Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda  |  Na. 6 2017

 Ŵaŵazgi Ŵithu Ŵakufumba Kuti . . .

Kasi Ŵakhristu Ŵakwenera Kukondwelera Khisimasi?

Kasi Ŵakhristu Ŵakwenera Kukondwelera Khisimasi?

Ŵanthu ŵanandi pa charu chose ŵakugomezga kuti Khisimasi ni zuŵa lakukondwelera kubabika kwa Yesu. Kweni kasi muli kujifumbapo usange ŵasambiri ŵa Yesu awo ŵakaŵa ŵabwezi ŵake ŵakakondweleranga Khisimasi? Kasi mukumanya ivyo Baibolo likuyowoya pa nkhani yakukumbukira zuŵa lakubabikira? Para tingamanya mazgoro gha mafumbo agha, vingatovwira kumanya usange ntchakwenelera kuti Ŵakhristu ŵakondwelerenge Khisimasi.

Chakwamba, Baibolo likuyowoyapo yayi kuti ŵanthu ŵakakondweleranga zuŵa ilo Yesu wakababikira, panji la munthu munyake uyo wakaŵa muteŵeti wa Chiuta. Baibolo likuyowoyapo waka za ŵanthu ŵaŵiri awo ŵakakondweleranga zuŵa lakubabikira. Ŵanthu aŵa ŵakasopanga Yehova yayi, nakuti pa zuŵa lakukumbukira kubabika kwawo, ŵakachita vinthu viheni. (Genizesi 40:20; Mariko 6:21) Buku linyake likuti: Ŵakhristu mu nyengo yakale “ŵakasuskanga vyakukumbukira mazuŵa ghakubabikira. Ŵanthu ŵakusopa ŵangoza ndiwo ŵakachitanga ivi.”—Encyclopædia Britannica.

Kasi Yesu wakababika pa deti wuli?

Baibolo likuyowoya yayi zuŵa leneko ilo Yesu wakababikira. Mabuku ghanyake ghakuti “zuŵa ilo Yesu wakababikira likumanyikwa yayi, ndipo nanga ni mu Baibolo la Testamente Lasono mulije deti lake.” (McClintock and Strong’s Cyclopedia) Yesu wakhumbenge kuti ŵalondezgi ŵake ŵakumbukirenge zuŵa ilo wakababikira, mphanyi wakaŵamanyiska deti ilo wakababikira.

Chachiŵiri, mu Baibolo mulije apo pakuyowoya kuti Yesu panji ŵasambiri ŵake ŵakachitanga Khisimasi. Kuyana na ivyo buku linyake likuyowoya, Khisimasi yikuzunulika kakwamba “mu buku la Chronograph of Philocalus, ilo likalembeka cha mu 336 C.E.” (New Catholic Encyclopedia) Apa pakaŵa kuti pajumpha vyaka vinandi kufuma apo Baibolo likamalira kulembeka kweniso kufuma apo Yesu wakaŵira pa charu chapasi. Lekani McClintock na Strong ŵakalemba kuti “Chiuta wandambiskepo Khisimasi nesi kuyowoya mu Testamente Lasono kuti tikondwelerenge Khisimasi. *

Kasi Yesu wakaphalira ŵasambiri ŵake kuti ŵakumbukirenge vichi?

Yesu wakayowoya mwakupulikikwa makora ivyo ŵalondezgi ŵake ŵakwenera kuchita, nakuti fundo izi zili mu Baibolo. Kweni wandayowoyepo kuti Ŵakhristu ŵakondwelerenge Khisimasi. Nga umo vikuŵira kuti msambizgi wakukhumba yayi kuti ŵana ŵa sukulu ŵachitenge ivyo ŵandaphalirike, Yesu nayo wakukhumba yayi kuti ŵalondezgi ŵake ‘ŵajumphenge vinthu ivyo vili kulembeka’ mu Baibolo.—1 Ŵakorinte 4:6.

Kweni pali chinthu chimoza chakuzirwa icho Ŵakhristu ŵakwambilira ŵakakumbukiranga. Iwo ŵakakumbukiranga nyifwa ya Yesu. Yesu wakaphalira ŵasambiri ŵake nyengo kweniso umo ŵakwenera kuchitira pakukumbukira nyifwa yake. Ivyo ŵakeneranga kuchita na deti lake leneko vili kulembeka mu Baibolo.—Luka 22:19; 1 Ŵakorinte 11:25.

Nga umo tawonera, Khisimasi ntchikondwelero icho ŵanthu ŵakuti ŵakukumbukira zuŵa la kubabika kwa Yesu. Kweni Ŵakhristu ŵakale ŵakakondweleranga yayi Khisimasi chifukwa ŵanthu ŵakusopa ŵangoza ndiwo ŵakambiska. Kweniso Baibolo lindayowoyepo kuti Yesu panji munthu munyake wakakondweleranga Khisimasi. Mwakuyana na fundo izi, Ŵakhristu mamiliyoni ghanandi pa charu chose ŵakukondwelera yayi Khisimasi.

^ ndime 6 Kuti mumanye vinandi pa nkhani ya umo Khisimasi yikambira, wonani nkhani yakuti “Mafumbo Ghakufuma Ku Ŵaŵazgi . . . Kasi Unenesko Ngwakuti Wuli pa Nkhani ya Khisimasi?” mu Gongwe la Mulinda la Disembala 1, 2014, likusangikaso pa www.jw.org.