Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) JANUARY 2015

Wongani Yehova Kuti Mutumbikike

Wongani Yehova Kuti Mutumbikike

‘Wongani Yehova, chifukwa ni muwemi.’—SAL. 106:1.

1. Chifukwa wuli tikwenera kumuwonga Yehova?

YEHOVA, ni Mupi wa ‘chawanangwa chilichose chiwemi na chakufikapo,’ ndipo tikwenera kumuwonga. (Yak. 1:17) Iyo ni Muliska wachitemwa, ndipo wakutipwelelera mwakuthupi na mwauzimu. (Sal. 23:1-3) Mu nyengo ya masuzgo, wakuŵa ‘chiphokwero chithu na nkhongono zithu.’ (Sal. 46:1) Ipo tikwenera kuwonga Chiuta na mtima withu wose, nga umo wakachitira wamasalimo uyo wakalemba kuti: ‘Wongani Yehova, chifukwa ni muwemi; lusungu lwake ndwamuyirayira.’—Sal. 106:1.

Lemba lithu la chaka cha 2015 ndakuti: ‘Wongani Yehova, chifukwa ni muwemi.’Salmo 106:1

2, 3. (a) Kasi pangaŵa masuzgo wuli usange tingatondeka kuwonga Yehova pa vitumbiko ivyo wakutipa? (b) Kasi nkhani iyi yizgorenge mafumbo wuli?

2 Chifukwa wuli kuwonga nkhwakuzirwa? Ŵanthu ŵanandi mazuŵa ghano mbambura kuwonga. Baibolo likayowoyerathu kuti ndimo vizamuŵira mu mazuŵa ghaumaliro. (2 Tim. 3:2) Ŵanthu ŵakuwonga yayi vinthu viwemi ivyo Yehova waŵachitira. Tikukhala na ŵanthu awo ŵakutemwa vinthu vyakuthupi. Para tingapusa, nase tingamba kutemwa vinthu vyakuthupi.  Nga Mbaisrayeli, tingatondeka kuzirwiska ubwezi withu na Yehova ndiposo vitumbiko ivyo watipa.—Sal. 106:7, 11-13.

3 Kweniso ghanaghanirani ivyo vingachitika para takumana na viyezgo vikuru. Masuzgo ghangatihangayiska ndipo tingaluwa vitumbiko ivyo Yehova watipa. (Sal. 116:3) Ntheura, kasi tingachita wuli kuti tiŵe na mtima wa kuwonga? Kasi tingachita wuli kuti tiwongenge nyengo zose? Kasi ntchivichi chingatovwira kuti tilutilire kuwona vinthu mwakwenelera para tikukumana na viyezgo? Tiyeni tiwone.

‘A YEHOVA, MILIMO YINU NJAKUZIZWISKA IYO MWAYANDANISKA’

4. Kasi ntchivichi chingatovwira kuti tilutilire kuwonga?

4 Tikwenera kufwilirapo kuti tilutilire kuwonga Yehova. Chakwamba, tikwenera kuwona umo Yehova watitumbikira. Kufuma apo, tikwenera kughanaghanira vitumbiko ivyo Yehova watipa ivyo vikulongora kuti wakutitemwa. Ndivyo wamasalimo wakachita, ndipo wakazizwa na ivyo Yehova wakamuchitira.—Ŵazgani Salmo 40:5; 107:43.

5. Kasi tingasambirako vichi kwa mpositole Paulosi pa nkhani ya kuwonga?

5 Tingasambirako vinandi kwa mpositole Paulosi pa nkhani ya kuwonga. Wakwenera kuti wakaghanaghaniranga ivyo Yehova wakamuchitira, ndipo kanandi wakalombanga na kuwonga Yehova. Pakwamba, Paulosi wakaŵa ‘wakuyuyura Chiuta na wakutambuzga kweniso munthu wamsinjiro.’ Ntheura, wakawonga Chiuta na Khristu chifukwa cha kumulongora lusungu na kumupa uteŵeti. (Ŵazgani 1 Timote 1:12-14.) Paulosi wakawonganga Ŵakhristu ŵanyake. Kweniso wakawonganga Yehova chifukwa Ŵakhristu aŵa ŵakaŵa na mikhaliro yiwemi ndiposo ŵakateŵeteranga Yehova mwakugomezgeka. (Fil. 1:3-5, 7; 1 Tes. 1:2, 3) Para wakumana na masuzgo, Paulosi wakawonganga Yehova chifukwa cha wovwiri uwo ŵabali ŵake ŵakamupanga. (Mil. 28:15; 2 Kor. 7:5-7) Lekani Paulosi wakachiska Ŵakhristu kuti: ‘Longorani kuti muli ŵakuwonga, kusokana yumoza na munyake na masalimo, malumbo kwa Chiuta, ndiposo sumu zauzimu zakukondweska.’—Kol. 3:15-17.

TIGHANAGHANIRENGE IVYO YEHOVA WATICHITIRA

6. Chifukwa wuli imwe mukumuwonga Yehova?

6 Kasi tingachita wuli kuti tiwongenge nga ni Paulosi? Tikwenera kughanaghanira ivyo Yehova watichitira. (Sal. 116:12) Usange munthu wangamufumbani vitumbiko ivyo Yehova wamupani, kasi mungazunura vitumbiko wuli? Panji mungazunura ubwezi winu na Yehova. Panji kugowokereka kwa zakwananga zinu chifukwa cha sembe yakuwombora ya Khristu. Panji mungazunura ŵabali na ŵadumbu awo ŵakamovwirani pa nyengo iyo mukakumana na viyezgo. Kweniso mungaluwa yayi kuzunurapo muwoli panji mfumu winu na ŵana. Para tingaghanaghanira vitumbiko ivyo Yehova watipa, timuwongenge na mtima wose.—Ŵazgani Salmo 92:1, 2.

7. (a) Chifukwa wuli tikwenera kuwonga Yehova? (b) Kasi tisangenge vyandulo wuli para tikuwonga Yehova?

7 Tikwenera kumuwonga Yehova chifukwa cha vitumbiko ivyo wakutipa. (Sal. 95:2; 100:4, 5) Ŵanthu ŵanandi ŵakulomba kwa Chiuta kuti ŵapemphe waka vinthu. Kweni ise tikumanya kuti Yehova wakukondwa para tikuwonga ivyo wali kutipa. Mu Baibolo muli malurombo ghanandi gha ŵateŵeti ŵa Chiuta awo ŵakawonganga Yehova. Chiyelezgero ni lurombo lwa Hana na lwa Hezekiya. (1 Sam. 2:1-10; Yes. 38:9-20)  Nase, tiwongenge nga umo ŵakachitira ŵateŵeti ŵakugomezgeka aŵa. Tiwongenge Yehova mu lurombo chifukwa cha vitumbiko ivyo wali kutipa. (1 Tes. 5:17, 18) Para tichitenge nthena, tiŵenge ŵakukondwa kweniso timutemwenge chomene Yehova ndipo tiŵenge nayo paubwezi.—Yak. 4:8.

Kasi ni vinthu wuli ivyo Yehova wali kumuchitirani ivyo mukuwonga? (Wonani ndime 6, 7)

8. Kasi ni vinthu wuli ivyo vingatipangiska kuti tiŵe ŵambura kuwonga?

8 Usange tikuŵa maso yayi, tingaleka kuwonga Yehova pa viwemi ivyo wakutichitira. Vili nthena chifukwa chakuti tili kuhara mtima wambura kuwonga kufuma ku ŵapapi ŵithu ŵakwambilira. Yehova wakaŵika Adamu na Eva mu paradiso, ndipo wakaŵapa chilichose icho ŵakakhumbikwiranga. Ŵakate ŵakhalenge mwamtende kwamuyirayira. (Gen. 1:28) Kweni ŵakatondeka kuwonga ivyo Yehova wakaŵachitira. Ŵakakhorwa yayi na ivyo ŵakaŵa navyo. Chifukwa cha kuleka kuwonga, ŵakataya chilichose icho ŵakaŵa nacho. (Gen. 3:6, 7, 17-19) Pakuti tikukhala mu charu icho ŵanthu mbambura kuwonga, nase tingatolerako nkharo yawo. Tingamba kuwona ubwezi withu na Yehova mwakupepuka. Kweniso tingamba kuwona kuti ubali withu wa pa charu chose ngwambura kuzirwa. Tingamba kutimbanizgika na vinthu vya mu charu ichi, icho chikuluta. (1 Yoh. 2:15-17) Kuti ivi vileke kutichitikira, tikwenera kughanaghanirapo chomene vitumbiko ivyo Yehova wali kutipa ndipo timuwongenge nyengo zose kuti ndise ŵanthu ŵake.—Ŵazgani Salmo 27:4.

PARA TIKUZIZIPIZGA VIYEZGO

9. Para tasangana na viyezgo vikuru, chifukwa wuli tikwenera kughanaghanira vitumbiko ivyo tili navyo?

9 Para tikuwonga, tizizipizgenge viyezgo vikuru. Tingasuzgika maghanoghano usange tingasangana na masuzgo ghakuru. Mwachiyelezgero, para mfumu panji muwoli withu waleka kugomezgeka, talwara matenda ghakuru, mubali withu wafwa, panji masoka gha chilengiwa. Usange vyatichitikira, tingapembuzgika na kukhozgeka para tikughanaghanira umo Yehova watitumbikira. Ŵanji vili kuŵachitikirapo. Tiyeni tiwone ivyo ŵakayowoya.

10. Kasi Irina wasanga vyandulo wuli chifukwa cha kughanaghanira ivyo Chiuta wakumuchitira?

10 Irina * uyo wakukhala ku North America ni mupayiniya wanyengozose. Wakatorana  na mubali uyo wakaŵa mulara mu mpingo. Mubali uyu wakaŵa wambura kugomezgeka ndipo wakamusida Irina na ŵana. Kasi ntchivichi icho chikawovwira Irina kuti walutilire kuteŵetera Yehova mwakugomezgeka? Iyo wakuti: “Nkhuwonga Yehova kuti wakunipwelelera. Para nkhughanaghanira ivyo Chiuta wakunichitira zuŵa lililose, nkhuwona kuti Yehova wakunitemwa na kunivikilira. Nkhumanya kuti walutilirenge kunovwira.” Nangauli Irina wakumana na viyezgo vikuru, kweni ngwakukondwa. Ichi chikumovwira kuti walutilire kuzizipizga ndipo ŵanji ŵakukhozgeka.

11. Kasi ntchivichi icho chikawovwira mudumbu munyake kuzizipizga nthenda yikuru?

11 Mudumbu munyake zina lake Kyung-sook, wa ku Asia, wakaŵa mupayiniya lumoza na mfumu wake kwa vyaka vyakujumpha 20. Ŵakamusanga na kansa ya mu maphapu ndipo ŵakamuphalira kuti wafwenge pambere myezi 6 yindajumphe. Nangauli iyo na mfumu wake ŵakakumanapo na viyezgo vinandi kumasinda, kweni ŵakaŵa na umoyo uwemi. Iyo wakati: “Nthenda iyi yikaŵa yikuru. Nkhawonanga kuti palije kawemi pa umoyo wane ndipo nkhachitanga wofi.” Kasi ntchivichi icho chawovwira mudumbu uyu kuti wazizipizge? Iyo wakuti: “Zuŵa lililose usiku pambere nindagone, nkhulomba kwa Yehova mwakubamulizga mazgu, kumuwonga vinthu vinkhondi ivyo wanichitira zuŵa ilo. Para nachita nthena nkhujipulika makora ndipo nkhumutemwa chomene Yehova.” Kasi mudumbu uyu wasanga chandulo wuli chifukwa cha kulomba kwa Yehova? Iyo wakuti: “Namanya kuti Yehova wakutiwovwira para tili mu viyezgo ndiposo kuti vitumbiko ni vinandi kuluska masuzgo agho tikukumana nagho.”

Wali na mudumbu wake, John, uyo ŵakaponera lumoza (Wonani ndime 13)

12. Kasi Jason wakapembuzgika wuli muwoli wake wakati wafwa?

12 Jason, uyo wakuteŵetera pa ofesi yinyake ya munthavi muno mu Africa, wachita uteŵeti wanyengozose kwa vyaka vyakujumpha 30. Iyo wakulongosora kuti: “Muwoli wane wali kufwa vyaka 7 ivyo vyajumpha, ndipo nkhusuzgika chomene maghanoghano. Para ningakhalira waka kughanaghanira umo muwoli wane wakasuzgikiranga na kansa, vinganigongoweska.” Kasi ntchivichi icho chawovwira Jason kuzizipizga? Iyo wakuti: “Zuŵa linyake nkhakumbukira vinthu vyakukondweska ivyo tikachitiranga lumoza na muwoli wane, ndipo nkhamuwonga Yehova mu lurombo. Nkhapembuzgika chomene, ndipo kufuma pa nyengo iyi, nyengo zose nkhuwonga Yehova chifukwa cha vinthu viwemi ivi. Chifukwa chakuti nkhumuwonga Yehova, vyanovwira kuti niwonenge vinthu mwakwenelera. Nangauli nichali na chitima, kweni nkhuwonga Yehova chifukwa chakuti nkhaŵa na banja liwemi ndiposo nkhateŵeteranga na munthu uyo wakatemwanga Chiuta. Ivi vyanovwira kuti niwonenge vinthu mwakwenelera.”

“Nkhuwonga chomene kuti Chiuta wane ni Yehova.”—Sheryl

13. Kasi ntchivichi icho chikawovwira Sheryl kuti wazizipizge apo ŵa mu mbumba yakwake ŵanandi ŵakafwa?

13 Mu 2013 ku Philippines kukachitika chimphepo chikuru chomene. Chifukwa cha chimphepo ichi, Sheryl uyo wakaŵa na vyaka 13 wakaŵavya chilichose. Iyo wakati: “Nyumba yakwithu yikawa kweniso ŵapapi na ŵabali ŵane ŵanandi ŵakafwa.” Chimphepo ichi chikakoma adada, amama na ŵana ŵakwake ŵatatu. Kasi ntchivichi icho chikawovwira Sheryl kuti wazizipizge suzgo iyi? Wakakumbukanga umo Yehova wakamutumbikira. Iyo wakati: “Nkhawona  ivyo ŵabali na ŵadumbu ŵakachita pakovwira kweniso kukhozga awo ŵakakhumbikwiranga wovwiri. Nkhamanya kuti ŵabali pa charu chose ŵakanilomberanga.” Wakasazgirapo kuti: “Nkhuwonga chomene kuti Chiuta wane ni Yehova. Nyengo zose wakutipa vinthu ivyo tikukhumbikwira.” Nadi, para tikukumbuka vitumbiko ivyo Yehova wakutipa, tiŵenge na chitima chakujumphizga yayi. Mtima wa kuwonga ukutovwira kuzizipizga masuzgo ghose agho tikukumana nagho.—Efe. 5:20; ŵazgani Ŵafilipi 4:6, 7.

‘NIKONDWENGE MWA YEHOVA’

14. Kasi tikulindilira vinthu wuli viwemi munthazi? (Wonani chithuzithuzi chakwamba.)

14 Ŵanthu ŵa Yehova ŵakukondwa na vitumbiko ivyo wakuŵapa. Ŵaisrayeli ŵakati ŵaponoskeka pa Nyanja Yiswesi, ŵakakondwa ndipo ŵakimba sumu za kulumba na kuwonga Yehova. (Exo. 15:1-21) Pa nyengo yasono, tikumanya kuti sonosono apa kuzamuŵavya vyakuŵinya. Ichi ntchimoza mwa vitumbiko vyakuzirwa chomene. (Sal. 37:9-11; Yes. 25:8; 33:24) Tizamukondwa chomene para Yehova wazakaparanya ŵalwani ŵake wose na kutipa charu chiphya umo muzamuŵa mtende na urunji. Kuyowoya unenesko, pa nyengo iyo tizamumuwonga chomene Yehova.—Uvu. 20:1-3; 21:3, 4.

15. Kasi mu chaka cha 2015, mwaŵikapo mtima kuchita vichi?

15 Mu chaka cha 2015, tikulindilira vitumbiko vyauzimu vinandi vyakufuma kwa Yehova. Mbunenesko kuti viyezgo vitisangenge. Ndipouli, kwali tisangane na suzgo wuli, tikumanya kuti Yehova watilekenge yayi. (Dute. 31:8; Sal. 9:9, 10) Iyo walutilirenge kutipa chilichose icho tikukhumbikwira kuti timuteŵetere mwakugomezgeka. Ntheura, mphanyi tose taŵikapo mtima kuti tiŵe nga ni ntchimi Habakuku, iyo yikati: ‘Nanga mkuyu uleke kuphuka, nesi vipasi muŵavye mu mpheska, kupasa kwa maolive kutondeke na minda yatondeka kupa vyakurya, mskambo umare mu lukutu, na ng’ombe mulije mu chiŵaya, ndipouli nditikondwenge mwa Yehova, ndisekelere mwa Chiuta wa chiponosko chane.’ (Hab. 3:17, 18) Nadi, mphanyi chaka chose ichi taghanaghanira vitumbiko ivyo Yehova watipa na kuchita ivyo lemba la chaka cha 2015 likutichiska. Lemba ili likuti: ‘Wongani Yehova, chifukwa ni muwemi.’—Sal. 106:1.

^ ndime 10 Mazina ghanyake mu nkhani iyi tabwelekerapo waka.