Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda  |  Na. 5 2017

 NKHANI YA PACHIKOPI | KASI ŴANGELO ŴALIKO NADI?

Kasi Ŵangelo Ŵangatovwira?

Kasi Ŵangelo Ŵangatovwira?

Zuŵa linyake Kenneth na muwoli wake Filomena awo ŵakukhala ku Curaçao, ŵakaluta kukawona mbumba yinyake iyo ŵakasambiranga nayo Baibolo.

Kenneth wakati: “Tati tafika, tikasanga kuti nyumba njakujara kweniso galimoto yawo pakaŵavya. Kweni pambere tindawelere nkhaghanaghana za kwimbira mwanakazi wa panyumba iyi.”

Mwanakazi wakazgora kuti mfumu wake wali ku ntchito. Kweni wakati wamanya kuti Kenneth na Filomena ŵali pawaro, wakafuma na kuŵaphalira kuti ŵanjire.

Kenneth na muwoli wake ŵakamanya kuti mwanakazi uyu waliranga. Apo Kenneth wakalombanga kuti ŵambe kusambira Baibolo, mwanakazi uyu wakambaso kulira. Kenneth na Filomena ŵakamufumba icho chachitika.

Mwanakazi uyu wakati wakhumbanga kujikoma. Iyo wakalembanga kakalata kuti mfumu wake wazakamanye chifukwa icho wajikomera. Wakati foni ya Kenneth ndiyo yikamutimbanizga. Mwanakazi uyu wakati wakusuzgika maghanoghano. Ntheura Kenneth na muwoli wake ŵakamupembuzga na fundo za mu Baibolo. Fundo izo ŵakamuphalira zikaponoska umoyo wake.

Kenneth wakati: “Tikawonga chomene Yehova pa kutizomerezga kuti timovwire mwanakazi wakusuzgika maghanoghano uyu. Yehova wakatovwira kwizira mwa mungelo panji mzimu utuŵa.” *

Kasi mbunenesko kuti Chiuta wakawovwira nadi Kenneth na Filomena kwizira mwa mungelo panji mzimu utuŵa? Panji kasi vikachitika waka mwamwaŵi kuti Kenneth wimbire foni mwanakazi uyu?

Tikumanya yayi. Kweni icho tikumanya ntchakuti Yehova wakugwiliskira ntchito ŵangelo kuti wovwire ŵanthu. Mwachiyelezgero, Baibolo likuti Chiuta wakatuma mungelo kwa Filipi kuti wawovwire nduna ya ku Etiyopiya kupulikiska Mazgu gha Chiuta.—Milimo 8:26-31.

Visopa vinandi vikusambizga kuti ŵangelo ŵaheni awo ni viŵanda, vikuchita khumbo la Chiuta panji kuvikilira ŵanthu. Ŵanthu ŵanandi ŵakugomezga kuti ŵangelo ŵalipo ndipo ŵakovwira ŵanthu munthowa zinandi. Apo ŵanyake ŵakugomezga yayi kuti ŵaliko.

Kasi ŵangelo ŵaliko nadi? Usange ŵaliko nadi, kasi ŵakafuma nkhu? Kasi Baibolo likuti wuli za ŵangelo? Kasi ŵangatovwira? Tiyeni tisange mazgoro gha mafumbo agha.

^ ndime 8 Baibolo likuti Yehova ni zina la Chiuta.—Salimo 83:18.