Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) AUGUST 2016

Mubali Johannes Rauthe wali mu upharazgi cha m’ma 1920

 KUFUMA MU NTHAMBA YITHU

“Nkhuchita Mulimo Wavuna Kuti Yehova Wapike Malumbo”

“Nkhuchita Mulimo Wavuna Kuti Yehova Wapike Malumbo”

GONGWE LA MULINDA la Seputembala 1, 1915 likalongosora kuti: “Nkhondo zose izo zikachitika kumasinda, zikuyana yayi na Nkhondo Yakwamba ya pa Charu Chose.” Nkhondo iyi yikakhwaska vyaru vyakujumpha 30. Magazini iyi yikalongosoraso kuti nkhondo iyi yikapangiska kuti mulimo wakupharazga utimbanizgike ku Germany na France.

Nangauli Ŵasambiri ŵa Baibolo ŵakasangana na masuzgo chifukwa cha nkhondo iyi, kweni pa nyengo iyi ŵakaŵa kuti ŵakumanya vinandi yayi pa nkhani ya kuleka kunjira nkhondo. Ntheura ŵanyake ŵakanjiranga usilikari. Ndipouli, iwo ŵakaŵikapo mtima pa mulimo wakupharazga makani ghawemi. Mubali Wilhelm Hildebrandt uyo wakaŵa msilikari, wakakhumbanga kuchita vinandi pa mulimo wakupharazga. Ntheura wakachemeska mabuku gha The Bible Students Monthly gha Chifurenchi. Pa nyengo iyi wakachitanga ukopotala [upayiniya] yayi ku France, kweni wakatumizgika nga msilikari wa boma la Germany. Nangauli wakavwaranga malaya gha usilikari, kweni wakapharazganga makani ghawemi ku ŵanthu wose ŵa ku France awo ŵakajumphanga. Ntheura ŵanthu ŵakamuwonangaso nga ni mulwani yayi.

Makalata agho ghakalembeka mu Gongwe la Mulinda ghakulongora kuti Ŵasambiri ŵa Baibolo ŵanandi ŵa ku Germany ŵakakhumbanga kupharazga makani ghawemi gha Ufumu apo ŵakaŵa ku nkhondo. Mubali Lemke uyo wakaŵa msilikari wa pa maji, wakasambizga ŵanyake 5 awo wakagwiranga nawo ntchito. Iyo wakati: “Nanga ni para nili mu sitima, nkhuchita mulimo wavuma kuti Yehova wapike malumbo.”

Georg Kayser wakaluta ku nkhondo nga msilikari, kweni apo wakawerangako, wakaŵa kuti ni muteŵeti wa Chiuta. Kasi wakazgoka wuli? Iyo wakasanga buku ilo likalongosoranga nkhani za mu Baibolo. Wakalisambira na mtima wose ndipo wakamanya unenesko. Pamanyuma wakaleka ntchito ya usilikari na kwamba ntchito yinyake. Nkhondo yikati yamara, wakaŵikapo mtima kuchita upayiniya kwa vyaka vinandi.

Nangauli Ŵasambiri ŵa Baibolo ŵakamanyanga vinandi yayi pa nkhani ya nkhondo, kweni nkharo yawo yikalongolerangathu kuti ŵakupambana chomene na ŵanthu ŵanyake pa nkhani iyi. Ŵandyali na ŵalongozgi ŵa visopa ŵakazomerezganga nkhondo. Kweni ŵasambiri ŵa Baibolo ŵakalutilira kulondezga “Karonga wa Mtende.” (Yes. 9:6) Nangauli ŵanyake ŵakanjiranga nkhondo, kweni ŵakaluwanga yayi mazgu gha msambiri wa Baibolo munyake zina lake Konrad Mörtter. Iyo wakati: “Nili kusambira  mu Mazgu gha Chiuta kuti Mkhristu wangakomanga chara.”—Eks. 20:13. *

Mubali Hans Hölterhoff wakupharazga za magazini ya The Golden Age mwakugwiliskira ntchito kangolo.

Boma la Germany likatenge waliyose wakwenera kunjira nkhondo, kwali wakukhumba panji yayi. Ndipouli Ŵasambiri ŵa Baibolo ŵakujumpha 20 ŵakakana kunjira usilikari. Ntheura ŵanthu ŵakaŵawonanga ŵasambiri ŵanyake kuti mbalwari mutu panji kuti mbakufuntha. Mwachiyelezgero, Mubali Gustav Kujath ŵakamukora na kumuŵika ku malo ghakusungirako ŵanthu ŵakufuntha ndipo ŵakamumweska mankhwala. Mubali Hans Hölterhoff nayo wakakana kunjira usilikari, ntheura ŵakamukaka na kumuponya mu jele. Apo wakaŵa ku jele, wakakana kuchita ntchito zose zakukhwaskana na usilikari. Ŵalonda ŵa jele ŵakamukaka na chijekete icho ŵakukakira ŵanthu ŵakufuntha kuti ŵaleke kupweteka ŵanyawo. Ivi vikapangiska kuti malundi na mawoko gha Mubali Hans ghachite sitiroku. Kweni ŵalinda ŵa jele ŵakati ŵawona kuti Hans wakuthera yayi, ŵakamba kumusuzga kwazanimuwone. Kweni Hans wakalutilira kuŵa wakugomezgeka.

Ŵabali ŵanyake awo ŵakaŵaphalira kuti ŵanjire usilikari, ŵakakana ndipo ŵakapempha kuti ŵachitenge ntchito zinyake izo zikukolerana chara na usilikari. * Mubali Johannes Rauthe wakati wakana kunjira usilikari, ŵakamutuma kuti wakagwirenge ntchito yakukhwaskana na maulendo gha sitima ya pa mtunda. Mubali Konrad Mörtter wakatumika kuti wakagwirenge ntchito ku chipatala, ndipo Reinhold Weber wakaŵa nesi. August Krafzig nayo wakaŵa wakukondwa kuti ntchito yake yikakhwaskananga na nkhondo yayi. Ŵasambiri ŵa Baibolo aŵa ŵakaŵikapo mtima kuteŵetera Yehova chifukwa ŵakamutemwanga ndipo ŵakakhumbanga kuŵa ŵakugomezgeka kwa iyo.

Boma la Germany likaŵika maso chomene pa Ŵasambiri ŵa Baibolo chifukwa chakuti ŵakakananga kunjira usilikari. Mu vyaka vyakulondezgapo, Ŵasambiri ŵa Baibolo ŵanandi ŵakazengeka mulandu chifukwa cha mulimo wawo wakupharazga. Ofesi ya munthavi ya ku Germany yikapanga dipatimenti yakuwona malango gha charu na chilato chakuti yiwovwirenge ŵabali na ŵadumbu awo ŵakazengeka mulandu.

Ŵakaboni ŵa Yehova ŵakalutilira kupulikiska nkhani yakuleka kunjira usilikari. Ivi vikaŵawovwira kuti ŵalutilire kukana kuchitako nkhondo pa nyengo ya Nkhondo Yachiŵiri ya pa Charu Chose. Ntheura boma la Germany likawonanga Ŵasambiri ŵa Baibolo kuti mbalwani ndipo likaŵatambuzganga kwazanimuwone. Yinyake mwa nkhani za “Kufuma mu Nthamba Yithu” mu Gongwe la mulinda lakunthazi, yizamulongosora umo boma la Germany likasuzgiranga Ŵasambiri ŵa Baibolo.—Kufuma mu nthamba yithu ku Central Europe.

^ ndime 7 Wonani nkhani ya mutu wakuti “Ŵakasunkhunyika Yayi mu ‘Ora la Kuyezgeka’” mu Gongwe la Mulinda la Meyi 15, 2013, kuti mumanye ivyo Ŵasambiri ŵa Baibolo ŵakachita ku Britain pa nyengo ya Nkhondo Yakwamba ya pa Charu Chose.

^ ndime 9 Nkhani yakuleka kunjira usilikari yikalongosorekapo mu buku la Millennial Dawn, voliyumu nambara 6, ilo likafuma mu 1904, kweniso mu Gongwe la Mulinda la Chijeremani la Zion’s Watch Tower la Ogasiti 1906. Nkhani iyi yikazakalongosorekaso makora mu Zion’s Watch Tower ya Seputembala 1915, iyo yikati Ŵasambiri ŵa Baibolo ŵakwenera yayi kunjira usilikari. Ndipouli magazini ya Seputembala 1915, yikang’anamurika yayi mu Chijeremani.