Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) SEPTEMBER 2016

“Mazgu gha Chiuta ngamoyo”

Mafumbo Ghakufumira ku Ŵaŵazgi

Mafumbo Ghakufumira ku Ŵaŵazgi

Kasi “mazgu gha Chiuta” agho lemba la Ŵahebere 4:12 likuti “ngamoyo na ghankhongono” ni vichi?

Chaputara 4 cha Buku la Ŵahebere chikulongora kuti Paulosi wakang’anamuranga uthenga, panji khumbo la Chiuta ilo likusangika mu Baibolo.

Lemba la Ŵahebere 4:12 likulembeka kanandi waka mu mabuku ghithu kudidimizga fundo yakuti mazgu gha Chiuta ghali na nkhongono yakusintha umoyo wa munthu. Nakuti fundo iyi njaunenesko. Ndipouli, ntchiwemi kusanda na kuwonaso ivyo lemba ili likuyowoya. Paulosi wakachiskanga Ŵakhristu Ŵachihebere kuti ŵachitenge vinthu ivyo vikukolerana na khumbo la Yehova ilo likusangika mu malemba ghatuŵa. Paulosi wakati chiyelezgero pa nkhani iyi, Mbaisrayeli awo ŵakaponoskeka ku Eguputo. Chiuta wakaŵalayizga kuŵapa Charu cha Layizgano ‘icho mukendanga mkaka na uchi’ kuti ŵakapumuzgike ku ŵalwani ŵawo na kukhala mwakufwasa.—Eks. 3:8; Doto. 12:9, 10.

Ntheura ili ndilo likaŵa khumbo la Chiuta kuti ŵanthu ŵake ŵakhalenge mwakufwasa. Kweni pamasinda, Ŵaisrayeli ŵakanonopeska mitima yawo ndipo ŵakalongora kuti ŵalije chipulikano. Ntheura ŵanandi ŵakatondeka kunjira mu Charu cha Layizgano na kupumuzgika. (Maŵa. 14:30; Josh. 14:6-10) Ndipouli, Paulosi wakayowoyaso kuti ‘layizgo lichalipo lakuti tinjire mu chipumulo cha [Chiuta].’ (Heb. 3:16-19; 4:1) Nakuti “layizgo” ili ntchigaŵa cha khumbo la Chiuta. Nga Mbakhristu Ŵachihebere, nase tikwenera kumanya na kukolerana na khumbo la Chiuta ili. Paulosi wakazunura fundo ya pa Genizesi 2:2 na Salimo 95:11 kuti wawovwire Ŵakhristu Ŵachihebere kupulikiska kuti fundo iyi nja mu Malemba.

Nadi, tikukondwa chomene kumanya kuti “layizgo lakuti tinjire mu chipumulo chake [Chiuta] lichalipo.” Kweniso tikugomezga kuti ivyo Baibolo likuyowoya kuti tizamunjira mu chipumulo cha Chiuta, ni vyaunenesko. Lekani tikuchita vyose ivyo tingakwaniska kuti tizakanjire mu chipumulo ichi. Kweni kuti tizakanjire mu chipumulo cha Chiuta, vikuthemba pa kusunga Dango la Mozesi yayi, nesi pa milimo iyo tikuchita pakuteŵetera Yehova. M’malo mwake, munthu wakwenera kuŵa na chipulikano na kulutira kukolerana na khumbo la Yehova. Kweniso nga umo tawonera pachanya apa, ŵanthu mamiliyoni ghanandi ŵakusambira Baibolo na kumanya ilo ni khumbo la Chiuta. Nakuti ŵanandi ŵakusintha umoyo wawo wakale na kubatizika, kulongora chipulikano mu ivyo ŵakusambira. Ivyo ŵanthu aŵa ŵakuchita, mbukaboni wambura kususkika wakuti “mazgu gha Chiuta ngamoyo na ghankhongono.” Kumanya khumbo la Chiuta kwatovwira kuti tisinthe umoyo withu nakuti tichali kulutilira kusintha.