Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda  |  Na. 2 2017

 NKHANI YA PA CHIKOPI | KASI MUKUWONGA CHAWANANGWA CHIKURU CHA CHIUTA?

Chawanangwa Chakuluska Vyose

Chawanangwa Chakuluska Vyose

JORDAN wakapika mutchini wakuŵezera phesulu wakuwoneka nga nkhasitima ndipo wakawona kuti chawanangwa ichi ntchakuzirwa viŵi yayi. Kweni pasono wakuchiwona kuti ntchakuzirwa chomene. Jordan wakati: “Russell uyo wakatemwanga kuchezga na banja lithu, ndiyo wakanipa chawanangwa ichi apo nkhaŵa mwana.” Russell wati wafwa, Jordan wakamanya kuti Russell wakawovwira chomene abuya na ŵapapi ŵake, nanga ni mu nyengo zakusuzga. Jordan wakati: “Pakuti sono namumanya makora Russell, ntheura nkhuwona kuti chawanangwa icho wakanipa ntchakuzirwa chomene.”

Nkhani iyi yikulongora kuti nyengo zinyake chawanangwa chingaŵa chambura ntchito ku ŵanthu ŵanyake. Kweni ŵanji wangachiwona kuŵa chakuzirwa chomene. Baibolo likuyowoya za chawanangwa chinyake ntchakuzirwa chomene. Likuti: “Pakuti Chiuta wakachitemwa chomene charu, lekani wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.”—Yohane 3:16.

Chawanangwa ichi chingawovwira munthu kuzakasanga umoyo wamuyirayira! Palije chawanangwa icho chikuyana na chawanangwa ichi. Nangauli ŵanyake ŵakuwona kuti ntchakuzirwa yayi, kweni Ŵakhristu ŵaunenesko ŵakuwona kuti ‘ntchakuzirwa’ chomene. (Salimo 49:8; 1 Petrosi 1:18, 19) Chifukwa wuli Chiuta wali kupeleka chawanangwa ichi?

Mpositole Paulosi wakuzgora kuti: “Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose chifukwa wose ŵakananga.” (Ŵaroma 5:12) Munthu wakwamba Adamu wakanangira Chiuta mwadala ndipo chilango chake chikaŵa nyifwa. Ntheura ŵana wose ŵa Adamu ŵakufwa chifukwa cha kwananga kwa munthu yumoza.

 Baibolo likuti: “Pakuti malipiro gha kwananga ni nyifwa, kweni chawanangwa icho Chiuta wakupeleka mbumoyo wamuyirayira mwa Khristu Yesu Fumu yithu.” (Ŵaroma 6:23) Ntheura kuti tiwombokwe ku kwananga na nyifwa, Chiuta wakatuma Mwana wake, Yesu kuti wazakapeleke umoyo wake wambura kwananga. Nakuti wose awo ŵali na chipulikano mwa Yesu ŵazamusanga umoyo wa muyirayira chifukwa “cha sembe” iyi.—Ŵaroma 3:24.

Pakuyowoya za vitumbiko ivyo awo ŵakusopa Chiuta mwaunenesko ŵazamusanga, Paulosi wakalemba kuti: “Tikuwonga Chiuta chifukwa cha chawanangwa chake chambura mayowoyeko.” (2 Ŵakorinte 9:15) Nadi, sembe ya Yesu ntchawanangwa chakuzirwa chomene na chambura mayowoyeko. Kweni ntchifukwa wuli tikuti sembe yakuwombora ntchawanangwa chapadera chomene kuluska vyose? * Ndipo tingalongora wuli kuti tikuwonga Chiuta pakutipa chawanangwa ichi? Ŵazgani nkhani ziŵiri zakulondezgapo kuti musange mazgoro gha mu Baibolo gha mafumbo agha.

^ ndime 8 Yesu “wakapeleka umoyo wake chifukwa cha ise.” (1 Yohane 3:16) Ndipouli, pakuti chawanangwa ichi chikovwira kufiska khumbo la Chiuta, lekani nkhani zakulondezgapo zikulongosora chomene ivyo Chiuta uyo wali kupeleka sembe iyi wakachita.