Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) FEBRUARY 2014

Yehova Ni Mubwezi Withu Wapamtima

Yehova Ni Mubwezi Withu Wapamtima

“[Abrahamu] wakacemeka ‘mubwezi wa Yehova.’”—YAK. 2:23.

1. Pakuti tili kulengeka mu cikozgo ca Ciuta, kasi tili na luso wuli?

KANANDI ŵanthu ŵakuyowoya kuti: “Mwana uyu wali kukozga awiske.” Ndipo nadi, ŵana ŵanandi ŵakukozga ŵapapi ŵawo. Nakuti mwana wangakozga wose ŵaŵiri, dada na mama. Yehova, Dada withu wa kucanya, ni Mupi wa umoyo. (Sal. 36:9) Ndipo ise, pakuŵa ŵana ŵake, tikukozganako nayo. Cifukwa cakuti tili kulengeka mu cikozgo cake, tili na luso lwa kughanaghana, kusankha cakucita, na kuŵa paubwezi na ŵanji.—Gen. 1:26.

2. Kasi kuti ise tiŵe paubwezi na Yehova nchifukwa ca vici?

2 Yehova wangaŵa Mubwezi withu wapamtima. Kuti ubwezi uwu uŵepo, nchifukwa cakuti Ciuta wakutitemwa, kweniso ise tili na cipulikano mwa iyo na Mwana wake. Yesu wakati: “Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yoh. 3:16) Mu Baibolo muli ŵanthu ŵanandi awo ŵakaŵa paubwezi na Yehova. Tiyeni tidumbiskane vya ŵanthu ŵaŵiri.

ABRAHAM MUBWEZI WANE

3, 4. Pa nkhani ya kuŵa paubwezi na Yehova, kasi Abrahamu wakapambana wuli na ŵana ŵake?

3 Yehova wakayowoya vya sekuru wa Ŵaisrayeli kuti: “Abrahamu,  mubali [‘mubwezi,’ NW] wane.” (Yes. 41:8) Lemba la 2 Midauko 20:7 nalo likuti Abrahamu wakaŵa mubwezi wa Ciuta. Cifukwa wuli mwanalume wakugomezgeka uyu wakalutilira kuŵa paubwezi na Mlengi wake? Cifukwa cakuti iyo wakaŵa na cipulikano.—Gen. 15:6; ŵazgani Yakobe 2:21-23.

4 Pakwamba, Yehova wakaŵa Dada kweniso Mubwezi wa mtundu wa Israyeli, awo mbana ŵa Abrahamu. Cacitima nchakuti, ubwezi wawo na Ciuta ukamara. Cifukwa wuli? Cifukwa cakuti ŵakatondeka kuŵa na cipulikano mu malayizgo gha Yehova.

5, 6. (a) Kasi vikenda wuli kuti Yehova waŵe Mubwezi winu? (b) Kasi tikwenera kujifumba mafumbo wuli?

5 Para munthu wakusambira comene vya Yehova, wakuŵa na cipulikano cakukhora comene mwa iyo, kweniso wakumutemwa comene. Ghanaghanirani nyengo iyo mukamanyira kuti Ciuta ngwanadi, ndiposo kuti mungaŵa nayo paubwezi. Kweniso mukamanya kuti tose tikubabika ŵakwananga cifukwa ca kuleka kupulikira kwa Adamu. Mukamba kupulikiska kuti ŵanthu ŵali kutali na Ciuta. (Kol. 1:21) Kufuma apo, mukamanya kuti Adada ŵithu ŵa kucanya mbacitemwa ndipo ŵakutipwelelera. Tikati tamanya kuti ŵakapeleka Mwana wawo, Yesu, kuŵa sembe yakuwombora, kweniso tikati taŵa na cipulikano mu sembe iyi, tikamba kuŵa paubwezi na Ciuta.

6 Pakuti sono pajumpha nyengo, tingajifumba kuti: ‘Kasi nkhucita vici kuti ubwezi wane na Ciuta ukhore? Kasi Yehova, Mubwezi wane wapamtima, nkhumuthemba comene kweniso kumutemwa comene zuŵa lililose?’ Munthu munyake uyo wakaŵa mubwezi wapamtima wa Yehova ni Gidiyoni. Tiyeni tiwone ivyo wakacita, na kutolerako.

‘YEHOVA NCHIMANGO’

7-9. (a) Kasi nchinthu wuli capadera ico Gidiyoni wakawona, ndipo cikakhwaska wuli ubwezi wake na Ciuta? (Wonani cithuzithuzi cakwamba.) (b) Kasi tikwenera kucita wuli kuti ubwezi withu na Yehova uŵe wakukhora?

7 Mweruzgi Gidiyoni wakateŵetera Yehova mu nyengo yakusuzga mu mdauko wa Ŵaisrayeli ŵakati ŵanjira mu Caru ca Layizgano. Buku la Ŵeruzgi cipaturo 6 likulongosora kuti mungelo wa Yehova wakaluta kwa Gidiyoni ku Ofra. Pa nyengo iyi, Ŵamidiyani awo ŵakaŵa ŵazengezgani ŵa Israyeli, ŵakaŵa ŵakofya comene ku mtundu uwu. Pa cifukwa ici, Gidiyoni wakakhwemanga tirigu pakweru cara, kweni mu cakukamiramo vinyo, kuti ciŵe cipusu kubisa tirigu uyu. Iyo wakazizikika apo mungelo uyo wakiza, wakamucema kuti, “wa cinkhara iwe!” Gidiyoni wakamufumba usange Yehova waŵathaskenge nga umo wakathaskira Ŵaisrayeli ku Eguputo. Pakuyowoya mu malo mwa Mlengi, mungelo wakasimikizgira Gidiyoni kuti Yehova wali nayo.

8 Gidiyoni wakafumba umo ‘wathaskirenge Ŵaisrayeli mu woko la Ŵamidiyani.’ Yehova wakazgora kuti: “Ine tindiŵenge nawe, tiuŵatimbe Ŵamidiyani nga ndi munthu yumoza.” (Ŵeru. 6:11-16) Gidiyoni wakwenera kuti wakajifumbanga umo ivi vicitikirenge, ntheura wakapempha cimanyikwiro. Wonani kuti pa cidumbirano ici, Gidiyoni wakakayikanga yayi kuti Yehova ngwanadi.

9 Ivyo vikacitika pamanyuma pake, vikakhozga cipulikano ca Gidiyoni na kumovwira kuti wasendelere comene kwa Ciuta. Gidiyoni wakaphika cakurya na kupa mungelo. Mungelo wakakhwaska cakurya ici na ndodo ndipo mwamunthondwe cikabuka na moto. Gidiyoni wakamanya kuti mungelo uyu wakatumika nadi na Yehova. Gidiyoni wakazizikika ndipo wakacemerezga kuti: “Okwe, Fumu Yehova Ciuta! Pakuti sono apa ndawona mungelo wa Yehova cisko ku cisko.” (Ŵeru. 6:17-22) Kasi ici cikatondeska Gidiyoni kuŵa paubwezi na Ciuta wake? Yayi. M’malo mwake, sono ndipo ubwezi ukakura comene. Gidiyoni wakamumanya makora Yehova ndipo wakawona kuti wali pa mtende na Ciuta. Tikumanya fundo iyi cifukwa ca zina ilo Gidiyoni wakathya jochero ilo wakazenga pa malo agha. Wakalithya  kuti ‘Yehova Nchimango.’ (Ŵazgani Ŵeruzgi 6:23, 24.) Para tikughanaghanirapo pa ivyo Yehova wakuticitira zuŵa lililose, tikwamba kumanya kuti ni Mubwezi wanadi. Usange tikulomba kwa Ciuta nyengo zose, tikuŵa na mtende ukuru ndipo ubwezi withu na iyo ukukhora.

NI NJANI UYO ‘WANGAKHALA MU HEMA LA YEHOVA’?

10. Kuyana na lemba la Salmo 15:3, 5, kasi Yehova wakukhumba kuti ticitenge vici kuti tiŵe nayo paubwezi?

10 Ndipouli, kuti Yehova waŵe Mubwezi withu, pali vinthu vinyake ivyo tikwenera kucita. Mu cipaturoSalmo 15 ca Salmo, Davide wakayowoya vinthu ivyo vikukhumbikwa kuti munthu ‘wakhale mu hema la Yehova,’ panji kuti waŵe mubwezi wa Ciuta. (Sal. 15:1) Tiyeni tiwonepo vinthu viŵiri, kugega kusesa na kuŵa ŵakugomezgeka mu vyose ivyo tikucita. Pakuyowoya vya munthu uyo wangaŵa mubwezi wa Yehova, Davide wakati: “Kuti wakusesa na lulimi lwake cara, . . . nanga nkhupokera cimbundi pa wambura mulandu.”—Sal. 15:3, 5.

11. Cifukwa wuli tikwenera kusesa yayi?

11 Mu salimo linyake, Davide wakacenjezga kuti: “Lulimi lwako luleke vya uheni.” (Sal. 34:13) Usange tikupulikira yayi cenjezgo ili, tingaŵa yayi paubwezi na Adada ŵithu ŵa kucanya awo mbarunji. Nakuti kusesa mbukhaliro wa Satana, uyo ni mulwani mukuru wa Yehova. Lizgu lakuti “Dyabulosi” lili kufuma ku lizgu Lacigiriki ilo likung’anamura “musesi.” Para tikujikora pakuyowoya vya ŵanji, tilutilirenge kuŵa paubwezi na Yehova. Fundo iyi njaunenesko, comenecomene para tikuyowoya na ŵanji vya ŵanalume ŵakwimikika mu mpingo.—Ŵazgani Ŵahebere 13:17; Yuda 8.

12, 13. (a) Cifukwa wuli tikwenera kuŵa ŵakugomezgeka mu vinthu vyose? (b) Kasi ŵanji ŵakukhwaskika wuli na kugomezgeka kwithu?

12 Ŵateŵeti ŵa Yehova ŵakumanyikwa na kugomezgeka, kulyera masuku pa mutu ŵanyawo yayi. Mpositole Paulosi wakalemba kuti: “Lutilirani kutilombera, pakugomezga kuti tili na njuŵi yakugomezgeka, uku tikukhumba kucita mwakugomezgeka mu vinthu vyose.” (Heb. 13:18) Cifukwa cakuti taŵikapo mtima “kucita mwakugomezgeka mu vinthu vyose,” tikulyera masuku pa mutu Ŵakhristu ŵanyithu yayi. Mwaciyelezgero, usange mubali tamulemba nchito, tikuwoneseska kuti tikucita nayo makora vinthu kweniso kuti tikumulipira mwakuyana na ivyo tikapangana. Pakuŵa Ŵakhristu, tikucita vinthu mwakugomezgeka na ŵanchito ŵithu ndiposo ŵanthu wose. Kweniso usange talembeka nchito na Mkhristu munyithu, tileke kupempha vinandi kuluska ivyo tapangana.

13 Kanandi ŵanthu ŵa ku caru ŵakuwonga Ŵakaboni ŵa Yehova cifukwa cakuti mbakugomezgeka. Mwaciyelezgero, mulara wa wupu unyake wa vyakuzengazenga wakawona kuti Ŵakaboni ŵa Yehova ŵakucita ivyo ŵayowoya. Iyo wakati: “Nyengo zose mukucita ivyo mwalayizga.” (Sal. 15:4) Cifukwa ca nkharo yithu yiwemi iyi, tikulutilira kuŵa paubwezi na Yehova. Kweniso nkharo iyi yikupangiska kuti ŵanthu ŵalumbe Adada ŵithu ŵacitemwa ŵa kucanya.

WOVWIRANI ŴANJI KUTI ŴAŴE ŴABWEZI ŴA YEHOVA

Tikovwira ŵanji kuti ŵaŵe ŵabwezi ŵa Yehova (Wonani ndime 14, 15)

14, 15. Para tili mu uteŵeti, kasi tingaŵawovwira wuli ŵanji kuti ŵaŵe ŵabwezi ŵa Yehova?

14 Ŵanthu ŵanandi awo tikukumana nawo mu uteŵeti, ŵakuwona Ciuta kuŵa Mubwezi wawo wapamtima yayi nangauli ŵakugomezga kuti waliko. Kasi tingaŵawovwira wuli? Wonani ulongozgi uwo Yesu wakapeleka ku ŵasambiri ŵake 70 apo wakaŵatuma ŵaŵiriŵaŵiri kukapharazga. Wakati: “Kulikose uko mwamunjira mu nyumba, cakwamba mukati, ‘Nyumba iyi yiŵe na mtende.’ Ndipo usange mubwezi wa mtende walimo, mtende winu wamukhala pa iyo. Kweni usange mulije, wamuwelera kwa imwe.” (Luka 10:5, 6) Ŵanthu ŵanandi ŵangasambira unenesko usange tikuŵapharazgira mwaubwezi.  Usange takumana na ŵakususka, ici cingawovwira kuti ŵawezgeko ukali ndipo ŵangazakatipokelera makora pa ulendo unyake.

15 Para tasanga ŵanthu awo ŵakudemelera comene ku cisopa cautesi, panji awo ŵakulondezga comene tumaluso twakupambana na Malemba, tikulutilira kuŵa ŵaubwezi kweniso ŵamtende. Ku maungano ghithu, tikupokelera ŵanthu wose awo ŵakukhumba kumanya vinandi vya Ciuta withu cifukwa cakuti ŵakhuŵara na nkharo ya ŵanthu ŵa mazuŵa ghano. Nkhani za mutu wakuti: “Baibolo Likusintha Umoyo wa Ŵanthu” zikulongosora vya ŵanthu ŵanthena aŵa.

KUGWIRA NCHITO LUMOZA NA MUBWEZI WITHU WAPAMTIMA

16. Kasi tikuŵa ŵabwezi kweniso “ŵanchito ŵanyake” na Yehova pa fundo wuli?

16 Ŵanthu awo ŵakugwilira lumoza nchito, kanandi ŵakwamba kutemwana comene. Ŵanthu wose awo ŵali kujipatulira kwa Yehova, ŵali na mwaŵi wa kuŵa ŵabwezi ŵake kweniso “ŵanchito ŵanyake.” (Ŵazgani 1 Ŵakorinte 3:9.) Nadi, para tikucita mulimo wa kupharazga na kuzgora ŵanthu kuŵa ŵasambiri, tikumanya makora mikhaliro ya Adada ŵithu ŵa kucanya. Tikuwona umo mzimu wawo utuŵa ukutovwilira kuti tipharazgenge makora makani ghawemi.

17. Kasi cakurya cauzimu ico cikupelekeka pa maungano gha dera, ghapadera na gha cigaŵa, cikulongora wuli kuti Yehova ni Mubwezi withu?

17 Para tikucitako comene mulimo wa kuzgora ŵanthu kuŵa ŵasambiri, tikusendelera comene kwa Yehova. Mwaciyelezgero, tikuwona umo Yehova wakutondera ŵakususka. Ghanaghanirani ivyo vyacitika mu vyaka ivyo vyajumpha. Kasi tawona umo Ciuta wakutilongozgera? Tikuzizwa na cakurya cinandi cauzimu ico tikupokera. Maungano ghithu gha cigaŵa, gha dera na ghapadera, ghakutovwira kumanya kuti Adada ŵithu ŵa kucanya ŵakumanya makora masuzgo na vyakukhumba vithu. Mbumba yinyake yikalemba kalata ya kuwonga cifukwa ca ungano wa cigaŵa, yikati: “Ungano uwu ukaticontha mtima comene. Tikawona umo Yehova wakutemwera ise waliyose payekha kweniso kuti wakukhumba kuti vinthu vitiyenderenge makora.” Mbumba yinyake ya ku Germany yikati yategherezga ungano wapadera ku Ireland, yikawonga comene cifukwa cakuti yikapokelereka na kupwelelereka makora. Yikasazgirapo kuti: “Kweni tikuwonga comene Yehova na Themba lake Yesu Khristu. Ŵaticema kuti tiŵe mu mtundu uwu wa ŵanthu ŵakukolerana zanadi. Apa tikuyowoyapo waka yayi kweni tikusangwa nadi na umoza uwu. Ivyo tikawona pa ungano wapadera wa ku Dublin, vilutilirenge kutikumbuska kuti tili na mwaŵi wa kuteŵetera Ciuta withu mukuru lumoza na imwe.”

 ŴANTHU AWO MPHAUBWEZI ŴAKUYOWOYESKANA

18. Kasi tingajifumba fumbo wuli pa nkhani ya kuyowoyeskana na Yehova?

18 Ubwezi ukukonda para ŵanthu ŵakuyowoyeskana makora. Mazuŵa ghano, kucezga na kutumirana mauthenga pa Intaneti na pa foni vyazara comene. Ndipouli, kasi tikucita wuli pa nkhani ya kuyowoyeskana na Mubwezi withu wapamtima, Yehova? Mbunenesko kuti iyo ‘wakupulika malurombo.’ (Sal. 65:2) Kweni kasi tikuyowoyeskana nayo kalinga?

19. Usange tikutondeka kuphalira Adada ŵithu ŵa kucanya vyakusingo, kasi pali wovwiri wuli?

19 Ŵateŵeti ŵanyake ŵa Ciuta ŵakutondeka kuti ŵaphalire Ciuta vyakusingo kwawo na umo vinthu vyaŵakhwaskira. Ndipouli, ivi ndivyo Yehova wakukhumba kuti timuphalirenge para tikulomba. (Sal. 119:145; Cit. 3:41) Nanga ni para tikuwona kuti nchakusuzga kuphalira Ciuta vyakusingo kwithu, wovwiri ulipo. Paulosi wakalembera Ŵakhristu ŵa ku Romu kuti: “Suzgo ilo tikwenera kulombera nga ni umo tikwenera kucitira tikulimanya cara, kweni mzimu iwowene ukuŵeyelera m’malo mwa ise na mitampho yambura kuyowoyeka. Ndipouli, uyo wakusanda mitima wakumanya ico mzimu ukung’anamura, cifukwa ukuŵeyelera m’malo mwa ŵatuŵa mwakuyana na khumbo la Ciuta.” (Rom. 8:26, 27) Para tikughanaghanirapo pa mazgu agho ghali kulembeka mu mabuku gha mu Baibolo, nga ni Job, Masalmo, na Zintharika, tovwirikenge kuti timuphalirenge vyakusingo kwithu Yehova.

20, 21. Kasi mazgu gha Paulosi gha pa Ŵafilipi 4:6, 7 ghakutipembuzga wuli?

20 Para takumana na masuzgo, tiyeni tilondezge ulongozgi uwo Paulosi wakapeleka ku Ŵafilipi wakuti: “Mungenjerwanga cara na kanthu kalikose, kweni mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Ciuta.” Para tiyowoyeskanenge nthena na Mubwezi withu wapamtima, tipembuzgikenge, cifukwa Paulosi wakasazgirapo kuti: “Mtende wa Ciuta uwo ukuluska ghanoghano lililose, usungilirenge mitima yinu na maghanoghano ghinu kwizira mwa Khristu Yesu.” (Fil. 4:6, 7) Mphanyi talutilira kusangwa na “mtende wa Ciuta” uwo ukusungilira nadi mitima yithu na maghanoghano ghithu.

21 Lurombo lukutovwira kuti tiŵe paubwezi na Yehova. Ntheura, tiyeni tilombenge “kwambura kuleka.” (1 Tes. 5:17) Mphanyi ivyo tasambira mu nkhani iyi, vyatovwira kukhozga ubwezi withu na Ciuta, weneuwo ngwapadera comene. Mphanyi vyatovwiraso kuti tiŵikepo mtima pakulondezga fundo zake za urunji. Kweniso tiyeni tilutilire kughanaghanirapo pa vitumbiko ivyo tikusanga cifukwa cakuti Yehova ni Dada withu, Ciuta withu, na Mubwezi withu.

Kasi lurombo lukukhozga wuli ubwezi withu na Ciuta? (Wonani ndime 21)