Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) JUNE 2014

Kasi Mukukumbuka?

Kasi Mukukumbuka?

Kasi muli kuŵazga magazini gha Gongwe la Mulinda ghasonosono apa? Yezgani kuzgora mafumbo agha:

Kasi pa Nisani 14, mwanamberere wa Paska wakeneranga kukomeka nyengo wuli?

Mabaibolo ghanyake ghakuti “na mise,” “misemise,” panji “para dazi lanjira waka” kweni ungweru ucalipo. (Ex. 12:6)—12/15, peji 18-19.

Kasi ni fundo wuli za mu Baibolo izo zingawovwira ŵawukirano kuti ŵasankhe vinthu mwavinjeru?

Zitatu ni izi (1) Penjani dankha Ufumu wa Ciuta na urunji wake. (Mat. 6:19-34) (2) Sangani cimwemwe pakuteŵetera ŵanji. (Mil. 20:35) (3) Teŵeterani Ciuta mwakukwana apo mucali ŵawukirano. (Muph. 12:1)—1/15, peji 19-20.

Kasi ŵanthu ŵanayi awo ŵakwera pa mahaci kwambira mu 1914 ŵakwimira vici?

Yesu, ndiyo wakwera pa haci lituŵa, ndipo wakacimbizga Satana na viŵanda vyake kucanya. Uyo wakwera pa haci liswesi wakwimira nkhondo izo zasuzga comene ŵanthu. Uyo wakwera pa haci lifipa wakwimira njara. Uyo wakwera pa haci lituwulufu wakukoma ŵanthu na nthenda zakofya, ndipo wakoma ŵanthu mamiliyoni ghanandi. (Uvu. 6:2-8)—2/1, peji 6-7.

Kasi nyengo yakuti “nthengwa ya Mwanamberere” yicitike yizamukwana pawuli? (Uvu. 19:7)

Yizamucitika para Themba, Yesu Khristu, lazakamalizga kutonda kwake, pamanyuma pakuti Babuloni Mukuru waparanyika ndiposo nkhondo ya Haramagedoni yamara.—2/15, peji 10.

Cifukwa wuli Ŵayuda ŵa mu nyengo yakale “ŵakalindiliranga” Mesiya? (Luka 3:15)

Palije ukaboni uwo ukulongora kuti Ŵayuda ŵa mu nyengo ya Yesu ŵakawumanyanga makora ucimi wa Daniyeli wakuyowoya vya Mesiya, umo ise tikuwumanyira. (Dan. 9:24-27) Ndipouli, ŵakwenera kuti ŵakapulika ivyo mungelo wakaphalira ŵaliska, panji ivyo nchimi yanakazi, Ana, yikayowoya yikati yawona Yesu mu tempile pa nyengo iyo wakaŵa bonda. Kweniso ŵakumanya vya nyenyezi ŵakiza kuzakapenja ‘uyo wakababika themba la Ŵayuda.’ (Mat. 2:1, 2) Pamanyuma, Yohane Mubapatizi wakalongora kuti Khristu wali pafupi kwiza.—2/15, peji 26-27.

Kasi tingacita wuli kuti kayowoyero kithu kaleke kuŵa Enya apo tikunena Cara? (2 Kor. 1:18)

Nyengo zinyake tingatondeka kufiska ivyo tikalayizga cifukwa ca vinthu vyamabuci. Kweni usange talayizga cinthu cinyake, tikwenera kuyezgayezga kufiska.—3/15, peji 32.

Kasi tingacita wuli kuti tikane ciyezgo ca kuwonelera vithuzithuzi vyamuziro?

Pali fundo zitatu zakovwira (1) Usange mwamabuci tawona vinthu vyakuwuska khumbo lakugonana, nyengo yeneyiyo tikwenera kulaŵiska kumphepete. (2) Tikwenera kuvikilira maghanoghano ghithu mwa kughanaghanira comene vinthu viwemi na kulomba kwa Ciuta. (3) Tikwenera kuvikilira mendero ghithu mwa kugega mafilimu panji Mawebusayiti agho ghakulongora vithuzithuzi vyamuziro.—4/1, peji 10-12.

Kasi pangaŵa masuzgo wuli usange Mkhristu wangasida mbumba yake na kuluta ku caru cinyake kukapenja ndalama?

Para ŵapapi na ŵana ŵakukhala pamoza yayi, ŵana ŵangasuzgika maghanoghano ndipo nkharo yawo yinganangika. Ŵangamba kuŵakwiyira ŵapapi ŵawo. Ndipo awo ŵakukhala kutali na munyawo wa mu nthengwa ŵangayezgeka kuti ŵacite uleŵi.—4/15, peji 19-20.

Cifukwa wuli vigeŵenga ivyo ŵakavipayikanga pa khuni ŵakaviphyoranga malundi?

Ŵaroma ŵakapayikanga pa khuni ŵanthu ŵanyake awo ŵaswa malango. Ŵayuda ŵakalomba kuti malundi gha vigeŵenga ivyo ŵakavipayika pafupi na Yesu ghaphyoleke. Ici cikapangiska kuti vigeŵenga vitondeke kuthuta makora, na kufwa luŵiro. Ntheura vikagona pa khuni yayi. (Dute. 21:22, 23)—5/1, peji 11.

Kasi tikwenera kukumbuka mafumbo ghanayi ngani para tili mu upharazgi?

Kasi ŵanthu awo nkhukhumba kuŵapharazgira mbanjani? Kasi naŵasanga nkhu? Kasi nyengo yiwemi yakuŵasangira ni nji? Kasi nkhwenera kucita wuli pakuŵapharazgira?—5/15, peji 12-15.

Kasi hona wakoma ŵanthu ŵanandi wuli?

Mu vyaka vya m’ma 1900 ivyo vyajumpha, wakakoma ŵanthu 100 miliyoni. Pa nyengo yasono, wakukoma ŵanthu pafupifupi 6 miliyoni pa caka.—6/1, peji 3.