Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) MARCH 2016

Mwaŵana, Kasi Mwanozgeka Kubatizika?

Mwaŵana, Kasi Mwanozgeka Kubatizika?

“Ni njani wa imwe uyo wakukhumba kuzenga chigongwe kwambura kukhala dankha pasi na kupendesera mtengo, kuti wawone usange wali na ndalama zakukwana kuti wachimalizge?”LUKA 14:28.

SUMU: 120, 64

Nkhani iyi na yakulondezgapo zalembekera ŵana awo ŵakukhumba kubatizika

1, 2. (a) Kasi chaka chilichose ŵanthu ŵa Chiuta ŵakukondwa na vichi? (b) Kasi ŵapapi na ŵalara mu mpingo ŵangawovwira wuli ŵana kuti ŵanozgekere ubatizo?

MULARA munyake wakaphalira Christopher wa vyaka 12 kuti: “Nkhukumanya kufuma pa wanichi wako, ndipo nakondwa kuti ukukhumba kubatizika. Kweni chifukwa wuli ukukhumba kubatizika?” Fumbo ilo mulara uyu wakafumba apa ndakuzirwa chomene. Chaka chilichose tikukondwa kuwona kuti ŵana ŵakubatizika. (Muph. 12:1) Kweni ŵapapi na ŵalara mu mpingo ŵakwenera kuwoneseska kuti ŵana awo ŵakukhumba kubatizika ŵajipeleka ŵekha ndipo ŵakumanya chifukwa icho ŵabatizikirenge.

 2 Mazgu gha Chiuta ghakuti para munthu wajipeleka na kubatizika wakwamba kutumbikika na Yehova, kweniso ni nyengo iyo Satana wakwamba kumususka chomene. (Zinth. 10:22; 1 Pet. 5:8) Ntheura, ŵapapi ŵakwenera kusambizga ŵana ŵawo kuti ŵamanye ivyo msambiri wa Khristu wakwenera kuchita. Ŵalara mu mpingo ŵakwenera kovwira ŵana awo ŵapapi ŵawo Mbakaboni yayi kuti nawo ŵamanye ivyo vikukhumbikwa kwa msambiri wa Yesu. (Ŵazgani Luka 14:27-30.) Munthu uyo wakukhumba kuzenga nyumba, wakwenera kunozgekera dankha. Ntheura uyo wakukhumba kuteŵetera Yehova mwakugomezgeka “m’paka kuumaliro,” nayo wakwenera kunozgekera. (Mat. 24:13) Kasi ŵana ŵangachita wuli kuti ŵasankhe ŵekha kuteŵetera Yehova umoyo wawo wose?

3. (a) Kasi mazgu gha Yesu na Petrosi ghakutisambizgachi pa nkhani ya ubatizo? (Mat. 28:19, 20; 1 Pet. 3:21) (b) Kasi tidumbiskanenge mafumbo wuli, ndipo chifukwa wuli?

3 Kasi ndimwe yumoza wa ŵana awo ŵakukhumba kubatizika? Usange ni nthena, mukwenera kuwongeka chomene. Ni mwaŵi ukuru kubatizika na kuŵa yumoza wa Ŵakaboni ŵa Yehova. Munthu uyo wakukhumba kuŵa Mkhristu wakwenera kubatizika, nakuti ubatizo ngwakukhumbikwa chomene kuti munthu wazakapone. (Mat. 28:19, 20; 1 Pet. 3:21) Ntchakuzirwa kunozgekera ubatizo chifukwa ivyo muzamulayizga Yehova, ndivyo muzamukhumbikwira kuchita umoyo winu wose. Ipo mungachita makora kujifumba kuti: (1) Kasi ndine wakukhwima mwauzimu? (2) Kasi nkhukhumba nekha kubatizika? (3) Kasi nkhumanya ivyo munthu uyo wajipeleka kwa Yehova wakuchita? Mafumbo agha ghangamovwirani kuwona usange ndimwe ŵakunozgeka kubatizika. Tiyeni tidumbiskane mafumbo agha.

KUKHWIMA MWAUZIMU

4, 5. (a) Chifukwa wuli ubatizo ngwa ŵalara pera yayi? (b) Kasi munthu wakukhwima mwauzimu wakuŵa wuli?

4 Baibolo likuyowoya yayi unandi wa vyaka  ivyo munthu wakwenera kuŵa navyo kuti wabatizike. Lemba la Zintharika 20:11 likuti: “Nanga ni mwana wakumanyikwa na milimo yake, usange nkharo yake njiwemi na yakwenelera.” Lemba ili likulongora kuti ŵana ŵangamanya ivyo Chiuta wakuti ni viwemi ndipo nawo ŵangajipeleka kwa iyo. Ntheura mwana uyo ngwakukhwima mwauzimu ndipo wajipeleka kwa Yehova wakwenera kubatizika.Zinth. 20:7.

5 Kasi munthu wakukhwima wakuŵa wuli? Kukhwima kukung’anamura waka unandi wa vyaka vya munthu yayi. Baibolo likuti ŵanthu ŵakukhwima ni awo “ŵali kuzgoŵezga nkhongono zawo zakamanyiro kupambaniska pakati pa chiwemi na chiheni.” (Heb. 5:14) Ŵanthu ŵakukhwima mwauzimu, ŵakumanya icho ntchiwemi mu maso gha Yehova nakuti ŵakuŵikapo mtima kuchita icho ntchakwenelera. Ntheura ŵakupuluskika yayi, panji kuchita kuchichizgika waka kuti ŵachite icho ntchiwemi. Nadi, tikukhazga kuti mwana uyo wabatizika walondezgenge malango gha Chiuta nanga ni para wali kwayekha.—Yaniskani na Ŵafilipi 2:12.

6, 7. (a) Kasi Daniyeli wakasangana na viyezgo wuli ku Babuloni? (b) Kasi Daniyeli wakalongora wuli kuti wakaŵa wakukhwima mwauzimu?

6 Kasi ŵana nawo ŵangalongora kuti mbakukhwima mwauzimu? Tiyeni tiwone nkhani ya Daniyeli. Apo wakatolekeranga ku wuzga ku Babuloni, wakwenera kuti wakaŵa na vyaka vyapakati pa 13 na 15. Ku Babuloni, Daniyeli wakakhalanga na ŵanthu awo ŵakatondekanga kupambaniska pakati pa chiwemi na chiheni. Kweniso ŵanthu ŵa ku Babuloni ŵakamupanga ntchindi zapadera. Nakuti Daniyeli wakaŵa yumoza mwa ŵana awo ŵakasankhika kuti ŵateŵetere themba la Babuloni. (Dan. 1:3-5, 13) Mwakuthupi, Daniyeli wakaŵa na mwaŵi ukuru ku Babuloni, uwo wakate wawusangenge yayi ku Israyeli.

7 Kasi Daniyeli wakachita wuli? Kasi wakayeyeka na vinthu vyakukopa vya ku Babuloni? Kasi wakazomerezga kuti vinthu ivi vimutimbanizge na kunanga ubwezi wake na Yehova? Yayi. Baibolo likuti apo Daniyeli wakaŵa ku Babuloni, “wakasimikizga mu mtima wake kuti wajikazuzgenge chara” na chinthu chilichose chakukolerana na kusopa kwautesi. (Dan. 1:8) Daniyeli wakalongora nadi kuti wakaŵa wakukhwima mwauzimu.

Mwana uyo ngwakukhwima mwauzimu wakuŵa mubwezi wa Chiuta, kwali waŵe ku Nyumba ya Ufumu panji ku sukulu (Wonani ndime 8)

8. Kasi mwasambira vichi kwa Daniyeli?

8 Kasi mwasambira vichi kwa Daniyeli? Mwana uyo ngwakukhwima mwauzimu wakuŵa wakukhazikika maghanoghano. Iyo wakupambana na lwivi uyo wakusintha mtundu kuyana na malo agho walipo. Nyengo yiliyose mwana uyo ngwakukhwima mwauzimu, wakuŵa mubwezi wa Chiuta, kwali waŵe ku Nyumba ya Ufumu panji ku sukulu. Wakuyeyeka na vilivyose yayi, ndipo wakusunkhunyika chara para wasangana na masuzgo.Ŵazgani Ŵaefeso 4:14, 15.

9, 10. (a) Chifukwa wuli uyo wakukhumba kubatizika wakwenera kujisanda? (b) Kasi ubatizo ukulongora vichi?

9 Ŵana na ŵalara wuwo ŵakubudiska nyengo zinyake. (Muph. 7:20) Ndipouli, uyo wakukhumba kubatizika wakwenera kujisanda usange ngwakunozgeka kulutilira kulondezga malango gha Yehova. Kasi mungajisanda wuli? Jifumbani kuti, ‘Kasi nkhulondezga malango gha Chiuta nyengo zose?’ Ghanaghanirani umo mukachitira na chiyezgo icho mwangukumana nacho mwasonosono. Kasi ivyo mukachita, vikulongora kuti mukumanya kupatura pakati pa chiwemi na chiheni?  Nga ni Daniyeli, kasi mungachita wuli usange ŵanthu ŵangamba kumupani ntchindi zapadera mu charu cha Satana ichi? Kasi mungalutilira kuchita “khumbo la Yehova” usange mwayezgeka kuchita vinthu ivyo vikususkana na malango ghake?Efe. 5:17.

10 Chifukwa wuli mafumbo agha ngakuzirwa? Mafumbo agha ghangamovwirani kuwona ubatizo mwakwenelera. Ubatizo ukulongora kuti muli kujipeleka kwa Yehova kuti mumuteŵeterenge kwamuyirayira. Mukulayizga Yehova kuti mumutemwenge na kumuteŵetera na umoyo winu wose. (Mrk. 12:30) Waliyose uyo wabatizika wakwenera kusimikizga kuti walutilirenge kuchita ivyo wali kulayizga Yehova.Ŵazgani Mupharazgi 5:4, 5.

SANKHANI MWEKHA KUBATIZIKA

11, 12. (a) Kasi munthu uyo wakukhumba kubatizika wakwenera kumanya vichi? (b) Kasi mungachita wuli kuti para mwabatizika mulutilire kuchita ivyo Yehova wakukhumba?

11 Baibolo likuti ŵanthu ŵa Yehova, ŵalara na ŵana, “ŵajipelekenge na mtima wose” kuti ŵamuteŵetere. (Sal. 110:3) Ntheura munthu uyo wakukhumba kubatizika wakwenera kusankha yekha. Kweni wakwenera kujisanda dankha. Chifukwa wuli? Chifukwa mikhaliro yikupambana. Ŵanyake ŵali kulereka na ŵapapi awo Mbakaboni ŵa Yehova, apo ŵanyake yayi.

12 Ŵanthu ŵanandi ŵakubatizika chaka chilichose. Pa ŵanthu aŵa, ŵanyake mbamsinkhu winu ndipo nyengo zinyake ŵanji ŵakuŵa ŵabali ŵinu. Usange ni nthena, kasi mukwenera kuŵa maso na vichi? Lekani kughanaghana kuti para mubali panji munyake wamsinkhu winu wabatizika ndikuti namwe mungabatizika. Kasi mungachita wuli kuti para mwabatizika mulutilire kuchita ivyo Yehova wakukhumba? Mukwenera kupatura nyengo yakughanaghanira kuzirwa kwa ubatizo. Mu nkhani iyi na yakulondezgapo musangenge vifukwa viwemi vyakubatizikira.

13. Kasi mungamanya wuli kuti mwasankha mwekha kubatizika?

13 Pali nthowa zinandi izo zingamovwirani kumanya usange mwasankha mwekha kubatizika. Mwachiyelezgero, ivyo mukulomba vingalongora usange mukukhumba kuteŵetera Yehova na mtima winu wose. Para mukulomba nyengo zose na kuzunura ivyo mukukhumba, vingavumbura usange muli paubwezi wakukhora na Yehova. (Sal. 25:4) Nthowa yikuru chomene iyo Yehova wakuzgolera malurombo yithu nkhwizira mu Mazgu ghake. Para tikulimbikira kuŵerenga Baibolo, tikulongora kuti tikukhumba nadi kuŵa paubwezi na Yehova na kumuteŵetera na mtima wose. (Josh. 1:8) Ntheura jifumbani kuti: ‘Kasi nkhutemwa kuzunura vichi mu malurombo yane? Kasi nkhusambira Baibolo nyengo zose? Kasi nkhusangikapo na kuzgorapo na mtima wose pa Nyengo Yakusopera ya Mbumba?’ Mafumbo agha ghangamovwirani kumanya usange mwasankha nadi mwekha kubatizika.

KUJIPELEKA

14. Longosorani mphambano pakati pa kujipeleka na ubatizo.

14 Ŵanji ŵakutondeka kupambaniska pakati pa kujipeleka na ubatizo. Mwachiyelezgero, ŵana ŵanyake ŵakuti ŵali kujipeleka kwa Yehova kweni ŵandanozgeke kubatizika. Kasi ŵakuneneska? Yayi. Kujipeleka kukung’anamura kuphalira Yehova kuti mumuteŵeterenge umoyo winu wose. Pa ubatizo, munthu wakulongora pakweru kuti wali kujipeleka.  Ntheura, ubatizo ukulongora kuti munthu wali kujipeleka kale kwa Yehova mu lurombo. Ipo pambere mundabatizike, mukwenera kumanya makora ng’anamuro la kujipeleka.

15. Kasi kujipeleka ni vichi?

15 Para mwapeleka umoyo winu kwa Yehova, mukuŵavya mazaza pa umoyo winu. Mukulayizga Yehova kuti mu umoyo winu khumbo lake ndilo liŵenge pakwamba. (Ŵazgani Mateyu 16:24.) Nyengo zose tikwenera kufiska ivyo tapangana na ŵanyithu. Ntheura ivyo talayizga Yehova tikwenera kuviwona mwakupepuka yayi. (Mat. 5:33) Kasi mungalongora wuli kuti mwajipeleka nadi kwa Yehova?Rom. 14:8.

16, 17. (a) Yowoyani chiyelezgero icho chikutovwira kupulikiska ng’anamuro la kujipeleka. (b) Kasi munthu uyo wajipeleka wakumuphalira vichi Yehova?

16 Tiyelezgere kuti mubwezi winu wamupani galimoto nga ntchawanangwa. Ndipo wakumuphalirani kuti, “Galimoto iyi njinu. Kweni makiyi nimusungiraninge ndipo galimoto nendeskenge ndine.” Kasi mungachiwona wuli chawanangwa ichi? Kasi mungamuwona wuli uyo wamupani chawanangwa ichi?

17 Sono ghanaghanirani vya munthu uyo wajipeleka kwa Yehova na kumulayizga kuti, “Nkhupeleka umoyo wane kwa imwe. Ndine winu.” Kasi Yehova wangamuwona wuli munthu wanthena usange wamba kuŵa na umoyo wa paŵiri, nga kuŵa pachibwezi na munthu uyo ni Kaboni wa Yehova yayi? Wuli usange munthu uyo wajipeleka kwa Yehova wangamba ntchito iyo yingamutondeska kuwungana panji kupharazga na mtima wose? Kasi kuchita nthena vingayana yayi na kulutilira kusunga makiyi gha galimoto iyo mwapeleka kwa munyinu? Munthu uyo wajipeleka kwa Yehova, wakuphalira Yehova kuti: “Nkhumupani umoyo wane. Nyengo zose nichitenge dankha ivyo imwe mukukhumba m’malo mwa vyakukhumba vyane.” Para namwe mwachita nthena, mukulongora kuti muli na kaghanaghaniro ka Yesu, uyo wakati: “Nili kukhira kufuma kuchanya kuzakachita khumbo lane chara, kweni khumbo la uyo wakanituma.”Yoh. 6:38.

18, 19. (a) Kasi ivyo wakayowoya Rose na Christopher vikulongorachi? (b) Kasi mukuwuwona wuli ubatizo?

18 Tawona kuti ubatizo ngwakuzirwa chomene ndipo tileke kuwuwona mwakupepuka. Kweniso ni mwaŵi ukuru kujipeleka na kubatizika. Ŵana awo ŵakutemwa Yehova ndipo ŵakumanya ng’anamuro la kujipeleka, ŵakuziwulika yayi kubatizika nesi kudandawura na ivyo ŵasankha. Rose ni muwukirano wakubatizika, iyo wakati: “Nkhutemwa Yehova, ndipo palije chinyake icho chinganipa chimwemwe chikuru kuluska kuteŵetera Yehova. Nkhuwona kuti nili kuchita makora chomene kubatizika.”

19 Kasi Christopher, uyo tamuzunura kukwambilira kwa nkhani iyi, vikamwendera wuli? Kasi wakachita makora kusankha kubatizika apo wakaŵa na vyaka 12? Christopher wakukondwa kuti wakasankha kujipeleka kwa Yehova na kubatizika. Wakamba upayiniya wanyengozose apo wakaŵa na vyaka 17, ndipo wakimikika kuŵa muteŵeti wakovwira apo wakaŵa na vyaka 18. Pasono wakuteŵetera pa Beteli. Iyo wakati: “Nkhachita makora kusankha kubatizika. Nkhukondwa kuteŵetera Yehova na gulu lake.” Usange namwe mukukhumba kubatizika, kasi munganozgekera wuli? Nkhani yakulondezgapo yizamuzgora fumbo ili.