Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) JULY 2014

“Yehova Wakuŵamanya Awo Mbake”

“Yehova Wakuŵamanya Awo Mbake”

Usange yunji wakutemwa Ciuta, uyu ndiyo wakumanyikwa na iyo.”—1 KOR. 8:3.

1. Longosorani nkhani ya mu Baibolo iyo yikulongora kuti ŵanthu ŵanyake ŵa Ciuta ŵakuŵa na maghanoghano ghakupuvya. (Wonani cithuzithuzi cakwamba.)

ZUŴA linyake mulenji, Musofi Mukuru, Aroni, wakimilira pa mulyango wa cihema ca Yehova. Wakakolera mbale yakusunkhizgiramo vyakusunkhizga. Pafupi nayo pakaŵa Kora na ŵanalume 250, awo nawo ŵakasunkhizganga vyakusunkhizga kwa Yehova, waliyose wakaŵa na mbale yake. (Maŵa. 16:16-18) Vikawonekanga nga ni para ŵanalume wose aŵa ŵakaŵa ŵakugomezgeka kwa Yehova. Ndipouli, kuwuskako Aroni, ŵanyake wose ŵakaŵa ŵakujikuzga kweniso ŵakugaluka ndipo ŵakakhumbanga kupoka usofi. (Maŵa. 16:1-11) Iwo ŵakajipusika pakughanaghana kuti Ciuta wangazomera kusopa kwawo. Kweni ivyo ŵakacita apa vikakwiyiska Yehova, uyo wakusanda mitima, ndipo wakamanya kuti mbapusikizgi.—Yer. 17:10.

2. Kasi Mozesi wakacima kuti vici, ndipo vikafiskika wuli?

2 Mayiro ghake, Mozesi wakacima kuti: “Namacero Yehova tiwalongore uyo ngwake.” (Maŵa. 16:5) Yehova wakapambaniska nadi pakati pa awo ŵakamusopanga mwaunenesko na awo ŵakaŵa ŵapusikizgi apo “moto wakufumira kwa Yehova ukaŵamyanga petu [Kora na] ŵanalume ŵara makhumi khumi ghaŵiri pacanya  makhumi ghankhondi, awo ŵakapelekanga vyakusunkhizga.” (Maŵa. 16:35; 26:10) Kweni Yehova wakaponoska Aroni. Ici cikalongora kuti ndiyo wakaŵa musofi waunenesko kweniso kuti ndiyo wakasopanga nadi Ciuta.—Ŵazgani 1 Ŵakorinte 8:3.

3. (a) Kasi nchivici ico cikacitika mu nyengo ya mpositole Paulosi? (b) Kasi tikusambirapo vici pa umo Yehova wakacitira na ŵakugaluka mu nyengo ya Mozesi?

3 Vyakuyana na ivi vikacitikaso pakati pajumpha vyaka pafupifupi 1,500. Vikacitika mu nyengo ya mpositole Paulosi. Ŵanthu ŵanyake awo ŵakatenge Mbakhristu, ŵakamba kusambizga visambizgo vyautesi; ndipouli, ŵakalutilira kuwungana na mpingo. Ŵanthu ŵakugaluka aŵa ŵakawonekanga nga ni para nawo ŵakuteŵetera Yehova. Kweni ŵakaŵa ŵakofya ku Ŵakhristu ŵakugomezgeka. Iwo ŵakaŵa mphumphi zanjara zakuvwara nga ni mberere, ndipo ŵakamba ‘kubwangandura cipulikano ca ŵanji.’ (2 Tim. 2:16-18) Kasi Yehova wakalaŵiskanga ivyo vikacitikanga? Enya. Paulosi wakamanyanga ivyo Ciuta wakacitira ŵanthu ŵakugaluka, Kora pamoza na ŵanyake. Ntheura wakaŵa wakusimikizga kuti Yehova wakamanyanga makora ivyo vikacitikanga. Pa nkhani iyi, tiyeni tiwone mazgu agho Paulosi wakalemba mu kalata yake yakuluta kwa Timote na kuwona ivyo tikusambirapo.

“INE YEHOVA KUTI NKHUZGOKA CARA”

4. Kasi Paulosi wakamanyanga vici? Kasi wakalongora wuli fundo iyi mu kalata yake yakuluta kwa Timote?

4 Paulosi wakamanyanga kuti Yehova waŵamanyenge awo ŵakamusopanga mwaupusikizgi kweniso awo ŵakumupulikira. Ukaboni wa fundo iyi tikuwusanga mu mazgu agho Paulosi wakalemba mu kalata yakuluta kwa Timote. Wakati wayowoya umo ŵakugaluka ŵakanangiranga umoyo wauzimu wa ŵanji mu mpingo, Paulosi wakalemba kuti: “Nangauli vili nthena, lufura lwakukhora lwa Ciuta lucali waka, luli na cidindo cakuti: ‘Yehova wakuŵamanya awo mbake,’ ndiposo kuti: ‘Waliyose uyo wakucema zina la Yehova waleke ubendezi.’”—2 Tim. 2:18, 19.

5, 6. Kasi capadera nchivici na mazgu ghakuti “lufura lwakukhora lwa Ciuta”? Kasi mazgu agha ghakwenera kuti ghakamovwira wuli Timote?

5 Kasi capadera nchivici mu mazgu agho Paulosi wakalemba? Mu Baibolo lose, mazgu ghakuti “lufura lwakukhora lwa Ciuta” ghakuzunulika pa lemba ili pera. Baibolo likuyaniska vinthu vyakupambanapambana na “lufura.” Mwaciyelezgero, likuyaniska lufura na malango gha Ciuta ghambura kusintha agho ghakovwira kuti caru cileke kusunkhunyika. (Sal. 104:5) Kweniso mulimo wa Yesu pakufiska khumbo la Yehova ukuyaniskika na lufura. (1 Kor. 3:11; 1 Pet. 2:6) Kasi Paulosi wakaghanaghananga fundo wuli apo wakalembanga mazgu ghakuti “lufura lwakukhora lwa Ciuta”?

6 Paulosi wakazunura mazgu ghakuti “lufura lwakukhora lwa Ciuta” wati walongosora ivyo Mozesi wakayowoya vyakukhwaskana na Kora pamoza na ŵanyake, ivyo vili kulembeka pa Maŵazgo 16:5. Paulosi wakwenera kuti wakayowoyanga ivyo vikacitika mu nyengo ya Mozesi kuti wakhozge Timote na kumukumbuska kuti Yehova wakumanya ŵakugaluka na kucitapo kanthu. Ŵakugaluka ŵakate ŵatimbanizgenge yayi khumbo la Yehova mu mpingo, nga umo wakatondekera Kora vyaka vinandi kumanyuma. Paulosi wakalongosora vyose yayi ivyo “lufura lwakukhora lwa Ciuta” lukwimira. Ndipouli, mazgu agha ghakwenera kuti ghakamuciska Timote kuti wathembenge na kugomezga comene nthowa za Yehova.

7. Cifukwa wuli tikwenera kusimikizga kuti nyengo zose Yehova wacitenge vinthu mwaurunji ndiposo mwakugomezgeka?

7 Fundo za Yehova ni zapacanya ndipo zikusintha yayi. Lemba la Salmo 33:11 likuti: “Fundo za Yehova zikukhalilira muyirayira, malanguruko ghake gha mtima nagho kwa muyirayira.” Malemba ghanyake ghakuti muwuso wa Yehova, lusungu lwake, magomezgeko ghake, na urunji wake, ni vyamuyirayira. (Ex.  15:18; Sal. 100:5; 112:9) Lemba la Malaki 3:6 likuti: “Ine Yehova kuti nkhuzgoka cara.” Mwakuyana waka, lemba la Yakobe 1:17 likuti Yehova ‘wakusintha cara, wakupambana na mfwiri, uwo ukuzgoka.’

“CIDINDO” ICO CIKUTOVWIRA KUKHOZGA CIPULIKANO MWA YEHOVA

8, 9. Kasi tikusambirapo vici pa mazgu ghakuti “cidindo” agho Paulosi wakazunura?

8 Mazgu agho Paulosi wakalemba pa 2 Timote 2:19, ghakulongosora vya lufura ulo pali uthenga wakucita kudinda. Kale, pa malufura gha nyumba zinandi pakaŵanga cidindo, ico panji cikalongoranga uyo wali kuzenga nyumba iyo panji mweneko. Pa ŵanthu awo ŵali kulembako Baibolo, Paulosi ngwakwamba kuyowoya vya cidindo. * Cidindo ico cili pa “lufura lwakukhora lwa Ciuta,” cili na mauthenga ghaŵiri. Wakwamba ngwakuti, “Yehova wakuŵamanya awo mbake,” ndipo waciŵiri ngwakuti, “Waliyose uyo wakucema zina la Yehova waleke ubendezi.” Ivi vikutikumbuska fundo iyo yili pa Maŵazgo 16:5.—Ŵazgani.

9 Kasi ŵanthu ŵa Yehova ŵakusambirapo vici pa mazgu ghakuti “cidindo” agho Paulosi wakazunura? Ŵakusambirapo kuti, fundo zose za Yehova na nthowa zake, vingalongosoreka mu fundo ziŵiri izi: (1) Yehova wakutemwa awo mbakugomezgeka kwa iyo, (2) Yehova wakutinkha ubendezi. Kasi fundo izi zikukolerana wuli na nkhani ya ŵakugaluka mu mpingo?

10. Kasi Ŵakhristu ŵakugomezgeka ŵakakhwaskika wuli na vyakucita vya ŵakugaluka?

10 Timote na ŵanji awo ŵakaŵa ŵakugomezgeka mu mpingo, ŵakwenera kuti ŵakafipanga mtima na vyakucita vya ŵakugaluka awo ŵakaŵa pakati pawo. Ŵakhristu ŵanyake ŵakwenera kuti ŵakafumbangapo cifukwa ico ŵakugaluka ŵakazomerezgekera kulutilira kuŵa mu mpingo. Ŵanthu ŵakugomezgeka ŵakwenera kuti ŵakakayikanga usange Yehova wakapambaniskanga nadi pakati pa iwo na ŵakugaluka awo ŵakasopanga mwaupusikizgi.—Mil. 20:29, 30.

Timote wakapuluskika yayi na vyakucita vya ŵakugaluka (Wonani ndime 10-12)

11, 12. Cifukwa wuli kalata ya Paulosi yikwenera kuti yikakhozga cipulikano ca Timote?

11 Kalata ya Paulosi yikwenera kuti yikakhozga cipulikano ca Timote. Yikamukumbuska ivyo vikacitika apo munthu wakugomezgeka, Aroni, wakamanyikwa kuti wakasopanga Ciuta mwaunenesko, kweni Kora pamoza na ŵanyake, ŵeneawo ŵakaŵa ŵapusikizgi, ŵakavumbukwa, kukanika, na kuparanyika. Apa, Paulosi wakayowoyanga fundo yakuti, nangauli mu mpingo mukaŵa Ŵakhristu ŵatesi,  kweni Yehova wakaŵamanyanga awo mbake, nga umo wakacitira mu nyengo ya Mozesi.

12 Yehova wakusintha yayi; ngwakugomezgeka. Wakutinkha ubendezi ndipo pa nyengo yakwenelera wakweruzga ŵakwananga ŵambura kupera. Pakuti Timote ‘wakacemanga zina la Yehova,’ kalata iyi yikweneraso kuti yikamukumbuska mulimo wake wakuti wakanenge ubendezi wa ŵakugaluka. *

PARA TIKUSOPA MWAKUGOMEZGEKA TIKUKOMWA PAWAKA YAYI

13. Kasi ni fundo wuli iyo tikwenera kuyigomezga na mtima wose?

13 Mazgu agho Paulosi wakalemba, nase ghangatikhozga mwauzimu. Yehova wakumanya kuti tili ŵakugomezgeka kwa iyo. Kweniso wakuwona ivyo awo mbake ŵakucita. Baibolo likuti: “Maso gha Yehova ghakulaŵiska uku na uko mu caru cose capasi, kujiwonya nkhongono kovwira awo mitima yawo njakufikapo pamaso pake.” (2 Mid. 16:9) Ntheura, tikwenera kugomezga na mtima wose kuti tikukomwa pawaka yayi para ivyo tikucitira Yehova vikufuma “mu mtima wakutowa.”—1 Tim. 1:5; 1 Kor. 15:58.

14. Kasi Yehova wakukana kusopa kwamtundu wuli?

14 Kweniso nchakukhozga kumanya kuti Yehova wakukana kumusopa mwaupusikizgi. Apo maso ghake “ghakulaŵiska uku na uko mu caru cose capasi,” wakumanya wose awo mitima yawo njambura ‘kufikapo pamaso pake.’ Lemba la Zintharika 3:32 likuti: “Ucikanamalango mbukazuzi kwa Yehova.” Ŵanyake mwa ŵacikanamalango aŵa, ni awo ŵakupusikizgira kuti ŵakupulikira Yehova uku kumphepete ŵakucita zakwananga. Nangauli munthu uyo nchikanamalango wangayezga kupusika ŵanji kwa kanyengo, kweni pakuti Yehova ngwankhongonozose ndiposo ni murunji, tisimikizge kuti “uyo wakubisa zakwananga zake kuti tiwaŵe na mwaŵi cara.”—Zinth. 28:13; ŵazgani 1 Timote 5:24; Ŵahebere 4:13.

15. Kasi tikwenera kugega vici, ndipo cifukwa wuli?

15 Ŵanthu ŵa Yehova ŵanandi ŵakumuteŵetera na mtima wose. Ni viŵi yayi kuti munthu munyake mu mpingo wambe kusopera dala mwaupusikizgi. Ndipouli, usange vikacitika mu nyengo ya Mozesi ndiposo mu nyengo ya Ŵakhristu ŵakwambilira, vingacitikaso mazuŵa ghano. (2 Tim. 3:1, 5) Kweni kasi cingaŵa ciwemi kuti tikayikirenge usange Ŵakhristu ŵanyithu mbakugomezgeka nadi kwa Yehova? Yayi. Nchiheni kukayikira ŵabali na ŵadumbu ŵithu kwambura vifukwa vyakukwana. (Ŵazgani Ŵaroma 14:10-12; 1 Ŵakorinte 13:7.) Kweniso, para tikutemwa kukayikira usange Ŵakhristu ŵanyithu mu mpingo mbakugomezgeka, umoyo withu wauzimu unganangika.

16. (a) Kasi tose tikwenera kucita vici kuti upusikizgi uleke kujintha misisi mu mitima yithu? (b) Kasi tikusambirapo vici pa bokosi la mutu wakuti, “ Lutilirani Kupima . . . Lutilirani Kuyezga . . .”?

16 Mkhristu waliyose wakwenera ‘kupima umo mulimo wake uliri.’ (Gal. 6:4) Cifukwa cakuti tili ŵakwananga, kwambura kumanya tingamba kusopa Yehova na vilato viheni. (Heb. 3:12, 13) Ntheura, nyengo na nyengo tikwenera kusanda vilato vithu pakuteŵetera Yehova. Tingajifumba kuti: ‘Kasi nkhusopa Yehova cifukwa cakuti nkhumutemwa ndiposo cifukwa cakuti nkhucindika muwuso wake? Panji nkhukhumba waka kuti nizakapokere vitumbiko vyakuthupi mu Paradiso?’ (Uvu. 4:11) Tose tingasanga candulo usange tingapima milimo yithu na kuwuskamo mu mtima withu upusikizgi uliwose uwo ungaŵamo.

PARA TILI ŴAKUGOMEZGEKA TIKUŴA ŴACIMWEMWE

17, 18. Cifukwa wuli tikwenera kusopa Yehova na mtima wose ndiposo mwakugomezgeka?

17 Tikusanga vyandulo vinandi para tikufwilirapo kuti tisopenge na mtima wose ndiposo mwakugomezgeka. Wamasalimo wakati:  “Ngwamwaŵi munthu uyo Yehova walije kumukontholera ubendezi, mu mzimu wake mulije uryarya.” (Sal. 32:2) Nadi, awo ŵakuwuskamo upusikizgi mu mtima wawo ŵakuŵa ŵakukondwa, ndipo ŵaŵenge mu gulu la ŵanthu awo ŵazamukondwa comene munthazi.

18 Pa nyengo yakwenelera, Yehova wazamuvumbura wose awo ŵakucita viheni panji awo mbapusikizgi, ndipo wazamupatura “pakati pa ŵakunyoloka na ŵaheni, pakati pa uyo wakuteŵetera Ciuta na uyo kuti wakumuteŵetera cara.” (Mal. 3:18) Pa nyengo yasono, nchakukhozga comene kumanya kuti “maso gha Yehova ghali pa ŵarunji, ndipo makutu ghake ghakupulikizga maŵeyelero ghawo.”—1 Pet. 3:12.

^ ndime 8 Lemba la Uvumbuzi 21:14, ilo likalembeka pakati pajumpha vyaka vinandi kufuma apo Paulosi wakalemba kalata kwa Timote, likuyowoya vya kaluso kenekaka pakuzunura “malibwe [12] gha lufura,” agho pali mazina gha ŵapositole 12.

^ ndime 12 Nkhani yakulondezgapo yizamulongosora umo tingakanira ubendezi mwakuti tiyezge Yehova.