Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA NA. 4 2016

 NKHANI YA PA CHIKOPI | BAIBOLO LAPONA KU VINANDI

Baibolo Lapona Kuvunda

Baibolo Lapona Kuvunda

SUZGO ILO LIKAŴAPO: Kale, ŵanthu awo ŵakalembanga na kukopera Baibolo, ŵakalembanga waka pa malukwa na pa vikumba. * (2 Timote 4:13) Kasi vinthu ivi vikaŵa na suzgo wuli?

Malukwa ghakachedwanga yayi kukeluka, kutchujuka, na kuveveluka. Ŵanthu ŵanyake ŵakumanya mdauko wa ku Eguputo Richard Parkinson na Stephen Quirke, ŵakati: “Mupukutu wa malukwa ukavundanga, na kuzgoka tumiguluzi waka panji fuvu. Nyengo zinyake para mwawusunga, mupukutu ukachitanga chuku panji kuvunda chifukwa cha mtika. Para ŵawundira pasi, ukalyekanga na mbeŵa panji chimehe.” Mipukutu yinyake ya malukwa iyo ŵakayibowozga yikanangika luŵiro chifukwa chakuti ŵakayiŵika pa muhanya panji pa mtika.

Chikumba ntchakukhora kuluska malukwa. Kweni nacho chikukaŵa yayi kunangika para ŵandachisunge pawemi panji para ŵachiŵika pa malo ghakotcha chomene na ghakuzizima chomene, panji pa zuŵa. * Chikumba nacho ni chubu na tayara ku mbeŵa na chimehe. Buku linyake likuti, chikaŵanga chakusuzga kuti vyakulembeka vyakale “visungike nyengo yitali.” Baibolo nalo liŵenge kuti likavunda, mphanyi uthenga wake nawo kulije pasono.

NTCHIVICHI CHIKAWOVWIRA KUTI BAIBOLO LILEKE KUVUNDA?: Dango la Ŵayuda likachiskanga fumu yiliyose kuti ‘yilembenge mu buku mazgu gha mu Dango ili,’ kung’anamura mabuku 5 ghakwambilira gha mu Baibolo. (Dotoronome 17:18) Chinyakeso icho chikawovwira ntchakuti, ŵanthu ŵakumanya kukopera, ŵakalemba mipukutu yinandi mwakuti mu nyengo ya Yesu yikasangikanga mu masunagoge mu Israyeli mose kweniso ku vigaŵa vyakutali chomene, nga ni Makedoniya. (Luka 4:16, 17; Milimo 17:11) Kasi vikenda wuli kuti mipukutu yinyake yakale chomene yisungike m’paka sono?

Mipukutu yakuchemeka the Dead Sea Scrolls yakhala vyaka vinandi mu viŵiya, ku mphanji panji malo gha chipalamba

Nkhwantha yinyake zina lake Philip W. Comfort, yikati: “Ŵayuda ŵakatemwanga kusunga mipukutu ya Malemba gha mu Baibolo mu viŵiya vyadongo kuti yileke kunangika.” Ŵakhristu nawo ndimo ŵakwenera kuti ŵakachitiranga. Ntheura mipukutu yinyake yikasangika mu viŵiya, mu mphanji, mu vinyumba vyakubwangasuka, kweniso mu vipalamba.

NTCHIVICHI CHACHITIKA?: Mipukutu yakale chomene ya Baibolo, yinyake yakuti yakhala vyaka vyakujumpha 2,000, yilipo m’paka sono. Palije buku linyake lakale ilo lili na mipukutu yinandi nthena kweniso yakale chomene.

^ ndime 3 Malukwa ni vyakumera vya mu maji, ndipo ŵakavinozganga na kulembapo. Vikumba vikafumanga ku nyama zakupambanapambana.

^ ndime 5 Chikalata icho boma la United States likasayinira chakuti lijiyimirenge palekha, ŵakachilemba pa chikumba. (U.S. Declaration of Independence) Sono pajumpha vyaka vyambura kukwana 250, kweni chili kutchujuka chomene mwakuti malemba ghakuwoneka viŵi yayi.