu gulu la nyenyezi. Kuŵavyenge zuŵa, mphanyi pa charu chapasi palije vyamoyo. Vyose ivi vili kulengeka na Yehova, ndipo vikutilongora kuti Chiuta wali na nkhongono, vinjeru, na chitemwa. Nadi, makhaliro gha Chiuta ghambura kuwoneka, “agho ni nkhongono yake yamuyirayira na Uchiuta wake, ghakuwoneka makora chomene chifukwa ghakumanyikwa kwizira mu vinthu ivyo wali kulenga.”—Rom. 1:20.

 8 Yehova wali kulenga charu chapasi kuti mukhalenge vyamoyo. Mu charu muli vinthu ivyo vikovwira ŵanthu na vinyama. Chiuta wakati walenga ŵanthu ŵakwamba, wakaŵaŵika mu munda wakutowa kuti ŵakhalengemo kwamuyirayira. (Ŵazgani Chivumbuzi 4:11.) Kweniso Yehova ‘wakupeleka chakurya ku chamoyo chilichose, pakuti lusungu lwake lukukhalilira muyirayira.’—Sal. 136:25.

9. Kasi Yehova wakuwona wuli uheni?

9 Nangauli Yehova ni Chiuta wachitemwa, kweni wakutinkha uheni. Mwachiyelezgero, pakuyowoya vya Yehova lemba la Salmo 5:4-6 likuti: ‘Ndimwe Chiuta uyo wakukondwa na uheni chara. Mukutinkha wose awo ŵakuchita uheni.’ Kweniso ‘Yehova wakutinkha ŵanthu ŵankhaza na ŵapusikizgi.’

UHENI UMARENGE SONOSONO

10, 11. (a) Kasi ŵanthu ŵaheni vizamuŵamalira wuli? (b) Kasi Yehova waŵasungira vichi ŵanthu ŵakugomezgeka?

10 Pa nyengo yakwenelera, Yehova wafumiskengepo uheni pa charu chapasi, chifukwa iyo ni Chiuta wachitemwa uyo wakutinkha viheni. Mazgu gha Chiuta ghakuti: ‘Ŵaheni ŵazamudumulika, kweni awo ŵakugomezga Yehova ŵazamuhara charu chapasi. Kwakhala kanyengo kachoko waka, ŵaheni ŵazamuŵakoso chara. Ŵalwani ŵa Yehova ŵazgeŵelekenge nga mbutheka wakubiliŵira ku malo ghakuliskako viŵeto. Ŵamwalalikirenge nga ni josi.’—Sal. 37:9, 10, 20.

11 Mazgu gha Chiuta ghakulayizgaso kuti: ‘Ŵarunji ŵazamuhara charu chapasi, ndipo ŵazamukhala mwenemumo muyirayira.’ (Sal. 37:29) Ŵanthu ŵarunji ‘ŵazamukondwa chomene na mtende ukuru.’ (Sal. 37:11) Yehova wazamuchita vyose ivi chifukwa wakutemwa ŵateŵeti ŵake ŵakugomezgeka. Baibolo likutiphalira kuti: “Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.” (Chivu. 21:4) Ŵanthu wose awo ŵakupulikira Yehova ŵazamukondwa na vinthu viwemi chomene.

12. Kasi “munthu wambura kafukwa” ni njani?

12 Mazgu gha Yehova ghakuti: ‘Umulaŵisiske munthu wambura kafukwa, na kuwona uyo ngwakunyoloka, pakuti munthazi, munthu uyu waŵenge mu mtende. Kweni ŵakuswa malango wose ŵaparanyikenge. Ŵanthu ŵaheni ŵadumulikenge.’ (Sal. 37:37, 38) “Munthu wambura kafukwa” ni uyo wakumanya Yehova na mwana wake ndiposo wakuchita ivyo Chiuta wakukhumba. (Ŵazgani Yohane 17:3.) Munthu uyu wakugomezgaso kuti “charu chikuluta na makhumbiro ghake, kweni uyo wakuchita khumbo la Chiuta wakukhalilira muyirayira.” (1 Yoh. 2:17) Pakuti umaliro waneng’enera chomene, tose tikwenera ‘kugomezga Yehova na kwenda mu nthowa yake.’—Sal. 37:34.

CHIKURU ICHO YEHOVA WACHITA

13. Kasi ntchinthu wuli chikuru icho Yehova wachita kulongora kuti wakutitemwa?

13 Nangauli ndise ŵakwananga, kweni tingamupulikira Chiuta. Sembe ya Yesu yikutovwira kuŵa paubwezi na Yehova. Sembe iyi ntchinthu chikuru icho Yehova wachita kulongora kuti wakutitemwa. Yehova wali kupeleka sembe ya Yesu kuti ŵanthu wose awo ŵakupulikira ŵafwatuke ku kwananga na nyifwa. (Ŵazgani Ŵaroma 5:12; 6:23.)  Apo Yesu wakaŵa kuchanya, wakapulikiranga awiske. Ntheura apo Yehova wakamutumanga pa charu chapasi, wakamanya kuti mwana wake wazamulutilira kugomezgeka. Yesu wakasuzgika m’paka kukomeka, ndipo ivi vikamukwenyerezga chomene Yehova uyo ni dada wachitemwa. Iyo wakagomezgeka na kulongora kuti Yehova ndiyo ngwakwenelera kuwusa. Yesu wakalongoraso kuti munthu wakufikapo wangalutilira kugomezgeka kwa Chiuta nanga ni para wakumana na masuzgo ghakuru.

Yehova wakutitemwa chomene lekani wakatitumira Mwana wake (Wonani ndime 13)

14, 15. Kasi nyifwa ya Yesu yikovwira wuli ŵanthu?

14 Nangauli Yesu wakasangana na masuzgo ghanandi, kweni wakalutilira kugomezgeka m’paka nyifwa. Tikuwonga chomene sembe ya Yesu chifukwa yikutipa mwaŵi wa kuzakakhala kwamuyirayira mu charu chiphya cha Chiuta. Mpositole Paulosi wakalongosora kuti sembe iyi yikulongora kuti Yehova na Yesu ŵakutitemwa. Iyo wakati: “Apo tikaŵa kuti tichali ŵakulopwa, Khristu wakafwira ŵanthu ŵakwananga pa nyengo yakutemeka. Pakuti ntchakusuzga kuti munthu wafwire murunji. Kweni panyake munthu wangachita chikanga kufwira munthu muwemi. Kweni Chiuta watilongora chitemwa chake, pakuti apo tikaŵa kuti tichali ŵakwananga, Khristu wakatifwira.” (Rom. 5:6-8)  Mpositole Yohane nayo wakalemba kuti: “Chitemwa cha Chiuta chikawoneka kwa ise mu nthowa iyi, Chiuta wakatuma Mwana wake wapadera mu charu, mwakuti tisange umoyo kwizira mwa iyo. Chitemwa chili nthena, ise tikamutemwa Chiuta yayi, kweni iyo ndiyo wakatitemwa na kutuma Mwana wake kuŵa sembe yakuphepiskira zakwananga zithu.”—1 Yoh. 4:9, 10.

15 Yesu wakati: “Chiuta wakachitemwa chomene charu, lekani wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yoh. 3:16) Nangauli vikamupweteka chomene Yehova, kweni wakapeleka Mwana wake kuŵa sembe. Ichi chikulongora kuti Yehova wakutemwa chomene ŵanthu, ndipo chitemwa chake chizamumara yayi. Paulosi wakati: “Nakhorwa ine kuti nanga ni nyifwa, umoyo, ŵangelo, maboma, vinthu ivyo viliko sono, vinthu ivyo vikwiza, nkhongono, kutumphuka, kunyang’amira, panji chilengiwa chinyake chilichose, vitipaturenge yayi ku chitemwa cha Chiuta icho chili mwa Khristu Yesu Fumu yithu.”—Rom. 8:38, 39.

UFUMU WA CHIUTA UKUWUSA

16. Kasi Ufumu wa Chiuta ni vichi, ndipo Fumu yake ni njani?

16 Yehova wakhazikiska boma lake kulongora kuti wakutemwa ŵanthu. Yehova wali kusora Yesu Khristu kuŵa themba la Ufumu wake. Yesu ngwakwenelera kulamulira chifukwa nayo wakutemwa ŵanthu. (Zinth. 8:31) Chiuta wali kusoraso ŵanthu ŵakukwana 144,000 kuti ŵakawuse na Khristu kuchanya. Ŵa 144,000 ŵazamuŵa mafumu ghawemi chifukwa nawo ŵali kusuzgikapo. (Chivu. 14:1) Nkhani yikuru ya upharazgi wa Yesu yikaŵa Ufumu wa Chiuta, lekani wakasambizga ŵasambiri ŵake kulomba kuti: “Adada ŵithu imwe muli kuchanya, zina linu lituŵiskike. Ufumu winu wize. Khumbo linu lichitike pano pasi nga nkhuchanya.” (Mat. 6:9, 10) Tikulindilira kuti Ufumu wa Chiuta wize na kutumbika ŵanthu.

17. Kasi ulamuliro wa Yesu ukupambana wuli na wa ŵanthu?

17 Ulamuliro wa Yesu ukupambana chomene na wa ŵanthu. Muwuso wa ŵanthu wapangiska nkhondo izo zakomeska ŵanthu mamiliyoni ghanandi. Kweni Yesu, Fumu yithu, wakutitemwa nga mbadada ŵake. (Chivu. 7:10, 16, 17) Yesu wakati: “Zani kwa ine, imwe mose mukuphyoka na kunyekezgeka, ndipo nimupumuzganinge. Yeghani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamupumuzgika. Chifukwa joko lane ndipusu na katundu wane ngwakupepuka.” (Mat. 11:28-30) Mazgu agha ngakukhozga chomene.

18. (a) Kasi Yehova wakuchita vichi kwambira mu 1914? (b) Kasi nkhani yakulondezgapo yizamuzgora mafumbo wuli?

18 Baibolo likulongora kuti Ufumu wa Chiuta ukamba kuwusa kuchanya mu 1914. Ntheura kwambira mu 1914, Yehova wakuwunganya Ŵakhristu ŵakuphakazgika awo ŵachali pa charu chapasi na ŵa “mzinda ukuru” awo ŵazamupona pa suzgo yikuru na kunjira mu charu chiphya. (Chivu. 7:9, 13, 14) Kasi mbalinga awo ŵakupanga mzinda ukuru? Kasi Chiuta wakukhumba kuti ŵachitenge vichi? Nkhani yakulondezgapo yizamuzgora mafumbo agha.