Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  December 2014

‘Nthowa Wakayimanya’

‘Nthowa Wakayimanya’

GUY HOLLIS PIERCE, wa mu Wupu Wakulongozga wa Ŵakaboni ŵa Yehova wakafwa pa Chiŵiri, Malichi 18, 2014. Panyengo iyi wakaŵa na vyaka 79, ndipo chigomezgo icho wakaŵa nacho chakuti wazamuwuskika na kukakhala na Khristu kuchanya chikafiskika.—Heb. 2:10-12; 1 Pet. 3:18.

Guy Pierce wakababikira ku Auburn, California, U.S.A., pa Novembala 6, 1934, ndipo wakabatizika mu 1955. Mu 1977, wakatora mwanakazi zina lake Penny ndipo ŵakababa ŵana. Ŵanthu ŵanandi ŵakamuwonanga nga ni dada wawo. Mu 1982, Mubali Pierce na Mudumbu Penny ŵakaŵa kuti ŵakuchita upayiniya, ndipo mu 1986 mubali Pierce wakimikika kuŵa mulaŵiliri wa dera. Wakachita uteŵeti uwu mu United States kwa vyaka 11.

Mu 1997, Guy na Penny Pierce ŵakamba kuteŵetera pa Beteli ya ku United States. Mubali Pierce wakateŵeteranga ku Dipatimenti ya Uteŵeti ndipo mu 1998 wakasankhika kuŵa movwiri wa Komiti Yakulaŵilira Ŵateŵeti ŵa pa Beteli ya Wupu Wakulongozga. Pa ungano wa pa chaka wa Watch Tower Bible and Tract Society of Pennsylvania uwo ukachitika pa Okutobala 2, 1999 pakaŵa chipharazgo chakuti Mubali Pierce wimikika kuŵa mu Wupu Wakulongozga. Wateŵeterapo mu Komiti ya Kulaŵilira Ŵateŵeti ŵa pa Beteli, ya Kulemba, ya Kusindikizga Mabuku na ya Kulongozga.

Chifukwa chakuti Mubali Pierce wakatemwanga kuseka na ŵanji, ŵanthu ŵa mitundu yose ŵakafwatukanga nayo. Ndipouli, mikhaliro iyo yikapangiska kuti ŵanthu ŵamutemwe chomene ntchitemwa, kujiyuyura, kuzirwiska fundo zaurunji ndiposo chipulikano chakukhora mwa Yehova. Guy Pierce wakagomezganga kuti nanga zuŵa lingatondeka kufuma kweni malayizgo gha Yehova ghafiskikenge kwambura kutondeka. Wakakhumbanga kuti charu chose chimanye fundo iyi.

Mubali Pierce wakavukanga yayi pakuteŵetera Yehova. Wakacheleranga mulenji ndipo kanandi wakagwiranga ntchito m’paka usiku. Wakenda mu vyaru vinandi kuti wakhozge ŵabali na ŵadumbu. Nyengo zose wakaŵanga wakunozgeka kuchezga, kupeleka ulongozgi, na kovwira waliyose. Nanga pangajumpha vyaka vinandi, ŵabali na ŵadumbu ŵaluwenge yayi kuti wakaŵa waubwezi, ndiposo kuti wakapelekanga ulongozgi wakukhozga wa mu Malemba.

Mubali Pierce wali kusida mwanakazi na ŵana 6 kweniso ŵazukuru na ŵazukuru chivu. Kweniso wakaŵa na ŵana ŵauzimu ŵanandi. Pa Chisulo, Malichi 22, 2014, Mubali Mark Sanderson, wa mu Wupu Wakulongozga, wakadumba nkhani ya nyifwa ya Mubali Pierce pa Beteli ya ku Brooklyn. Mubali Sanderson wakayowoya vya chigomezgo cha Mubali Pierce cha kuluta kuchanya ndipo wakaŵazga mazgu gha Yesu ghakuti: “Mu nyumba ya Ŵadada muli malo ghanandi ghakukhalamo. . . . Usange nkhuluta kukamunozgerani malo, nkhwizaso ndipo nizamupokelera imwe kwa namwene, mwakuti uko ine nili ndiko namwe muŵenge. Ndipo uko nkhuya nthowa mukuyimanya.”—Yoh. 14:2-4.

Mbunenesko kuti pamaso pafipenge chomene chifukwa chakuti Mubali Pierce palije. Ndipouli, tili ŵakukondwa kuti ‘nthowa wakayimanya’ yakulutira ku ‘malo ghake ghakukhalamo’ kwamuyirayira.