Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  September 2015

Kasi Tingalongora Wuli Kuti Tikumutemwa Yehova?

Kasi Tingalongora Wuli Kuti Tikumutemwa Yehova?

“Ise tili na chitemwa chifukwa ndiyo wakamba kutitemwa.”—1 YOH. 4:19.

SUMU: 56, 138

1, 2. Kasi Yehova wakutisambizga wuli kuti timutemwenge?

DADA wakusambizga makora ŵana ŵake para wakuŵatemwa. Usange dada wakutemwa ŵana ŵake, ndikuti wakuŵasambizga kuti nawo ŵamutemwenge. Palije munthu uyo wakutitemwa chomene kuluska Yehova. Mpositole Yohane wakati nase tikumutemwa Yehova chifukwa ndiyo “wakamba kutitemwa.”—1 Yoh. 4:19.

2 Kasi Yehova wakachita vichi ivyo vikulongora kuti ndiyo “wakamba kutitemwa”? Mpositole Paulosi wakati: “Chiuta watilongora chitemwa chake, pakuti apo tikaŵa kuti tichali ŵakwananga, Khristu wakatifwira.” (Rom. 5:8)Yehova, Dada withu wachitemwa, wakapeleka Mwana wake kuŵa sembe kuti watiwombore ku kwananga na nyifwa. Sembe iyi yikutovwira kuti tiŵe paubwezi na Yehova. Yehova wakajipata chomene pakupeleka mwana wake kuŵa sembe. Uwu mbukaboni wakuti Yehova wakutitemwa chomene. Ntheura, wakutisambizga kuti nase timutemwenge na mtima withu wose.—1 Yoh. 4:10.

3, 4. Kasi tingalongora wuli kuti tikumutemwa Yehova?

3 Mukhaliro ukuru chomene wa Yehova ntchitemwa. Lekani Yesu wakayowoya kuti dango lakwamba ndakuti: “Utemwenge  Yehova Chiuta wako na mtima wako wose na umoyo wako wose na maghanoghano ghako ghose na nkhongono zako zose.” (Mrk. 12:30) Yehova wakukwiya usange tikutemwa chomene munthu panji chinthu chinyake kuluska iyo. Yehova wakukhumba kuti ise timutemwenge na ‘mtima withu wose.’ Kweniso tikwenera kumutemwa Yehova na umoyo ‘withu wose, maghanoghano ghithu ghose, na nkhongono zithu zose.’ Ntchimi Mika yikati ivi ndivyo Yehova wakukhumba.—Ŵazgani Mika 6:8.

4 Kasi tingalongora wuli kuti Yehova tikumutemwa na mtima withu wose? Tingalongora kuti tikumutemwa na mtima withu wose para tikumuŵika pakwamba mu umoyo withu. Mu nkhani iyo yajumpha, tikadumbiskana fundo zinayi izo Yehova wakulongolera kuti wakutitemwa. Mu nkhani iyi tidumbiskanenge nthowa zinayi izo nase tingalongolera kuti tikumutemwa.

KUWONGA YEHOVA

5. Kasi tikwenera kuchita vichi para tikuwona vyose ivyo Yehova wakutichitira?

5 Usange munyithu watipa chawanangwa, kanandi tikuwonga. Kweniso para tamanya kuzirwa kwa chawanangwa icho tapika, tikuchigwiliskira ntchito makora. Msambiri Yakobe wakalemba kuti: “Chawanangwa chilichose chiwemi na chawanangwa chilichose chakufikapo chikufuma kuchanya, pakuti chikukhira kufuma ku Awiske ŵa ungweru wakuchanya, iwo ŵakusintha yayi, ŵakupambana na mfwiri uwo ukuzgoka.” (Yak. 1:17) Yehova wakutitemwa ndipo wakutipa chilichose icho tikukhumbikwira pa umoyo kuti tiŵe ŵakukondwa. Ntheura nase tikwenera kumutemwa na kumuwonga chifukwa cha ivyo wakutichitira.

6. Kasi Ŵaisrayeli ŵakeneranga kuchita vichi kuti Yehova walutilire kuŵatumbika?

6 Yehova wakaŵapa vyawanangwa viwemi Ŵaisrayeli. Wakaŵapa malango agho ghakaŵalongozganga kwa vyaka vinandi, kweniso wakaŵapweleleranga mwakuthupi na mwauzimu. (Dute. 4:7, 8) Ŵaisrayeli ŵapulikirenge malango gha Yehova, mphanyi ŵakalongora kuti ŵakaŵa ŵakuwonga. Mwachiyelezgero, Yehova wakakhumbanga kuti para ŵakupeleka sembe za vipambi, ŵapelekenge “vipambi viwemi chomene vyakwamba kucha.” (Ex. 23:19) Ŵaisrayeli ŵakamanyanga kuti Yehova walutilirenge kuŵatumbika usange ŵakupulikira malango ghake na kumupa viwemi chomene.—Ŵazgani Duteronome 8:7-11.

7. Kasi tingamupa vichi Yehova kulongora kuti tikumutemwa?

7 Nase tingalongora kuti tikumutemwa Yehova para tikumupa ‘vinthu vithu vyakuzirwa.’ (Zinth. 3:9) Tikwenera kumuteŵetera Yehova na vinthu ivyo tili navyo. Mwachiyelezgero, tingapeleka ndalama kuti tovwire ntchito ya kupharazga Ufumu iyo yikuchitika pa mpingo withu ndiposo pa charu chose. Kwali ndise ŵasambazi panji ŵakavu, tose tingalongora kuti tikumutemwa Yehova para tikumupa ivyo tili navyo. (2 Kor. 8:12) Paliso vinyake ivyo tingachita kulongora kuti tikutemwa Yehova.

8, 9. Chifukwa wuli tikwenera kumugomezga Yehova? Kasi Mike na mbumba yake ŵakalongora wuli kuti ŵakugomezga Yehova?

8 Yesu wakati tikwenera kulutilira kupenja dankha Ufumu ndipo tileke kwenjerwa na ivyo tiryenge panji tivwarenge. Iyo wakati Dada withu wakuchanya, Yehova, wakumanya ivyo ise tikukhumbikwira. (Mat. 6:31-33) Tikumugomezga Yehova ndipo tikumanya kuti watovwirenge. Nakuti munthu uyo tikumutemwa nadi,  tikumukayikira yayi. Ntheura para tikutemwa Yehova, tikweneraso kumugomezga. (Sal. 143:8) Tingajifumba kuti: ‘Kasi mapulani ghane na umo nkhugwiliskira ntchito nyengo na nkhongono zane, vikulongora kuti nkhutemwa Yehova na mtima wane wose? Kasi zuŵa lililose nkhugomezga kuti Yehova wanovwirenge?’

9 Mike na mbumba yake ŵakalongora kuti ŵakumutemwa Yehova na kumugomezga. Apo Mike wakaŵa mwana muchoko, wakakhumbanga kukateŵetera ku charu chinyake. Nangauli wakatora ndipo wakaŵa na ŵana ŵaŵiri, kweni khumbo lake likaŵa kuti lindasinthe. Mike na mbumba yake ŵakaŵazga nkhani za ŵabali na ŵadumbu awo ŵateŵeterapo uko kuli ŵapharazgi ŵachoko. Nkhani izi zikaŵawovwira kuti ŵasinthe vinthu vinyake pa umoyo wawo. Ŵakaguliska nyumba yawo na kwamba kukhala mu nyumba yichoko. Mike wakachepeska ntchito zinyake izo kampani yake yikachitanga ndipo wakasambira umo wangendeskera kampani yake kwizira pa intaneti uku wali ku charu chinyake. Pamanyuma, Mike na mbumba yake ŵakasamira ku charu chinyake ndipo ŵakakondwanga chomene na uteŵeti wawo. Mike wakati: “Tikawona kuti fundo ya Yesu ya pa Mateyu 6:33 njaunenesko nadi.”

IVYO YEHOVA WAKUTISAMBIZGA

10. Nga ni Davide, chifukwa wuli tikwenera kughanaghanira ivyo Yehova wakutisambizga?

10 Themba Davide likalemba kuti: ‘Machanya ghakupharazga uchindami wa Chiuta, mlengalenga kuchanya ukuthuwuska mulimo wa mawoko ghake. Dango la Yehova ndakufikapo, likuwezgeramo nkhongono. Vikumbusko vya Yehova ni vyakugomezgeka, muzeleza vikumuzgora wavinjeru.’ Davide wakaghanaghaniranga malango na chilengiwa cha Yehova. Ivi vikamovwira kuti waŵe paubwezi na Yehova. Davide wakati: ‘Mphanyi mazgu gha mu mulomo wane na ivyo nkhughanaghana mu mtima wane vyamukondweskani, A Yehova, Jalawe lane na Muwomboli wane.’—Sal. 19:1, 7, 14.

11. Kasi ivyo Yehova wakutisambizga tikwenera kuchita navyo wuli, ndipo chifukwa wuli? (Wonani chithuzi chakwamba.)

11 Mazuŵa ghano, Yehova wakutisambizga kuti timumanye iyo, timanye khumbo lake, chilengiwa chake, na Mazgu ghake. Charu chikuchiska kuti ŵanthu ŵasambirenge chomene. Kweni kanandi masambiro gha charu ghakupangiska ŵanthu kuti ŵaleke kugomezga na kutemwa Yehova. Mwakupambana na masambiro gha charu, masambiro gha Yehova ghakutovwira kuti timanyenge vinthu kweniso kuti timutemwenge. Yehova wakukhumba kuti tisange chandulo na ivyo wakutisambizga, kweniso kuti nase tisambizgenge ŵanyithu. (Zinth. 4:5-7) Khumbo la Yehova ndakuti “ŵanthu ŵa mitundu yose ŵamanye makora unenesko na kuponoskeka.” (1 Tim. 2:4) Para tikulimbikira kupharazga makani ghawemi gha Ufumu wa Chiuta, tikulongora kuti tikutemwa Yehova na ŵanyithu.—Ŵazgani Salmo 66:16, 17.

12. Kasi Shanoni wakayowoya vichi wati wapokera buku pa ungano?

12 Ŵana ŵachoko nawo ŵangaghanaghanira ivyo Yehova wakuŵapa. Shanoni wachali kukumbuka ivyo vikachitika apo wakaŵa pa ungano wa chigaŵa wa mu 1989. Panyengo iyo wakaŵa na vyaka 11 ndipo munung’una wake wakaŵa na vyaka 10. Pa nyengo yinyake pa ungano uwu, ŵana wose ŵakapempheka kuti ŵakhale pa malo ghamoza. Pakwamba Shanoni wakaŵa na wofi. Kweni pamasinda wakakondwa kuwona kuti mwana waliyose wakupokera  buku la Achichepere Akufunsa. Kasi buku ili likamovwira wuli? Shanoni wakati: “Apa nkhamanya kuti Yehova waliko nadi ndiposo kuti wakunitemwa chomene. Tikakondwa chomene kuti Chiuta withu Yehova wakatipa chawanangwa chiwemi ichi.”

ZOMERANI CHILANGO CHA YEHOVA

13, 14. Kasi tikwenera kuchita wuli para Yehova wakutilanga, ndipo chifukwa wuli?

13 Baibolo likuti: ‘Awo Yehova wakuŵatemwa wakuŵachenya, nga umo dada wakuchitira na mwana wake uyo wakukondwa nayo.’ (Zinth. 3:12) Timanyenge icho ntchiwemi na kuŵa na mtende wa mu mtima para tikuzomera kuti Yehova watilange na kutisambizga. Kweni Baibolo likuti “palije munthu uyo wakukondwa para wakupokera chilango, chikuŵa chakuŵinya.” (Heb. 12:11) Nangauli chikuŵinya, kweni kasi tikwenera kuchita wuli para Yehova wakutilanga? Tikwenera chara kuzerezga panji kuyuyura chilango cha Yehova. Tikumutemwa Yehova, lekani tikuzomera chilango chake na kusintha apo pakukhumbikwira.

14 Mu nyengo ya Malaki, Ŵayuda ŵanandi ŵakaleka kupulikira Yehova. Ŵakaŵavya navyo ntchito kuti Yehova waleka kukondwa na sembe zawo. Ntheura Yehova wakaŵachenya. (Ŵazgani Malaki 1:12, 13.) Yehova wakaŵapa ulongozgi kanandi waka, kweni ŵakapulikiranga yayi. Ntheura Yehova wakaŵaphalira kuti: ‘Nitumenge nthembo pa imwe, ndipo nizgorenge vitumbiko vinu kuŵa nthembo.’ (Mal. 2:1, 2) Nase tingataya ubwezi withu na Yehova usange tikukana kupulikira ulongozgi wake panji kuwuwona kuti ngwambura ntchito.

Lekani kuyegheka waka na charu, kweni londezgani ulongozgi wa Yehova (Wonani ndime 15)

15. Kasi tikwenera kugega nkharo wuli?

15 Charu cha Satana chikukhuŵirizga ŵanthu kuti ŵaŵe ŵakujitemwa. Ŵanandi ŵakukhumba yayi kuti munthu munyake waŵasambizge panji kuŵaphalira chakuchita. Ŵanyake ŵakupokera ulongozgi mwakuchichizgika waka. Ise tikwenera kuchita nthena yayi. Baibolo likutiphalira kuti tileke kutolera nkharo ya ŵanthu ŵa mu nyengo iyi. M’malo mwake likutichiska  kuti timanye khumbo “lakufikapo” la Chiuta na kuchita ivyo vikumukondweska. (Rom. 12:2) Yehova wakutipa ulongozgi pa nyengo yakwenelera kwizira mu gulu lake. Mwachiyelezgero, gulu likutikumbuska umo tikwenera kuchitira na ŵanthu awo mbanalume panji ŵanakazi ŵanyithu yayi, umo tingasankhira ŵabwezi ŵawemi na vyakusanguluska. Para tikuzomera ulongozgi wa Yehova na kuchita vinthu ivyo vikumukondweska, tikulongora kuti tikuwonga ndiposo kuti tikumutemwa na mtima withu wose.—Yoh. 14:31; Rom. 6:17.

GOMEZGANI YEHOVA

16, 17. (a) Chifukwa wuli tikwenera kupempha ulongozgi kwa Yehova pambere tindasankhe chakuchita? (b) Kasi Ŵaisrayeli ŵakachita vichi kulongora kuti ŵakamugomezganga yayi Yehova?

16 Ŵana ŵachoko ŵakugomezga chomene ŵapapi ŵawo kuti ŵaŵawovwirenge. Nanga ŵangaŵa kuti ŵakura, kweni nyengo zinyake ŵakufumba ŵapapi ŵawo kuti ŵaŵawovwire. Ŵakumanya kuti nangauli ŵangasankha ŵekha vyakuchita, kweni ŵapapi ŵawo ŵangaŵapa ulongozgi wakovwira. Dada withu Yehova wakutipa wanangwa wakusankha. Kweni chifukwa chakuti tikumugomezga na kumutemwa, nyengo zose pambere tindasankhe chakuchita, tikumupempha kuti watovwire ndipo tikuchita vinthu mwakukolerana na khumbo lake. Para tikumugomezga nadi Yehova, iyo watipenge mzimu utuŵa kuti utovwire kuchita ivyo ni viwemi.—Fil. 2:13.

17 Mu nyengo ya Samuyeli, Ŵafilisiti ŵakathereska Ŵaisrayeli. M’malo mwa kupempha ulongozgi kwa Yehova, Ŵaisrayeli ŵakati: ‘Tiyeni tikatore likasa la phangano la Yehova ku Shilo, mwakuti liŵenge nase na kutiponoska mu woko la ŵalwani ŵithu.’ Kasi ntchivichi icho chikachitika? Ŵaisrayeli ŵanandi ŵakakomeka. Baibolo likuti: ‘Ŵasilikari ŵakwenda pasi 30,000 ŵa Israyeli ŵakafwa.’ Kweniso Ŵaisrayeli ŵakapokeka Likasa la Chiuta. (1 Sam. 4:2-4, 10, 11) Ŵaisrayeli ŵakaghanaghana kuti para ŵaluta na likasa la Yehova ku nkhondo, mbwenu Yehova wamuŵawovwira. Ŵakakhumba yayi kupempha ulongozgi kwa Yehova kuti ŵamanye maghanoghano ghake pa nkhani iyi. M’malo mwake, ŵakachita waka ivyo iwo ŵakawonanga kuti ni viwemi. Ntheura Ŵaisrayeli ŵakathereskeka mwachikhozga soni.—Ŵazgani Zintharika 14:12.

18. Chifukwa wuli Baibolo likuti tigomezgenge Yehova?

18 Wamasalimo uyo wakagomezganga na kutemwa chomene Yehova wakati: ‘Lindilira Chiuta, pakuti nimulumbenge nipera pakuŵa Mponoski wane Mukuru. Chiuta wane, nkhwenjerwa. Lekani nkhumukumbukani.’ (Sal. 42:5, 6) Kasi namwe ndimo mukumuwonera Yehova? Kasi mukujiwona kuti mukumutemwa na kumugomezga Yehova? Tikwenera kumugomezga chomene Yehova. Baibolo likuti: ‘Uthembenge Yehova na mtima wako wose, ungagomezganga pa kapulikiskiro kako yayi. Mu mendero ghako ghose maso ghako ghaŵe kwa iyo, ndipo wakunyoloskerenge nthowa zako.’—Zinth. 3:5, 6.

19. Kasi tikwenera kumutemwa wuli Yehova?

19 Yehova ndiyo wakamba kutitemwa ndipo wakutisambizga umo nase tikwenera kumutemwera. Ntheura nyengo zose tighanaghanirenge ivyo watichitira na umo wakutitemwera taŵanthu ŵake. Nase tiyeni tilongore kuti tikumutemwa Yehova na mtima withu wose, umoyo withu wose, maghanoghano ghithu ghose, na nkhongono zithu zose.—Mrk. 12:30.