Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) MARCH 2015

Ili Ndilo ni Khumbo la Yehova

Ili Ndilo ni Khumbo la Yehova

‘Mwabisa vinthu ivi ku ŵavinjeru na ŵamahara ndipo mwavivumbura ku ŵanichi.’LUKA 10:21.

1. Chifukwa wuli Yesu wakaŵa na ‘chimwemwe chikuru’? (Wonani chithuzithuzi chakwamba.)

MUŴE nga mukuwona Yesu uyo wakondwa chomene. Wakumwemwetera ndipo chisko chake chikulongora kuti wali na chimwemwe chikuru. Kasi wakondwa na vichi? Yesu wakatuma ŵasambiri ŵake 70 kuti ŵakapharazge makani ghawemi gha Ufumu wa Chiuta. Wakakhumbanga kumanya umo ŵasambiri ŵake ŵachitirenge ntchito iyi. Ŵalembi na Ŵafarisi ŵakatinkhanga chomene makani ghawemi. Ŵakayuyuranga Yesu ndipo ŵakamuwonanga kuti ni kalipentara waka. Kweniso ŵakatenge ŵasambiri ŵake ‘mbambura kusambira ndiposo ŵanthu bweka.’ (Mil. 4:13; Mrk. 6:3) Yesu wakaŵa na chimwemwe chikuru chifukwa ŵasambiri ŵake ŵakapharazga mwachikanga nangauli ŵanthu ŵakaŵasuskanga. Viŵanda navyo vikatondeska yayi ntchito yawo. Chifukwa wuli ŵasambiri ŵakapharazga mwachikanga ndiposo ŵakaŵa ŵakukondwa?—Ŵazgani Luka 10:1, 17-21.

2. (a) Chifukwa wuli ŵasambiri ŵa Yesu ŵakaŵa nga ni ŵana? (b) Kasi ntchivichi chikawovwira ŵasambiri ŵa Yesu kumanya makora unenesko?

2 Wonani ivyo Yesu wakaphalira Yehova: ‘Nkhumulumbani pakweru Ŵadada, Fumu ya kuchanya na charu chapasi, chifukwa mwabisa vinthu ivi ku ŵavinjeru na ŵamahara  ndipo mwavivumbura ku ŵanichi. Enya Ŵadada, chifukwa ichi chikuyana na khumbo linu.’ (Mat. 11:25, 26) Yesu wakang’anamuranga kuti ŵasambiri ŵake mbana nadi yayi. Wakamanya kuti ŵanthu awo ŵakajiwonanga kuti mbavinjeru kweniso ŵakusambira chomene, ŵakawonanga ŵasambiri ŵake kuŵa ŵapasi. Yesu wakasambizga ŵasambiri ŵake kujiyuyura kweniso kuti ŵazomerenge kusambizgika nga umo ŵana ŵakuchitira. (Mat. 18:1-4) Kasi kujiyuyura kukaŵawovwira wuli? Yehova wakaŵapa mzimu utuŵa kuti ŵapulikiske unenesko wa mu Baibolo. Kweni awo ŵakatenge mbavinjeru na ŵamahara ŵakaŵa ŵakujikuzga ndipo Satana wakaŵabulumutizga kuti ŵaleke kumanya unenesko.

3. Kasi mu nkhani iyi tizgorenge fumbo wuli?

3 Mphake kuti Yesu wakaŵa na chimwemwe chikuru! Iyo wakakondwa chomene kuwona umo Yehova wakawovwilira ŵanthu ŵakujiyuyura kupulikiska vinthu vya ndimba vya mu Baibolo, kwali mbakusambira chomene panji yayi. Adada ŵake ŵakakhumbanga kuti ŵanthu ŵasambizgikenge mwakupulikikwa makora. Yehova wandasinthe. Kasi khumbo lake lakuti ŵanthu ŵasambizgikenge mu nthowa yipusu, likufiskika wuli mazuŵa ghano? Tizgorenge fumbo ili mu nkhani iyi. Nga ni Yesu, nase tiŵenge na chimwemwe.

TIKUSAMBIRA UNENESKO MU NTHOWA YIPUSU

4. Kasi Gongwe la Mulinda la Chingelezi chipusu lawovwira wuli ŵanthu?

4 Mazuŵa ghano, gulu la Yehova likupeleka chakurya chauzimu mu nthowa yipusu. Tiyeni tiwone nthowa zitatu. Yakwamba, mazuŵa ghano tili na Gongwe la Mulinda la Chingelezi chipusu. * Gongwe la Mulinda ili, likovwira chomene awo ŵakusuzgikira kuyowoya na kuŵazga makora Chingelezi. Mitu ya mbumba yikukondwa chomene kuwona kuti ŵana ŵawo ŵakuzgorapo. Sambiro la Gongwe la Mulinda ni nthowa yikuru yakupelekera chakurya chauzimu ku ŵateŵeti ŵa Chiuta. Ŵanji ŵakulemba makalata ku Wupu Wakulongozga kuwonga magazini gha Chingelezi chipusu. Mudumbu munyake wakati wakagongowanga kuzgorapo pa Sambiro la Gongwe la Mulinda. Kweni Gongwe la Mulinda la Chingelezi chipusu likumovwira chomene. Iyo wakati: “Pakwamba nkhazgorangapo yayi pa Sambiro la Gongwe la Mulinda. Kweni mazuŵa ghano nilije wofi ndipo nkhuzgorapo kanandi waka. Nkhuwonga chomene Yehova.”

5. Yowoyani uwemi wa Baibolo la Chingelezi ilo likafuma mu 2013.

5 Nthowa yachiŵiri, ni Baibolo la Chingelezi chipusu la Malemba Ghakupatulika mu Mang’anamuliro gha Caru Cipya ilo likafuma pa Okutobala 5, 2013. * Mavesi ghanandi ŵali kuchepeskako mazgu, kweni ng’anamuro ŵandasinthe ndipo ghakupulikikwa makora chomene. Mwachiyelezgero, Job 10:1 likaŵa na mazgu 27 kweni pasono lili na mazgu 19; Zintharika 8:6 likaŵa na mazgu 20, kweni sono lili na mazgu 13. Mavesi agha ghakupulikikwa makora chomene mu Baibolo lasono. Mubali munyake wakuphakazgika uyo wateŵetera mwakugomezgeka kwa vyaka vinandi wakati: “Apo nkhaŵazganga buku la Job mu Baibolo lasono,  vikaŵa nga nkhakwamba.” Ivi ndivyo ŵanandi ŵakuyowoya.

6. Kasi tikujipulika wuli chifukwa chakuti tapulikiska lemba la Mateyu 24:45-47?

6 Nthowa yachitatu, kupulikiska makora visambizgo vinyake. Mwachiyelezgero, Gongwe la Mulinda la Julayi 15, 2013, lili kulongosora mwakupulikikwa makora uyo ni ‘muzga wakugomezgeka na wakuchenjera.’ (Mat. 24:45-47) Magazini iyi yikati muzga wakugomezgeka ni ŵabali awo ŵali mu Wupu Wakulongozga, ndipo “ŵateŵeti ŵake ŵa pa nyumba,” ni wose awo ŵakupokera chakurya chauzimu, ŵakuphakazgika na ‘ŵamberere zinyake.’ (Yoh. 10:16) Ndise ŵakukondwa chomene kumanya fundo iyi na kusambizgako ŵanyithu. Khumbo la Yehova ndakuti ŵanthu ŵasambizgike mu nthowa yipusu. Tiyeni tiwone nthowa zinyake.

KULONGOSORA NKHANI ZA MU BAIBOLO MWAKUPULIKIKWA MAKORA

7, 8. Zunurani nkhani zinyake za mu Baibolo izo zikwimira chinthu chinyake.

7 Umo mabuku ghithu ghakulongosolera nkhani za mu Baibolo mazuŵa ghano, vikupambana na kumasinda. Kale ghakalongosoranga kuti nkhani zinyake za mu Baibolo zikwimira chinthu chinyake. Nkhani iyo yikuyowoyeka mu Baibolo, yingaŵa uchimi panji yingimira chinthu chinyake. Mabuku ghithu ghakalongosoranga kufiskika kwa uchimi panji ivyo nkhani iyo yikimiranga. Kasi nkhani zanthena izi zilimo mu Baibolo? Enya. Mwachiyelezgero, Yesu wakayowoya “chimanyikwiro cha Yona ntchimi.” (Ŵazgani Mateyu 12:39, 40.) Yesu wakayowoya kuti mazuŵa ghatatu agho Yona wakaŵira mu nthumbo ya chisomba, ghakimiranga mazuŵa ghatatu agho Yesu wakaŵira mu dindi.

8 Mu Baibolo muli nkhani zinyake izo zikwimira chinthu chinyake. Mpositole Paulosi wakayowoyapo nkhani zanthena izi. Mwachiyelezgero, wakalongosora ubali wa pakati pa Abrahamu, Sara na Hagara kuti ukayimiranga ubali uwo wuli pakati pa Yehova, Israyeli wakuthupi na chigaŵa cha kuchanya cha gulu la Yehova. (Gal. 4:22-26) Mwakuyana waka, chihema chakukumanamo, tempile, Zuŵa la Mphepiska, wasembe mulara, na vinthu vinyake ivyo vikaŵa mu Dango la Mozesi vikaŵa “muzgezge waka wa vinthu viwemi ivyo vikwiza.” (Heb. 9:23-25; 10:1) Para tikusambira mauchimi chipulikano chithu chikukhora kweniso tikukondwa. Kweni kasi nkhani yiliyose ya mu Baibolo yikwimira chinthu chinyake?

9. Kasi kale mabuku ghithu ghakalongosoranga wuli nkhani ya Naboti?

9 Kale, mabuku ghithu ghakalongosoranga kuti munthu panji chinthu chilichose icho chikuzunurika mu Baibolo, chikwimira chinthu chinyake. Mwachiyelezgero, Fumukazi Yezebeli yikakomeska Naboti, munthu wambura mulandu. Wakachita ichi kuti wapoke munda wa Naboti kuti uŵe wa Ahabu, mfumu wake. (1 Mathe. 21:1-16) Mu 1932, nkhani ya Naboti yikalongosoreka kuti ni uchimi. Ahabu na Yezebeli ŵakayimiranga Satana na gulu lake. Naboti wakimiranga Yesu; nyifwa ya Naboti yikimiranga nyifwa ya Yesu. Ndipouli, mu 1961, buku linyake ilo likafuma mu Chingelezi la mutu wakuti, “Zina Linu Lituŵiskike” (Let Your Name Be Sanctified) likati Naboti wakwimira ŵakuphakazgika ndipo Yezebeli wakwimira chisopa chautesi. Ntheura kutambuzgika kwa Naboti kukimiranga kutambuzgika kwa Ŵakhristu ŵakuphakazgika mu mazuŵa ghaumaliro. Kwa vyaka vinandi, ŵanthu  ŵa Chiuta ŵakawonanga kuti iyi ni nthowa yiwemi ya kulongosolera nkhani za mu Baibolo. Kweni ndimo viliri yayi mazuŵa ghano. Chifukwa wuli?

10. (a) Kasi muzga wakuchita wuli pambere wandalongosore nkhani za mu Baibolo? (b) Kasi mazuŵa ghano mabuku ghithu ghakulongosora wuli nkhani za mu Baibolo?

10 Yehova wawovwira ‘muzga wakugomezgeka na wakuchenjera’ kuti waŵenge maso chomene. Muzga wakusanda dankha mwakupwelelera ukaboni mu Malemba kuti wamanye usange nkhani yinyake mu Baibolo ni uchimi panji yayi. Usange nkhani ya mu Baibolo yalongosoreka waka nga ni uchimi, kanandi ŵanthu ŵakumanya yayi ivyo nkhani iyo yakuŵasambizga. Ntchipusu yayi kulongosora nkhani zanthena mwakudunjika. Chikuŵaso chakusuzga kuzikumbukira na kulondezga fundo zake. Kweni mazuŵa ghano mabuku ghithu ghakulongosora mwakupulikikwa makora kweniso umo tingalondezgera fundo za mu nkhani iyo tikusambira mu Baibolo. Ntheura tikusambira umo tingaŵira na chipulikano, tingazizipizgira masuzgo, tingalongolera kuti tikutemwa Chiuta, na umo tingaŵira na mikhaliro yiwemi. *

Nkhani ya Naboti yikutisambizga kuti tikwenera kuŵa ŵakugomezgeka (Wonani ndime 11)

11. (a) Kasi mazuŵa ghano mabuku ghithu ghakulongosora wuli nkhani ya Naboti? Kasi tikusambirako vichi? (b) Chifukwa wuli mabuku ghithu ghakulongosora viŵi yayi kuti nkhani yinyake mu Baibolo yikwimira chinthu chinyake? (Wonani “Mafumbo Ghakufumira ku Ŵaŵazgi” mu magazini yino.)

11 Mazuŵa ghano, mabuku ghithu ghakulongosora mwakupulikikwa makora chomene nkhani ya Naboti. Naboti wakafwa chifukwa chakuti wakaŵa wakugomezgeka. Wakafwa chifukwa wakimiranga Yesu panji ŵakuphakazgika yayi. Wakakhumbanga yayi kuswa Malango gha Yehova nangauli wakatambuzgika na kukomeka na mulongozgi wankhaza. (Maŵa. 36:7; 1 Mathe. 21:3) Tingasambirako kanthu kwa Naboti chifukwa nase tikutambuzgika pa vifukwa vyakuyana waka.  (Ŵazgani 2 Timote 3:12.) Tose tingapulikiska, kukumbukira na kulondezga ivyo tikusambira kwa Naboti. Nkhani iyi yingatovwira kukhozga chipulikano chithu.

12. (a) Kasi tikwenera kumanya vichi pakuyowoya za nkhani za mu Baibolo? (b) Kasi ntchivichi chikovwira kuti tipulikiske nkhani za mu Baibolo? (Wonani mazgu ghamusi.)

12 Kasi nkhani za mu Baibolo zikuyowoya ivyo tikusambirapo pera? Yayi. Mabuku ghithu ghakulongosoraso kuyana kwa nkhani zinyake za mu Baibolo. Kweni tikwenera kumanya kuti ni nyengo zose yayi apo mabuku ghithu ghakulongosora ivyo nkhani za mu Baibolo zikwimira. Mwachiyelezgero, Naboti wakatambuzgika ndipo wakafwa chifukwa cha kugomezgeka. Nkhani iyi yikutikumbuska kugomezgeka kwa Khristu na ŵakuphakazgika pamoza na “mberere zinyake.” Yehova wakutisambizga mu nthowa yipusu na yakupulikikwa makora. *

KULONGOSORA MAKORA NTHARIKA

13. Kasi ni ntharika wuli izo zili kulongosoreka makora?

13 Yesu Khristu wakaŵa Msambizgi waluso kuluska munthu waliyose. Wakayowoyanga ntharika pakusambizga. (Mat. 13:34) Ntharika zikovwira kuti ŵanthu ŵapulikiske. Mabuku ghithu ghakulongosora ntharika za Yesu mu nthowa yipusu na yakupulikikwa makora. Gongwe la Mulinda la Julayi 15, 2008, lili kulongosora makora ntharika ya chilungo, ya njere ya sinapi na ntharika ya mkwawu. Ntharika izi zikulongosora Ufumu wa Chiuta na umo ukovwilira ŵanthu mu charu chiheni ichi kuti ŵalondezgenge Khristu.

14. (a) Kasi kale tikalongosoranga wuli ntharika ya Musamariya muwemi? (b) Kasi yikutisambizga vichi?

14 Kasi ni vichi ivyo tikwenera kumanya pakuyowoya vya ntharika za Yesu? Tikwenera kumanya kuti ntharika zinyake zikaŵa uchimi kweni zinyake zikimira waka vinthu vinyake. Zinyake zikulongosora ivyo ise tikusambirapo. Kweni kasi tingamanya wuli kuti ntharika iyi yikwimira chinthu chinyake panji yayi? Yehova ndiyo wakutovwira kuti timanye. Mwachiyelezgero, wonani umo tikalongosoleranga ntharika ya Musamariya muwemi. (Luka 10:30-37) Mu 1924, Gongwe la Mulinda likati Musamariya wakimiranga Yesu. Nthowa yakufuma ku Yerusalemu kuluta ku Yeriko yikimiranga nkharo yiheni ya ŵanthu kufuma waka apo ŵakagalukira mu Edeni. Vigeŵenga vikimiranga mabungwe ghakurughakuru na ŵamalonda. Musofi panji wasembe na Mulevi ŵakimiranga chisopa chautesi. Mazuŵa ghano, mabuku ghithu ghakulongosora ivyo ntharika iyi yikutisambizga. Yikutisambizga kuti tikwenera yayi kutemwera. Tikwenera kupharazgira ŵanthu wose kuti ŵamanye Yehova. Tikukondwa chomene chifukwa Yehova wakutisambizga mu nthowa yipusu.

15. Kasi tizamudumbiskana vichi mu nkhani yakulondezgapo?

15 Mu nkhani yakulondezgapo, tizamudumbiskana ntharika ya ŵamwali 10. (Mat. 25:1-13) Chifukwa wuli Yesu wakayowoya ntharika iyi? Kasi chilichose icho cikuzunurika mu ntharika iyi chikwimira chinthu chinyake? Kasi yikutisambizga vichi? Nkhani yakulondezgapo yizamuzgora mafumbo agha.

^ ndime 4 Gongwe la Mulinda la Chingelezi chipusu likamba kufuma mu Julayi 2011. Kweniso liliso mu viyowoyero vinyake vichoko waka.

^ ndime 5 Pasono ntchito yili mukati ya kung’anamulira Baibolo ili mu viyowoyero vinyake.

^ ndime 10 Mwachiyelezgero, buku la mutu wakuti Tsanzirani Chikhulupiriro Chawo likulongosora vya ŵanthu 14 ŵa mu Baibolo. Buku ili likulongosora ivyo tingasambirako ku ŵanthu aŵa m’malo mwakulongosora waka ivyo ŵanthu aŵa ŵakwimira.

^ ndime 12 Mu Baibolo muli nkhani zinyake ‘zakusuzga kupulikiska,’ nga ni izo wakalemba Paulosi. Kweni mzimu utuŵa ndiwo ukawovwira awo ŵakalemba Baibolo. Mazuŵa ghano napo, Ŵakhristu ŵaunenesko ŵakovwirika na mzimu utuŵa kuti ŵapulikiske nkhani za mu Baibolo. Ŵakupulikiska ‘nanga ni vinthu vyakunyang’amira vya Chiuta.’—2 Pet. 3:16, 17; 1 Kor. 2:10.