Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) MARCH 2015

Mafumbo Ghakufumira ku Ŵaŵazgi

Mafumbo Ghakufumira ku Ŵaŵazgi

Chifukwa wuli mazuŵa ghano mabuku ghithu ghakulongosora chomene ivyo nkhani za mu Baibolo zikutisambizga m’malo mwa ivyo zikwimira?

Gongwe la Mulinda la Seputembala 15, 1950, likati nkhani zinandi za mu Baibolo zikwimira vinthu ivyo vizamuchitika kunthazi. Kale, mabuku ghithu ghakalongosoranga kuti ŵanthu ŵakugomezgeka nga Debora, Elihu, Yefita, Yobu, Rahabi, Rabeka na ŵanyake ŵanandi, ŵakimiranga ŵakuphakazgika panji “mzinda ukuru.” (Uvu. 7:9) Mwachiyelezgero, kale tikatenge Yefita, Yobu, na Rabeka ŵakimiranga Ŵakhristu ŵakuphakazgika, ndipo Debora na Rahabi ŵakimiranga mzinda ukuru. Kweni pasono mabuku ghithu ghakulongosora nthena yayi. Chifukwa wuli?

Ŵanthu ŵanyake awo ŵakuzunulika mu Baibolo ŵakwimira nadi vinthu vinyake. Pa Ŵagalatiya 4:21-31 mpositole Paulosi wakayowoya vya ŵanakazi ŵaŵiri, Sara na Hagara. Hagara wakaŵa wantchito wa Abrahamu. Paulosi wakati Hagara wakimiranga Ŵaisrayeli awo ŵakaŵa pasi pa Dango la Mozesi. Sara wakaŵa muwoli wa Abrahamu. Iyo wakimiranga chigaŵa cha kuchanya cha gulu la Yehova. Kweniso Paulosi wakayaniska wasembe mukuru Melekizedeki na Yesu. (Heb. 6:20; 7:1-3) Paulosi wakayowoya kuti ntchimi Yesaya na ŵana ŵake ŵakwimira Yesu na Ŵakhristu ŵakuphakazgika. (Heb. 2:13, 14) Yehova ndiyo wakaphalira Paulosi kulemba nkhani izi. Ntheura tikugomezga kuti nkhani zinyake izo Baibolo likuyowoya zikwimira vinthu vinyake.

NKHANI YA MU BAIBOLO

Kale Ŵaisrayeli ŵakapelekanga mberere kuŵa sembe pa paska.—Maŵa. 9:2

ICHO YIKWIMIRA

Mberere yikimiranga sembe ya Yesu.1 Kor. 5:7

Baibolo likuzunura ŵanthu awo ŵakayimiranga ŵanthu ŵanyake. Kweni ni vyose yayi ivyo ŵakachita vikwimira chinthu chinyake. Mwachiyelezgero, Paulosi wakalongosora kuti  Melekizedeki wakimiranga Yesu. Kweni Paulosi wakayowoyapo yayi kuti nyengo yinyake Melekizedeki wakapeleka chingwa na vinyo kwa Abrahamu pamanyuma pakuthereska mafumu ghanayi. Malemba ghandayowoyepo kuti ivyo wakachita apa vikwimira chinthu chinyake.—Gen. 14:1, 18.

Pamanyuma pakuti Yesu wawuka ku ŵakufwa, ŵanthu ŵanyake ŵakamba kulemba nkhani zakubudika. Buku linyake likulongosora ivyo Origen, Ambrose, na Jerome ŵakasambizganga. Buku ili likati chilichose icho chikuzunulika mu nkhani ya mu Baibolo, chikwimira chinthu chinyake. Nyengo yinyake ŵasambiri ŵa Yesu ŵakakora somba 153. Ntheura ŵanthu aŵa ŵakatenge nambara ya 153 yikwimira vinthu vinyake.—The International Standard Bible Encyclopaedia.

Munthu munyake, Augustine of Hippo wakalongosora kuti vingwa vinkhondi na somba ziŵiri izo Yesu wakalyeska ŵanthu 5,000, vikimiranga vinthu vinyake. Iyo wakati vingwa vinkhondi vya balere vikwimira mabuku ghankhondi ghakwambilira gha mu Baibolo. Kale ŵakawonanga tirigu kuŵa muwemi kuluska balere. Ntheura Augustine wakatenge “Testamente la Sono” ndakuzirwa kuluska “Testamente la Kale.” Wakalongosoraso kuti somba ziŵiri, zikimiranga fumu na wasembe. Mulembi munyake wakalongosora kuti ivyo Yakobe wakachita pakugura ulara na sima yiswesi kwa Esau, vikimiranga kuti Yesu wakugura ŵanthu na ndopa zake ziswesi kuti ŵaŵe na chigomezgo cha kuchanya.

Munthu payekha wangamanya yayi usange nkhani yinyake ya mu Baibolo yikwimira chinthu chinyake panji yayi. Usange palije ukaboni wa mu Malemba, tikwenera yayi kudumura kuti nkhani yinyake ya mu Baibolo yili na ng’anamuro lapadera panji yikwimira chithu chinyake.

Kasi nkhani za mu Baibolo zingatovwira wuli? Mpositole Paulosi wakati: ‘Vinthu vyose ivyo vikalembeka kale, vikalembekera kutisambizga, kuti kwizira mu chizizipizgo chithu na mu chisangulusko chakufuma mu Malemba, tiŵe na chigomezgo.’ (Rom. 15:4) Paulosi wakaphaliranga Ŵakhristu ŵakuphakazgika ivyo ŵangasambira mu nkhani za mu Baibolo. Nkhani za mu Baibolo zikovwira Ŵakhristu ŵakuphakazgika na ‘ŵamberere zinyake.’—Yoh. 10:16; 2 Tim. 3:1.

Yobu wakakumana na masuzgo ghanandi, kweni wakazizipizga. Ŵakhristu ŵakuphakazgika nawo ŵakazizipizga masuzgo ghanandi panyengo ya Nkhondo Yakwamba ya Charu Chose. Ŵamberere zinyake nawo ŵakukumana na masuzgo ghakupambanapambana, kweni ŵakuzizipizga nga umo wakachitira Yobu. Para tikuŵazga nkhani ya Yobu tikuwona umo Yehova wakamutumbikira. Tikumanya kuti ‘Yehova wali na mtima wachitemwa chomene na chisungusungu.’—Yak. 5:11.

Mazuŵa ghano, pali ŵadumbu ŵanandi awo mbakugomezgeka nga ni Debora. Ŵalara ŵanyake mu mpingo ŵangaŵa ŵachoko mu vyaka, kweni ŵakuchita vinthu mwamahara nga ni Elihu. Yefita wakaŵa na chikanga kweniso wakalimbikiranga ntchito. Mazuŵa ghano, pali ŵapayiniya awo ŵakulimbikira kupharazga kweniso ŵali na chikanga. Tikuwonga chomene Yehova kuti ‘vinthu vyose ivyo vikalembeka kale, vikalembekera kutisambizga, kuti kwizira mu chizizipizgo chithu na mu chisangulusko chakufuma mu Malemba, tiŵe na chigomezgo.’

Tileke kughanaghanira waka kuti nkhani yinyake ya mu Baibolo yikwimira chithu chinyake. Ntheura mazuŵa ghano mabuku ghithu ghakulongosora chomene ivyo nkhani za mu Baibolo zikutisambizga m’malo mwa ivyo zikwimira.