Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) APRIL 2015

Gomezgani Yehova Nyengo Zose

Gomezgani Yehova Nyengo Zose

“Tamirani Iyo nyengo zose.”—SAL. 62:8.

1-3. Chifukwa wuli Paulosi wakagomezganga Yehova? (Wonani chithuzithuzi chakwamba.)

ŴAKHRISTU ŵakwambilira ŵakatambuzgikanga chomene mu Romu. Mu 64 C.E., Ŵaroma ŵakapusikizgira Ŵakhristu kuti ndiwo ŵakabuska moto mu Romu kweniso ŵakapangiskanga kuti ŵanthu ŵatinkhanenge. Ŵabali na ŵadumbu ŵithu ŵanandi ŵakakakika. Ŵanyake ŵakatwazulikanga na nyama zakofya. Ŵanyake ŵakaŵakhomanga pa khuni na kuŵawotcha.

2 Mpositole Paulosi nayo wakakakika pa nyengo iyi. Panji wakaghanaghananga kuti ŵabali ŵamovwirenge yayi, chifukwa pakwamba palije uyo wakamovwira. Kweni Yesu wakamovwira. Paulosi wakati: “Fumu yikimilira pafupi nane ndipo yikanipa nkhongono.” Yesu wakapeleka nkhongono kwa Paulosi kuti wazizipizge masuzgo. Paulosi wakalembaso kuti “nkhathaskika ku mulomo wa nkhalamu.”—2 Tim. 4:16, 17. *

 3 Paulosi wakakumbuka umo Yehova wakamovwilira kumasinda. Ntheura wakaŵa na chigomezgo kuti Yehova wamupenge nkhongono kuti wazizipizge chiyezgo chilichose. Lekani wakalemba kuti: “Fumu yizamunithaska ku mulimo uliwose uheni.” (2 Tim. 4:18) Paulosi wakagomezganga kuti Yehova na Yesu ŵamovwirenge nanga ŵabali ŵangatondeka kumovwira. Wakakayikanga yayi napachoko.

APO TINGALONGOLERA KUTI ‘TIKUTAMIRA YEHOVA’

4, 5. (a) Kasi ni njani uyo wangamovwirani nyengo zose? (b) Kasi tingachita wuli kuti tikhozge ubwezi withu na Yehova?

4 Kasi muli kukumanapo na suzgo ndipo palije uyo wakamovwirani? Panji muli kukumanapo na masuzgo nga ni agha: kumara kwa ntchito, masuzgo gha ku sukulu, matenda na masuzgo ghanyake. Panji mukapempha munthu kuti wamovwirani, kweni wakamovwirani umo imwe mukakhumbiranga yayi. Ŵanthu ŵangamazga masuzgo ghose yayi. Para mwakumana na masuzgo, kasi mukwenera kuchita wuli? Baibolo likuti, “tamira mwa Yehova.” (Zinth. 3:5, 6) Mukwenera kugomezga kuti Yehova wamovwiraninge. Mu Baibolo muli nkhani zinandi izo zikulongora kuti Yehova wakovwira ŵanthu ŵake.

5 Ntheura, kugongowa yayi para ŵanthu ŵatondeka kumovwirani. M’malo mwake, para mwakumana na masuzgo ndiyo nyengo iyo mukwenera kugomezga chomene Yehova. Kweniso kuwona kuti Yehova wakumupwelelerani. Para mwachita nthena mumugomezgenge chomene kweniso ubwezi winu na iyo ukhorenge.

GOMEZGANI YEHOVA

6. Chifukwa wuli nyengo zinyake chikuŵa chinonono kugomezga Yehova?

6 Panji muli na suzgo linyake ilo likumuhangayiskani. Tikukayika yayi kuti mwalombapo kanandi waka kwa Yehova kuti wamovwirani. Panji mwayezga nthowa zinyake kuti mulimbane na suzgo linu. Usange mugomezgenge Yehova, musuzgikenge maghanoghano yayi. (Ŵazgani Salmo 62:8; 1 Petrosi 5:7.) Kuti muŵe paubwezi na Yehova, mukwenera kumugomezga. Ndipouli, nyengo zinyake chikuŵa chinonono kuchita nthena. Chifukwa wuli? Nyengo zinyake tingawona nga kuti Yehova wakuchedwa kuzgora malurombo ghinu.—Sal. 13:1, 2; 74:10; 89:46; 90:13; Hab. 1:2.

7. Chifukwa wuli nyengo zinyake Yehova wakuzgora nyengo yeneyiyo yayi malurombo ghithu?

7 Chifukwa wuli nyengo zinyake Yehova wakuzgora nyengo yeneyiyo yayi malurombo ghithu? Baibolo likuti Yehova wali nga ni dada. (Sal. 103:13) Nyengo zinyake, dada wangapeleka nyengo yeneyiyo yayi icho mwana wake wapempha. Dada wakumanya kuti mwana wangalomba chinthu chinyake ndipo para pajumpha nyengo wangachikhumbaso yayi. Wakumanya icho ntchiwemi kwa mwana wake kweniso umo vingakhwaskira ŵanyake. Wakumanyaso icho mwana wake wakukhumbikwira nadi ndiposo nyengo yiwemi iyo wangamupira. Dada wangazgoka muzga wa mwana wake usange wakupeleka chilichose icho mwana wakukhumba. Yehova wakutitemwa chomene. Iyo ni Mlengi wavinjeru, ndipo wakumanya icho tikukhumbikwira kweniso nyengo yiwemi iyo wangatipira. Ntchakuzirwa chomene kulindilira m’paka  apo wazamutizgolera.—Yaniskani na Yesaya 29:16; 45:9.

8. Kasi Yehova wakutilayizga vichi?

8 Yehova wakumanya chiyezgo icho munthu waliyose wangakwaniska kuzizipizga na icho wangatondeka. (Sal. 103:14) Ntheura wakutipa nkhongono kuti tizizipizge. Nyengo zinyake tingawona kuti nkhongono zatimalira. Yehova wakutilayizga kuti usange chiyezgo icho takumana nacho ntchikuru chomene, iyo “wapelekengeso nthowa yakufumiramo.” (Ŵazgani 1 Ŵakorinte 10:13.) Ntchakukhozga chomene kuti Yehova wakumanya viyezgo ivyo tingakwaniska kuzizipizga.

9. Usange talomba kwa Yehova ndipo wakuchedwa kutizgora, kasi tikwenera kuchita wuli?

9 Usange talomba kwa Yehova ndipo tikuwona nga kuti wakuchedwa kuzgora, kasi tikwenera kuchita wuli? Tikwenera kuzikira. Kumbukani kuti Yehova ngwakukhumbisiska kutovwira, kweni wakulindilira nyengo yiwemi kuti watipe ivyo tikukhumba. Baibolo likuti: ‘Yehova wakulindizga kuti waŵe namwe na lusungu. . . Chifukwa Yehova ni Chiuta wakweruzga mu urunji; mbakutumbikika wose awo ŵakumulindilira.’—Yes. 30:18.

“MULOMO WA NKHALAMU”

10-12. (a) Chifukwa wuli nyengo zinyake chingaŵa chinonono kupwelelera ŵalwari? (b) Kasi ntchivichi chingachitika para mukugomezga chomene Yehova pa nyengo ya masuzgo? Yowoyani chiyelezgero.

10 Panji namwe mukusangana na masuzgo agho ghali nga ni “mulomo wa nkhalamu.” Ipo mukujipulika nga ni Paulosi uyo wakakhumbikwiranga munthu munyake kuti wamovwire. Pa nyengo iyi mukwenera kugomezga chomene Yehova. Panji mukupwelelera mubali winu uyo wakulwara. Mungaŵa kuti mwalomba Yehova kuti wamovwirani kusankha makora vinthu kweniso kuti muŵe ŵakukhora. * Manyani kuti Yehova wakumuwonani ndiposo wakumanya masuzgo ghinu. Wamovwiraninge kuti muzizipizge kweniso kuti mulutilire kuŵa ŵakugomezgeka. Ndipo muzamuŵa na mtende wa mu mtima.—Sal. 32:8.

11 Nyengo zinyake mungawona nga kuti Yehova wakumovwirani yayi. Mwachiyelezgero, madokotala ghangakana kumovwirani umo mukukhumbira. Ŵabali ŵinu ŵakuthupi nawo ŵangamba kumususkani m’malo mwa kumovwirani. Para vyaŵa nthena, gomezgani Yehova kuti wamupani nkhongono zakuzizipizgira. Sendelerani chomene kwa iyo. (Ŵazgani 1 Samuel 30:3, 6.) Para mwawona kuti Yehova wakumovwirani, ubwezi winu na iyo ungakhora chomene.

12 Linda * nayo vikamuchitikirapo. Wakapweleleranga ŵapapi ŵake awo ŵakalwara kwa nyengo yitali. Iyo wakati: “Pa nyengo iyi, ine, mfumu wane, na mudumbu wane tikasoŵanga chakuchita. Nyengo zinyake nkhongono zikatimaliranga. Ndipouli, Yehova wakatovwira. Wakatikhozganga na kutovwira pa nyengo iyo tasoŵa pakukora.”

13. Kasi kugomezga chomene Yehova kukamovwira wuli Rhonda?

13 Para tikugomezga chomene Yehova tizizipizgenge masuzgo. Ivi ndivyo vikawovwira Rhonda. Mfumu wake uyo wakaŵa  Kaboni wa Yehova yayi wakakhumbanga kumazga nthengwa. Pa nyengo iyi, mudumbu wa Rhonda wakasangika na matenda ghakofya. Pakati pajumpha myezi yichoko waka, muwoli wa mudumbu wake wakafwa. Rhonda wakamba upayiniya chitima chikati chachepako. Pamasinda amama ŵake ŵakafwa. Kasi ntchivichi chikawovwira Rhonda kuzizipizga? Iyo wakati: “Zuŵa lililose nkhalombanga kwa Yehova nanga pangaŵa pa tunthu tuchoko chomene. Nkhamba kugomezga chomene Yehova m’malo mwa kujigomezga panji kugomezga ŵanthu. Nadi, Yehova wanovwira pa masuzgo ghane ghose.”

Mu mbumba namo tingakumana na viyezgo ivyo vingatimbanizga ubwezi withu na Yehova (Wonani 14-16)

14. Kasi Yehova wangamovwirani wuli para mubali winu wasezgeka?

14 Tiyeni tiwone suzgo linyake. Tiyelezgere kuti mubali winu wasezgeka mu mpingo. Mukumanya ivyo Baibolo likuyowoya pa nkhani iyi. (1 Kor. 5:11; 2 Yoh. 10) Pakuti mukutemwa mubali winu uyo wasezgeka, nyengo zinyake chingamuŵirani chinonono kupulikira ulongozgi wa mu Baibolo. * Kweni para mukugomezga Yehova, wamupaninge nkhongono kuti mulutilire kuŵa ŵakugomezgeka. Para mubali winu wasezgeka, wonani kuti ndiyo ni nyengo yakuti mukhozge chomene ubwezi winu na Yehova.

15. Chifukwa wuli Adamu wakatondeka kupulikira Yehova?

15 Kasi nkhani iyi yikuyana wuli na ivyo Adamu wakachita? Adamu wakamanyanga kuti wafwenge usange waleka  kupulikira Yehova. Baibolo likuti: ‘Adamu kuti wakapusikika chara.’ (1 Tim. 2:14) Ipo chifukwa wuli Adamu wakatondeka kupulikira Yehova? Wakatemwanga chomene muwoli wake kuluska Yehova. Wakapulikira muwoli wake m’malo mwa kupulikira dango la Yehova.—Gen. 3:6, 17.

16. Kasi tikwenera kukhozga ubwezi withu na njani? Chifukwa wuli?

16 Ivyo wakachita Adamu vikutisambizga kuti tikwenera kutemwa Yehova kuluska waliyose. (Ŵazgani Mateyu 22:37, 38.) Usange tikutemwa chomene Yehova, tovwirenge makora ŵabali ŵithu, kwali ŵakuteŵetera Yehova panji yayi. Ntheura, lutilirani kukhozga ubwezi winu na Yehova na kumugomezga chomene. Usange mukwenjerwa chifukwa cha mubali winu wakusezgeka, lombani kwa Yehova na kumuphalira umo mukujipulikira. * (Rom. 12:12; Fil. 4:6, 7) Nangauli mukukwenyelera kuti mubali winu wali kusezgeka, kweni iyi ni nyengo yakuti mukhozge chomene ubwezi winu na Yehova. Para mwachita nthena mumugomezgenge chomene Yehova na kumupulikira chifukwa mukumanya kuti para mukumupulikira mutumbikikenge chomene.

APO TIKULINDILIRA KUTI VINTHU VISINTHE

Para mukulimbikira kupharazga ndikuti mukugomezga Yehova (Wonani ndime 17)

17. Usange tikulimbikira kupharazga, kasi Yehova watichitirenge vichi?

17 Chifukwa wuli Yehova wakaponoska Paulosi mu “mulomo wa nkhalamu”? Paulosi wakati: “Kuti kwizira mwa ine upharazgi ufiskike mwakukwana, ntheura kuti mitundu yose yipulike upharazgi uwu.” (2 Tim. 4:17) Yehova watituma kuti tipharazgenge “makani ghawemi,” ndipo wakuwona kuti ndise ‘ŵantchito ŵanyake.’ (1 Tes. 2:4; 1 Kor. 3:9) Usange tikulimbikira kuchita ntchito iyi, tigomezgenge kuti Yehova watipenge chilichose icho tikusoŵerwa. (Mat. 6:33) Ndipo tilindilirenge Yehova kuti wazgore malurombo ghithu.

18. Kasi ntchivichi chingamovwirani kuti mugomezgenge chomene Yehova?

18 Nyengo zose khozgani ubwezi winu na Yehova, chomenechomene usange mwakumana na masuzgo. Mukwenera kusambira na kughanaghanirapo ivyo mukuŵazga mu Mazgu gha Chiuta. Mulombenge na kutangwanika chomene kumuteŵetera. Usange mukuchita vinthu ivi, mugomezgenge kuti Yehova wamovwiraninge kuzizipizga chiyezgo chilichose sono kweniso munthazi.

^ ndime 2 Paulosi wakwenera kuti wakapona ku nkhalamu panji ku vinthu vinyake vyakofya.

^ ndime 10 Mu mabuku ghithu muli nkhani izo zingawovwira ŵalwari kweniso awo ŵakupwelelera ŵalwari. Wonani Galamukani! ya Febuluwale 8, 1994; Febuluwale 8, 1997; Juni 8, 2000; na ya Febuluwale 8, 2001.

^ ndime 12 Mazina ghanyake tasintha.

^ ndime 14 Wonani nkhani ya mutu wakuti, “Chifukwa Wuli Ntchiwemi Kusezga Munthu Wakwananga?” mu magazini yino.

^ ndime 16 Mu Gongwe la Mulinda la Chicheŵa la Seputembala 1, 2006 peji  17-21, na la Janyuwale 15, 2007 peji 17-20 muli ivyo vingatovwira para ŵabali ŵithu ŵasezgeka.