Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) AUGUST 2016

Chifukwa Wuli Mukwenera Kusambizga Ŵanji?

Chifukwa Wuli Mukwenera Kusambizga Ŵanji?

“Nimupaninge fundo ziwemi.”—ZINTH. 4:2.

SUMU: 93, 96

1, 2. Chifukwa wuli tikwenera kovwira ŵanji?

APO Yesu wakaŵa pa charu chapasi, mulimo wake ukuru ukaŵa wakusambizga ŵanthu makani ghawemi gha Ufumu. Ndipouli, iyo wakapaturangaso nyengo yakusambizgira ŵasambiri ŵake kuti ŵaŵe ŵaliska kweniso ŵasambizgi. (Mat. 10:5-7) Filipu wakatangwanikanga na ntchito yakupharazga, kweni nayo wakawovwira ŵana ŵake ŵasungwana ŵanayi kuti ŵapharazgenge mwaluso. (Mil. 21:8, 9) Chifukwa wuli ntchiwemi kusambizga ŵanji mazuŵa ghano?

2 Mazuŵa ghano, ŵanthu ŵanandi ŵakuzomera kusambira Baibolo. Ntheura tikwenera kuŵawovwira kuti ŵatemwenge kusambira Baibolo paŵekha. Ŵakweneraso kusambizgika kuti ŵapharazgenge makani ghawemi na kusambizga mwaluso. Ŵabali ŵakwenera kuchiskika kuti ŵalimbikirenge chomene vinthu vyauzimu kuti ŵaŵe ŵakwenelera kuteŵetera nga mbalara panji ŵateŵeti ŵakovwira. Ŵabali ŵakukhwima mwauzimu ŵakwenera kuyowoya “fundo  ziwemi” kuti ŵawovwire ŵaphya kukura mwauzimu.—Zinth. 4:2.

KUŴAWOVWIRA KUSANGA NKHONGONO NA VINJERU

3, 4. (a) Kasi Paulosi wakati pali kukolerana wuli pakati pa kusambira Baibolo na mulimo wakupharazga? (b) Kasi tikwenera kuchita vichi pambere tindambe kovwira ŵanji kusambira Baibolo?

3 Chifukwa wuli ntchakuzirwa kusambira Baibolo nyengo zose? Zgoro likusangika mu mazgu agho mpositole Paulosi wakalembera Ŵakhristu ŵa ku Kolose. Paulosi wakalemba kuti: “Tindaleke kumulomberani na kupempha kuti mumanye makora khumbo lake [la Chiuta] ndiposo muŵe na vinjeru na kupulikiska vinthu vyamzimu. Kuti mwendenge mwakwenelera Yehova na kumukondweska pa chilichose, apo mukulutilira kupambika vipambi mu mulimo wose uwemi na kulutilira kumumanya makora Chiuta.” (Kol. 1:9, 10) Paulosi wakachiska Ŵakhristu ŵa ku Kolose kuti ŵalutilire kumumanya makora Chiuta na chilato chakuti ‘ŵendenge mwakwenelera Yehova na kumukondweska pa chilichose.’ Kweniso kumanya makora Chiuta kukaŵawovwira kuti “ŵapambike vipambi mu mulimo wose uwemi,” chomenechomene pakupharazga makani ghawemi. Muteŵeti waliyose wa Yehova wakwenera kusambira Baibolo zuŵa lililose kuti wapulikiske fundo za Yehova na kumuteŵetera mwakukwana. Ntheura tikwenera kovwira ŵasambiri ŵithu kumanya kuti ntchakuzirwa chomene kusambira Baibolo zuŵa lililose.

4 Pambere tindambe kuchiska ŵanji kuti ŵasambirenge Baibolo, tikwenera kwamba ndise kumanya uwemi wakusambira Baibolo. Nakuti tikwenera kulongora kuti tikutemwa chomene kusambira Baibolo. Ipo tikwenera kujifumba kuti: ‘Para nasangana na munthu uyo wakuyowoya fundo izo zikukolerana yayi na Baibolo ndipo wakufumba mafumbo ghanonono, kasi nkhugwiliskira ntchito Baibolo pakuzgora? Para nkhuŵazga za ŵateŵeti ŵakugomezgeka ŵa Chiuta nga ni Yesu, Paulosi, na ŵanji awo ŵakazizipizga nthambuzgo zinandi, kasi nkhughanaghanira umo nkhani izi zikukhwaskira uteŵeti wane?’ Tose tikwenera kusambira na kumanya makora Chiuta kweniso tikwenera kulondezga fundo za mu Mazgu ghake. Para tikulimbikira kusambira Baibolo patekha na kuphalirako ŵanji vitumbiko ivyo tikusanga, nawo ŵatemwenge kusambira Baibolo.

5. Kasi mungawovwira wuli msambiri winu kuti nyengo zose wasambirenge Baibolo payekha?

5 Kasi mungawovwira wuli msambiri winu kuti nyengo zose watemwenge kusambira Baibolo? Chakwamba musambizgani umo wanganozgekelera sambiro ilo mukuchita nayo. Mungamuchiskaso kuti waŵazgenge vyakusazgirapo ivyo vili ku umaliro wa buku la Kasi Baibolo Likusambizgachi Chomenechomene? na kuŵazga malemba ghose. Movwirani kuti wanozgekerenge maungano na chilato chakuti wakazgorengepo. Muchiskani kuti  waŵazgenge Gongwe la Mulinda na Wukani! yiliyose. Kweniso mulongorani umo wangasangira mazgoro gha mafumbo ghanyake gha mu Baibolo pakugwiliskira ntchito Watchtower Library panji Layibulare ya pa Intaneti ya Watchtower. Para mungachita nthena, movwirenge msambiri winu kuti nayo watemwenge kusambira Mazgu gha Chiuta payekha.

6. (a) Kasi mungawovwira wuli msambiri winu kuti watemwenge kusambira Baibolo? (b) Kasi msambiri wajipulikenge wuli para wakulutilira kutemwa kusambira Baibolo?

6 Nangauli tikwenera kumuchiska kuti wasambirenge Baibolo payekha, kweni ntchiwemi yayi kuchita kumuchichizga. M’malo mwake, tikwenera kugwiliskira ntchito vinthu ivyo gulu la Yehova likutipa kuti tovwire msambiri withu kutemwa chomene Baibolo. Pamanyuma, msambiri wazamujipulika nga wamasalimo uyo wakimba kuti: “Kwa ine, ntchiwemi kusendelera kwa Chiuta. Naŵika Fumu Yikuru Yehova kuŵa malo ghane ghakubisamamo.” (Sal. 73:28) Ntheura mzimu utuŵa wa Yehova wovwirenge chomene msambiri winu.

ŴASAMBIZGANI KUPHARAZGA NA KUSAMBIZGA MWALUSO

7. Kasi Yesu wakasambizga wuli ŵapositole ŵake kuti ŵapharazgenge mwaluso, ndipo tikusambirapo vichi? (Wonani chithuzi chakwamba.)

7 Mu chaputara 10 cha buku la Mateyu, muli ulongozgi uwo Yesu wakapeleka ku ŵapositole ŵake 12. Yesu wakaŵatuma waka kukapharazga yayi, kweni wakaŵaphaliraso ivyo ŵakwenera kuchita kuti ŵakapharazge mwaluso. [1] Ŵapositole ŵakategherezganga para Yesu wakuŵasambizga. Pamanyuma, ŵakanyamuka na kuluta kukapharazga. Pakuti ŵakawonanga umo Yesu wakapharazgiranga, mwaluŵiro nawo ŵakamba kusambizga mwaluso fundo za mu Malemba. (Mat. 11:1) Nase tingawovwira ŵasambiri ŵithu kuti wapharazgenge makani ghawemi mwaluso. Kasi tingaŵawovwira wuli? Tiyeni tidumbiskane nthowa ziŵiri.

8, 9. (a) Kasi Yesu wakadumbiskananga wuli na ŵanthu? (b) Kasi tingawovwira wuli ŵaphya kuti nawo ŵayowoyenge nga ni Yesu?

8 Kudumbiskana na ŵanthu. Kanandi Yesu wakaphaliranga ŵanthu vya Ufumu wa Chiuta ndipo nyengo zinyake wakadumbiskananga na munthu payekha. Mwachiyelezgero, Yesu wakapharazgira mwanakazi pa chisimi cha Yakhobe icho chikaŵa ku Sukari. (Yoh. 4:5-30) Yesu wakapharazgiraso Mateyu wakusonkheska msonkho uyo wakachemekangaso Levi. Nangauli mabuku gha Makani Ghawemi ghakulongosora vinandi yayi ivyo ŵakadumbiskana, kweni Mateyu wakazomera kuŵa mulondezgi wa Yesu. Mateyu na ŵanyake ŵakapulika apo Yesu wakayowoyanga nawo pa chiphikiro icho chikachitikira mu nyumba yake.—Mat. 9:9; Luka 5:27-39.

9 Nyengo yinyake Yesu wakayowoyaso na Nataniyeli uyo wakatinkhanga ŵanthu ŵa ku Nazarete. Kweni pamanyuma Nataniyeli wakasintha kaghanaghaniro kake chifukwa Yesu wakayowoya nayo mwaubwezi. Nataniyeli wakanweka kusambira vinandi kwa Yesu wa ku Nazarete. (Yoh. 1:46-51) Ntheura nase tikwenera kusambizga ŵaphya kuti ŵayowoyenge na ŵanthu mwakufwatuka, mwalusungu kweniso mwaubwezi. [2] Para tachita nthena, ŵasambiri ŵithu ŵazamukondwa chomene kuwona kuti ŵanthu ŵanandi ŵamitima yiwemi ŵakutegherezga makani ghawemi.

10-12. (a) Kasi Yesu wakawovwira wuli ŵanthu kuti ŵanweke na makani ghawemi? (b) Kasi tingawovwira wuli ŵapharazgi ŵaphya kuti ŵasambizgenge mwaluso?

10 Ŵawovwirani kuti ŵaŵe ŵakunweka. Apo Yesu wakaŵa pa charu chapasi, wakaŵa na nyengo yichoko yakuchitira uteŵeti wake. Ndipouli, iyo wakapatulanga nyengo kuti wawovwire ŵanthu kuti ŵanweke na makani ghawemi. Mwachiyelezgero, nyengo yinyake Yesu wakakwera mu boti kuti wapharazge makora ku wumba wa ŵanthu. Pa nyengo iyi, Yesu wakawovwira Petrosi kuti wakore somba zinandi mwamunthondwe. Pamanyuma, wakamuphalira kuti: “Kufuma sono ukolenge ŵanthu.” Kasi ntchivichi icho chikachitika?  Petrosi na ŵanyake “ŵakiza na maboti ku mtunda, ndipo ŵakasida vyose na kumulondezga [Yesu].”—Luka 5:1-11.

11 Nikodemo, yumoza wa mphara ya Sanihedirini, wakanweka na ivyo Yesu wakasambizganga. Iyo wakakhumbanga kumanya vinandi, kweni wakatondeka kumufumba Yesu chifukwa chakuti wakawopanga ŵanthu. Ntheura Nikodemo wakiza kwa Yesu usiku. Pakuti Yesu wakaŵa wakufwatuka ndipo wakapatulanga nyengo yakuchezgera na ŵanthu, wakamupokelera ndipo wakachezga nayo. (Yoh. 3:1, 2) Kasi nkhani izi zikutisambizga vichi? Zikutisambizga kuti Mwana wa Chiuta wakapatulanga nyengo kuti wasambizge na kukhozga chipulikano cha ŵanthu ŵakupambanapambana. Nase tikwenera kulimbikira kuwelerako na kusambira Baibolo na wose awo ŵakunweka na makani ghawemi.

12 Para tikupharazgira lumoza na ŵapharazgi ŵaphya, nawo ŵaŵenge ŵasambizgi ŵaluso. Tingaŵawovwiraso kuti ŵapharazgirenge ŵanthu wose nanga ni awo ŵakulongora kuti ŵakunweka viŵi yayi. Tingaŵapempha kuti tilutire lumoza ku maulendo ghakuwelerako kweniso ku masambiro gha Baibolo. Apo tikulutilira kuŵasambizga na kuŵakhozga, ŵapharazgi ŵaphya ŵazamumanya umo ŵangawovwilira ŵanthu kuti ŵanweke na makani ghawemi na kwamba kusambira nawo Baibolo paŵekha. Kweniso ŵazamusambira kuti ŵakwenera kuŵa ŵakuzika ndiposo ŵakuzizipizga mu uteŵeti.—Gal. 5:22; wonani bokosi lakuti “ Ntchiwemi Kuzizipizga.”

SAMBIZGANI ŴAPHYA KUTEŴETERA ŴANJI

13, 14. (a) Kasi mukusambirako vichi ku ŵanthu awo ŵakuzunulika mu Baibolo awo ŵakawovwiranga ŵanji? (b) Kasi imwe mungawovwira wuli ŵaphya na ŵawukirano kuti ŵatemwenge ŵabali na ŵadumbu?

13 Nkhani za mu Baibolo zikulongora kuti tili na mwaŵi ukuru wa ‘kutemwa ŵabali’ na kuŵateŵetera. (Ŵazgani 1 Petrosi 1:22; Luka 22:24-27.) Mwana wa Chiuta wakajikhutura na kupeleka umoyo wake kulongora kuti wakateŵeteranga ŵanji. (Mat. 20:28) Dorika “wakachitanga milimo yiwemi na kupeleka vyawanangwa ku ŵanthu.” (Mil. 9:36, 39) Mariya uyo wakakhalanga ku Roma ‘wakachitiranga ŵanji milimo yinandi’ mu mpingo. (Rom. 16:6) Kasi tingawovwira wuli ŵapharazgi ŵaphya kuti nawo ŵateŵeterenge ŵabali na ŵadumbu mu mpingo?

Sambizgani ŵaphya kutemwa ŵabali na ŵadumbu (Wonani ndime 13, 14)

14 Para Ŵakhristu ŵakukhwima mwauzimu ŵakuluta kukawona ŵalwari panji ŵachekuru, ntchiwemi kuti ŵalutenge na ŵapharazgi ŵaphya. Usange mphakwenelera, ŵapapi ŵangalutira lumoza na ŵana ŵawo. Ŵalara ŵangavwirana na ŵabali ŵanji kuwoneseska kuti ŵabali na ŵadumbu ŵachekuru ŵali na chakurya na nyumba ziwemi. Ivi vikovwira ŵawukirano na ŵaphya kuti nawo ŵalongorenge lusungu ŵanyawo. Mulara munyake para wakupharazga, wakatemwanga kuwona ŵabali na ŵadumbu awo ŵakakhalanga mu chigaŵa icho wakapharazgangako. Ivi vikawovwira muwukirano uyo kanandi wakapharazgiranga nayo lumoza kumanya kuti ntchiwemi kutemwa ŵabali na ŵadumbu wose mu mpingo.—Rom. 12:10.

15. Chifukwa wuli ŵalara ŵakwenera kovwira ŵabali kuti ŵasambizgenge mwaluso?

15 Pakuti Yehova wakugwiliskira ntchito ŵabali pa mulimo wakusambizga mu mpingo, ipo ntchiwemi kuti ŵabali ŵaŵikengepo mtima pakukuzga luso lawo lakusambizga. Usange ndimwe mulara, kasi mungategherezga apo muteŵeti wakovwira wakuyezgelera kudumba nkhani yake? Para mungamovwira, wangaŵa msambizgi waluso wa Mazgu gha Chiuta.—Neh. 8:8. [3]

16, 17. (a) Kasi Paulosi wakawovwira wuli Timote? (b) Kasi ŵalara ŵangasambizga wuli makora ŵanji kuti ŵazakaŵe ŵaliska munthazi?

16 Mazuŵa ghano, pakukhumbikwa ŵaliska ŵanandi kuti ŵawovwirenge ŵabali na ŵadumbu mu mpingo. Kweniso ŵabali ŵanji ŵakwenera kulutilira kusambizgika kuti ŵazakaŵe ŵaliska munthazi. Paulosi wakalongosora vinthu vinyake ivyo vingawovwira pakusambizga ŵabali kuti ŵaŵe ŵaliska mu mpingo. Iyo wakaphalira Timote  kuti: “Iwe mwana wane, lutilira kusanga nkhongono kwizira mu lusungu lukuru ulo luli mwa Khristu Yesu. Ndipo vinthu ivyo nkhakuphalira ivyo ŵakaboni ŵanandi ŵakakhozgera uvipeleke ku ŵanthu ŵakugomezgeka, awo ŵaŵengeso ŵakwenelera kusambizga ŵanyawo.” (2 Tim. 2:1, 2) Timote wakasambira vinandi kwa Paulosi pa nyengo iyo ŵakateŵeteranga lumoza. Pamanyuma, Timote wakalondezga ivyo wakasambira kwa Paulosi pakuchita uteŵeti wake.—2 Tim. 3:10-12.

17 Paulosi wakatora Timote na kwamba kwenda nayo kuti wamusambizge makora. (Mil. 16:1-5) Usange mphakwenelera, ŵalara nawo ŵakwenera kwendera lumoza na ŵateŵeti ŵakovwira awo ŵakuchita makora para ŵakuluta ku maulendo ghauliska. Ivi vikovwira kuti ŵateŵeti ŵakovwira ŵamanye mikhaliro iyo ŵalaŵiliri ŵakwenera kuŵa nayo, nga chipulikano, kuzizipizga, na chitemwa. Nakuti iyi ni nthowa yiwemi chomene yakusambizgira ŵaliska ŵamunthazi ŵa “mskambo wa Chiuta.”—1 Pet. 5:2.

UWEMI WAKUSAMBIZGA ŴANJI

18. Chifukwa wuli mulimo wakusambizga ŵanji ukwenera kuŵa pakwamba?

18 Ntchiwemi chomene kusambizga ŵanji chifukwa ŵanthu ŵanandi ŵakujipeleka kuti ŵateŵetere Yehova ndipo ŵakuthilimukira ku gulu lake. Nthowa iyo Yesu na Paulosi ŵakagwiliskiranga ntchito pakusambizga ŵanji yichali yakovwira mazuŵa ghano. Yehova wakukhumba kuti ŵateŵeti ŵake ŵasambizgike kuti ŵachite makora milimo yawo mu gulu lake. Yehova watipa mwaŵi wakusambizga ŵaphya kuti ŵaŵe na maluso agho ghangaŵawovwira kuchita milimo mu mpingo. Ntchito yakusambizga ŵanji njakuzirwa chomene ndipo yikwenera kuchitika mwaluŵiro chifukwa vinthu mu charu ichi vikulutilira kuhenipirahenipira. Kweniso ŵabali na ŵadumbu ŵanandi ŵachali kukhumbikwa chifukwa mulimo wakupharazga ukuluta panthazi chomene mazuŵa ghano.

19. Chifukwa wuli tikugomezga kuti tingakwaniska kusambizga ŵanji?

19 Ntchipusu yayi kusambizga ŵanji chifukwa pakukhumbikwira kupatura nyengo na kuŵikapo mtima. Kweni Yehova na Yesu ŵatovwirenge na kutipa vinjeru kuti tisambizge makora ŵanyithu. Para tikulimbikira kusambizga ŵanji, tizamukondwa chomene kuwona kuti awo tikuŵasambizga ‘ŵakufukafuka na kulimbikira’ kuteŵetera Yehova. (1 Tim. 4:10) Mphanyi nase talutilira kukura mwauzimu na kuteŵetera Yehova na mtima wose!

^ [1] (ndime 7) Yesu wakaphaliraso ŵapositole ŵake kuti: (1) Ŵapharazgenge uthenga wakwenelera. (2) Ŵakhorwenge na ivyo Chiuta wakupeleka. (3) Ŵaleke kupindana na ŵanthu. (4) Ŵagomezgenge Chiuta para ŵanthu ŵakuŵasuska. (5) Ŵaleke kopa.

^ [2] (ndime 9) Buku la Sangani Candulo na Sukulu ya Uteŵeti wa Ciuta, pa peji 62-64, lili na fundo izo zingatovwira kuti tidumbiskanenge makora na ŵanthu mu uteŵeti.

^ [3] (ndime 15) Buku la Sangani Candulo na Sukulu ya Uteŵeti wa Ciuta peji 52-61, likulongosora vinthu ivyo vingawovwira munthu kuti waŵe muyowoyi muwemi wa pa wumba.