Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA NA. 1 2016

Kasi Mukumanya?

Kasi Mukumanya?

Kasi kale ŵakapanganga wuli mipukutu, ndipo yikagwiranga wuli ntchito?

Chithuzi cha buku la Esitere lakulembeka pa mipukutu ya chikumba na pepara, cha m’ma 1700 c.E

Buku la Luka likuti Yesu wakajura mupukutu wa Yesaya na kuŵazga, ndipo pamasinda wakawuzinga. Yohane nayo wakazunurapo vya mupukutu kuumaliro wa buku la Yohane. Wakayowoya kuti vyose ivyo Yesu wakachita vikaŵa vinandi chomene mwakuti charu chingakwana yayi kuŵikapo mipukutu iyo yingalembeka.Luka 4:16-20; Yohane 20:30; 21:25.

Kasi mipukutu ŵakayipanganga wuli? Ŵakatoranga vikumba (vipapa), panji malukwa na kuvibatika pamoza kupanga chipepara chitali. Kufuma apo, chipepara ichi ŵakachizinganga ku kakhuni, malemba ghakaŵanga mukati. Malemba ghakaŵanga mu makolamu ghafupighafupi. Para mupukutu ngutali, ŵakaŵikanga tumakuni kosekose. Ntheura, para munthu wakukhumba kuŵazga lemba, woko linyake likazunguluranga mupukutu apo linyake likazinganga m’paka wasange apo wakukhumba.

Buku linyake lakulongosora mazgu gha mu Baibolo likuti: “Mupukutu ukaŵanga utali (panyake mamita 10) mwakuti para wazingika, ivyo vyalembekamo vikaŵa vyakuti vingakwana buku lichoko.” Ŵanyake ŵakusachizga kuti mupukutu wa buku la Luka ukaŵa utali mamita 9 na hafu. Nyengo zinyake, ŵakadumuliranga makora muchanya na musi mwa mupukutu, ŵakakwenthangamo na libwe liwemi kweniso kudayamo na utoto.

Kasi “ŵalara ŵa ŵasembe” awo ŵakuzunulika mu Malemba Ghachigiriki ŵakaŵa anjani?

Kufuma apo mulimo wa usembe ukambira pakati pa Ŵaisrayeli, munthu yumoza pera ndiyo wakaŵanga wasembe mukuru. Pakwamba, munthu wakaŵanga pa udindo uwu umoyo wake wose. (Maŵazgo 35:25) Aroni ndiyo wakaŵa wakwamba kuŵa wasembe mukuru. Kufuma apo, mwana mulara ndiyo wakahaliranga awiske pa udindo uwu. (Ekisodo 29:9) Ŵana ŵanalume ŵa Aroni ŵanandi ŵakaŵa ŵasembe, kweni ŵachoko waka ndiwo ŵakaŵapo ŵasembe ŵakuru.

Ŵaisrayeli ŵakati ŵamba kulongozgeka na mitundu yinyake, ŵalongozgi ŵa mitundu iyi ndiwo ŵakasoranga na kuwuskapo ŵasembe ŵakuru Ŵachiyuda umo ŵakhumbira. Kweni vikuwoneka kuti ŵanthu awo ŵakasolekanga ŵakafumanga mu mbumba zapadera, chomenechomene izo zikafuma mu mphapu ya Aroni. Ntheura lizgu lakuti “ŵalara ŵa ŵasembe” likuyowoya vya ŵalaraŵalara awo ŵakaŵa mu gulu la ŵasembe. Mu gulu la ŵalara ŵa ŵasembe mukaŵa ŵalongozgi ŵa magulu 24 ghausembe; mukaŵaso ŵanthu ŵakumanyikwa kufuma mu nyumba za ŵasembe ŵakuru; na ŵasembe ŵakuru awo ŵakakhizgika pa udindo uwu, nga ni Anasi.1 Midauko 24:1-19; Mateyu 2:4; Mariko 8:31; Milimo 4:6.

Manyani Vinandi

Kasi Ni Njani Wakalemba Baibolo?

Awo ŵakalembako Baibolo ŵakuti ŵakatumika na Chiuta. Chifukwa wuli tikwenera kugomezga ivyo ŵali kulemba?