Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) AUGUST 2014

Kasi Mukupokera ‘Cakurya pa Nyengo Yakwenelera’?

Kasi Mukupokera ‘Cakurya pa Nyengo Yakwenelera’?

NYENGO iyo tilimo njakusuzga comene kuluska kumanyuma kose. (2 Tim. 3:1-5) Zuŵa lililose tikuyezgeka kuti tilongore usange tikutemwa Yehova kweniso usange tikukhumba kupulikira malango ghake ghaurunji. Yesu wakamanyirathu kuti nyengo yakusuzga iyi yiŵengeko, ndipo wakasimikizgira ŵalondezgi ŵake kuti waŵawovwirenge kuti ŵazizipizge mpaka ku umaliro. (Mat. 24:3, 13; 28:20) Kuti waŵakhozge, wali kwimika muzga wakugomezgeka kuti waŵapenge ‘cakurya [cauzimu] pa nyengo yakwenelera.’—Mat. 24:45, 46.

Kwambira mu 1919, apo Yesu wakimikira muzga wakugomezgeka, “ŵateŵeti ŵake ŵa pa nyumba” mamiliyoni ghanandi ŵa viyowoyero vyose ŵawunganyika mu gulu la Ciuta ndipo ŵakulyeskeka mwauzimu. (Mat. 24:14; Uvu. 22:17) Ndipouli, mu viyowoyero vinyake mabuku ghithu ghanyake ghandang’anamulike. Kweniso ŵanji ŵalije makompyuta panji mafoni ghapacanya kuti ŵaŵazgenge mabuku ghithu pa vinthu ivi. Mwaciyelezgero, ŵanandi ŵalije mavidiyo panji nkhani izo zikuŵikika pa jw.org pera. Kasi fundo iyi yikung’anamura kuti ŵanji cakurya cinyake cauzimu cikuŵapamba ndipo ŵangalopwa mwauzimu? Kuti tizgore fumbo ili, tiyeni tiwone mazgoro gha mafumbo ghanayi.

 1. Kasi cakurya ico Yehova wakupeleka cikufuma nkhu?

Apo Satana wakayezganga Yesu kuti wazgore malibwe kuti ghaŵe vingwa, Yesu wakazgora kuti: “Munthu wakwenera kuŵa wamoyo na cingwa pera cara, kweniso na lizgu lililose lakufuma mu mulomo wa Yehova.” (Mat. 4:3, 4) Mazgu gha Yehova ghali kulembeka mu Baibolo. (2 Pet. 1:20, 21) Ntheura, cakurya cauzimu cikufuma mu Baibolo.—2 Tim. 3:16, 17.

Gulu la Yehova lili kung’anamura Baibolo la Malemba Ghakupatulika mu Mang’anamuliro gha Caru Ciphya, lose panji cigaŵa waka, mu viyowoyero vyakujumpha 120. Viyowoyero vinyake vinandi vikusazgikako caka na caka. Padera pa Baibolo ili, paliso Mabaibolo ghanyake ghanandi mu viyowoyero masauzandi ghanandi. Ivi vikukolerana na khumbo la Yehova lakuti “ŵanthu ŵa mitundu yose ŵafike pa kumanya makora unenesko na kuponoskeka.” (1 Tim. 2:3, 4) Kweniso, cifukwa cakuti “kulije cilengiwa ico nchambura kuwonekera pamaso” pa Yehova, tili na cigomezgo cose kuti wose awo “ŵakumanya kusoŵerwa kwawo kwauzimu” waŵaguzirenge ku gulu lake na kuŵapa cakurya cauzimu.—Heb. 4:13; Mat. 5:3, 6; Yoh. 6:44; 10:14.

2. Kasi mabuku ghithu ghakovwira wuli pakupeleka cakurya cauzimu?

Kuti munthu waŵe na cipulikano cakukhora, wakwenera yayi kuŵazga Baibolo mwakucimbilira. Wakwenera kupulikiska ivyo wakuŵazga na kuvilondezga. (Yak. 1:22-25) Mu nyengo ya Ŵakhristu ŵakwambilira, nthunguli ya ku Etiyopiya yikamanya fundo iyi. Yikaŵazganga Mazgu gha Ciuta apo Filipu mupharazgi wakayifumba kuti: “Kasi mukupulikiska ivyo mukuŵazga?” Nthunguli yikazgora kuti: “Ningapulikiska wuli, kwambura kuti yunji wanilongozga?” (Mil. 8:26-31) Filipu wakawovwira nthunguli iyi kuti yimanye makora unenesko wa Mazgu gha Ciuta. Nthunguli iyi yikacontheka mtima comene na ivyo yikasambira mwakuti yikabapatizika. (Mil. 8:32-38) Ntheura pera, mabuku ghithu ghakulongosora Baibolo ghatovwira kuti timanye makora unenesko. Ghakuticontha mtima comene na kuticiska kuti tilondezgenge ivyo tikusambira.—Kol. 1:9, 10.

Kwizira mu mabuku, ŵateŵeti ŵa Yehova ŵakupokera vinthu vyauzimu vyakukwana vyakuti ŵarye na kumwa. (Yes. 65:13) Mwaciyelezgero, Gongwe la Mulinda, leneilo lili mu viyowoyero vyakujumpha 210, likulongosora maucimi gha mu Baibolo, likutovwira kuti tipulikiskenge vinthu vyauzimu vyakunyang’amira, na kuticiska kuti tilondezgenge fundo za mu Baibolo. Galamukani!, yeneiyo yili mu viyowoyero pafupifupi 100, yikutovwira kuti timanye makora vinthu ivyo Yehova wali kulenga, na kulongosora umo tingalondezgera ulongozgi wa mu Baibolo. (Zinth. 3:21-23; Rom. 1:20) Muzga wakugomezgeka wakupeleka mabuku na vinyake vyakulongosora Baibolo mu viyowoyero vyakujumpha 680. Kasi mukupatura nyengo yakuŵazgira Baibolo zuŵa lililose? Kasi mukuŵazga magazini yiphya yiliyose ndiposo mabuku ghithu ghanyake agho mukupokera mu ciyowoyero cinu caka cilicose?

Padera pa mabuku na vinyake, gulu la Yehova likunozga maautilayini gha nkhani izo zikuyowoyeka pa maungano gha mpingo, gha dera, na gha cigaŵa. Mukwenera kuti mukusanga candulo cikuru comene na nkhani, seŵero, viyezgelero, na mafumbo ivyo vikuŵa pa maungano agha. Nadi, Yehova wakutipa ciphikiro cauzimu.—Yes. 25:6.

 3. Usange mu ciyowoyero cinu mabuku ghanyake mulije, kasi ndikuti muŵenge na njara mwauzimu?

Napacoko pose. Ŵateŵeti ŵanyake ŵa Yehova nyengo zinyake ŵakuŵa na cakurya cinandi cauzimu kuluska ŵanyake. Ici nchakuzizika yayi. Cifukwa wuli? Mu nyengo ya ŵapositole namo ndimo vikaŵira. Ŵapositole ŵakapokeranga ulongozgi unandi kuluska ŵasambiri ŵanji. (Mrk. 4:10; 9:35-37) Nangauli vikaŵa nthena, ŵasambiri ŵanji aŵa nawo ŵakakhutanga mwauzimu. Ŵakapokeranga cakurya ico ŵakakhumbikwiranga.—Efe. 4:20-24; 1 Pet. 1:8.

Kweniso nchakuzirwa kumanya kuti vinandi ivyo Yesu wakayowoya na kucita apo wakaŵa pa caru capasi, vindalembeke mu mabuku gha Makani Ghawemi. Mpositole Yohane wakalemba kuti: “Nakuti paliso vinthu vinyake vinandi ivyo Yesu wakacita, ivyo viŵenge kuti vyalembeka vyose, nkhughanaghana kuti, caru cingakwana cara kuŵikapo mipukutu iyo yingalembeka.” (Yoh. 21:25) Nangauli ŵalondezgi ŵa Yesu ŵa mu nyengo yakale ŵakamanyanga vinandi comene vyakukhwaskana na munthu wakufikapo Yesu kuluska ise, kweni nase tikukhuta mwauzimu. Yehova wawoneseska kuti timanye vyakukwana vyakukhwaskana na Yesu kuti vitovwire kuŵa ŵalondezgi ŵake.—1 Pet. 2:21.

Kweniso ghanaghanirani vya makalata agho ŵapositole ŵakatumizganga ku mipingo Yacikhristu yakwambilira. Kalata yinyake iyo Paulosi wakalemba, mu Baibolo mulije. (Kol. 4:16) Kasi cakurya cauzimu ico tili naco nchakupeleŵera cifukwa cakuti tilije kalata iyi? Yayi. Yehova wakumanya ivyo tikukhumbikwira ndipo watipa cakurya cauzimu cakukwana kuti tilutilire kuŵa ŵakukhora mwauzimu.—Mat. 6:8.

Yehova wakumanya ivyo tikukhumbikwira ndipo watipa cakurya cauzimu cakukwana kuti tilutilire kuŵa ŵakukhora mwauzimu

Mazuŵa ghano, ŵateŵeti ŵa Yehova ŵanyake ŵali na cakurya cinandi cauzimu kuluska ŵanyake. Kasi mu ciyowoyero cinu muli mabuku ghacoko waka? Usange ni nthena, manyani kuti Yehova wakumupwelelerani. Sambirani mabuku agho muli nagho, ndipo usange nchamacitiko, mulutenge ku maungano agho ghakucitika mu ciyowoyero ico mukupulika. Ndipo simikizgani kuti Yehova wamovwiraninge kuti mulutilire kuŵa ŵakukhora mwauzimu.—Sal. 1:2; Heb. 10:24, 25.

4. Usange mulije mwaŵi wakuti muwone mabuku na vinyake ivyo vikuŵa pa jw.org, kasi ndikuti muŵenge ŵakulopwa mwauzimu?

Pa Webusayiti yithu, pakuŵa magazini, mabuku ghakusambilira Baibolo na vinyake vyantheura. Kweniso pakuŵa nkhani izo zikovwira ŵakutorana, ŵawukirano na awo ŵali na ŵana ŵacoko. Mbumba zikusanga candulo cifukwa ca kusambira vinthu ivi pa Nyengo Yakusopera. Kweniso Webusayiti yithu yikulongosora maungano ghanyake ghapadera, nga ungano wa pa caka na wa awo ŵamalizga masambiro gha Giliyadi. Kweniso yikumanyiska ŵabali na ŵadumbu pa caru cose capasi masoka agho ghacitika ndiposo milandu yakukhwaskana na ŵanthu ŵa Yehova. (1 Pet. 5:8, 9) Webusayiti iyi yikovwira comene pakupharazga, yikovwira kuti makani ghawemi ghafike nanga nkhu vyaru ivyo mulimo withu ngwakukanizgika.

Ndipouli, mungalutilira kuŵa ŵakukhora mwauzimu kwali muli na mwaŵi wa kuwona pa Webusayiti kwali yayi. Muzga wagwira nchito na nkhongono zose kuti wapeleke mabuku ghakukwana kuti muteŵeti wa pa nyumba waliyose walyeskekenge mwakukwana mwauzimu. Ntheura, mukwenera kujisuzga yayi kuti mpaka mugure kompyuta panji foni iyo yili na Intaneti kuti mujurenge pa jw.org. Ŵanji ŵangasindikizga vinthu vicoko waka pa Webusayiti yithu na kupeleka ku awo ŵalije mwaŵi wa Intaneti, kweni nchakukhumbikwa viŵi yayi kuti mipingo yicitenge nthena.

Tikuwonga comene Yesu cifukwa ca kufiska layizgo lake lakuti watipenge vinthu vyauzimu ivyo tikukhumbikwira. Apo mazuŵa ghaumaliro ghakusuzga agha ghali pafupi kumara, tili na cigomezgo cose kuti Yehova walutilirenge kutipa ‘cakurya [cauzimu] pa nyengo yakwenelera.’