Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) DECEMBER 2016

Yehova Wakuŵapa Njombe Awo Ŵakumupenja na Mtima Wose

Yehova Wakuŵapa Njombe Awo Ŵakumupenja na Mtima Wose

“Uyo wakusendelera kwa Chiuta wakwenera kugomezga kuti waliko ndipo wakuŵapa njombe awo ŵakumupenja na mtima wose.”—HEB. 11:6.

SUMU: 85, 134

1, 2. Kasi chitemwa na chipulikano vikukolerana wuli? (b) Kasi tidumbiskanenge mafumbo wuli?

TIKUTEMWA YEHOVA “chifukwa ndiyo wakamba kutitemwa.” (1 Yoh. 4:19) Yehova wakutemwa chomene ŵanthu, lekani wakutumbika ŵateŵeti ŵake ŵakugomezgeka. Para tikumutemwa chomene Yehova, chipulikano chithu chilutilirenge kukhora. Tikugomezga kuti waliko kweniso wakupeleka njombe ku awo wakuŵatemwa.—Ŵerengani Ŵahebere 11:6.

2 Yehova wakuŵapa njombe ŵateŵeti ŵake, ndipo ichi ntchimoza mwa vinthu ivyo wakuchita. Tikuŵa na chipulikano chakukhora para tikugomezga kuti Chiuta wazamuŵapa njombe awo ŵakumupenja na mtima wose, chifukwa “chipulikano ntchilindizga chanadi cha vinthu ivyo tikugomezga.” (Heb. 11:1) Ntheura chipulikano chikutovwira kulindilira vitumbiko ivyo Chiuta walayizga. Kasi pali uwemi wuli para tikugomezga kuti tizamupokera njombe? Kasi kale Yehova wakatumbikanga wuli ŵateŵeti ŵake? Ndipo sono wakuŵatumbika wuli? Tiyeni tiwone.

YEHOVA WAKULAYIZGA KUTI WATUMBIKENGE ŴATEŴETI ŴAKE

3. Kasi Yehova wakutilayizga vichi pa Malaki 3:10?

3 Yehova Chiuta wali kulayizga yekha kuti watumbikenge ŵateŵeti  ŵake ŵakugomezgeka. Ntheura wakutipempha kuti tisange vitumbiko ivi. Wakuti: “‘Niyezgani . . . ndimo wayowoyera Yehova wa mawumba, “muwone usange nilekenge kumujulirani vipata vyakuchanya na kumupungulirani vitumbiko m’paka musoŵe pakusunga.’” (Mal. 3:10) Tikulongora kuti tikuwonga Yehova kufumira pasi pa mtima para tikuzomera ivyo watipempha.

4. Chifukwa wuli tikugomezga ivyo Yesu wakayowoya pa Mateyu 6:33?

4 Yesu wakaŵasimikizgira ŵasambiri ŵake kuti para ŵadangizga dankha Ufumu, Chiuta waŵawovwirenge. (Ŵerengani Mateyu 6:33.) Yesu wakamanya kuti ivyo Chiuta walayizga vikufiskika nadi. Wakawonanga umo Yehova wakafiskiranga ivyo walayizga. (Yes. 55:11) Nase tikwenera kuŵa na chigomezgo chose kuti ivyo Yehova walayizga vizamufiskika nadi. Iyo wakuti: “Nikulekenge yayi napachoko nesi kukutaya munthowa yiliyose.” (Heb. 13:5) Ntheura fundo iyi yikukolerana na ivyo Yesu wakayowoya vya kupenja dankha Ufumu na urunji wa Chiuta.

Yesu wakati ŵasambiri ŵake ŵazamupokera njombe chifukwa cha kujipeleka (Wonani ndime 5)

5. Chifukwa wuli ivyo Yesu wakazgora Petrosi vikukhozga chipulikano chithu?

5 Nyengo yinyake mpositole Petrosi wakafumba Yesu kuti: “Ise tasida vinthu vyose na kumulondezgani, kasi tizamuŵa na vichi?” (Mat. 19:27) Yesu wakamukalipira yayi Petrosi chifukwa cha ivyo wakafumba. Kweni iyo wakaphalira ŵasambiri ŵake kuti ŵazamupokera njombe chifukwa cha kujipeleka. Ŵapositole na Ŵakhristu ŵanyake ŵakugomezgeka, ŵamulamulira pamoza na Yesu kuchanya. Kweni nanga ni sono nthena ŵakutumbikika. Yesu wakati: “Waliyose uyo wasida nyumba panji ŵakuru panji ŵanung’una panji ŵadumbu panji awiske  panji anyina panji ŵana panji minda chifukwa cha zina lane, wazamupokera vinandi chomene ndipo wazamuhara umoyo wamuyirayira.” (Mat. 19:29) Ŵasambiri ŵa Yesu ŵakasanga vitumbiko vinandi chomene kujumpha ivyo ŵakete ŵasangenge. Kasi ŵadada, ŵamama, ŵakuru, ŵadumbu, na ŵana ŵauzimu awo tili kusanga chifukwa cha kuŵika dankha Ufumu pakwamba, asi mbakuzirwa chomene kuluska chilichose icho tili kuleka?

“CHILI NGA NI NYANGURU WA UMOYO WITHU”

6. Chifukwa wuli Yehova walayizga ŵateŵeti ŵake kuti waŵapenge njombe?

6 Yehova wali kulayizga ŵateŵeti ŵake kuti waŵapenge njombe. Ivi vikuŵawovwira kuti ŵalutilire kugomezgeka para ŵakuyezgeka. Nangauli pasono ŵateŵeti ŵa Chiuta ŵakutumbikika mwauzimu, kweni ŵakulindilira vitumbiko vinandi chomene munthazi. (1 Tim. 4:8) Chifukwa chakuti tikugomezga chomene kuti “wakuŵapa njombe awo ŵakumupenja na mtima wose,” vikutovwira kuti tilutilire kuŵa na chipulikano chakukhora mwa Yehova.—Heb. 11:6.

7. Kasi chigomezgo chikuyana wuli na nyanguru?

7 Pa upharazgi wake pa Phiri, Yesu wakati: “Sekelerani na kukondwa chomene, pakuti njombe yinu njikuru kuchanya, chifukwa ndimo ŵakatambuzgira ntchimi izo zikaŵako pambere imwe mundaŵeko.” (Mat. 5:12) Ŵakhristu ŵanyake ŵamupokera njombe yawo kuchanya, ndipo ŵanyake ‘ŵakusekelera na kukondwa chomene’ chifukwa cha chigomezgo chakuzakakhala na umoyo wamuyirayira pa charu chapasi mu Paradiso. (Sal. 37:11; Luka 18:30) Kwali tizamukhala pa charu chapasi, kwali tikuluta kuchanya, chigomezgo chithu chili nga ni “nyanguru wa umoyo withu.” (Heb. 6:17-20) Nga umo nyanguru wakovwilira sitima panji boti kuti yileke kubira para chimphepo chikuputa, chigomezgo chanadi chingatovwira kuti tiŵe na maghanoghano ghawemi, kweniso kuti tilutilire kuchita makora mwauzimu. Chigomezgo chingatovwira kuti tiŵe na nkhongono zakuzizipizgira.

8. Kasi chigomezgo chili na nkhongono wuli?

8 Chigomezgo chithu chakufuma mu Baibolo chili na nkhongono zakuchepeskera kwenjerwa. Ivyo Chiuta watilayizga vili nga ni mafuta ghauzimu agho ghakutovwira kuti tileke kwenjerwa chomene. Tikujipulika makora chomene para ‘katundu withu tamuthwikiska Yehova,’ uku tikumanya kuti ‘watovwirenge.’ (Sal. 55:22) Tili na chigomezgo chose kuti Chiuta wangachita “vinandi nkhanira kuluska vinthu vyose ivyo tikulomba panji kughanaghana.” (Efe. 3:20) Manyani kuti Chiuta wangachita “vinandi nkhanira” kuluska umo ise tikughanaghanira.

9. Chifukwa wuli tikugomezga kuti Yehova wangatitumbika?

9 Kuti tizakapokere njombe, tikwenera kugomezga chomene Yehova na kupulikira ivyo wakutiphalira. Mozesi wakaphalira mtundu wa Israyeli kuti: “Yehova wamumutumbikani nadi mu charu icho Yehova Chiuta winu wakumupani kuti mupoke kuŵa chiharo chinu. Ivi vyamuchitika pekha usange mwamupulikira lizgu la Yehova Chiuta winu na kusunga mwakupwelelera dango lose ili, ilo nkhumupani muhanya uno. Yehova Chiuta winu wamumutumbikani nga umo walayizgira.” (Doto. 15:4-6) Kasi mukugomezga nadi kuti Yehova wangamutumbikani para mungalutilira kumuteŵetera mwakugomezgeka? Mukwenera kuti muli na vifukwa vyakukwana vyakumugomezgera.

YEHOVA NDIYO WAKAŴAPANGA NJOMBE

10, 11. Kasi Yehova wakamutumbika wuli Yosefe?

10 Baibolo likalembeka kuti litovwire. Muli viyelezgero vinandi ivyo vikulongora kuti Chiuta wakatumbikanga ŵateŵeti ŵake ŵakugomezgeka. (Rom. 15:4) Yosefe wakaŵa yumoza wa ŵateŵeti ŵake ŵakugomezgeka. Nyengo yinyake,  ŵakuru ŵake ŵakamupangira chiŵembu, pamanyuma mwanakazi wa bwana wake wakamupusikizgira kuti wakakhumbanga kumukolelera. Ndipo paumaliro Yosefe ŵakamujalira mu jele ku Eguputo. Kasi wakaleka kugomezga Chiuta? Yayi. “Yehova wakalutilira kuŵa na Yosefe ndipo wakamulongoranga lusungu . . . Yehova wakaŵa nayo ndipo Yehova wakatumbikanga chilichose icho Yosefe wakachitanga.” (Gen. 39:21-23) Yosefe wakalindilira Chiuta mwakuzikira kuti wamovwirenge.

11 Vyaka vikati vyajumphapo, Farawo wakamufumiska Yosefe mu jele ndipo wakamwimika kuŵa wachiŵiri wake mu charu chose cha Eguputo. (Gen. 41:1, 37-43) Nyengo yikati yajumphapo, muwoli wake wakamubabira ŵana ŵanyamata ŵaŵiri. “Yosefe wakathya mwana wakwamba zina lakuti Manase, chifukwa wakati, ‘Chiuta waniluwiska suzgo lane lose, na nyumba yose ya adada.’ Mwana wachiŵiri wakamuthya zina lakuti Efurayimu, chifukwa wakati, ‘Chiuta wanipa ŵana mu charu cha visuzgo vyane.’” (Gen. 41:51, 52) Chifukwa chakuti Yosefe wakagomezgeka kwa Chiuta, wakatumbikika chomene ndipo wakaponoska umoyo wa Ŵaisrayeli na Ŵaeguputo. Apa fundo njakuti, Yosefe wakamanya kuti Yehova ndiyo wakamutumbika na kumupa njombe.—Gen. 45:5-9.

12. Ntchivichi chikawovwira Yesu kuti wazizipizge?

12 Yesu Khristu wakayezgeka chomene, kweni wakalutilira kugomezgeka kwa Chiuta, ndipo paumaliro wakapokera njombe. Ntchivichi chikawovwira Yesu kuti wazizipizge? Baibolo likuti: “Chifukwa cha chimwemwe icho chikaŵikika panthazi pake, wakazizipizga khuni lakusuzgikirapo, wakasulako soni.” (Heb. 12:2) Yesu wakakondwa chomene chifukwa wakatuŵiska zina la Chiuta. Kweniso Adada ŵake ŵakakondwa nayo chomene ndipo ŵakamupa mauteŵeti ghanandi. Baibolo likutiphalira kuti “wakhala pasi ku woko lamalyero la chitengo cha Chiuta.” Kweniso likuti: “Chiuta wakamukwezga pa malo ghapachanya na kumupa zina ilo lili pachanya pa zina linyake lililose.”—Fil. 2:9.

YEHOVA WAKULUWA YAYI IVYO TIKUCHITA

13, 14. Kasi Yehova wakujipulika wuli na ivyo tikumuchitira?

13 Tili na chigomezgo chose kuti Yehova wakuwonga ivyo tikuchita kuti timuteŵetere. Wakumanya ivyo tikwenjerwa panji umo tikujipulikira. Chitima chikumukora para tikusuzgika maghanoghano chifukwa cha ukavu, ulwari, panji masuzgo ghanyake agho ghakutitondeska kuchita makora uteŵeti withu. Tikugomezga kuti Yehova wapelekenge njombe ku ŵateŵeti ŵake chifukwa ŵakugomezgeka kwa iyo.—Ŵerengani Ŵahebere 6:10, 11.

14 Kumbukani kuti tikwenera kulomba kwa Chiuta uyo ‘wakupulika malurombo’ na chigomezgo chose kuti watovwirenge. (Sal. 65:2) “Dada wa mtima walusungu na Chiuta wa chisangulusko chose,” watovwirenge mwauzimu kweniso para tikusuzgika maghanoghano. Wangachita nthena kwizira mu Ŵakhristu ŵanyithu. (2 Kor. 1:3) Yehova wakukondwa chomene para tikulongora lusungu ŵanyithu. “Uyo wakulongora lusungu kwa mukavu wakubwerekeska Yehova, ndipo wamuwezgerenge pa ivyo wachita.” (Zinth. 19:17; Mat. 6:3, 4) Ntheura para tikovwira ŵanyithu awo ŵakusuzgika, Yehova wakuwona ndipo vikuŵa nga tikumubwereka iyo. Iyo wakutilayizga kuti nayo wazamutilongora lusungu.

WATIPENGE NJOMBE SONO KWENISO MUYIRAYIRA

15. Kasi mukulindilira njombe wuli? (Wonani chithuzi chakwamba.)

15 Ŵakhristu ŵakuphakazgika ŵakulindilira kuzakapokera “mphumphu ya urunji . . . iyo Fumu, mweruzgi murunji, yizamupeleka . . . nga ni njombe mu zuŵa ilo.” (2 Tim. 4:7, 8) Ntheura  muzamukhorwa na njombe yiliyose iyo Chiuta wazamumupani. “Mberere zinyake” za Yesu, nazo zikukondwa kuti zizamupokera njombe ya umoyo wamuyirayira pa charu chapasi mu Paradiso. Mu charu chiphya “ŵazamukondwa chomene na mtende ukuru.”—Yoh. 10:16; Sal. 37:11.

16. Kasi ni mazgu wuli ghakukhozga agho ghali pa 1 Yohane 3:19, 20?

16 Nyengo zinyake tingawona nga palije icho tikuchita, panji kuti Yehova wakukondwa yayi na ivyo tikufiska pa kumuteŵetera. Ndipo nyengo zinyake tingawona nga ndise ŵambura kwenelera kupokera njombe. Kweni nyengo zose tikumbukenge kuti “Chiuta ni mukuru kuluska mitima yithu ndipo wakumanya vinthu vyose.” (Ŵerengani 1 Yohane 3:19, 20.) Chiuta wakupeleka njombe pa uteŵeti uliwose uwo tingachita kufumira pasi pa mtima chifukwa cha chipulikano kweniso chitemwa. Iyo wakuwona kuti uteŵeti uliwose, kwali uwoneke wapasi wuli, ngwakuzirwa chomene kwa iyo.—Mrk. 12:41-44.

17. Kasi ni vitumbiko wuli ivyo tikusanga sono?

17 Nangauli tili mu mazuŵa ghaumaliro gha charu cha Satana ichi, kweni Yehova wakutumbika ŵaŵeteti ŵake. Wakuwoneseska kuti ŵateŵeti ŵake ŵakukondwa na chakurya chinandi chauzimu. Wakuŵapa chakurya chinandi chomene kuluska kumanyuma kose. (Yes. 54:13) Nga umo Yesu wakalayizgira, Yehova wakutitumbika nadi sono. Tili na ŵabali na ŵadumbu ŵauzimu pa charu chose chapasi. (Mrk. 10:29, 30) Kweniso awo ŵakupenja Chiuta na mtima wose, ŵakutumbikika chomene chifukwa ŵakuŵa na mtende mu mtima, ŵakukhorwa, kweniso ŵakuŵa ŵakukondwa.—Mrk. 10:29, 30.

18, 19. Kasi ŵaŵeti ŵa Yehova ŵakujipulika wuli na umo waŵatumbikira?

18 Ŵateŵeti ŵa Yehova pa charu chose chapasi, ŵakuwona na maso ghawo kuti Yehova wakuŵatumbika. Mwachiyelezgero, Bianca wa ku Germany wakuti: “Nkhumanya yayi umo ningawongera Yehova. Wanovwira kuti nileke kwenjerwa, kweniso nyengo zose wakuŵa nane pafupi. Vinthu vili makora yayi mu charu, mukuchitika viheni na vyakofya. Kweni apo nkhuteŵera Yehova, nkhujipulika kuti nili wakuvikilirika. Nyengo zose para nkhumuteŵetera, wakunitumbika chomene.”

19 Ghanaghanirani za Paula wa ku Canada uyo wali na vyaka 70. Iyo wakukotondeka kwenda chifukwa wali na suzgo la malundi. Iyo wakuti: “Nangauli nkhutondeka kwenda, kweni nkhupharazga. Nkhupharazgira ŵanthu pa foni kweniso awo ŵiza kuzakaniwona. Kuti nilutilire kuŵa wakukhora mwauzimu, nili na kabuku ako nkhulembamo mavesi na nkhani izo naŵerenga mu mabuku ghithu, ndipo nkhuwonangamo pafupipafupi. Aka nkhukachema “Kabuku Kakukhozga.” Masuzgo agho tikukumana nagho ngakanyengo para tikughanaghanira ivyo Yehova watilayizga. Yehova ngwakunozgeka kutovwira pa suzgo lililose.” Nangauli masuzgo ghinu ghakuyana yayi na gha Bianca panji Paula, kweni nyengo zose mukwenera kughanaghanira ivyo Yehova wamuchitirani na ivyo wachitira ŵanyinu. Ntchiwemi kughanaghanira umo Yehova wamutumbikirani pasono, kweniso umo wazamumutumbikirani munthazi.

20. Kasi tizamupokera vichi para tikulutilira kuteŵetera Chiuta na mtima wose?

20 Kuluŵa yayi kuti “muzamupokerapo njombe yikuru” para mukuromba Chiuta kufumira pasi pa mtima na kumuphalira chilichose. Manyani kuti ‘para mwachita khumbo la Chiuta, muzamupokera ivyo Chiuta walayizga.’ (Heb. 10:35, 36) Ntheura tiyeni tilutilire kukhozga chipulikano chithu na kumuteŵetera Yehova na mtima wose. Tikuchita nthena chifukwa tikumanya kuti ni Yehova pera uyo wazamutipa njombe.—Ŵerengani Ŵakolose 3:23, 24.