Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) MAY 2014

 KUFUMA MU NTHAMBA YITHU

“Pacali Nchito Yinandi ya Vuna Yakuti Yicitike”

“Pacali Nchito Yinandi ya Vuna Yakuti Yicitike”

George Young wakafika mu Rio de Janeiro mu Malici 1923

MUKAŴA mu caka ca 1923. Holo yinyake yakucitiramo maseŵero na kwimbiramo sumu mu msumba wa São Paulo, yikazura na ŵanthu. Mubali George Young wakadumbanga nkhani. Nkhani iyi yikang’anamulikanga mu Ciphwitikizi. Pakaŵa ŵanthu 585 ŵeneawo ŵakategherezganga mwakupwelelera comene. Malemba gha mu Baibolo gha mu Ciphwitikizi ghakalongorekanga pa sinema. Paumaliro, ŵanthu ŵakapokera tumabuku 100 twa mutu wakuti, Ŵanthu Ŵanandi Awo Mbamoyo Sono Ŵafwenge Yayi (Millions Now Living Will Never Die!), mu Ciphwitikizi, Cingelezi, Cijeremani, na Ciitaliyani. Nkhani iyi yikawovwira ŵanthu ŵanandi comene. Mazgu gha Ciuta ghakathandazgika. Pakati pajumpha mazuŵa ghaŵiri, ŵanthu ŵakazuraso mu holo iyi kuzakategherezga nkhani yinyake. Kweni kasi nchivici ico cikapangiska kuti ivi vicitike?

Mu 1867, Sarah Bellona Ferguson wakasama na mbumba yake kufuma ku United States kuluta ku Brazil. Mu 1899, mudumbu wake wakiza na mabuku ghakulongosora Baibolo ku Brazil kufuma ku United States. Sarah wakati waŵazga mabuku agha, wakamanya kuti wasanga unenesko. Pakuti wakakhumbanga kuŵazga vinandi mu mabuku ghithu, wakalembeska kuti wapokerenge Gongwe la Mulinda la Cingelezi. Wakakondwa comene na uthenga wa mu Baibolo uwo wakaŵazganga, ntheura wakalemba kalata kwa Mubali C. T. Russell. Mu kalata iyi wakalemba kuti iyo “mbukaboni wakuti pacali ŵanthu ŵanandi awo ŵakukhumbikwira kuŵapharazgira.”

Kabuku kakuti, Kasi Ŵanthu Ŵamoyo Ŵangayowoya na Ŵakufwa? (Mu Ciphwitikizi)

Sarah Ferguson wakaphalirangako ŵanji unenesko wa mu Baibolo, kweni wakajifumbanga usange paŵenge munyake uyo wangawovwira iyo, mbumba yake, na ŵanthu wose awo ŵakakhumbanga kumanya unenesko mu Brazil. Mu 1912, Beteli ya ku Brooklyn yikamumanyiska kuti mubali munyake wizenge ku São Paulo na mathirakiti ghanandi gha mu Ciphwitikizi gha mutu wakuti, Kasi Ŵakufwa Ŵali Nkhu? Mu 1915, wakayowoya kuti wakazizwanga comene kuti Ŵasambiri ŵa Baibolo ŵanandi ŵakalindizganga kuti ŵalutenge kucanya. Iyo wakalongosora maghanoghano ghake, wakati: “Mu Brazil na mu South  America mose ke? . . . Para mungaghanaghanira ukuru wa South America, mumanyenge kuti pacali nchito yinandi ya vuna yakuti yicitike.” Nadi, nchito yinandi ya vuna yikeneranga kucitika.

Ca mu 1920, ŵawukirano 8 ŵa ku Brazil awo ŵakendanga pa sitima ya pa maji, iyo yikaŵa ya nkhondo, ŵakategherezga maungano mu Msumba wa New York apo sitima yawo yikaŵa kwakunozgeska. Ŵakati ŵawelera ku Rio de Janeiro, ŵakaphalirako ŵanyawo za cigomezgo cawo ciphya ca mu Baibolo ico ŵakasambira. Pakati pajumpha nyengo yicoko waka, mu Malici 1923, George Young, uyo wakaŵa mulaŵiliri wakwendakwenda, wakafika mu Rio de Janeiro, ndipo wakasanga ŵanthu ŵakunweka. Wakawovwira kuti mabuku ghithu ghanandi ghang’anamulike mu Ciphwitikizi. Mwaluŵiro, Mubali Young wakafika ku São Paulo, msumba uwo ukaŵa na ŵanthu 600,000. Mu msumba uwu, wakadumba nkhani na kugaŵira tumabuku twa mutu wakuti, Ŵanthu Ŵanandi Awo Mbamoyo Sono Ŵafwenge Yayi, nga umo talongosolera pakwambilira pa nkhani iyi. Iyo wakati: “Pakuti nkhaŵa nekha, nkhani zane zikapharazgikanga mu manyuzipepara.” Wakasazgirapo kuti, nkhani zacisanisani izi zikaŵa “zakwamba kupharazgika mu nyuzipepara mu zina la wupu wa I.B.S.A. mu Brazil.” *

Malemba gha mu Baibolo ghakalongorekanga pa sinema apo Mubali Young wakadumbanga nkhani zake

Mu lipoti lakuyowoya vya ku Brazil, Gongwe la Mulinda la Cingelezi la Disembala 15, 1923, likati: “Para tikukumbuka kuti mulimo mu caru ici ukamba pa Juni 1 ndiposo kuti pa nyengo iyi mukaŵavya mabuku ghithu, tikuwona kuti Fumu yatumbika comene mulimo withu.” Kweniso lipoti ili likati nkhani zacisanisani izo Mubali Young wakadumba mu São Paulo, zikaŵa ziŵiri mwa nkhani 21 izo zikayowoyeka kufuma pa Juni 1 mpaka pa Seputembala 30, ndipo ŵanthu wose pamoza awo ŵakategherezga nkhani izi ŵakaŵapo 3,600. Mu Rio de Janeiro, uthenga wa Ufumu ukathandazgikanga pacoko na pacoko. Ndipo mu myezi yicoko waka, mabuku ghithu ghakujumpha 7,000 gha mu Ciphwitikizi ghakagaŵika. Kweniso, Gongwe la Mulinda lakwamba kupharazgika mu Ciphwitikizi likaŵa la Novembala-Disembala 1923.

Sarah Bellona Ferguson, munthu wakwamba mu Brazil kulembeska kuti wapokerenge Gongwe la Mulinda la Cingelezi

George Young wakaluta kwa Sarah Ferguson, ndipo Gongwe la Mulinda likati: “Mudumbu uyu wakati wamuwona, kwa kanyengo wakasoŵa cakuyowoya. Wakakorako casa kwa Mubali Young, ndipo wakamulaŵiska ku maso na kuyowoya kuti: ‘Mwiza nadi, panji nkhulota waka?’” Pakati pajumpha nyengo yicoko waka, iyo na ŵana ŵake ŵakabapatizika. Nakuti wakaŵa kuti walindilira ubapatizo kwa vyaka 25. Gongwe la Mulinda la Ogasiti 1, 1924, likati ŵanthu 50 ŵakabapatizika mu Brazil, comenecomene mu msumba wa Rio de Janeiro.

Pa nyengo yasono pajumpha vyaka 90, ndipo nchambura kwenelera kuti tifumbeso kuti: “Mu Brazil na mu South America mose ke?” Mazuŵa ghano, Ŵakaboni ŵa Yehova ŵakujumpha 760,000, ŵakupharazga makani ghawemi mu Brazil. Ndipo mu South America mose, uthenga wa Ufumu ukupharazgika mu Ciphwitikizi, Cisipanishi na mu viyowoyero vinandi vya ku malo agha. Mu 1915, Sarah Ferguson wakaneneskanga nadi. ‘Pakaŵa kuti pacali nchito yinandi ya vuna yakuti yicitike.’—Kufuma mu nthamba yithu ku Brazil.

^ ndime 6 I.B.S.A. cikwimira International Bible Students Association.