Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) AUGUST 2015

Ghanaghanirani Chitemwa cha Yehova

Ghanaghanirani Chitemwa cha Yehova

Nighanaghanirenge milimo yinu yose.’—SAL. 77:12.

SUMU: 18, 61

1, 2. (a) Kasi imwe muli na ukaboni wuli wakuti Yehova wakutemwa ŵanthu ŵake? (b) Kasi Yehova wakukhumba kuti tichitenge nawo wuli ŵanyithu?

KASI muli na ukaboni wuli wakuti Yehova wakumutemwani? Pambere mundazgore fumbo ili, wonani dankha viyelezgero ivi: Kwa vyaka vinandi, ŵabali na ŵadumbu ŵakachiskanga mudumbu Talene kuti waleke kutangwanika na vinthu ivyo wangakwaniska yayi. Talene wakati: “Yehova walekenge kunitemwa mphanyi ŵabali ŵakanipa yayi ulongozgi uwu.” Brijeti wakalera yekha ŵana ŵake ŵaŵiri, mfumu wake wakati wafwa. Iyo wakati: “Ntchakusuzga kulera ŵana mu charu cha Satana ichi, chomene usange mupapi njumoza. Kweni Yehova wandanitaye, ndipo wakunovwira kuzizipizga para nakumana na masuzgo.” (1 Kor. 10:13) Sandira wakulwara nthenda yambura kukonda munkhwala. Muwoli wa mubali munyake wakachezga na Sandira apo ŵakaŵa pa ungano. Mfumu wa Sandira wakati: “Nangauli mudumbu uyu tikamumanyanga yayi kweni tikakondwa chomene chifukwa wakatilongora chitemwa. Tunthu tuwemi uto ŵanyithu ŵakutichitira, mbukaboni wakuti Yehova wakutitemwa chomene.”

 2 Taŵanthu tili kulengeka kuti titemwanenge na ŵanyithu. Kweni nyengo zinyake tikutondeka kuchita nthena chifukwa cha kukhuŵara, ulwari, kusoŵa ndalama, panji chifukwa chakuti vinthu vikutiyendera makora yayi mu uteŵeti. Para tamba kuwona nga kuti Yehova watitaya, tikwenera kukumbuka kuti iyo wakutiwona kuŵa ŵakuzirwa mu maso ghake, kweniso ‘wakutikora ku woko lithu lamalyero’ kuti watovwire. Watiluwenge yayi usange tilutilirenge kugomezgeka kwa iyo.—Yes. 41:13; 49:15.

3. Kasi ntchivichi chingatovwira kumanya kuti Yehova wakutitemwa nyengo zose?

3 Ŵanthu awo ŵazunulika mu ndime yakwamba ŵali na chigomezgo chose kuti Chiuta wakuŵa nawo para ŵali mu masuzgo. Nase tikugomezga kuti Yehova watitayenge yayi. (Sal. 118:6, 7) Nkhani iyi yikulongosora umo Yehova watilongolera chitemwa chake kwizira mu (1) ivyo wali kulenga, (2) Mazgu ghake, (3) lurombo, na (4) sembe ya Yesu. Para tikughanaghanira viwemi ivyo Yehova watichitira, tilutilirenge kumuwonga chifukwa cha chitemwa icho wakutilongora nyengo zose.—Ŵazgani Salmo 77:11, 12.

IVYO YEHOVA WALI KULENGA

4. Kasi ivyo Yehova wali kulenga vikutisambizga vichi? (Wonani chithuzi chakwamba.)

4 Kasi chilengiwa chikulongora wuli kuti Yehova wakutitemwa? Vinthu ivyo Yehova wali kulenga vikutisambizga kuti iyo wakutitemwa nyengo zose. (Rom. 1:20) Yehova wali kulenga charu kuti tikhalengemo. Iyo watipa chilichose kuti tiŵe ŵakukondwa. Watipa vyakurya vyakupambanapambana kuti tiryenge na kukondwa navyo. (Muph. 9:7) Mudumbu Catherine wa ku Canada wakukondwa chomene para wakuwona vinthu ivyo Yehova wali kulenga. Wakukondwa para wakuwona maluŵa ghakutowa, viyuni vikuduka mu dera, kweniso kayuni kajongwe ako kakurya pafupi na khichini lake. Ivi vikumupa ukaboni wakuti Yehova wakutitemwa. Yehova uyo ni Dada withu wachitemwa, wakukondwa chomene na ivyo wali kulenga ndipo wakukhumba kuti nase tikondwenge navyo.—Mil. 14:16, 17.

5. Kasi umo Yehova wali kutilengera vikulongora wuli kuti wakutitemwa?

5 Yehova wali kutilenga kuti tigwirenge ntchito izo zikutovwira kuti tiŵe ŵakusangwa. (Muph. 2:24) Khumbo lake ndakuti tibabane, tizuzge charu, na kuŵa na mazaza pa somba, viyuni, na vyamoyo vinyake. (Gen. 1:26-28) Yehova ngwachitemwa, lekani wali kutilenga na mikhaliro iyo yikutovwira kumuyezga.—Efe. 5:1.

MAZGU GHAKE

6. Chifukwa wuli tikwenera kuwonga kuti tili na Baibolo?

6 Chiuta wakutitemwa chomene lekani wali kutipa Baibolo. Baibolo likutovwira kuti timumanye iyo kweniso timanye umo wakuchitira na ŵanthu. Malemba ghakutiphalira umo wakachitira na Ŵaisrayeli awo ŵakamugalukiranga kanandi waka. Lemba la Salmo 78:38 likuti: ‘Pakuŵa wa lusungu, wakagowokera ubendezi wawo; ntha wakaŵaparanya; enya, nyengo zinandi wakawezga ukali wake, ndipo kuti wakagolerezga ukali wake wose chara.’ Para mungaghanaghanirapo ivyo vesi ili likuyowoya mumanyenge kuti Yehova wakumutemwani na kumupwelelerani. Manyani kuti ndimwe ŵakuzirwa chomene mu maso mwa Yehova.—Ŵazgani 1 Petrosi 5:6, 7.

7. Chifukwa wuli tikwenera kuŵerenga Baibolo?

 7 Tikwenera kuŵerenga Baibolo chifukwa ndiyo nthowa yikuru iyo Yehova wakuyowoyera nase. Para ŵapapi na ŵana ŵakuyowoyeskana makora, ŵakugomezgana ndipo ŵakutemwana chomene. Kasi ise tikuyowoya nayo Yehova? Nangauli Yehova tindamuwonepo nesi kupulika mazgu ghake mwakudunjika, kweni wakuyowoya nase kwizira mu Baibolo ndipo tikwenera kupulikira ivyo Baibolo likuyowoya. (Yes. 30:20, 21) Yehova wakulongozga na kuvikilira ŵateŵeti ŵake. Wakukhumbaso kuti timumanye na kumugomezga.—Ŵazgani Salmo 19:7-11; Zintharika 1:33.

Nangauli Yehu wakachenya Yehoshafati, kweni Yehova ‘wakawonamo kauwemi’ mwa Yehoshafati (Wonani ndime 8, 9)

8, 9. Kasi Yehova wakukhumba kuti timanye vichi? Yowoyani chiyelezgero.

8 Yehova wakukhumba kuti timanye kuti wakutitemwa, wakusulako maubudi ghithu, na kulaŵiska ivyo tikuchita makora. (2 Mid. 16:9) Ndimo wakachitira na Yehoshafati, themba la Yuda. Nyengo yinyake Yehoshafati wakachita vinthu mwambura mahara. Wakazomera kuluta ku nkhondo na Ahabu, themba la Israyeli, kuti ŵakapoke chigaŵa cha Ramoti-giliyadi mu mawoko gha Ŵasiriya. Ntchimi zitesi 400 zikaphalira Ahabu kuti wamuthereska Ŵaasiriya, kweni Mikaya ntchimi ya Yehova, yikaphalira Yehoshafati kuti wamuluza. Ahabu wakafwira ku  nkhondo ndipo Yehoshafati wakawelera mu mulomo wa mbuzi. Yehoshafati wakati wafika ku Yerusalemu, Yehu wakamuchenya chifukwa cha kukolerana na Ahabu. Ndipouli Yehu, mwana wa Hanani wakaphalira Yehoshafati kuti: ‘Kawoneka kauwemi mwa imwe.’—2 Mid. 18:4, 5, 18-22, 33, 34; 19:1-3.

9 Apo Yehoshafati wakambanga kulamulira, wakaphalira ŵakaronga, Ŵalevi, na ŵasembe kuti ŵasambizge ŵanthu Dango la Yehova mu misumba yose ya Yuda. Ntchito iyi yikawovwira kuti ŵanthu ŵa mu vyaru vya pafupi na Israyeli nawo ŵambe kopa Yehova. (2 Mid. 17:3-10) Nangauli Yehoshafati wakabuda, kweni Yehova wakaluwa yayi viwemi ivyo wakachita. Nkhani iyi yikutisambizga kuti nangauli ndise ŵakwananga, Yehova walutilirenge kutitemwa chikuru tikulimbikira kumukondweska.

LUROMBO

10, 11. (a) Chifukwa wuli tikwenera kulomba kwa Yehova? (b) Kasi Chiuta wakuzgora wuli malurombo ghithu?

10 Dada wachitemwa wakutegherezga para ŵana ŵake ŵakuyowoya nayo. Wakutegherezga kuti wamanye ivyo vili mu mtima wa ŵana ŵake. Yehova, Dada withu wakuchanya, nayo wakutegherezga para tikuyowoya nayo mu lurombo.

11 Tingalomba kwa Yehova nyengo yiliyose. Wandaŵike mphaka ya nyengo iyo tingalombera. Yehova ni mubwezi withu uyo nyengo zose ngwakunozgeka kupulika malurombo ghithu. Talene uyo wazunulika kukwambilira, wakati: “Yehova ungamuphalira chilichose.” Para tamuphalira ivyo vili kusingo kwithu, Yehova wangatizgora kwizira mu Baibolo, mabuku, na Ŵakhristu ŵanyithu. Nangauli ŵanji ŵangapulikiska yayi masuzgo ghithu, kweni Yehova wakupulikiska madandawuro yithu. Yehova wakuzgora malurombo ghithu chifukwa chakuti nyengo zose wakutitemwa.

12. Chifukwa wuli tikwenera kughanaghanira malurombo gha ŵateŵeti ŵa Chiuta ŵakale? Yowoyani chiyelezgero.

12 Tingasambira vinandi ku malurombo agho ghakusangika mu Mazgu gha Chiuta. Tingadumbiskana malurombo agha pa nyengo yakusopera ya mbumba. Para tikughanaghanira umo ŵateŵeti ŵa Yehova ŵakale ŵakalomberanga, vingatovwira kumanya ivyo nase tingayowoya para tikulomba. Tingaghanaghanira ivyo Yona wakalomba apo wakaŵa mu nthumbo ya chisomba. (Yona 1:17–2:10) Tingadumbiskana ivyo Solomoni wakalomba kwa Yehova apo wakajuliranga tempile. (1 Mathe. 8:22-53) Ghanaghanirani ivyo Yesu wakalomba apo wakasambizganga ŵasambiri ŵake umo ŵangalombera. (Mat. 6:9-13) Nyengo zose ‘madandawuro ghithu ghamanyikwe kwa Chiuta, ndipo mtende wa Chiuta uwo ukuluska ghanoghano lililose usungilirenge mitima yithu na maghanoghano ghithu.’ Para tikulomba tikulongora kuti tikuwonga chitemwa cha Yehova.—Fil. 4:6, 7.

SEMBE YA YESU

13. Kasi sembe ya Yesu yatipa mwaŵi wuli?

13 Sembe ya Yesu yikapelekeka kuti “tisange umoyo.” (1 Yoh. 4:9) Sembe ya Yesu yikulongora chitemwa chikuru cha Chiuta. Mpositole Paulosi wakalemba kuti: ‘Khristu wakafwira ŵanthu ŵambura kopa Chiuta pa nyengo yakutemeka. Pakuti ni viŵi chara kuti munthu wafwire murunji; nadi, panyake yunji wangachita chikanga kuti wafwire munthu muwemi. Kweni  Chiuta wakuphara chitemwa cha iyomwene kwa ise, mu fundo yakuti apo tikaŵa tichali ŵakwananga, Khristu wakatifwira.’ (Rom. 5:6-8) Sembe iyi yikulongora kuti Yehova wakutitemwa chomene ndipo yatipa mwaŵi wakuti tiŵe nayo paubwezi.

14, 15. Kasi sembe ya Yesu yapeleka mwaŵi wuli ku (a) Ŵakhristu ŵakuphakazgika (b) awo ŵazamukhala pa charu chapasi?

14 Yehova walongoraso chitemwa chake ku Ŵakhristu ŵachoko waka munthowa yinyake yapadera. (Yoh. 1:12, 13; 3:5-7) Ŵakhristu aŵa ŵakuphakazgika na mzimu utuŵa kuti ŵaŵe ‘ŵana ŵa Chiuta.’ (Rom. 8:15, 16) Paulosi wakati: ‘Wakatiwuskira pamoza na kutikhalika pamoza mu malo ghakuchanya pakuti tili mu umoza na Khristu Yesu.’ (Efe. 2:6) Ŵakhristu ŵakuphakazgika ŵamukhala kuchanya chifukwa ŵali ‘kudindika na mzimu utuŵa uwo ukalayizgika, uwo ntchikhole cha chiharo chawo’ icho ‘chikusungikira iwo kuchanya.’—Efe. 1:13, 14; Kol. 1:5.

15 Ŵanthu ŵanyake wose awo ŵali na chipulikano mu sembe ya Yesu ŵali na mwaŵi wakuŵa ŵabwezi ŵa Yehova ndipo ŵazamukhala mu Paradiso pa charu chapasi kwamuyirayira. Ntheura, sembe ya Yesu yikulongora kuti Yehova wakutemwa ŵanthu wose. (Yoh. 3:16) Usange tikulindizga kuzakakhala na umoyo pa charu chapasi, tikwenera kulutilira kumuteŵetera mwakugomezgeka. Kweniso mu charu chiphya Yehova wazamutichitira chilichose kuti tizakasangwe na umoyo. Nadi, sembe ya Yesu yikulongora kuti Chiuta wakutitemwa chomene.

UMO TINGAWONGERA CHITEMWA CHA YEHOVA

16. Chifukwa wuli tikwenera kughanaghanira umo Yehova wakutitemwera?

16 Tingakwaniska yayi kupenda vinthu vyose ivyo vikulongora kuti Yehova wakutitemwa. Davide wakimba kuti: ‘Nako nkhuzirwa kwa maghanoghano ghinu kwa ine, A Yehova! nawo mbunandi pakughapenda! Usange natenge nighapende nganandi ghakuluska mchenga.’ (Sal. 139:17, 18) Para tikughanaghanira umo Yehova wakutitemwera nase tilutilirenge kumutemwa chomene. Ipo tiyeni tichite vyose ivyo tingakwaniska kuti tilongore kuti tikutemwa Yehova.

17, 18. Kasi ni vichi vinyake ivyo tingachita kuti tilongore kuti tikutemwa Chiuta?

17 Pali vinyake ivyo tingachita kuti tilongore kuti tikutemwa Yehova. Para tikulimbikira kupharazga Ufumu wa Chiuta, tikulongora kuti tikutemwa Yehova kweniso ŵazengezgani ŵithu. (Mat. 24:14; 28:19, 20) Tingalongoraso kuti tikumutemwa Yehova para tikulutilira kuzizipizga viyezgo. (Ŵazgani Salmo 84:11; Yakobe 1:2-5.) Para tasangana na masuzgo, tikwenera kugomezga kuti Chiuta wakumanya masuzgo ghithu ndipo watovwirenge chifukwa ndise ŵakuzirwa chomene kwa iyo.—Sal. 56:8.

18 Chitemwa chikutichiska kuti tighanaghanirenge ivyo Yehova wali kulenga na viwemi vinyake ivyo wakutichitira. Para tikuŵikapo mtima kusambira Baibolo tikulongora kuti tikumutemwa Yehova na kuchindika Mazgu ghake. Lurombo lukutovwira kuti tiŵe paubwezi na Yehova. Tilutilirenge kumutemwa Yehova para tikughanaghanira sembe ya Yesu iyo yikapelekeka chifukwa cha zakwananga zithu. (1 Yoh. 2:1, 2) Ivi ni vinyake ivyo tingachita kulongora kuti tikuwonga Yehova chifukwa chakuti wakutitemwa.