Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  August 2016

Chinthu Chakuzirwa Kuluska Golide

Chinthu Chakuzirwa Kuluska Golide

Kasi muli kusangapo libwe la golide? Ŵanthu ŵanandi ŵandalisangepo. Ndipouli, ŵanthu mamiliyoni ghanandi ŵali kusanga chinthu chakuzirwa chomene kuluska libwe la golide. Kasi chinthu ichi ni vichi? Ni vinjeru ivyo “vingagulika yayi na golide liwemi.”—Yobu 28:12, 15.

ŴANTHU wose awo ŵakutemwa kusambira Baibolo ŵali nga ni ŵanthu awo ŵakupenja golide. Iwo ŵakwenera kuŵikapo mtima na kulutilira kupenjerezga mu Malemba kuti ŵasange vinjeru. Kasi ŵanthu awo ŵakupenja golide ŵakuchita wuli kuti ŵamusange, ndipo tikusambirako vichi?

SANGANI GOLIDE!

Yelezgerani kuti mukwenda mumphepete mwa mlonga ndipo mwawona kanthu kanyake kali gabugabugabu. Kakuwoneka kachoko chomene nga ni mutu wa matchisa, kweniso kakusangika bweka yayi pakuyaniska na dayamondi wakudura chomene. Mukukhotama na kutora ndipo mukuwona kuti nkhalibwe ka golide. Kasi mungajipulika wuli? Mungakondwa chomene, nakuti mungamba kupenjerezga kuti musange tunyake.

Mwakuyana waka, mungakumbuka zuŵa ilo Ŵakaboni ŵa Yehova ŵakiza pa nyumba yinu kuti ŵadumbiskane namwe uthenga wa mu Baibolo. Panji mukukumbukira fundo yinyake ya mu Baibolo iyo yikamukondweskani chomene mukati mwayipulika kakwamba. Panji mukakondwa chomene kupulika kuti zina la Chiuta ni Yehova. (Sal. 83:18) Panji mukakondwa kusambira kuti namwe mungaŵa paubwezi na Yehova. (Yak. 2:23) Apa mukwenera kuti mukamanya kuti mwasanga chinthu chakuzirwa chomene kuluska golide. Kweniso mukwenera kuti mukakhumbanga kumanya vinandi kufuma mu Baibolo.

SANGANI MUNYAKE!

Nyengo zinyake tumalibwe twa golide tukuwunjikana mumphepete mwa madambo na milonga. Ŵanthu awo ŵakuŵikapo mtima kupenja golide, nyengo zinyake mu myezi yichoko waka ŵakusanga golide munandi mu malo agha uyo ŵakumuguliska madola ghanandi.

Apo mukambanga kusambira Baibolo na yumoza wa Ŵakaboni ŵa Yehova, mukawona kuti pali vinandi vyakuti wamusambizgani. Mukwenera kuti mukajipulika nga ni munthu uyo wasanga golide munandi pa malo ghamoza. Apo mukaghanaghaniranga ivyo mwasambira mu Baibolo, mukasazgirangako chimanyisko chinu. Mukasambira ivyo mungachita kuti musendelere kwa Yehova na kuzakasanga umoyo wamuyirayira.—Yak. 4:8; Yuda 20, 21.

Namwe ŵikanipo mtima kuti musange vinjeru mu Baibolo nga umo wakuchitira uyo wakupenja golide

Ŵanthu awo ŵakupenja golide, ŵakulimbikira chomene m’paka ŵamusange. Mwakuyana waka, namwe mukwenera kulimbikira chomene kupenjerezga usambazi wauzimu. Pamanyuma pakusambira  visambizgo vyakwambilira mu Baibolo, mukachiskika kuchitapo kanthu kuti mujipeleke kwa Yehova na kubatizika.—Mat. 28:19, 20.

LUTILIRANI KUPENJEREZGA

Nyengo zinyake golide wakusangika mukati mu malibwe ghanyake. Usange ndimo viliri, munthu uyo wakupenja golide wakwenera kuphwanya chilibwe kuti wafumiskeko golide. Nyengo zinyake pakwamba, mungamanya makora yayi unandi wa golide mu chilibwe icho. Chifukwa wuli? Chifukwa kanandi golide wakuŵa muchoko chomene pa malibwe ghanandi agho munthu wangajima. Ndipouli, munthu uyo wakupenja golide, wakuŵikapo mtima kuti m’paka wamusange.

Mwakuyana waka, munthu wakwenera kulimbikira chomene kuti walutilire kukura mwauzimu kuluska kumanya waka “chisambizgo chakwambilira cha Khristu.” (Heb. 6:1, 2) Nyengo zose wakwenera kulutira kusambira fundo ziphya na kuwona umo wangazigwiliskira ntchito pa umoyo wake wa zuŵa na zuŵa. Kasi mungachita wuli kuti mulutilire kusanga chandulo na ivyo mukusambira mu Baibolo pamwekha nanga ni para mukamba ni kale kusambira Baibolo?

Chakwamba, ŵani ŵakukhumbisiska kuti musambire vinandi. Ŵikanipo mtima kuti mupulikiske makora fundo zose izo mukusambira. Lutilirani kuŵikapo mtima kuti musange ulongozgi na vinjeru vya Chiuta. (Rom. 11:33) Nyengo zose mugwiliskirenge ntchito ivyo tikufufuzira nkhani kuti musazgireko chimanyisko chinu. Wonani umo fundo izo mwasanga mu Baibolo zikumukhwaskirani na kusanga mazgoro gha mafumbo agho mukujifumba. Mungafumbaso ŵabali na ŵadumbu ŵanyake kuti ŵamuphalirani malemba na nkhani zinyake izo ŵawona kuti ni zakovwira kweniso zakukhozga. Namweso muphalirengeko ŵanyinu fundo zakukhozga izo mukusanga para mukusambira mazgu gha Chiuta.

Ndipouli, manyani kuti chilato chinu ntchakuti mumanye waka vinandi yayi. Mpositole Paulosi wakachenjezga kuti: “Munthu uyo wamanya vinthu wakujitukumura.” (1 Kor. 8:1) Ntheura lutilirani kujiyuyura ndipo ŵani na chipulikano chakukhora. Nyengo zose musambirenge Baibolo pamwekha ndipo para muli na mbumba, muŵenge na Nyengo Yakusopera ya Mbumba. Usange mukuchita ivi, nyengo zose muchitenge ivyo Yehova wakukhumba na kovwiraso ŵanyake. Nakuti chakuzirwa chomene ntchakuti muŵenge ŵakukondwa kuti mwasanga chinthu chakuzirwa chomene kuluska golide.—Zinth. 3:13, 14.