Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) JULY 2016

Mafumbo Ghakufumira ku Ŵaŵazgi

Mafumbo Ghakufumira ku Ŵaŵazgi

Kasi kubamphika pamoza tumakuni tuŵiri uto tukuzunulika mu Ezekiyeli 37 kukung’anamurachi?

Kwizira mwa ntchimi Ezekiyeli, Yehova wakachima kuti Ŵaisrayeli ŵazamuwelera ku Charu Chalayizgano ndipo ŵazamuŵaso rmtundu umoza wakukolerana. Kweniso uchimi uwu ukayowoyerathu kuti ŵanthu ŵa Chiuta ŵazamuŵa ŵakukolerana mu mazuŵa ghaumaliro.

Yehova wakaphalira ntchimi Ezekiyeli kulemba pa tumakuni tuŵiri. Kasi wakati walembe vichi? Yehova wakati pa kakhuni kakwamba walembe kuti: “Nkha Yuda na ŵana ŵa Israyeli awo ŵali nayo pamoza.” Ndipo pa kakhuni kachiŵiri walembe kuti: “Nkha Yosefe, nkhakhuni ka Efurayimu na nyumba yose ya Israyeli iyo yili nayo pamoza.” Yehova wakaphaliraso Ezekiyeli kuti wabamphike tumakuni tuŵiri utu pamoza “mwakuti tuŵe waka kakhuni kamoza mu woko” lake.—Ezek. 37:15-17.

 Kasi zina lakuti “Efurayimu” likwimira vichi? Yerobowamu uyo wakaŵa themba lakwamba la mafuko 10 ghakumpoto, wakafuma mu fuko la Efurayimu ilo likaŵa lankhongono chomene. (Doto. 33:13, 17; 1 Mathe. 11:26) Fuko ili likafuma mwa Efurayimu, mwana wa Yosefe. (Maŵa. 1:32, 33) Yosefe wakapokera vitumbiko vyapadera chomene kwa adada ŵake a Yakhobe. Lekani kakhuni ako kakayimiranga ufumu wa mafuko 10 ghakumpoto kakachemeka kuti “nkhakhuni ka Efurayimu.” Pa nyengo iyo Ezekiyeli wakalemberanga uchimi wa tumakuni tuŵiri utu, pakaŵa kuti pajumpha kale nyengo yitali kufuma apo Ŵaisrayeli ŵa mu ufumu wakumpoto ŵakatolekera ku wuzga na Ŵasiriya mu 740 B.C.E. (2 Mathe. 17:6) Pamanyuma, Ufumu wa Siriya ukathereskeka na Ufumu wa Babuloni ndipo Ŵaisrayeli awo ŵakaŵa ku wuzga ŵakamba kuwusika na Ŵababuloni. Pa nyengo iyo Ezekiyeli wakalemberanga uchimi uwu, Ŵaisrayeli ŵakaŵa waka palipose mu Ufumu wa Babuloni.

Mu 607 B.C.E., ufumu wakumwera wa mafuko ghaŵiri ukatolekera ku wuzga ku Babuloni. Ŵaisrayeli ŵa mu ufumu wakumpoto awo ŵakakoreka yayi wuzga na Ŵasiriya, ŵakwenera kuti nawo pa nyengo iyi ŵakakoleka na Ŵababuloni. Mafumu gha mu fuko la Yuda ndigho ghakalamuliranga mafuko ghaŵiri gha ufumu wakumwera. Kweniso pa nyengo iyi ŵasembe ŵakakhalanga ku Yuda chifukwa ŵakateŵeteranga pa tempile ku Yerusalemu. (2 Mid. 11:13, 14; 34:30) Ntheura chikaŵa chakwenelera kuti kakhuni ako kakalembeka kuti “nkha Yuda,” kayimire mafuko ghaŵiri gha ufumu wakumwera.

Kasi mphawuli apo tumakuni tuŵiri utu tukabamphikika pamoza? Mukaŵa mu 537 B.C.E., apo Ŵaisrayeli ŵakafumira ku wuzga na kuwelera kukazengaso tempile ku Yerusalemu. Ŵanthu ŵa mu ufumu wakumpoto na wakumwera ŵakawelera pamoza kufuma ku wuzga. Ntheura ŵana ŵa Israyeli ŵakaŵaso ŵakugaŵikana yayi. (Ezek. 37:21, 22) Ŵaisrayeli ŵakambaso kusopa Yehova mwakukolerana. Yesaya na Yeremiya nawo, ŵakayowoyerathu kuti mafuko 10 gha Israyeli na mafuko ghaŵiri gha Yuda ghazamuphemanaso.—Yes. 11:12, 13; Yer. 31:1, 6, 31.

Kasi ntchivichi icho uchimi uwu ukayowoyerathu pa nkhani yakusopa kwaunenesko? Uchimi uwu ukayowoyerathu kuti Yehova wazamovwira kuti ŵanthu wose awo ŵakumusopa ŵaŵe ŵakukolerana nga “kakhuni kamoza.” (Ezek. 37:18, 19) Kasi awo ŵakusopa Yehova mbakukolerana nadi mazuŵa ghano? Enya. Uchimi uwu ukamba kufiskika mu 1919, apo Yehova pachoko na pachoko wakamba kunozga vinthu mu gulu lake na kovwira ŵanthu ŵake kuti ŵamuteŵeterenge mwakukolerana. Nangauli pakwamba Satana wakayezga kuti wagaŵaniske ŵanthu ŵa Chiuta, kweni vikamutonda.

Mu 1919, ŵateŵeti ŵanandi ŵa Chiuta ŵakaŵa na chilindizga chakukalamulira na Yesu kuchanya nga ni mathemba na ŵasembe. (Chivu. 20:6) Ŵanthu aŵa ŵakaŵa nga ni ‘kakhuni ka Yuda.’ Kweni mukuluta kwanyengo, ŵanthu ŵanandi awo ŵazamukhala kwamuyirayira pa charu chapasi, ŵabamphikana panji kuti kukolerana na Ŵayuda ŵauzimu aŵa. (Zek. 8:23) Awo ŵazamukhala pa charu chapasi ŵali nga ni ‘kakhuni ka Yosefe.’

Awo ŵamuwusa na Yesu kuchanya pamoza na awo ŵazamukhala pa charu chapasi, ŵakuteŵetera Yehova mwakukolerana. Wose ŵakulongozgeka na Themba Yesu Khristu, uyo wakuchemekaso kuti “muteŵeti wane Davide.” (Ezek. 37:24, 25) Yesu wakalombera ŵalondezgi ŵake kuti ‘wose ŵaŵenge ŵamoza, umo Adada ŵake ŵaliri mu umoza na iyo.’ * (Yoh. 17:20, 21) Iyo wakayowoyerathu kuti ŵalondezgi ŵake ŵakuphakazgika awo ŵakupanga kamskambo kachoko pamoza na ‘ŵamberere zinyake,’ ŵazamuŵa “mskambo umoza.” Wose ŵazamuŵa pasi pa “muliska yumoza.” (Yoh. 10:16) Yesu wakalongosora makora kuti ŵateŵeti wose ŵa Yehova, awo ŵakuluta kuchanya na awo ŵazamukhala pa charu chapasi, mbakukolerana.

^ ndime 6 Apo Yesu wakayowoyanga za chimanyikwiro cha mazuŵa ghaumaliro, wakayowoya ntharika zinandi. Ntchakukondweska kuti pakwamba wakayowoya za “muzga wakugomezgeka na wavinjeru.” Muzga uyu nkhagulu kachoko ka ŵabali awo ŵakulongozga ŵanthu ŵa Chiuta pa charu chapasi mazuŵa ghano. (Mat. 24:45-47) Pamanyuma, wakayowoya ntharika izo zikulongosora chomene za awo ŵakuluta kuchanya. (Mat. 25:1-30) Paumaliro, Yesu wakayowoya za awo ŵazamukhala pa charu chapasi awo ŵakovwira ŵabali ŵake, ŵakuphakazgika. (Mat. 25:31-46) Mazuŵa ghano napo, uchimi wa Ezekiyeli ukuyowoya dankha za awo ŵali na chilindizga chakuluta kuchanya. Nangauli ufumu wa mafuko 10 ukwimira awo ŵazamukhala pa charu chapasi yayi, kweni ivyo vikulongosoreka mu uchimi uwu vikutikumbuska kuti ŵakuphakazgika na ŵamberere zinyake mbakukolerana chomene pakuteŵetera Yehova.