Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  FEBRUARY 2014

‘Daŵirani Utozi wa Yehova’

‘Daŵirani Utozi wa Yehova’

Masuzgo ghakukhwaska comene umoyo withu. Tingasuzgika maghanoghano, nkhongono zingamara, ndipo umoyo tingamba kuwuwona mu nthowa yinyake. Davide, themba la Ŵaisrayeli, wakakumana na masuzgo ghanandi. Kasi nchivici ico cikamovwira kuti wazizipizge? Mu salimo linyake, Davide wakati: “Nkhucemerezga na kucema Yehova, nkhuŵeyelera Yehova na mazgu ghane. Nkhupungulira pamaso pake kunyunyuta kwane, na kukonkhoska pakweru lwavyo lwane. Para lwathika lusoko mukati mu mzimu wane, Imwe mukumanya uko nkhwenda.” Nadi, Davide wakalombanga wovwiri kwa Ciuta.—Sal. 142:1-3.

Para wakumana na masuzgo, Davide wakalombanga wovwiri kwa Yehova

Kweniso mu salimo linyake, Davide wakimba kuti: “Kanthu kamoza ndalomba kwa Yehova, kenekako ndiko ndipenjenge; kuti ndikhalilire mu nyumba ya Yehova mazuŵa ghose gha umoyo wane, mwakuti ndidaŵirenge utozi wa Yehova, na kutaŵataŵa vya mu tempele lake.” (Sal. 27:4) Davide wakaŵa Mulevi yayi, kweni wonani kuti wakakondwanga kukhala kuwaro kwa luŵaza lwakupatulika pafupi na cihema, ico cikaŵa malo ghakuzirwa comene pa nkhani ya kusopa kwaunenesko pa nyengo iyi. Davide wakaghazirwiskanga comene malo agha mwakuti wakakhumbanga kukhala kwenekuku umoyo wake wose kuti ‘wadaŵirenge utozi wa Yehova.’

Lizgu lakuti “utozi,” likuyowoya za vinthu ivyo ni “vyakuzomerezgeka ndiposo vyakukondweska.” Nyengo zose, Davide wakazirwiskanga comene ivyo Ciuta wakanozga pa nkhani ya kusopa. Tingajifumba kuti, ‘Kasi ndimo nane nkhucitira?’

‘TITATAŴENGE’ NDONDOMEKO YA CIUTA NA MTIMA WA KUWONGA

Mazuŵa ghano, palije malo ghapadera agho Yehova wali kunozga ghakuti tisoperengepo. M’malo mwake, tikusopa Ciuta mu tempile lake likuru lauzimu, iyo ni ndondomeko ya kusopa kwaunenesko. * Usange ‘tikutataŵa’ ndondomeko iyi na mtima wa kuwonga, nase ‘tidaŵirenge utozi wa Yehova.’

Ghanaghanirani vya jochero la mkuŵa la sembe zakocha ilo likaŵa pa mulyango wa cihema. (Ex. 38:1, 2; 40:6) Jochero ili likaŵa cimanyikwiro cakuti Ciuta ngwakukhumbisiska kupokelera sembe ya Yesu. (Heb. 10:5-10) Ghanaghanirani waka ivyo fundo iyi yikung’anamura kwa ise. Mpositole Paulosi wakalemba kuti: “Apo tikaŵa ŵalwani, tikaphemaniskika kwa Ciuta kwizira mu nyifwa ya Mwana wake.” (Rom. 5:10) Usange tilongorenge cipulikano mu ndopa za Yesu izo zikathiskika, Ciuta watitemwenge na kutigomezga pakuŵa ŵabwezi ŵake. Para tacita nthena, ‘Yehova waŵenge bwezi’ lithu.—Sal. 25:14.

Cifukwa cakuti ‘zakwananga zithu zikusisitika,’ ‘nyengo zakusamphuska zikwiza kufuma ku cisko ca Yehova.’ (Mil. 3:19) Tili nga ni kayidi uyo wapera pa ivyo wakacita na kusintha pambere wandakomeke. Pakuwona ivi, mweruzgi walusungu wakuciskika kumugowokera na kulangura kuti waleke kukomeka. Kayidi wakukondwa comene. Nga ni mweruzgi uyu, Yehova wakugowokera ŵanthu awo ŵapera ndipo wakuŵawuskirapo ceruzgo ca nyifwa.

MUKONDWENGE NA KUSOPA KWAUNENESKO

Vinthu vyakukhwaskana na kusopa kwaunenesko ivyo Davide wakadaŵiranga pa nyumba ya Yehova, ni ungano uwo pakizanga mizinda ya Ŵaisrayeli  ŵanyake, ndiposo kuŵazgika na kulongosoreka kwa Dango. Vinyake, nkhocha sembe, kweniso uteŵeti wakupatulika wa ŵasofi na Ŵalevi. (Ex. 30:34-38; Maŵa. 3:5-8; Dute. 31:9-12) Pali kuyana pakati pa vinthu ivi na ivyo vikucitika mazuŵa ghano pa kusopa kwaunenesko.

Nga ni kale, mazuŵa ghano napo cikuŵa cakukondweska na cakunozga kuwona “ŵanambumba ŵakukhala pamoza na mtima wakulungana!” (Sal. 133:1) Gulu la pa caru cose la ‘ŵabali mu cipulikano’ lakura comene. (1 Pet. 2:17) Mazgu gha Ciuta ghakuŵazgika na kulongosoreka pa maungano ghithu. Kwizira mu gulu lake, Yehova wanozga masambiro ghanandi ghauzimu. Kweniso wapeleka cakurya cinandi cauzimu kwizira mu mabuku kuti tisambirenge patekha kweniso mu mbumba. Mubali munyake wa mu Wupu Wakulongozga wakati: “Nkhulanguluka pa Mazgu gha Yehova, nkhughanaghanirapo pa ng’anamuro lake, nkhupenja mahara na umanyi, ndipo ivi vyanovwira kuti niŵe musambazi mwauzimu kweniso wakukhorwa.” Nadi, ‘mahara ghaŵenge ghakuca nagho ku mzimu withu.’—Zinth. 2:10.

Mazuŵa ghano, Yehova wakupokelera malurombo kufuma ku ŵateŵeti ŵake zuŵa lililose. Kwa Yehova, malurombo agha ghali nga ni sembe ya sungu liwemi. (Sal. 141:2) Nchakukhozga comene kumanya kuti Yehova Ciuta wakukondwa nase comene para tikulomba kwa iyo mwakujiyuyura.

Mozesi wakalomba kuti: “Ulemu [lusungu] wa Yehova Ciuta withu ukhale nase, nchito ya mawoko ghithu muyikhozge.” (Sal. 90:17) Apo tikucita uteŵeti withu mwamwamphu, Yehova wakuwutumbika. (Zinth. 10:22) Tingaŵa kuti tili kovwirapo ŵanji kuti ŵasambire unenesko. Panyake tazizipizga kwa vyaka vinandi pakuteŵetera Ciuta nangauli ŵanyake ŵakukana kutegherezga, panji tikulwaralwara, tikusuzgika maghanoghano, panji tikutambuzgika. (1 Tes. 2:2) Ndipouli, tawona “utozi wa Yehova” ndipo tamanya kuti Adada ŵithu ŵa kucanya ŵakukondwa comene na ivyo tikucita.

Davide wakimba kuti: “Yehova ndiye ciharo cane na nkhombo yane; ndimwe mukukhozga nkharo yane. Vyose vyandiwira mu malo gha cimwemwe.” (Sal. 16:5, 6) Davide wakawonganga “ciharo” cake ico nkhuŵa paubwezi na Yehova kweniso mwaŵi wa kumuteŵetera. Nga ni Davide, tingakumana na masuzgo, kweni tikutumbikika comene mwauzimu. Ntheura, mphanyi talutilira kukondwa na kusopa kwaunenesko ndipo nyengo zose ‘titataŵenge’ tempile lauzimu la Yehova na mtima wa kuwonga.

^ ndime 6 Wonani Gongwe la Mulinda la Ciceŵa la Julayi 1, 1996, peji 14-24.