Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) OCTOBER 2015

 NKHANI YAKULONGOSORA UMOYO WA MUNTHU

Ŵakadandawurapo Yayi na Ivyo Ŵakasankha

Ŵakadandawurapo Yayi na Ivyo Ŵakasankha

PAMBERE ŵandafwe, asekuru ŵane a Nikolai Dubovinsky ŵakalemba vinthu ivyo vikaŵachitikira pa umoyo wawo. Ŵakalongosora vinthu vyakukondweska kweniso masuzgo agho ŵakakumana nawo pakuteŵetera Yehova. Pa nyengo iyo, ntchito yithu yikaŵa yakukanizgika mu charu icho kale chikachemekanga Soviet Union. Nangauli ŵakasuzgika chomene, kweni ŵakalutilira kugomezgeka. Kanandi asekuru a Nikolai ŵakayowoyanga kuti ŵakukhumba kuti ŵawukirano ŵazakapulike ivyo vikaŵachitikira pa umoyo wawo. Ntheura nkhukhumba kuti nimulongosolerani vinyake ivyo vikaŵachitikira. Asekuru ŵakababika mu 1926, mu muzi wa Podvirivka ku Chernivtsi Oblast, Ukraine.

UMO ŴAKAMANYIRA UNENESKO

A Nikolai ŵakati: “Zuŵa linyake mu 1941, mukuru wane Ivan wakiza na buku la Zeze wa Mulungu, The Divine Plan of the Ages, magazini gha Gongwe la Mulinda, na tumabuku tunyake. Mabuku agha nkhaghaŵerenga ghose, ndipo nkhazizwa kumanya kuti ni Chiuta yayi uyo wakuchitiska masuzgo mu charu, kweni ni Dyabulosi. Nkhaŵazgaso mabuku gha Mateyu m’paka Yohane, ndipo nkhamanya kuti nasanga unenesko. Nkhamba kuphalira ŵanyane ivyo nkhasambira vyakukhwaskana na Ufumu. Mabuku agha ghakanovwira chomene kuti nipulikiske unenesko ndiposo kuti nambe kuteŵetera Yehova.

“Nkhamanyanga kuti nisuzgikenge chifukwa cha ivyo nkhugomezga. Pa nyengo iyi, mu charu cha Ukraine mukaŵa nkhondo ndipo ine nkhakhumbanga yayi kunjira nkhondo. Nkhasungilira pa mtima Mateyu 10:28 na 26:52, kuti ghazakanovwire para nakumana na chiyezgo chakuti ninjire usilikari. Nkhasimikizga mtima kuti nilutilirenge kugomezgeka kwa Yehova nanga umoyo wane uŵe pangozi.

“Mu 1944, apo nkhaŵa na vyaka 18, boma likanichema kuti nkhambe usilikari. Iyi yikaŵa nyengo yakwamba kukumana na Ŵakhristu ŵanyane awo nawo ŵakiza kwakulembeskera usilikari. Tikaphalira ŵalara ŵa boma kuti tichitengeko nkhondo yayi. Mulara wa ŵasilikari wakakwiya chomene ndipo wakamba kutiwofya kuti watikhawuliskenge. Wakati wamutijimiska vimigero, apo cha watilasenge na futi. Ise tikachita wofi yayi, kweni tikamuphalira kuti: ‘Tili pasi pinu bwana. Kweni kwali muchitenge nase wuli, tiswenge yayi dango la Chiuta lakuti, ‘Ungakomanga munthu chara.’’—Ex. 20:13.

“Ntheura ine na ŵabali ŵanyake ŵaŵiri, ŵakatituma ku Belarus kuti tikagwirenge ntchito yakunozga nyumba. Nichali kukumbuka vinthu vyakofya ivyo vikachitika chifukwa cha nkhondo kufupi na tawuni ya Minsk. Vimakuni vyakuphya na moto vikaŵa waka mbwee mu msewu. Vitanda vya ŵanthu na mahachi vikaŵa palipose. Nkhawonaso magaleta na vilwero vikuruvikuru vya nkhondo kweniso  viphapha vya ndege ivyo ŵasilikari ŵakavileka. Vyose ivi vikachitika chifukwa chakuleka kulondezga malango gha Chiuta.

“Nangauli nkhondo yikamara mu 1945, kweni ise ŵakati tilutilire kukhala mu jele vyaka 10 chifukwa chakukana kunjira usilikari. Kwa vyaka vitatu vyakwambilira, tikaŵavya mwaŵi wakuwungana panji kusanga mabuku ghakulongosora Baibolo. Tikalemberananga waka makalata na ŵadumbu ŵanyake, kweni pamasinda nawo ŵakakakika na kweruzgika kuti ŵakakhale vyaka 25 ku misasa yakusuzgirako ŵanthu.

“Mu 1950, ŵakatifumiska ndipo tikawelera kukaya. Apo nkhaŵa ku jele, amama na mudumbu wane Maria ŵakasambira Baibolo na kuŵa Ŵakaboni ŵa Yehova. Pa nyengo iyi, ŵakuru ŵane ŵakaŵa kuti ŵakusambira waka Baibolo. Pakuti nkhalimbikiranga chomene kupharazga, boma likakhumbangaso kunikaka. Kweni ŵabali awo ŵakalongozganga ntchito yakupharazga ŵakanipempha kuti nipangenge mabuku mwakubisilizga mu kachipinda kapasi. Pa nyengo iyi nkhaŵa na vyaka 24.

KUPANGA MABUKU

“Ŵakaboni ŵanandi ŵakatemwanga kuyowoya kuti, ‘Para ŵatikanizga kupharazga pakweru, tipharazgenge mwakubisilizga.’ (Zinth. 28:28) Pa nyengo iyi, tikabisamanga mu vipinda vyapasi pakupanga mabuku. Chipinda icho nkhamba kugwiliramo ntchito chikaŵa pasi pa nyumba iyo mukakhalanga mukuru wane Dmitry. Nyengo zinyake nkhakhalanga mu chipinda ichi masabata ghaŵiri kwambura kufumira kuwaro. Para nyali yazimwa chifukwa chakuchepa kwa mphepo, nkhagonanga waka m’paka apo mu chipinda muŵirengeso mphepo zakukwana.

Chithuzi cha kachipinda kapasi umo a Nikolai ŵakapangiranga mabuku

 “Zuŵa linyake, mubali uyo nkhagwiranga nayo ntchito wakanifumba kuti, ‘Kasi Nikolai uli kubatizika?’ Nkhaŵa kuti nindabatizike, nangauli nkhaŵa kuti nateŵetera Yehova kwa vyaka 11. Ntheura tikati tadumbiskana, usiku wenewuwo nkhabatizika. Pa nyengo iyi nkhaŵa na vyaka 26. Pakati pajumpha vyaka vitatu, nkhasankhika kuŵa mu Komiti ya Charu. Pakuti ŵabali ŵanyake awo ŵakateŵeteranga mu Komiti iyi ŵakakakika, ŵabali ŵanyake ŵakasankhika kuti ŵanjire mu malo ghawo. Ntheura ntchito yakupharazga Ufumu yikalutilira.

MASUZGO GHANYAKE

“Ntchito yakupanga mabuku mwakubisilizga yikaŵa yinonono kuluska kugwira jele. Chifukwa chakopa ŵapolisi, nkhatondekanga kuwungana kwa vyaka 7 ndipo nkhajipweleleranga nekha mwauzimu. Banja lane nkhaliwonanga mwa apo na apo, chifukwa nkhalutangako viŵi yayi ku nyumba. Ŵamumbumba yane ŵakanipulikiskanga, ndipo ichi chikanikhozganga chomene. Nyengo zinyake nkhongono zikanimaliranga chifukwa cha kusuzgika maghanoghano na kwenjerwa. Nkhaŵanga wakunozgeka kuti chilichose chinganichitikira. Mwachiyelezgero, zuŵa linyake mise ŵapolisi ŵaŵiri ŵakiza ku nyumba uko nkhakhalanga. Nkhafumira pa windo lakuseri na kuchimbilira ku thengere. Apo nkhachimbiranga, nkhapulika kulira nga ni lukhweru kweni yikaŵa mpholopolo. Wapolisi munyake wakakwera hachi na kuniskera uku wakuniwombera na futi m’paka mpholopolo zikamumalira. Mpholopolo yimoza yikanilasa pa woko. Wakati wanichimbizga mtunda wa makilomita 5, nkhabisama mu thengere. Kweni nyengo yinyake apo nkheruzgikanga, ŵakaniphalira kuti wapolisi wakaniwombera maulendo 32.

“Thupi lane likasintha chomene chifukwa kanandi nkhakhalanga mu kachipinda kapasi. Ivi vikakhwaska mulimo wane. Ntheura nkhamba kukhala pa zuŵa kuti thupi lane lambe kuwonekaso makora. Nkhamba kulwaralwara chifukwa cha kukhaliska mu kachipinda kapasi. Zuŵa linyake nkhatondeka kusangika pa ungano unyake wakuzirwa chifukwa nkhafumanga ndopa mu mphuno na mu mulomo.

A NIKOLAI ŴAKAKAKIKASO

Mu 1963, pa msasa wakusuzgirako ŵanthu ku Mordvinia

“Pa Janyuwale 26, 1957, nkhakakikaso. Pakati pajumpha myezi 6, khoti likuru chomene la Ukraine likati ŵanilase na futi. Kweni boma la Ukraine likaŵa kuti lamazga chilango cha  kukoma munthu, ntheura ŵakati nikhale mu jele vyaka 25. Tikaŵapo ŵabali 8. Ŵakatituma ku misasa ya ku Mordvinia uko tikasangako ŵabali pafupifupi 500. Tikakumananga mwakubisilizga mu tumagulu kuti tisambire Gongwe la Mulinda. Msilikari munyake wakaŵazga magazini agho ŵakatipoka, ndipo wakati: ‘Para mulutilirenge kuŵazga magazini agha, palije icho chimuthereskaninge.’ Nyengo zose tikagwiranga mwakugomezgeka ntchito yiliyose iyo ŵatipa. Ndipouli, mulara wa ŵasilikari uyo wakatilaŵiliranga wakati: ‘Ntchito iyo mukuchita kuno yilije phindu kwa ise. Ise tikukhumba waka kuti muŵe ŵakugomezgeka ku boma.’”

“Nyengo zose tikagwiranga mwakugomezgeka ntchito iyo ŵatipa”

ŴAKALUTILIRA KUGOMEZGEKA

Nyumba ya Ufumu ku Velikiye Luki

Mu 1967, asekuru a Nikolai ŵakawerako ku msasa wakusuzgirako ŵanthu. Pamanyuma, ŵakawovwira kukhazikiska mipingo ku Estonia na St. Petersburg, Russia. Kukwambilira kwa chaka cha 1991, khoti likasintha chigamuro icho likapeleka mu 1957, chifukwa pakaŵavya ukaboni. Pa nyengo iyi boma likasandaso milandu ya Ŵakaboni ŵa Yehova awo ŵakakakika. Mu 1996, a Nikolai ŵakasamira ku msumba wa Velikiye Luki ku Pskov Oblast, uwo uli pa mtunda wa makilomita 500 (ma mayilosi 300) kufuma ku St. Petersburg. Ŵakagura nyumba kuti ŵakhalengemo, ndipo mu 2003, Nyumba ya Ufumu yikazengeka pa malo ghawo. Pasono pali mipingo yiŵiri iyo yikuwungana mu Nyumba ya Ufumu iyi.

Ine na mfumu wane tikuteŵetera pa Beteli ya ku Russia. Mu Malichi 2011, myezi yichoko waka pambere ŵandafwe, asekuru a Nikolai ŵakiza kuzakatiwona. Uwu ukaŵa ulendo waumaliro kuchezga nase. Ivyo ŵakayowoya vikatichontha mtima chomene. Iwo ŵakati: “Nkhuwona kuti zuŵa la nambara 7 lakuzingilira Yeriko lambapo kale.” (Josh. 6:15) Asekuru a Nikolai ŵakafwa na vyaka 85. Nangauli ŵakasangana na masuzgo ghanandi pa umoyo wawo, kweni ŵakati: “Ndine wakukondwa chomene kuti nkhasankha kuteŵetera Yehova nichali mwana muchoko. Nkhudandawura yayi kuti nkhasankha kuteŵetera Yehova.”