Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) MAY 2015

 KUFUMA MU NTHAMBA YITHU

Chitemwa Ndicho Chikawovwiranga

Chitemwa Ndicho Chikawovwiranga

NYENGO zose Ŵakaboni ŵa Yehova ŵakukondwa chomene para ŵawungana kuti ŵarye chakurya chauzimu. Kweniso ŵakukondwa chomene para ŵakulyera lumoza chakurya chakuthupi pa nyengo yakupumura.

Mu Seputembala 1919, Ŵasambiri ŵa Baibolo ŵakaŵa na ungano wa mazuŵa 8 ku Cedar Point, Ohio, U.S.A. Kukiza ŵanthu ŵanandi chomene ku ungano uwu. Ŵanthu ŵanandi ŵakagonanga na kurya ku mahotelo. Pakuti ntchito yikaŵa yinandi, awo ŵakagwiranga ntchito ya kuphika na kupelekera chakurya pa hotelo yinyake, ŵakagaŵana ntchito. Mulara wa pa hotelo iyi wakapempha ŵalendo ŵachinyamata kuti ŵawovwire kugwira ntchito ya kuphika na kupelekera chakurya. Ŵanandi ŵakajipeleka. Sadie Green nayo wakajipeleka. Iyo wakati: “Kakaŵa kakwamba kugwira ntchito ya kuphika. Kweni tikakondwa chomene.”

Sierra Leone, 1982

Kwamba pa nyengo iyi, ŵabali na ŵadumbu ŵakamba kujipeleka kuphika na kupelekera chakurya pa maungano. Ŵawukirano ŵanandi ŵakamba kuŵa na vilato vyauzimu chifukwa ŵabali na ŵadumbu ŵakagwiliranga lumoza ntchito. Mu 1937, Gladys Bolton wakajipeleka kuphika na kupelekera chakurya pa ungano wa chigaŵa. Iyo wakati: “Tikamanyana na ŵanthu ŵakufuma ku vigaŵa vinandi, kweniso ŵakatiphaliranga umo ŵakachitiranga para ŵakumana na masuzgo. Nane nkhadokera kwamba upayiniya.”

Beulah Covey wakati: “Ŵanthu ŵanandi ŵakajipeleka ndipo ŵakagwira ntchito na mtima umoza nga ni nyerere.” Ndipouli pakaŵa masuzgo ghanyake. Angelo Manera wakati wafika ku Dodger Stadium ku Los Angeles, California, mu 1969, ŵakamuphalira kuti wagwirenge ntchito ya kuphika na kupelekera chakurya pa ungano. Iyo wakati: “Nkhazizwa chomene chifukwa nkhaŵa kuti nindachitepo ntchito iyi.” Pa kunozgekera ungano uwu, ŵakajima mugero uwo mukenda payipi ya gasi mamita 400 kuti ukafike uko ŵakaphikiranga.

Frankfurt, Germany, 1951

Mu 1982, ku Sierra Leone, ŵanandi ŵakajipeleka kuzenga na kunozga malo ghakupokerako chakurya pa ungano. Mu 1951, ku Frankfurt, Germany, ŵabali ŵakachita hayara galimoto iyo yikanyamura migomo panji mapoto ghakurughakuru 40. Ŵabali na ŵadumbu ŵakagaŵanga chakurya ku ŵanthu 30,000 pa ora limoza. Pakaŵa ŵabali na ŵadumbu 576 awo ŵakasukanga mbale. Kuti ntchito ya kusuka mbale yichepeko, waliyose wakizanga na foloko kweniso chimayi chake. Ku Yangon, Myanmar, awo ŵakaphikanga ŵakathiranga sabola munandi yayi ku chakurya  chifukwa ŵakaghanaghaniranga ŵabali ŵakufuma mu vyaru vinyake.

“ŴAKUCHITA KURYA CHAKWIMILIRA”

Annie Poggensee nayo wakaŵapo pa ungano uwo ukachitikira ku United States mu 1950. Ŵabali na ŵadumbu ŵakandandanga pa mzere kuti ŵapokere chakurya, zuŵa lili nge! Apo Annie wakaŵa pa mzere, wakachezga na ŵadumbu ŵaŵiri ŵakufuma ku Europe. Iyo wakati: “Nkhakondwa chomene kumanyana nawo. Iwo ŵakenda pa boti kuti ŵazakafike pa ungano uwu.” Iyo wakawona kuti ukaŵa mwaŵi wapadera chomene kuchezga nawo. Ŵadumbu aŵa ŵakalongosora umo Yehova wakaŵawovwilira kuti ŵize ku ungano. Annie wakati: “Ŵadumbu aŵa ŵakakondwa chomene. Ŵakadandaurapo yayi kuti ŵakaphyanga na zuŵa pa mzere kuti ŵapokere chakurya.”

Seoul, Korea, 1963

Pa maungano ghakurughakuru pakanozgekanga malo ghakulyera ndipo pakaŵanga mathebulu ghatalighatali. Awo ŵakalyeranga pa mathebulu agha ŵakachitanga kwimilira. Ivi vikawovwiranga kuti ŵamalizge luŵiro kurya na kupeleka mpata ku ŵanyawo. Munthu munyake uyo wakaŵa Kaboni yayi wakati: “Ŵanthu aŵa mbamaseŵera yayi. Ŵakuchita kurya chakwimilira.”

Ŵasilikari na ŵalara ŵa boma ŵakazizikika chomene chifukwa cha kukolerana kwa ŵabali na ŵadumbu. Mulara munyake wa ŵasilikari ŵa ku United States wakaŵapo pa ungano uwo ukachitikira ku Yankee Stadium, New York. Iyo wakawona umo ŵabali na ŵadumbu ŵakachitiranga pa nyengo ya chakurya. Wakapempha Faulkner, mulara wa ŵasilikari ŵa ku Britain, kuti nayo wazakajiwonere yekha. Ntheura, Faulkner na mwanakazi wake ŵakiza pa ungano uwo ukachitika mu 1955, wa mutu wakuti, “Ufumu Uwo Ukutonda.” (Triumphant Kingdom) ku Twickenham, England. Nayo wakawona kuti chitemwa ndicho chikawovwiranga kuti vinthu vyende makora pa nyengo ya chakurya.

Kwa vyaka vinandi, ŵabali na ŵadumbu ŵakalongora kuti ŵakutemwa ŵanyawo. Ŵakajipelekanga kunozga chakurya chiwemi na kupeleka kwa awo ŵiza pa ungano. Kweni suzgo likaŵa lakuti ŵabali na ŵadumbu awo ŵakawovwiranga pa ntchito iyi, ŵakategherezganga makora yayi maungano. M’ma 1970, ndondomeko ya kunozga chakurya pa ungano yikasintha mu vigaŵa vinandi. Kweni kwamba mu 1995, waliyose uyo wakwiza ku ungano wakunyamura chakurya. Ichi chawovwira kuti ŵabali na ŵadumbu ŵaleke kutangwanika na ntchito ya kuphika pa nyengo ya ungano. M’malo mwake, wose ŵakuŵa na nyengo yakuchezga na kutegherezga kwambura nthimbanizgo. *

Yehova wakukondwa chomene para ŵabali ŵakujipeleka kuteŵetera ŵanyawo. Mazuŵa ghano, ŵanyake ŵangawona nga kuti maungano ghakunozga yayi chifukwa chakuti vyakuphika pa maungano vili kumara. Kweni pali chinthu chinyake icho chindasinthe. Chinthu ichi ntchitemwa. Chitemwa chikupangiska kuti maungano ghithu ghanozgenge chomene.—Yoh. 13:34, 35.

^ ndime 12 Ŵabali na ŵadumbu ŵachali kujipeleka kovwira mu madipatimenti ghanyake pa maungano.