Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) SEPTEMBER 2014

Kumbukani Awo Ŵakuchita Uteŵeti Wanyengozose

Kumbukani Awo Ŵakuchita Uteŵeti Wanyengozose

Nyengo zose tikukumbuka mulimo winu wa chipulikano na mulimo winu wachitemwa.’—1 TES. 1:3.

1. Kasi Paulosi wakati wuli pa nkhani ya awo ŵakateŵeteranga Yehova na mtima wose?

MPOSITOLE Paulosi wakakumbukanga awo ŵakapharazganga makani ghawemi na mtima wawo wose. Iyo wakalemba kuti: ‘Nyengo zose tikukumbuka mulimo winu wa chipulikano na mulimo winu wachitemwa, kweniso chizizipizgo chinu chifukwa cha chigomezgo icho muli nacho mwa Fumu yithu Yesu Khristu, panthazi pa Chiuta withu na Dada.’ (1 Tes. 1:3) Yehova nayo wakukumbuka mulimo wachitemwa wa awo ŵakumuteŵetera mwakugomezgeka, kwali ŵakuchita vinandi kwali vichoko.—Heb. 6:10.

2. Kasi tidumbiskanenge vichi mu nkhani iyi?

2 Ŵateŵeti ŵa Yehova ŵanandi, ŵakale na ŵasono wuwo, ŵakujipeleka chomene pakuteŵetera Yehova. Mu nkhani iyi tiwonenge ivyo ŵanji ŵakachita mu nyengo yakale. Kweniso tiwonenge mauteŵeti ghanyengozose gha mazuŵa ghano ndiposo ivyo tingachita kuti tikumbukenge awo ŵajipeleka kuchita mauteŵeti ghapadera agha.

ŴAKHRISTU ŴAKWAMBILIRA

3, 4. (a) Kasi ŵanji ŵakachita mauteŵeti wuli mu nyengo yakale? (b) Kasi ŵakasanganga wuli vyakukhumbikwa pa umoyo wawo?

3 Yesu wakati wabatizika waka, wakambiska mulimo uwo pasono ukuchitika pa charu chose chapasi. (Luka 3:21-23; 4:14, 15, 43) Wakati wafwa, ŵapositole ŵake ŵakamba kudangilira pa mulimo wa kuthandazga  makani ghawemi. (Mil. 5:42; 6:7) Ŵakhristu ŵanji, nga ni Filipu, ŵakaŵa ŵapharazgi ndiposo ŵamishonale mu Palestina. (Mil. 8:5, 40; 21:8) Paulosi na ŵanji ŵakapharazga ku vigaŵa vyakutali. (Mil. 13:2-4; 14:26; 2 Kor. 1:19) Kweniso ŵanji, nga ni Silivano (Sila), Mariko, na Luka, ŵakalembako Baibolo, panji ŵakalembanga m’malo mwa ŵalembi ŵa Baibolo. (1 Pet. 5:12) Ŵadumbu ŵakateŵeteranga lumoza na ŵabali ŵakugomezgeka aŵa. (Mil. 18:26; Rom. 16:1, 2) Mu Malemba Ghachigiriki tikuŵazga nkhani zakukhozga za ŵabali na ŵadumbu aŵa. Nkhani izi zikutovwira kumanya kuti Yehova wakuwona kuti mulimo wa ŵateŵeti ŵake ngwakuzirwa ndiposo kuti wakuŵapwelelera.

4 Kasi ŵateŵeti ŵanyengozose mu nyengo yakale, ŵakasanganga wuli vyakukhumbikwa pa umoyo? Iwo ŵakachichizganga ŵabali yayi kuti ŵaŵawovwire, ntheura nyengo zinyake ŵakachitanga ganyu. (1 Kor. 9:11-15) Ndipouli, ŵakakananga yayi para munthu wakukhumba kuŵawovwira. Ŵanji ŵakaŵachemeranga ku nyumba kwawo kuti ŵakaryeko chakurya, ŵanji ŵakaŵapanga malo ghakugona, panji kuŵawovwira mu nthowa zinyake. Ŵabali na ŵadumbu, ndiposo mpingo wose, ŵakaŵa ŵakukhumbisiska kuŵawovwira.—Ŵazgani Milimo 16:14, 15; Ŵafilipi 4:15-18.

ŴATEŴETI ŴANYENGOZOSE MAZUŴA GHANO

5. Kasi mbumba yinyake yikati wuli pa nkhani ya uteŵeti wanyengozose uwo yikuchita?

5 Mazuŵa ghano napo, ŵabali na ŵadumbu ŵanandi ŵakujipeleka kuti ŵachite uteŵeti wanyengozose. (Wonani bokosi lakuti “ Mauteŵeti Ghanyengozose.”) Kasi ŵakujipulika wuli chifukwa chakuti ŵali kusankha uteŵeti wanyengozose? Ŵafumbani ndipo musangenge chandulo. Mwachiyelezgero: Mubali munyake uyo wali kuŵapo mupayiniya wanyengozose, mupayiniya wapadera, mishonale, ndipo panyengo yasono ni muteŵeti wa pa Beteli mu charu chinyake, wakati: “Nkhuwona kuti nkhachita makora chomene kwamba uteŵeti wanyengozose. Apo nkhaŵa na vyaka 18, nkheneranga kusankhapo chimoza: kuluta ku yunivesite, kugwira ntchito ya ku charu, panji kwamba upayiniya. Kuyana na ivyo vyanichitikira, nawona kuti Yehova wakukumbuka ivyo munthu wasida kuti wambe uteŵeti wanyengozose. Maluso agho Yehova wanipa, naghagwiliskira ntchito makora chomene. Ivi mphanyi vikachitika yayi nisankhenge kugwira ntchito ya ku charu.” Muwoli wake wakati: “Mulimo uliwose uwo nachita mu gulu la Yehova, wanovwira kuti niŵe wakukhora mwauzimu. Nyengo zose, Yehova wakutivikilira na kutilongozga. Ivi mphanyi vindatichitikire tiŵenge pa ntchito za ku charu. Zuŵa lililose nkhuwonga Yehova chifukwa chakuti watizomerezga kuti tiŵe mu uteŵeti wanyengozose.” Namwe mungazakaŵa ŵakukondwa usange mungamba uteŵeti wanyengozose.

6. Kasi Yehova wakuŵawona wuli ŵateŵeti ŵake wose?

6 Mbunenesko kuti ŵanji ŵangafiska yayi kuchita uteŵeti wanyengozose panyengo yasono chifukwa cha umo vinthu viliri pa umoyo wawo. Ndipouli, tikusimikizga kuti Yehova wakuwona kuti mulimo uwo ŵakuchita na mtima wawo wose ngwakuzirwa chomene. Mwachiyelezgero, pa Filemone 1-3, Paulosi wakatawuzga ŵabali wose mu mpingo wa Kolose, ndipo ŵanji wakaŵazunura na mazina wuwo. (Ŵazgani.) Paulosi wakaŵawonga, ndipo ndimo Yehova wakachitiranga. Mwakuyana waka, Adada ŵithu ŵa kuchanya ŵakuwonga ivyo tikuchita pakuŵateŵetera. Ndipouli, kasi awo panyengo yasono ŵakuchita uteŵeti wanyengozose tingaŵawovwira wuli?

KASI ŴAPAYINIYA TINGAŴAWOVWIRA WULI?

7, 8. Kasi ŵapayiniya ŵakuchita mulimo wuli? Kasi ŵanji mu mpingo ŵangaŵawovwira wuli?

7 Nga umo ŵakachitiranga ŵapharazgi ŵa mu nyengo yakale, ŵapayiniya ŵamwamphu ŵakukhozga chomene mipingo. Ŵanandi ŵakuŵikapo mtima kuti ŵapharazge maora 70 mwezi uliwose. Kasi tingaŵawovwira wuli?

8 Mudumbu munyake uyo ni mupayiniya, zina lake Shari, wakati: “Chifukwa chakuti ŵapayiniya ŵakuŵa mu upharazgi zuŵa lililose,  ŵakuwoneka kuŵa ŵakukhora mwauzimu. Ndipouli, nawo ŵakukhumba kukhozgeka.” (Rom. 1:11, 12) Mudumbu munyake uyo wakaŵa mupayiniya kwa vyaka vinandi, wakayowoya vya ŵapayiniya ŵa mu mpingo wake. Iyo wakati: “Nyengo zose ŵapayiniya ŵakugwira ntchito na mtima wose. Para ŵanji ŵaŵawovwira mendero, panji kuŵachemera ku nyumba kwawo kuti ŵakaryeko chakurya, panji kuŵapako ndalama, ŵakuwonga chomene. Ivi vikuŵawovwira kumanya kuti ŵabali na ŵadumbu ŵakuŵaghanaghanira chomene.”

9, 10. Kasi ŵanji ŵawovwira wuli ŵapayiniya ŵa mu mpingo wawo?

9 Nthowa yinyake iyo tingawovwilira ŵapayiniya, nkhuluta nawo mu upharazgi. Mupayiniya munyake zina lake Bobbi wakati: “Mukati mwa sabata tikukhumba chomene ŵanthu ŵakuti tilutenge nawo mu upharazgi.” Mupayiniya munyake uyo wali mu mpingo umoza na Bobbi, wakati: “Kumise chikuŵa chakusuzga chomene kusanga munthu wakuluta nayo mu upharazgi.” Mudumbu munyake uyo pasono wakuteŵetera pa Beteli ku Brooklyn, wakayowoya ivyo vikachitikanga apo wakaŵa mupayiniya. Iyo wakati: “Pakaŵa mudumbu munyake uyo wakaŵa na galimoto ndipo wakaniphalira kuti, ‘Para ulije munthu wakuluta nayo mu upharazgi uniphalirenge, ndipo ine nilutenge nawe.’ Mudumbu uyu wakaniwovwira chomene kuti nilutilire kuchita upayiniya.” Shari wakati: “Para ŵapayiniya awo ŵandatore panji kutengwa ŵawera mu upharazgi, kanandi ŵakusoŵa wakuchezga nayo. Mungaŵachema nyengo zinyake kuti muŵenge nawo pa Nyengo Yakusopera ya Mbumba yinu. Kweniso mungaŵawovwira chomene usange mungachita nawo lumoza milimo yinyake.”

10 Mudumbu munyake uyo waŵa mu uteŵeti wanyengozose kwa vyaka pafupifupi 50, wakayowoya ivyo vikachitikanga apo wakaŵa mupayiniya lumoza na ŵadumbu ŵanyake ŵambura kutengwa. Iyo wakati: “Ŵalara ŵakenderanga taŵapayiniya para pajumpha myezi yichoko waka. Ŵakakhumbanga kumanya usange tili makora, ntchito izo tikugwira kweniso suzgo lililose ilo tingaŵa nalo. Ŵakakhumbanga chomene kuti ŵatovwire. Ŵakizanga ku nyumba yithu kuti ŵamanye usange tikukhumbikwira wovwiri.” Ŵalara aŵa na ŵanji awo ŵakovwira ŵapayiniya ŵakuyezga Onesiforo. Padera pa kupwelelera mbumba yake, wakawovwirangaso Paulosi.—2 Tim. 1:18.

11. Kasi ŵapayiniya ŵapadera ŵakuchita mulimo wuli?

 11 Mipingo yinyake yili na ŵapayiniya ŵapadera. Ŵapayiniya ŵapadera ŵanandi ŵakuŵikapo mtima kuti ŵapharazge maora 130 mwezi uliwose. Chifukwa chakuti ŵakuŵa mu upharazgi nyengo yitali kweniso ŵakuchita milimo yinyake yauzimu, kanandi ŵakugwira ntchito ya ku charu yayi. Ofesi ya munthavi yikuŵapa ndalama zichoko waka mwezi uliwose kuti ziŵawovwirenge, ntheura ŵakuŵika mtima wawo wose pa mulimo wa kupharazga.

12. Kasi ŵalara kweniso ŵanji ŵangaŵawovwira wuli ŵapayiniya ŵapadera?

12 Kasi tingaŵawovwira wuli ŵapayiniya ŵapadera? Mulara munyake uyo wakuteŵetera pa ofesi ya munthavi, mweneuyo milimo yake yikukhwaskana na ŵapayiniya ŵapadera, wakati: “Ŵalara ŵakwenera kuyowoya nawo, kumanya usange ŵali makora, ndiposo umo ŵangaŵawovwilira. Ŵakaboni ŵanyake ŵakuwona kuti ŵapayiniya ŵapadera ŵakusoŵa kanthu yayi pakuti ŵakupika ndalama. Ndipouli, ŵabali na ŵadumbu ŵa mu mpingo wawo ŵangawovwira mu nthowa zinandi.” Nga mbapayiniya ŵanyengozose, ŵapayiniya ŵapadera ŵakuwonga chomene para ŵabali na ŵadumbu ŵakuluta nawo mu upharazgi. Kasi mungawovwira mu nthowa iyi?

KASI ŴALAŴILIRI ŴA DERA TINGAŴAWOVWIRA WULI?

13, 14. (a) Kasi ŵalaŵiliri ŵa dera ŵakukhumba vichi? (b) Kasi mungaŵawovwira wuli?

13 Kanandi ŵabali na ŵadumbu ŵakuwona kuti ŵalaŵiliri ŵa dera ndiposo ŵawoli ŵawo, mbanthu ŵakukhwima mwauzimu. Uwu mbunenesko. Ndipouli nawo ŵakukhumbikwira kukhozgeka, kwenda nawo lumoza mu upharazgi, kweniso kuchita nawo vyakusanguluska. Nyengo zinyake ŵangalwara na kugonekeka mu chipatala, panji ŵangakhumbikwira kuŵachita opareshoni. Usange vingaŵa nthena, kasi tingaŵawovwira wuli? Ŵangawonga chomene usange ŵabali na ŵadumbu ŵangaŵawovwirako vinyake ndiposo para ŵangakaŵawonanga. Luka, ‘mchizgi wakutemweka,’ wakapweleleranga Paulosi na ŵanji awo ŵakenderanga mipingo.—Kol. 4:14; Mil. 20:5–21:18.

14 Ŵalaŵiliri ŵa dera na ŵawoli ŵawo, nawo ŵakukhumba kuŵa na ŵabwezi. Mulaŵiliri wa dera munyake wakati: “Ŵabwezi ŵane ŵakumanya para nkhukhumba kukhozgeka. Ŵakunifumba mafumbo mwaluso, ndipo ichi chikovwira kuti niŵalongosolere suzgo lane. Nkhovwirika chomene para ŵanitegherezga.” Ŵalaŵiliri ŵa dera na ŵawoli ŵawo ŵakuwonga chomene para ŵabali na ŵadumbu ŵakuŵaghanaghanira.

KASI ŴATEŴETI ŴA PA BETELI TINGAŴAWOVWIRA WULI?

15, 16. Kasi ŵateŵeti ŵa pa Beteli ŵakuchita milimo wuli? Kasi tingaŵawovwira wuli?

15 Ŵateŵeti ŵa pa Beteli ŵakuchita milimo yakupambanapambana iyo yikukhozgera mulimo wa kupharazga makani ghawemi gha Ufumu. Usange mu mpingo panji mu dera linu muli ŵateŵeti ŵa pa Beteli, kasi mungalongora wuli kuti mukuŵakumbuka?

16 Para ŵafika waka pa Beteli, ŵangakumbuka kukaya chifukwa cha kuŵa kutali na ŵabali ŵawo ndiposo ŵabwezi ŵawo. Ŵakuwonga chomene usange ŵanyawo ŵa pa Beteli na ŵanji mu mpingo wawo uphya, ŵangaŵa nawo paubwezi. (Mrk. 10:29, 30) Milimo yawo yikuŵapa mpata kuti sabata yiliyose ŵawunganenge na mpingo na kuluta mu upharazgi. Ndipouli, nyengo zinyake ŵateŵeti ŵa pa Beteli ŵakuŵa na milimo yinandi. Usange ŵabali na ŵadumbu mu mpingo ŵakupulikiska na kulongora kuti ŵakuwonga mulimo uwo ŵateŵeti ŵa pa Beteli ŵakuchita, wose ŵakusanga chandulo.—Ŵazgani 1 Ŵatesalonika 2:9.

KASI AWO ŴAKUTEŴETERA MU CHARU CHINYAKE TINGAŴAWOVWIRA WULI?

17, 18. Kasi awo ŵakuteŵetera mu charu chinyake ŵakuchita milimo wuli?

17 Awo ŵakuteŵetera mu charu chinyake ŵakusanga kuti chakurya, chiyowoyero, kakhaliro ka ŵanthu na vinyake vyantheura, vikuŵa  vyakupambana na ivyo ŵali kuzgoŵera. Kasi ŵakuchita milimo wuli mu vyaru vinyake ivi?

18 Ŵanji mbamishonale ndipo kanandi ŵakuŵa mu upharazgi. Iwo ŵali na luso pakupharazga ndiposo pakusambizga, ndipo ŵakusambizgako ŵabali na ŵadumbu ivyo ŵali kusambira. Ofesi ya munthavi yikuŵasangira nyumba na kuŵapa ndalama zichoko waka zakuti ŵagulirenge vyakukhumbikwa. Ŵanji awo ŵakuteŵetera mu vyaru vinyake ŵakuteŵetera pa Beteli panji ŵakovwira kuzenga maofesi gha munthavi, maofesi ghakung’anamulirako mabuku, Malo Ghakuchitirapo Ungano, panji Nyumba za Ufumu. Ŵakupika chakurya, nyumba, na vinyake vyakukhumbikwa. Nga mbateŵeti ŵa pa Beteli, nawo ŵakuwungana na kuluta mu upharazgi, ntheura ŵakovwira mu nthowa zinandi.

19. Kasi tikwenera kukumbuka vichi para tikuchita vinthu na awo ŵakuteŵetera mu charu chinyake?

19 Kasi mungaŵakumbuka wuli ŵateŵeti ŵanyengozose aŵa? Manyani kuti para ŵafika waka, ŵakuŵa kuti ŵandazgoŵere vyakurya vya mu charu icho. Mukumbukenge fundo iyi para mukuŵachemera ku nyumba yinu kuti ŵazakarye chakurya. Mungaŵafumba chakurya icho ŵangatemwa kurya panji icho ŵangatemwa kuchiyezga. Mukwenera kuŵa ŵakuzikira para ŵakusambira chiyowoyero chinu na kakhaliro kinu. Pangatora nyengo kuti ŵapulikiske ivyo mukuyowoya, kweni mukwenera kuŵawovwira mwalusungu umo ŵangazunulira mazgu mwakwenelera. Iwo ŵakukhumba kuti ŵasambire.

20. Kasi ŵateŵeti ŵanyengozose na ŵapapi ŵawo tingaŵakumbuka wuli?

20 Para nyengo yajumphapo, ŵateŵeti ŵanyengozose awo ŵakuteŵetera kutali na kukwawo, ŵangakhumbikwira kusankha chakuchita pa nkhani ya kovwira ŵapapi ŵawo ŵachekuru. Para ŵapapi Mbakaboni, ŵangatemwa kuti ŵana ŵawo ŵalutilire kuteŵetera. (3 Yoh. 4) Mbunenesko kuti para ŵapapi ŵawo ŵakukhumbikwira wovwiri, ŵateŵeti ŵanyengozose ŵakuchita chilichose icho ŵangafiska kuti ŵaŵapwelelere kweniso kukaŵawona nyengo na nyengo. Ndipouli, awo ŵakukhala pafupi ŵangawovwira pakupwelelera ŵapapi ŵachekuru aŵa para pakukhumbikwa wovwiri. Ivi vingawovwira awo ŵakuchita uteŵeti wanyengozose. Manyani kuti ŵateŵeti ŵanyengozose ŵakovwira pa mulimo wakuzirwa chomene pa charu chapasi. (Mat. 28:19, 20) Kasi imwe panji mpingo winu, ungawovwira para ŵapapi ŵa ŵateŵeti ŵanyengozose ŵakukhumbikwira wovwiri?

21. Kasi ŵateŵeti ŵanyengozose ŵakuchita wuli para ŵanji ŵakuŵawovwira na kuŵakhozga?

21 Chilato cha ŵabali na ŵadumbu awo ŵakwamba uteŵeti wanyengozose nkhusanga ndalama yayi, kweni kuchita vinandi pakuteŵetera Yehova na kovwira ŵanji. Iwo ŵangawonga chomene para mungaŵawovwira. Mudumbu munyake uyo wakuteŵetera mu charu icho ntchakwake yayi, wakati: “Para ŵanji ŵatiwonga ntchilongolero chakuti ŵakutighanaghanira ndiposo kuti ŵakukondwa na ivyo tikuchita.”

22. Chifukwa wuli uteŵeti wanyengozose ngwakuzirwa?

22 Ŵateŵeti ŵanyengozose ŵakukondwa na kukhorwa na umoyo. Mazuŵa ghano palije chinthu chinyake chakukondweska chomene kuluska uteŵeti wanyengozose. Ŵateŵeti ŵanyengozose ŵakusambira umo ŵangaŵira na mikhaliro yiwemi kweniso ŵakusambira vinthu vinyake ivyo vikuŵawovwira sono ndiposo ivyo vizamuŵawovwira mu charu chiphya. Sonosono apa ŵateŵeti wose ŵa Yehova ŵazamuchitanga mulimo wakukhorweska zuŵa lililose. Mphanyi tose talutilira kukumbuka ‘mulimo wa chipulikano na mulimo wachitemwa’ wa awo ŵali mu uteŵeti wanyengozose.—1 Tes. 1:3.