Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) OCTOBER 2014

 NKHANI YAKULONGOSORA UMOYO WA MUNTHU

Vinthu Vyapadera Ivyo Vyanichitikira Pakupharazga Ufumu

Vinthu Vyapadera Ivyo Vyanichitikira Pakupharazga Ufumu

Mu 1947, ŵasembe ŵa Katolika ŵakatuma ŵanthu kuti ŵatambuzge Ŵakaboni ŵa Yehova mu Santa Ana, ku El Salvador. Pa nyengo ya Sambiro la Gongwe la Mulinda, ŵanyamata ŵakamba kuponya vimalibwe vikuruvikuru mu nyumba ya ŵamishonale. Kufuma apo, pakiza gulu la ŵanthu ŵakulongozgeka na ŵasembe. Ŵanyake ŵakayegha matochi ghakulikira; ŵanyake ŵakayegha vikozgo. Kwa maora ghaŵiri, ŵakalutilira kuponya malibwe na kuchemerezga kuti: “Umoyo utali kwa Mariya!” kweni “Yehova wafwe!” Chilato chawo chikaŵa chakuti ŵamishonale ŵachite wofi na kufumamo mu tawuni iyi. Nane nkhaŵapo pa Sambiro la Gongwe la Mulinda apo ivi vikachitikanga vyaka 67 ivyo vyajumpha. *

VYAKA viŵiri pambere ivi vindachitike, Ine na Evelyn Trabert, uyo tikachitiranga lumoza umishonale, tikamalizga Sukulu Yakusambizga Baibolo ya Giliyadi, iyo yikaŵa pafupi na Ithaca, ku New York. Tikatumika kukateŵetera ku Santa Ana. Kweni pambere nindalutilire kulongosora vya uteŵeti wane wa umishonale uwo nkhachita pafupifupi vilimika 29, lekani nimuphalirani icho chikanichiska kuti nichite uteŵeti uwu.

CHIHARO CHANE CHAUZIMU

Nkhababika mu 1923 ku Spokane, mu Washington, ku U.S.A. uko ŵapapi ŵane, a John na a Eva Olson, ŵakakhalanga. Ŵakasopanga mu tchalitchi la Lutheran, kweni ŵakawonanga kuti chisambizgo chakuti kuli moto wa helo icho tchalitchi ili likusambizga ntchautesi chifukwa ŵakagomezganga kuti Chiuta ngwachitemwa. (1 Yoh. 4:8) Adada ŵakagwiranga ntchito ku nyumba iyo ŵakuphikirako mabuledi. Usiku unyake munyawo uyo ŵakagwiranga nayo ntchito wakaŵasimikizgira kuti Baibolo likuyowoyapo yayi kuti ŵanthu ŵakuyuzgika mu helo. Mwaluŵiro, ŵapapi ŵane ŵakamba kusambira Baibolo na Ŵakaboni ŵa Yehova, ndipo ŵakamanya ivyo Baibolo likusambizga nadi pa nkhani ya icho chikuchitika para munthu wafwa.

Nangauli nkhaŵa na vyaka 9, kweni nichali kukumbuka mazgu agho ŵapapi ŵane ŵakayowoyanga chifukwa cha kukondwa kuti ŵakamanya unenesko wa mu Baibolo. Chimwemwe chawo chikakura chomene ŵakati ŵamanya kuti zina la Chiuta ni Yehova,  na kufwatuka ku chisambizgo chautesi cha Utatu. Nane nkhamba kusambira Baibolo. Visambizgo ivi ‘mbunenesko uwo ukufwatura.’ (Yoh. 8:32) Nkhawonanga kuti kusambira Baibolo nkhwakuphyora yayi. Nyengo zose nkhukondwa kusanda Mazgu gha Chiuta. Nangauli nkhaŵa wasoni, kweni nkhapharazganga lumoza na ŵapapi ŵane. Iwo ŵakabatizika mu 1934. Apo nkhaŵa na vyaka 16 mu 1939, nane nkhabatizika na kuŵa muteŵeti wa Yehova.

Amama, Ine, na Adada, pa ungano wa mu 1941 mu St. Louis, ku Missouri

Mu Julayi 1940, ŵapapi ŵane ŵakaguliska nyumba yawo ndipo tose tikamba kuchita upayiniya mu msumba wa Coeur d’Alene, ku Idaho. Tikachitanga lenti mu nyumba yakudikanya umoso tikachitiranga maungano gha mpingo. Kusi kwa nyumba iyi ŵakanozgerangako magalimoto. Pa nyengo iyi, mipingo yinandi yikaŵavya Nyumba za Ufumu, ntheura yikawungananga mu nyumba za ŵabali panji mu malo gha lenti.

Mu 1941, ine na ŵapapi ŵane tikaluta ku ungano ku St. Louis, ku Missouri. Zuŵa la Sabata likaŵa “Zuŵa la Ŵana,” ndipo ŵana wose ŵa vyaka 5 m’paka 18 ŵakakhala pa mipando ya kufupi na pulatifomu. Apo nkhani yinyake ya Mubali Joseph F. Rutherford yikaŵa pafupi kumara, wakayowoya na taŵawukirano, wakati: “Mwaŵawukirano mose . . . imwe mukuzomera kuti mupulikirenge Chiuta na Fumu yake, yimilirani!” Tose tikimilira. Ntheura, Mubali Rutherford wakati: “Wonani, ŵapharazgi ŵaphya ŵa Ufumu ŵakujumpha 15,000!” Nkhani iyi yikanovwira kuti nilutilire kuchita upayiniya.

UTEŴETI UWO MBUMBA YITHU YIKAPIKA

Myezi yichoko waka pamanyuma pa ungano uwo ukachitikira ku St. Louis, mbumba yakwithu yikasamira ku chigaŵa cha kumwera kwa California. Tikakhalanga mu msumba wa Oxnard, ndipo mulimo withu ukaŵa wakuti tambiske mpingo ku malo agha. Tikakhalanga mu nyumba yakwenda nayo iyo yikaŵa na bedi limoza. Apa vinthu vikasintha chomene chifukwa pakwamba nkhaŵa na chipinda chane na chane chakugonako kweni panyengo iyi nkhagonanga pa balaza.

Pambere tindafike mu California, charu cha Japan chikaponya mabomba pa dowoko la Pearl Harbor mu Hawaii, pa Disembala 7, 1941. Zuŵa lakulondezgapo charu cha United States nacho chikamba kurwako Nkhondo Yachiŵiri ya Charu Chose. Masitima gha mu maji gha charu cha Japan ghakaŵa pafupi na California pa nyengo iyi. Ŵalara ŵa boma ŵakalangura kuti tizimwe magesi, ntheura tikakhala kwambura magesi usiku wose. Chisi chikawovwira kuti ŵankhondo ŵa ku Japan ŵatondeke kuponya mabomba pa malo agho ŵakakhumbanga.

Pakati pajumpha myezi, mu Seputembala 1942, tikaluta ku ungano ku Cleveland, ku Ohio, wa mutu wakuti, Ŵanthu Ŵakopa Chiuta Awo Ŵazamuhara Charu Chiphya (New World Theocratic Assembly). Pa ungano uwu, Mubali Nathan H. Knorr wakayowoya nkhani yakuti, Kasi Mtende Ungakhalilira? (“Peace—Can It Last?”) Wakalongosora buku la Uvumbuzi chapitara 17, ilo likulongosora vya ‘chikoko’ ico ‘chikaŵako, kweni kulije, ndipouli, chili pafupi kufuma ku chizongwe.’ (Uvu. 17:8, 11) Mubali Knorr wakalongosora kuti ‘chikoko’ ukaŵa wupu wa League of Nations uwo ukaleka kugwira ntchito mu 1939. Baibolo likayowoyerathu kuti wupu unyake uzamunjira m’malo gha League of Nations, ivyo vizamulongozgera ku nyengo ya mtende. Ivi vikachitika nadi. Mu 1945, Nkhondo Yachiŵiri ya Charu Chose yikati yamara, ‘chikoko’ chikawonekaso ndipo ni wupu wa United Nations. Ŵakaboni ŵa Yehova ŵakasazgirako ntchito yawo ya kupharazga pa charu chose, ndipo gulu lakura chomene kuluska kumanyuma kose.

Dipuloma yane ya ku Giliyadi

Uchimi uwu ukanovwira kumanya ivyo vichitikenge munthazi. Pakaŵa chipharazgo chakuti Sukulu  ya Giliyadi yiyambenge chaka chakulondezgapo, ndipo khumbo lane la kuŵa mishonale likakura chomene. Mu 1943, nkhatumika kukachita upayiniya mu Portland, ku Oregon. Panyengo iyi, pakupharazga tikalizganga nkhani pa giramu kuti ŵanthu ŵategherezge. Pamanyuma, tikaŵapanga mabuku ghakulongosora Baibolo ghakuyowoya vya Ufumu wa Chiuta. Chaka chose ichi, nkhaghanaghananga waka vya uteŵeti wa umishonale.

Mu 1944, nkhakondwa chomene apo Ine na mubwezi wane, Evelyn Trabert, tikachemeka ku Sukulu ya Giliyadi. Kwa myezi yinkhondi, ŵasambizgi ŵithu ŵakatilongora umo tingaŵazgira Baibolo mwakuti tisange nalo chandulo. Tikadokera chomene mtima wawo wa kujiyuyura. Panyengo ya chakurya, nyengo zinyake ŵabali aŵa ndiwo ŵakatigaŵiranga vyakurya. Tikamalizga Sukulu ya Giliyadi pa Janyuwale 22, 1945.

UTEWETI WANE WA UMISHONALE

Evelyn na Ine, kweniso Leo na Esther Mahan, tikafika ku El Salvador mu Juni 1946. Tikasanga kuti minda ‘yacha kale mwakuti yivunike.’ (Yoh. 4:35) Ivyo vyalongosoreka pakwambilira pa nkhani iyi, vikulongora umo ŵalongozgi ŵa chisopa ŵakakwiyira. Sabata yimoza pambere ivi vindachitike, tikaŵa na ungano wa dera uwo ukaŵa wakwamba kwa ise mu Santa Ana. Tikachemerako ŵanthu ku nkhani yachisanisani ndipo tikakondwa chomene kuti ŵanthu pafupifupi 500 ŵakiza ku ungano uwu. M’malo mwa kufumamo mu tawuni iyi, tikasimikizga mtima kuti tikhale na kovwira ŵanthu ŵawemi mtima. Nangauli ŵalongozgi ŵa chisopa ŵakachenjezga ŵanthu kuti ŵaleke kuŵazga Baibolo, kweni ŵanandi ŵakakhumbanga kumanya unenesko. Pa nyengo iyi, ŵanthu ŵachoko waka ndiwo ŵakaŵa kuti ŵangakwaniska kugura Baibolo. Ŵakatilumba chomene chifukwa tikafwilirapo kusambira Chisipanishi kuti tiŵasambizge vya Yehova, Chiuta waunenesko, na layizgo lake la kuzgora charu chapasi kuŵa Paradiso.

Tose taŵankhondi tikatumika ku El Salvador kufuma ku Sukulu ya Giliyadi. Kwambira kumazere: Evelyn Trabert, Millie Brashier, Esther Mahan, Ine, na Leo Mahan

Rosa Ascencio wakaŵa yumoza mwa ŵanthu ŵakwambilira awo nkhaŵasambizganga Baibolo. Wakakhalanga na mwanalume uyo ŵakaŵa kuti ŵandatorane mwakuyana na dango. Kweni wakati wamba kusambira Baibolo, wakaleka kukhala nayo. Pamanyuma mwanalume nayo wakamba kusambira Baibolo. Ŵakatorana mwakuyana na dango na kubatizika ndipo ŵakaŵa ŵateŵeti ŵamwamphu ŵa Yehova. Rosa wakaŵa mupayiniya wanyengozose wakwamba mu Santa Ana. *

Rosa wakaŵa na sitoro. Para wakuluta mu uteŵeti, wakajaranga sitoro yake, ndipo wakagomezganga kuti Yehova wamupenge ivyo wakasoŵerwanga. Usange wajuraso sitoro yake, kukizanga makasitomala ghanandi. Wakajiwonera yekha kuti mazgu agho ghali pa Mateyu 6:33 ngaunenesko. Wakalutilira kugomezgeka m’paka apo wakafwira.

Tikaŵapo ŵamishonale ŵakukwana 6 ndipo tikachitanga lenti nyumba yimoza. Zuŵa linyake, wasembe wakachenjezga mweneko wa nyumba kuti usange walutilirenge kutizomerezga kuchita lenti nyumba yake, iyo na muwoli wake ŵasezgekenge mu tchalitchi. Mweneko wa nyumba, uyo wakaŵaso wakumanyikwa chomene chifukwa cha bizinesi, wakaŵa  kuti wakhuŵara kale na nkharo ya ŵalongozgi ŵa chisopa. Ntheura wakachita wofi yayi. Ndipo wakaphalira wasembe kuti vilije kanthu nanga ŵangamusezga. Wakatiphalira kuti tili ŵanangwa kukhala mu nyumba yake m’paka apo tizamukhumbira kufumamo.

MUNTHU WAKUCHINDIKIKA WAKAZGOKA KABONI

Ofesi ya munthavi iyo yikazengeka mu 1955

Mu msumba wa San Salvador, mishonale munyake wakasambiranga Baibolo na muwoli wa Baltasar Perla, uyo wakaŵa injiniya. Mwanalume wa mtima uwemi uyu wakaleka kuŵa na chipulikano mwa Chiuta chifukwa cha upusikizgi wa ŵalongozgi ŵa chisopa. Pakuzenga ofesi ya munthavi, Baltasar wakajipeleka kulemba pulani na kuzenga kwambura kulipiliska, nangauli wakaŵa kuti wandasambire unenesko.

Wati wachezga na ŵanthu ŵa Yehova pakuzenga ofesi ya munthavi, Baltasar wakakhorwa kuti wasanga chisopa chaunenesko. Wakabatizika pa Julayi 22, 1955, ndipo mwaluŵiro mwanakazi wake zina lake Paulina, nayo wakabatizika. Ŵana ŵawo wose ŵakuteŵetera Yehova mwakugomezgeka. Mwana wawo mwanalume uyo nayo wakuchemeka kuti Baltasar, wateŵetera pa Beteli ya ku Brooklyn vyaka 49 uko wakovwira pa mulimo wa pa charu chose wa kupharazga. Panyengo yasono wakuteŵetera mu Komiti ya Munthavi ya United States. *

Tikati tayamba kuŵa na maungano gha chigaŵa mu San Salvador, Mubali Perla ndiyo wakawovwira kuti tizomerezgeke kuwungana mu holo yakuchitiramo maseŵero ghakukhozga thupi. Pakuti tikaŵa ŵachoko, pakwamba tikakhalanga pa mipando yichoko waka, kweni chifukwa chakuti Yehova wakatitumbikanga, tikasazgikirangako chilimika chilichose m’paka holo kuzura na kuchepa. Pa maungano agha, nkhakumananga na ŵanthu awo nkhaŵasambizga Baibolo. Nkhakondwanga chomene para awo nkhaŵasambizganga Baibolo ŵakunilongora masambiro ghawo gha Baibolo agho ghabatizika.

Mubali F.W. Franz wakudumbiskana na ŵamishonale pa ungano wa chigaŵa

Pa ungano unyake, mubali wakiza kwa ine na kuniphalira kuti wakaŵa nane na mazgu. Nkhamumanya yayi kweni nkhaŵa wakunweka kutegherezga. Wakati: “Nkhaŵa yumoza wa ŵanyamata ŵara ŵakamuponyaninge na malibwe ku Santa Ana.” Pa nyengo ya ungano iyi, nayo wakaŵa muteŵeti wa Yehova nga ndine. Nkhakondwa chomene. Ivyo tikadumbiskana apa, vikanikhorweska kuti  uteŵeti wanyengozose uli na vyandulo vinandi kuluska ntchito yinyake yiliyose.

Tili pa ungano wa dera uwo tikachitira mu El Salvador kakwamba

NKHASANKHA MAKORA

Pafupifupi vyaka 29 nkhalutilira kuchita umishonale mu El Salvador. Pakwamba, mu msumba wa Santa Ana, kufuma apo, mu Sonsonate, mu Santa Tecla, ndipo paumaliro mu San Salvador. Mu 1975, pamanyuma pa kulomba mwakufwilirapo, nkhaghanaghana kuti nileke uteŵeti wa umishonale na kuwelera ku Spokane. Nkhawera kuti nkhapwelelere ŵapapi ŵane awo ŵakaŵa ŵachekuru chomene.

Adada ŵakati ŵafwa mu 1979, nkhalutilira kupwelelera Amama, awo ŵakaŵavyirathu nkhongono. Pakati pajumpha vyaka 8 ŵakafwa, ndipo ŵakafwa na vyaka 94. Pa nyengo yakusuzga iyi, vikalema chomene. Ivi vikapangiska kuti nilware mashingozi. Kweni chifukwa cha lurombo na wovwiri wa Yehova nkhazizipizga chiyezgo ichi. Vikaŵa nga ni para Yehova wakuyowoya kuti, ‘nanga ufike ku uchekuru, tindikuyeghenge; enya, kukuyegha na kukuthaska.’—Yes. 46:4.

Mu 1990, nkhasamira ku Omak, ku Washington. Uku nako nkhawovwira chomene mu chigaŵa cha chiyowoyero cha Chisipanishi, ndipo ŵanandi awo nkhasambiranga nawo Baibolo ŵakabatizika. Kuzakafika mu Novembala 2007, nkhatondekanga kupwelelera nyumba yane ya ku Omak chifukwa cha uchekuru, ntheura nkhasamira mu nyumba yichoko mu tawuni yapafupi ya Chelan, ku Washington. Mpingo wa Chisipanishi wanipwelelera chomene, ndipo pa ichi nkhuwonga chomene. Pakuti muchekuru ndine pera mu mpingo uwu, ŵabali na ŵadumbu ŵakunitora kuti ndine gogo wawo.

Nangauli nkhasankha kuleka kutengwa na kuŵa na mbumba kuti niteŵetere “kwambura nthimbanizgo,” kweni nili na ŵana ŵanandi ŵauzimu. (1 Kor. 7:34, 35) Nkhawona kuti mu mgonezi uwu ntchambura machitiko kuŵa na chilichose. Ntheura nkhajipeleka kuti niteŵetere Yehova na mtima wane wose. Mu charu chiphya, muzamuŵa vyakusanguluska vinandi. Lemba lane la pamtima ni Salmo 145:16, ilo likuti Yehova ‘wazamukhorweska chamoyo chose.’

Upayiniya ukunovwira kuti nilutilire kuŵa wamwamphu

Pa nyengo yasono nili na vyaka 91, ndipo nichaliko na nkhongono, ntheura nkhulutilira kuchita upayiniya. Upayiniya ukunovwira kuti nilutilire kuŵa wamwamphu kweniso kumanya kuti umoyo wane ngwachandulo. Pakwamba, apo nkhafikanga mu El Salvador, mulimo wa kupharazga ukaŵa kuti ukwamba waka. Nangauli Satana wakulutilira kutisuska, kweni panyengo yasono mu charu ichi muli ŵapharazgi ŵakujumpha 39,000. Ichi chakhozga chomene chipulikano chane. Nadi, mzimu utuŵa wa Yehova ukovwira ŵanthu ŵake.

^ ndime 4 Wonani 1981 Yearbook of Jehovah’s Witnesses, peji 45-46.

^ ndime 19 1981 Yearbook, peji 41-42.

^ ndime 24 1981 Yearbook, peji 66-67, 74-75.