Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda  |  Na. 2 2017

 NKHANI YA PA CHIKOPI | KASI MUKUWONGA CHAWANANGWA CHIKURU CHA CHIUTA?

Kasi Mukuwonga Chawanangwa Chikuru cha Chiuta?

Kasi Mukuwonga Chawanangwa Chikuru cha Chiuta?

“Chitemwa icho Khristu wali nacho chikutichichizga. . . . Wakaŵafwira wose kuti awo mbamoyo ŵaleke kujikhalira ŵekha, kweni ŵakondweskenge uyo wakaŵafwira na kuwuskika.”—2 Ŵakorinte 5:14, 15.

PARA tapika chawanangwa icho ntchakuzirwa chomene tikuwonga kufuma pasi pamtima. Yesu wakati wachizga ŵanalume 10 awo ŵakaŵa na vyoni iyo yikaŵa nthenda yambura munkhwala, wakayowoya zakuzirwa kwa kuwonga. Wati waŵachizga, mwanalume yumoza pera ndiyo “wakawelera, wakachemerezganga na kupeleka uchindami kwa Chiuta.” Yesu wakati iyo: “Asi awo ŵatozgeka ŵanguŵapo 10? Kasi ŵanyake 9 ŵali nkhu?” (Luka 17:12-17) Kasi tikusambira vichi apa? Kanandi tikuluwa luŵiro viwemi ivyo ŵanyithu ŵatichitira.

Palije chawanangwa icho chingayana na sembe ya Yesu chifukwa chawanangwa ichi ntchapachanya chomene nkhanira. Ntheura kasi imwe mungalongora wuli kuti mukuwonga chawanangwa ichi?

  • Mumanyani uyo wali kupeleka. Pakuti Yesu wali kutifwira, kasi ndikuti waliyose wazamusanga umoyo wamuyirayira? Yayi. Apo Yesu wakalombanga kwa Adada ŵake wakati: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, uyo mukamutuma.” (Yohane 17:3) Usange mwamanya kuti munthu munyake wakamuponoskani apo mukaŵa mwana, kasi mungatemwa yayi kuti mumumanye makora munthu uyu? Yehova Chiuta, uyo wali kupeleka sembe yakuwombora, wakukhumba kuti timumanye makora na kuŵa nayo pa  ubwezi. Baibolo likuti: “Sendelerani kwa Chiuta, ndipo iyo wasendelerenge kwa imwe.”—Yakobe 4:8.

  • Ŵani na chipulikano mu sembe ya Yesu. Baibolo likuti: “Uyo wakupulikana mwa Mwana wali na umoyo wamuyirayira.” (Yohane 3:36) Kasi munthu wangalongora wuli kuti wali na chipulikano? Milimo ndiyo yikulongora. (Yakobe 2:17) Kasi ntchivichi chinyake icho chikukhumbikwa? Para munthu wazomera na kupokera chawanangwa ndipo chikuŵa chake. Ntheura namwe mukwenera kuzomera sembe ya Yesu. Kasi mungazomera wuli? Sambirani ivyo Chiuta wakukhumba na kulondezga ivyo mukusambira. * Lombani Chiuta kuti wamugowokerani na kumupani njuŵi yituŵa. Para mukulomba mukwenera kuŵa na chipulikano kuti sembe ya Yesu yingamovwirani kuzakasanga umoyo wamuyirayira, kuŵa pa mtende, na kuzakakondwa na umoyo.—Ŵahebere 11:1.

  • Musangikenge pa ungano wakukumbukira nyifwa ya Yesu. Yesu ndiyo wakambiska ungano uwu ndipo ukuchitika chaka chilichose. Yesu wakati: “Lutilirani kuchita ichi kuti munikumbukenge.” (Luka 22:19) Ŵakaboni ŵa Yehova ŵazamukumbukira nyifwa ya Yesu pa Chiŵiri, Epulero 11, 2017, para zuŵa lanjira. Ungano uwu ukutora pafupifupi ora limoza, ndipo pakuŵa nkhani ya mu Baibolo iyo yikulongosora kuzirwa kwa nyifwa ya Yesu na vyandulo ivyo tizamusanga munthazi. Chaka chamara, ŵanthu ŵakukwana 20 miliyoni ŵakakumbukira nyifwa ya Yesu. Ntheura tikumupemphani kuti muzakaŵe nase pa ungano wapadera uwu.

^ ndime 7 Nthowa yiwemi iyo mungamanyira Chiuta na kuŵa nayo paubwezi, nkhusambira Mazgu ghake Baibolo. Kuti mwambe kusambira Baibolo pemphani Ŵakaboni ŵa Yehova panji lutani pa webusayiti yithu ya www.jw.org.