Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  July 2015

Ŵakajipeleka na Mtima Wose ku Russia

Ŵakajipeleka na Mtima Wose ku Russia

KWA vyaka vinandi, boma la Russia likazomerezganga chara kuti Ŵakaboni ŵa Yehova ŵapharazgenge. Kweni mu 1991, Ŵakaboni ŵakakondwa chomene apo boma ili likazomerezgaso mulimo wawo wa kupharazga. Pa nyengo iyo, ŵanandi ŵakamanyanga yayi kuti ku Russia kuzamuŵa Ŵakaboni ŵanandi nga umo viliri sono. Sono ku Russia kuli Ŵakaboni ŵakujumpha 170,000. Ŵanandi mwa ŵapharazgi ŵa Ufumu aŵa, ŵali kufuma mu vyaru vinyake ndipo ŵakukhala ku Russia kuti ŵawovwire pa mulimo wa kuvuna. (Mat. 9:37, 38) Tiyeni tiwone ŵanyake mwa iwo.

ŴABALI ŴAKUKHOZGA MIPINGO

Matthew wa ku Great Britain, wakaŵa na vyaka 28 mu chaka icho boma la Russia likazomerezga mulimo wa kupharazga. Mu nkhani yinyake iyo yikaŵa pa ungano wa chigaŵa mu chaka icho, muyowoyi wakayowoyapo chomene kuti mipingo ya kumafumiro gha dazi kwa Europe yikukhumbikwira wovwiri. Muyowoyi wakazunurapo mpingo wa ku St. Petersburg, uwo ukaŵavya ŵalara kweni ukaŵa waka na muteŵeti wakovwira yumoza. Kweni ŵapharazgi ŵakasambiranga Baibolo na ŵanthu ŵanandi. Matthew wakati: “Nkhani iyi yikati yamara, mu mutu mukendanga waka vya kusamira ku Russia. Ntheura nkhalomba kwa Yehova na kumuphalira kuti nkhukhumba kusamira ku Russia.” Matthew wakamba kusunga ndalama na kuguliskapo katundu wake munyake. Ndipo mu 1992, wakasamira ku Russia. Kasi vinthu vikamwendera wuli?

Matthew

Matthew wakati: “Chiyowoyero ndicho chikaŵa chakusuzga chomene. Nkhatondekanga kudumbiskana na ŵanthu mu uteŵeti.” Suzgo linyake likaŵa malo ghakukhala. Matthew wakati: “Nkhakhaliranga waka kusama nyumba iyi na kunjira yinyake chifukwa ŵenecho ŵa nyumba ŵakanibuchizganga waka kuti nifumemo.” Nangauli pakwamba Matthew wakakumana na masuzgo agha, kweni iyo wakuti: “Nkhachita chinthu chamahara chomene kusamira ku Russia. Chifukwa chakuti nkhuteŵetera kuno, nasambira kugomezga chomene Yehova ndipo nawona kuti wakunovwira mu nthowa zinandi.” Nyengo yikati yajumphapo, Matthew wakaŵa mulara ndiposo mupayiniya wapadera. Pasono wakuteŵetera pa ofesi ya munthavi pafupi na St. Petersburg.

Mu 1999, Hiroo wakamalizga Sukulu Yakusambizga Uteŵeti ku Japan. Panyengo iyi wakaŵa na vyaka 25.  Yumoza mwa ŵasambizgi pa sukulu iyi wakamuchiska kuti wakateŵetere ku charu chinyake. Hiroo wakapulikapo kuti ku Russia kukukhumbikwira wovwiri, ntheura wakamba kusambira chiyowoyero cha ku Russia. Wakachitaso chinthu chinyake. Iyo wakuti: “Nkhaluta ku Russia na kukhalako myezi 6. Nkhaluta mu Novembala kuti nkhawone usange ningakwaniska kukhala, chifukwa ku Russia kukuzizima chomene mu nyengo iyi.” Wati wakhala ku Russia myezi yose yakuzizima, Hiroo wakawelera ku Japan. Wati wafika, wakamba kusunga ndalama kuti zikamovwire para wasamira ku Russia chifukwa ndiko wakakhumbanga kuti wakakhalenge.

Hiroo na Svetlana

Hiroo wakakhala ku Russia vyaka 12 ndipo wakateŵetera mipingo yinandi. Nyengo zinyake, mulara wakaŵanga yekha pa mpingo ndipo wakapweleleranga ŵapharazgi ŵakujumpha 100. Pa mpingo unyake, sabata yiliyose wakalongozganga Sukulu ya Uteŵeti wa Chiuta, Gongwe la Mulinda, na kudumba nkhani zinandi mu Ungano wa Uteŵeti. Wakalongozgangaso magulu 5 gha Sambiro la Buku la Mpingo, ilo sono ni Sambiro la Baibolo la Mpingo. Wakenderangaso ŵabali ŵanandi mu nyumba zawo na kuŵakhozga. Hiroo wakukumbuka umo vikaŵira nyengo iyo, ndipo wakuti: “Chikaŵa chakukondweska chomene kovwira ŵabali na ŵadumbu kuti ŵaŵe ŵakukhora mwauzimu.” Kasi watumbikika wuli chifukwa cha kuteŵetera uko kukakhumbikwiranga wovwiri? Iyo wakuti: “Pambere nindize ku Russia, nkhaŵa kale mulara ndiposo mupayiniya. Kweni nati niza kuno, nkhuwona nga namba ubwezi uphya na Yehova. Nasambira kugomezga chomene Yehova pa chilichose.” Mu 2005, Hiroo wakatorana na Svetlana, ndipo ŵakulutilira kuchitira lumoza upayiniya.

Michael na Olga kweniso Marina na Matthew

Matthew, wa ku Canada uyo wali na vyaka 34, na munung’una wake Michael, wa vyaka 28, ŵakaluta ku Russia ndipo ŵakakondwa kuwona ŵanthu ŵanandi ŵakwiza ku maungano. Kweni kukaŵa ŵabali ŵachoko ŵakuti ŵachitiskenge maungano. Matthew wakuti: “Mpingo uwo nkhalutako kukawungananga ŵanthu 200, kweni maungano wakalongozganga ni mulara yumoza muchekuru na muteŵeti wakovwira yumoza muwukirano. Nkhati nawona umo vikaŵira, nkhaghanaghana kuti ndiko nisamire kuti nkhawovwire ŵabali.” Ndipo mu 2002, wakasamira ku Russia.

Pakati pajumpha vyaka vinayi, Michael wakasamukira ku Russia. Wati wafika, wakawona kuti kukakhumbikwiranga nadi ŵabali ŵanandi. Pakuti wakaŵa muteŵeti wakovwira, wakapika mulimo wa kupwelelera ndalama za mpingo, mabuku, kweniso vigaŵa vyakupharazgako. Kweniso wakapempheka kuchita mulimo uwo ukeneranga kuchitika na mulembi wa mpingo, kuyowoya nkhani zachisanisani, kovwira kunozga maungano gha dera, na kuzenga Nyumba za Ufumu. Nanga ni sono wuwo, mipingo yinandi yikukhumbikwira wovwiri. Munthu wakwenera kujipata kuti wachite milimo yose iyi. Pasono Michael ni mulara, ndipo wakuti: “Ndine wakukondwa chomene chifukwa nkhovwira ŵabali. Nkhuwona kuti palije chinyake icho mphanyi nkhukondwa nacho kuluska milimo iyi.”

Matthew wakatorana na Marina, ndipo Michael wakatorana na Olga. Iwo pamoza na ŵabali ŵanandi ŵakujipeleka ŵakulutilira kovwira mipingo.

ŴADUMBU ŴAKOVWIRAPO PA MULIMO WA KUVUNA

Tatyana

Mu 1994, apo Tatyana wakaŵa na vyaka 16, ŵapayiniya ŵapadera 6 ŵakufuma ku Czech Republic, Poland, na Slovakia, ŵakamba kuteŵetera mu mpingo uwo wakawungananga ku Ukraine. Wakukumbuka makora ivyo ŵapayiniya aŵa ŵakachitanga, ndipo wakuti: “Ŵapayiniya aŵa ŵakalimbikiranga chomene kupharazga kweniso ŵakafwatukanga na ŵanthu. Ŵakaŵa ŵalusungu ndipo ŵakamanyanga Malemba.” Tatyana wakawona umo Yehova wakaŵatumbikira chifukwa cha mtima wawo wakujipeleka, ndipo mu mtima wakatenge, ‘Nane nkhukhumba kuŵa nga ndiwo.’

Tatyana wakasambirako kanthu ku ŵapayiniya aŵa. Para ku sukulu kuli holide, wakalutanga na ŵanyake ku vigaŵa vyakutali vya ku Ukraine na Belarus uko Ŵakaboni ŵakaŵa kuti ŵandapharazgeko. Wakakondwanga chomene na maulendo agha, mwakuti wakaghanaghana kusamira ku Russia kuti wasazgireko uteŵeti wake.  Pakwamba, wakakhalako mazuŵa ghachoko waka. Wakaluta kukawona mudumbu munyake uyo wakasamukira ku Russia. Mudumbu uyu nayo wakafuma ku charu chinyake. Kweniso Tatyana wakakhumbanga kukapenja ntchito iyo yingamovwira pakuchita upayiniya. Ntheura mu 2000, wakasamira ku Russia. Kasi wakakumana na suzgo wuli?

Tatyana wakuti: “Nkhaŵavya ndalama zakukwana zakulipilira nyumba ya renti, ntheura nkhachitanga renti chipinda chimoza mu nyumba iyo mukaŵa kale ŵanthu. Chikaŵa chipusu yayi kukhala mu nyumba yanthena. Nyengo zinyake nkhakhumbanga kuwelera kukaya. Kweni Yehova wakanovwiranga kuwona kuti wanitumbikenge usange ningalutilira kumuteŵetera.” Pasono Tatyana ni mishonale ku Russia, ndipo wakuti: “Vyaka vyose ivyo nakhala kuno ku Russia, nachita vinandi kweniso nasanga ŵabwezi ŵanandi. Kweni chakuzirwa chomene ntchakuti, mu vyaka ivi chipulikano chane chakhora chomene.”

Masako

Masako wa ku Japan, wali na vyaka vya m’ma 50. Kwamba kale wakakhumbanga kuŵa mishonale, kweni wakawonanga kuti vingachitika yayi chifukwa wakalwarangalwaranga. Kweni wakati waŵako makora, wakasamira ku Russia, kuti wakawovwire pa mulimo wa kuvuna. Chikaŵa chakusuzga kuti wasange nyumba yiwemi na ntchito yakukhazikika. Kweni vinthu vyakukhumbikwa pa umoyo wakaŵanga navyo apo wakachitanga upayiniya chifukwa wakasambizganga ŵanthu Chijapanizi. Kasi ntchivichi chamovwira kuti walutilire uteŵeti wake?

Para wakukumbukira vyaka 14 ivyo wateŵetera ku Russia, Masako wakuti: “Vinthu vyakukondweska ivyo vikunichitikira mu uteŵeti, vikuluska masuzgo agho nkhukumana nagho. Para wamunthu ukupharazga ku malo uko kuli ŵapharazgi ŵachoko, ukusambira vinandi kweniso umoyo ukunozga. Vyaka vyose ivyo nakhala kuno, para nkhughanaghanira umo Yehova wakunipira chakurya, vyakuvwara, na pakugona, nkhuwona nga ni munthondwe.” Padera pa kuteŵetera ku Russia, uko kukukhumbikwira wovwiri, Masako wakateŵeteraso ku Kyrgyzstan. Kweniso wawovwira magulu gha chiyowoyero cha Chingelezi, Chitchayinizi, na Wiga. Pasono, Masako ni mupayiniya ku St. Petersburg.

 AWO ŴAKUJIPELEKA ŴAKUTUMBIKIKA

Inga na Mikhail

Chifukwa cha suzgo la ndalama, mabanja ghanandi ghakusamira ku vyaru vinyake kukapenja ndalama. Kweni mabanja ghanyake ghali kuchita nga ni Abrahamu na Sara. Ghali kusamukira ku vyaru vinyake kuti ghakachite vinthu vyauzimu. (Gen. 12:1-9) Mwachiyelezgero, Mikhail na muwoli wake Inga ŵali na vyaka vya m’ma 40. Iwo mba ku Ukraine, ndipo ŵakasamira ku Russia mu 2003. Ŵati ŵafika waka, ŵakasanga ŵanthu awo ŵakakhumbanga kumanya unenesko.

Mikhail wakuti: “Nyengo yinyake tikapharazga ku malo uko Ŵakaboni ŵakaŵa kuti ŵandapharazgeko. Tikati tafika pa nyumba yinyake, dada munyake muchekuru wakajurako ndipo wakafumba kuti, ‘kasi ndimwe ŵapharazgi?’ Tikati tazomera, wakati: ‘Nkhamanyanga kuti zuŵa linyake mwizenge. Vingachitika yayi kuti mazgu gha Yesu ghaleke kufiskika.’ Pamanyuma dada uyu wakazunura lemba la Mateyu 24:14.” Mikhail wakatiso: “Mu chigaŵa ichi, tikasangaso ŵanakazi 10 ŵa tchalitchi la Babatisiti. Iwo ŵakaŵa na mtima wa kukhumba kumanya unenesko. Ŵakaŵa na buku la Mungathe Kukhala ndi Moyo Kosatha M’paradaiso pa Dziko Lapansi ndipo sabata yiliyose ŵakasambiranga Baibolo na buku ili. Tikazgora mafumbo ghawo kwa maora ghanandi na kwimba nawo sumu za Ufumu. Kweniso tikarya nawo chakurya cha namise. Ulendo uwu nizamuluwa yayi.” Mikhail na Inga nawo ŵakuti ubwezi wawo na Yehova wakhora chomene chifukwa cha kuteŵetera uko kuli ŵapharazgi ŵachoko ŵa Ufumu. Ŵakutemwa chomene ŵanthu, kweniso mbakukondwa. Pasono ŵakuchita uteŵeti wakwendakwenda.

Oksana, Aleksey, na Yury

Yury na Oksana, mbakutorana ŵakufuma ku Ukraine ndipo ŵali na vyaka vya m’ma 30. Mu 2007, ŵakaluta kukendera munthavi wa ku Russia pamoza na mwana wawo Aleksey uyo wali na vyaka 13. Ŵakawona mapu gha Russia agho ghakaŵa na vigaŵa vinandi ivyo Ŵakaboni ŵandapharazgeko. Oksana wakuti: “Tikati tawona mapu agha, tikawona kuti kukukhumbikwira nadi ŵapharazgi ŵa Ufumu. Ntheura tikasamira ku Russia.” Kasi ntchivichi chinyake icho chikaŵawovwira? Yury wakuti: “Tikaŵazganga nkhani mu mabuku ghithu, nga njakuti, ‘Kodi Mungakatumikire Kudziko Lina?’ * Nkhani izi zikatovwira chomene. Tikaluta ku Russia kukendera chigaŵa icho Munthavi ukasachizga kuti tingasamirako. Tikati tafika, tikamba kupenja nyumba na ntchito.” Mu 2008, ŵakasamira ku Russia.

Pakwamba, ntchito zikaŵasoŵanga. Ŵakakhaliranga waka kusinthasintha nyumba. Yury wakuti: “Kanandi tikalombanga kuti tileke kugongowa, ndipo tikalutilira kupharazga chifukwa tikagomezganga kuti Yehova watovwirenge. Yehova wakatovwira chifukwa chakuti tikadangizga vya Ufumu. Uteŵeti uwu wakhozga chomene banja lithu.” (Mat. 6:22, 33) Kasi kuteŵetera uko kukukhumbikwira ŵapharazgi ŵanandi kwawovwira wuli Aleksey? Oksana wakuti: “Kwamovwira chomene. Wakajipeleka kwa Yehova na kubatizika apo wakaŵa na vyaka 9. Pakuti wawona kuti kuno kukukhumbikwira ŵapharazgi ŵanandi ŵa Ufumu, wakuchita upayiniya wakanyengo para sukulu zajara. Tikukondwa chomene chifukwa wakutemwa uteŵeti.” Pasono, Yury na Oksana mbapayiniya ŵapadera.

“ICHO NKHUDANDAWURA NACHO”

Ŵabali na ŵadumbu awo ŵakuchita mulimo wa kuvuna ŵakutichiska kuti tikwenera kugomezga chomene Yehova para tikukhumba kukateŵetera ku vigaŵa vinyake. Mbunenesko kuti awo ŵakuteŵetera mu vigaŵa ivi ŵakukumana na masuzgo, kweni ŵakukondwa chomene chifukwa cha kovwira ŵanthu awo ŵakunweka na makani ghawemi. Kasi namwe mungachitako ntchito ya kuvuna mu vigaŵa ivyo mukukhumbikwira ŵapharazgi ŵanandi? Usange ndivyo mukukhumba kuchita, namwe muzamuyowoya nga ni Yury, uyo wakati: “Chekha icho nkhudandawura nacho, ntchakuti nkhaluta mwakuchedwa kukateŵetera uko kukakhumbikwiranga wovwiri.”

^ ndime 20 Wonani Gongwe la Mulinda la Chicheŵa la Okutobala 15, 1999, peji 23-27.