Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) DECEMBER 2016

Kasi Mukukumbuka?

Kasi Mukukumbuka?

Kasi muli kuŵerengapo magazini gha Gongwe la Mulinda ghasonosono apa? Yezgani kuzgora mafumbo agha:

Kasi ni zakwananga wuli izo munthu wangalondezga ulongozgi wa Yesu wa pa Mateyu 18:15-17?

Wakayowoyanga zakwananga izo ŵanthu awo ŵabudirana ŵangamazga ŵekha. Kweni munthu wangasezgekerapo para ŵatondeka kumazga ŵekha. Mwachiyelezgero, munthu wangaŵa kuti wakusesa ŵanyake panji wakuchita ukhuluku.—w16.05, p. 7.

Kasi tikwenera kuchita wuli kuti tisangenge chandulo na ivyo tikuŵazga mu Baibolo?

Tingasanga chandulo pakuŵazga Baibolo para tingachita vinthu ivi: Kuŵa na maghanoghano ghakwenelera. Kuwona fundo iyo mungalondezga; mungajifumba kuti, ‘Kasi ningawovwira wuli ŵanthu na fundo iyi?; kweniso mungafufuza fundo zinyake mu mabuku ghithu kuti mumanye vinandi.—w16.05, p. 24-26.

Kasi Mkhristu uyo wakugomezga kuti kuli chiwuka wakwenera yayi kuŵa na chitima para mubali wake wafwa?

Mkhristu wangaleka yayi kuŵa na chitima chifukwa cha kugomezga kuti kuli chiwuka. Abrahamu wakalira na kutengera apo muwoli wake Sara wakafwa. (Gen. 23:2) Kweni chitima chikuchepako para pajumpha nyengo.—wp16.3, p. 4.

Kasi munthu uyo wali na kachikwama ka mulembi ndiposo ŵanalume 6 awo ŵali na vilwero vyakukomera mu mboniwoni ya Ezekiyeli mbanjani?

Ŵanthu aŵa ŵakwimira vilengiwa vyakuchanya ivyo vikadangilira pakuparanya msumba wa Yerusalemu. Nakuti vilengiwa ivi ndivyo vizamudangiliraso pakuparanya charu cha Satana ichi pa nkhondo ya Haramagedoni. Mazuŵa ghano, mwanalume uyo wakaŵa na kachikwama ka mulembi, wakwimira Yesu Khristu uyo wakudinda ŵanthu kuti ŵazakapone.—w16.06, p. 16-17.

Kasi Baibolo lapona ku vinthu wuli?

Baibolo lapona (1) kuti lileke kuvunda pa mipukutu ya malukwa; (2) ku ŵandyali na ŵaliska ŵanyake awo ŵakakhumbanga kuti lileke kuŵapo (3) ku ŵanthu ŵanyake awo ŵakakhumbanga kusintha uthenga wake.—wp16.4, p. 4-7.

Kasi Mkhristu wangachita wuli kuti wachepeskeko vinyake?

Wakwenera kumanya ivyo wakukhumbikwira nadi. Kupanga bajeti yakwenelera. Kuguliska vinthu ivyo wakuleka kuvigwiliskira ntchito na kuwezga ngongoli. Kuchepeska maora agho wakugwilira ntchito na kuwona uteŵeti uwo wangachitako.—w16.07, p. 10.

Kasi Baibolo likuti ntchinthu wuli chakuzirwa kuluska Golide panji siliva?

Lemba la Yobu 28:12, 15 likuyowoya kuti vinjeru vya Chiuta ni vyakuzirwa chomene kuluska golide panji siliva. Apo mukupenja vinjeru ivi, lutilirani kujiyuyura na kuŵa na chipulikano chakukhora.—w16.08, p. 18-19.

Kasi ntchakwenelera kuti mubali wasungenge mwembe mazuŵa ghano?

Ku vigaŵa vinyake ŵabali ŵakuzomerezgeka kusunga mwembe chikuru ŵakuwupwelelera makora. Ku vigaŵa ivi, ŵanthu ŵakukhuŵara yayi ndipo ŵakutegherezga uthenga wa Ufumu. Kweni ŵabali ŵanyake ŵangasankha kuleka kusunga mwembe. (1 Kor. 8:9) Ku vigaŵa vinyake, ŵakuwona kuti ntchiwemi yayi kuti Ŵakhristu ŵasungenge mwembe.—w16.09, p. 21.

Chifukwa wuli tikugomezga kuti nkhani ya Davide na Goliyati yikachitika nadi?

Baibolo likuti Goliyati wakaŵa mutali mikono 6 kuluska munthu uyo ni mutali chomene mazuŵa ghano. Davide wakaŵako nadi. Ŵanthu ŵakufukura vinthu vyakale ŵali kusanga chinthu chinyake chakale chomene icho pali kulembeka nyumba ya Davide, kweniso ivyo Yesu wakayowoya nawo mbukaboni. Kweniso malo agho vinthu ivi vikachitikira ghakulongora kuti nkhani iyi njaunenesko.—wp16.5, p. 13.

Kasi pali mphambano wuli pakati pa umanyi, kupulikiska vinthu, na vinjeru?

Munthu waumanyi ni uyo wakumanya waka vinthu panji fundo. Kweni munthu wakupulikiska vinthu wakumanya waka umo fundo yinyake yikukolerana na yinyake. Ndipo munthu wavinjeru wakumanya na kupulikiska makora vinthu ndipo wakugwiliskira ntchito ivyo wakumanya.—w16.10, p. 18