Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) JUNE 2014

Kasi Tingaŵawovwira Wuli Ŵakhristu Ŵanyithu Awo Ŵali Kupatika?

Kasi Tingaŵawovwira Wuli Ŵakhristu Ŵanyithu Awo Ŵali Kupatika?

Mukwenera kuti mukumanyapo yunji panji ŵanji awo ŵali kupatika. Ivi vili nthena cifukwa cakuti mazuŵa ghano kupatana kwazara comene. Mwaciyelezgero, kafukufuku uyo wakacitika ku Poland wakulongora kuti ŵanthu awo ŵali na vyaka 30, ndipo ŵakhala mu nthengwa kwa vyaka kwambira pa vitatu mpaka vinkhondi na cimoza, ŵangapatana nyengo yiliyose. Ndipouli, mba vyaka ivi pera yayi awo ŵakupatana.

Nakuti lipoti la wupu unyake mu Spain likati: “Vikulongora kuti [mu Europe] hafu ya ŵanthu wose awo ŵakunjira mu nthengwa ŵazamupatana.” (Institute for Family Policy) Ndimo viliriso mu vyaru vinyake visambazi.

MAGHANOGHANO GHAMBURA KWENELERA GHAKUŴA GHANANDI

Kasi nchivici ico cikucitika para ŵanthu ŵapatana? Munthu munyake wa ku Mafumiro gha Dazi kwa Europe, uyo wapeleka ulongozgi wakukhwaskana na nthengwa kwa nyengo yitali, wakati: “Para ŵanthu ŵapatana ŵakulongora waka ivyo vyacitikanga kale mu nyumba yawo, ivyo ni kumara kwa ubwezi na kupatukana ndipo ivi vikuŵa vyakuŵinya comene.” Wakasazgirapo kuti: Kanandi para nthengwa yamara “ŵanthu ŵakuŵa na maghanoghano ghambura kwenelera. Ŵakuŵa ŵakali, ŵakujizenga mulandu, ŵakukhuŵara, ŵakutaya mtima ndiposo soni zikuŵakora.” Nyengo zinyake ŵakughanaghana vya kujikoma. “Para ŵa khoti ŵadumura kuti nthengwa yamara, ndipo masuzgo ghanyake ghakwamba. Cifukwa ca kujiwona kuti ngwambura nchito, uyo wapatika wangamba kughanaghana kuti: ‘Pakuti sono nthengwa yamara, kasi niliso wakuzirwa nthena? Kasi cilipo nthena cifukwa cakuŵira wamoyo?’”

Pakulongosora ivyo vikamucitikira kumasinda, Ewa wakati: “Nthengwa yikati yamara, soni zikanikora comene cifukwa ŵazengezgani ŵane na awo nkhagwiranga nawo nchito ŵakanisekanga, ŵakatenge ndine ciwuya. Nkhakwiyanga comene. Apo afumu ŵane ŵakanipatanga, nkhaŵa na ŵana ŵaŵiri ŵacokoŵacoko, ndipo nekha nkheneranga kuŵa dada ndiposo mama.” * Adam, uyo wakaŵa mulara wakucindikika mu mpingo kwa vyaka 12, wakati: “Nkhujiwona kuti nili wambura nchito mwakuti nyengo zinyake nkhuŵa mukali, kweniso nkhukhumba kuŵa panekha.”

AWO ŴAPATIKA ŴAKUSUZGIKA KUTI ŴAMBESO KUGHANAGHANA MAKORA

Cifukwa ca kwenjerwa na umo vinthu viŵirenge munthazi, ŵanji ŵakusuzgika kuti ŵambeso kughanaghana makora, nanga ni para pajumpha vyaka vinandi kufuma apo ŵakapatikira. Ŵangaghanaghana kuti ŵanthu ŵakuŵatemwa yayi. Kweniso panyengo yasono ŵakwenera “kusintha vyakucita na kusambira kumarana nagho ŵekha masuzgo,” nga umo wakayowoyera munthu munyake uyo wakulemba nkhani zakukhwaskana na kupatana mu nyuzipepara.

Stanisław wakati: “Tikati tapatana, uyo wakaŵa muwoli wane wakanikaniranga kuwona ŵana ŵane.  Ntheura nkhamba kughanaghana kuti palije uyo wakunighanaghanira ndiposo kuti Yehova nayo wakwenera kuti wanileka. Nkhakhumbanga kuti nifwe waka. Pakati pajumpha nyengo, nkhamanya kuti nkhaghanaghananga mwakupuvya.” Wanda, uyo wakapatika, nayo wakenjerwanga na umo vinthu viŵirenge munthazi. Iyo wakati: “Nkhawonanga kuti para pajumpha nyengo, ŵanthu wose, nanga ŵangaŵa Ŵakhristu ŵanyane, ŵalekenge kutemwa ine na ŵana ŵane. Ndipouli, pa nyengo yasono nkhuwona kuti ŵabali ŵaŵa nase ndipo ŵanovwira apo nafwilirangapo kulera ŵana ŵane kuti ŵaŵe ŵateŵeti ŵa Yehova.”

Ivyo ŵakayowoya ŵanthu aŵa, vikulongora kuti para ŵanji ŵapatika ŵakuŵa na maghanoghano ghambura kwenelera. Ŵangamba kujiwona mwambura kwenelera, kughanaghana kuti mbambura kuzirwa kweniso kuti ŵanthu ŵangaŵatemwaso yayi. Kweniso ŵangamba kuwona ŵanji mwambura kwenelera. Cifukwa ca kughanaghana nthena, ŵangamba kuwona nga mpingo ulije citemwa na lusungu. Ndipouli, ivyo vikacitikira Stanisław na Wanda, vikulongora kuti para pajumpha nyengo awo ŵapatika ŵangamanya kuti ŵabali na ŵadumbu ŵakuŵatemwa comene. Nakuti Ŵakhristu ŵanyithu ŵakutovwira comene nangauli pakwamba tingamanya yayi.

IVYO MUNGACITA PARA MWAMBA KUŴA NA PHUKWA NDIPOSO KUJIWONA ŴAMBURA NCHITO

Tikwenera kumanya kuti nanga tingaŵawovwira wuli Ŵakhristu ŵanyithu awo ŵapatika, kweni nyengo na nyengo ŵaŵenge na phukwa. Ŵadumbu awo ŵapatika ndiwo kanandi ŵakughanaghana kuti awo ŵakuŵatemwa mbacoko waka. Alicja wakazomerezga wakati: “Pajumpha vyaka vinkhondi na vitatu kufuma apo nthengwa yane yili kumalira. Ndipouli, nicali kujiwona kuti nili wambura kwenelera. Pa nyengo izi, nkhutemwa kujipatura ku ŵanyane na kwamba kulira kweniso nkhuŵa na maghanoghano ghambura kwenelera.”

Nangauli ŵanthu awo ŵapatika ŵakuŵa na maghanoghano agha, kweni Baibolo likukana kujipatura. Para tingatondeka kupulikira ulongozgi uwu, tingamba kugalukira “vinjeru vyose.” (Zinth. 18:1) Ndipouli, munthu uyo wali na phukwa wakwenera kumanya kuti para wakugega kupenja ulongozgi mwakuwerezgawerezga kwa munthu uyo ni mwanalume panji mwanakazi munyake yayi, ndikuti wali na vinjeru. Ivi vingawovwira kuti paŵavye kudokerana kuheni.

Ŵakhristu ŵanyithu awo ŵali kupatika, ŵangasuzgika maghanoghano na vinthu vinandi, nga nkhwenjerwa na umo vinthu viŵirenge munthazi, phukwa, panji kujiwona kuti mbambura kwenelera. Maghanoghano agha ngakuzara ndipo ngakusuzga kughamazga, ntheura tikwenera kuyezga Yehova na kovwira ŵabali na ŵadumbu ŵithu aŵa. (Sal. 55:22; 1 Pet. 5:6, 7) Tiŵe ŵakusimikizga kuti wovwiri uliwose uwo tingapeleka ngwakuwongeka comene. Nadi, mu mpingo muli ŵabwezi ŵawemi awo ŵangaŵawovwira.—Zinth. 17:17; 18:24.

^ ndime 6 Mazina ghanyake tabwelekerapo waka.