Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) MARCH 2016

Tikwenera kuchezga na ŵabali ŵithu kuti timanye umo tingaŵawovwilira

Kasi Mungawovwira mu Mpingo Winu?

Kasi Mungawovwira mu Mpingo Winu?

PAMBERE Yesu wandakwere kuchanya, wakaphalira ŵasambiri ŵake kuti: “Muzamuŵa ŵakaboni ŵane . . . ku vigaŵa vyakutali chomene vya charu chapasi.” (Mil. 1:8) Kasi Ŵakhristu ŵakwambilira ŵakate ŵakwaniskenge wuli kupharazga pa charu chose?

Nkhwantha yinyake yikati: “Mulimo uwo Ŵakhristu ŵakatumika kuchita ukaŵapambaniskanga na magulu ghanyake gha chisopa, kusazgapo gulu la chisopa cha Chiyuda mu ufumu wa Roma.” Yesu wakalutanga ku malo ghakupambanapambana kukapharazga. Ŵakhristu ŵaunenesko ŵakulondezga Yesu, ndipo ŵakumanya kuti ŵakwenera kupharazga “makani ghawemi gha Ufumu wa Chiuta” na kupenja ŵanthu awo ŵakukhumba kumanya unenesko. (Luka 4:43) Lekani mpingo wakwambilira wa Chikhristu ukaŵa na “ŵapositole,” kung’anamura ŵanthu awo ŵatumika. (Mrk. 3:14) Yesu wakaphalira ŵalondezgi ŵake kuti: “Ntheura, lutaninge mukazgore ŵanthu ŵa mitundu yose kuŵa ŵasambiri.”Mat. 28:18-20.

Pasono, tilije ŵapositole 12 ŵa Yesu pa charu chapasi. Kweni ŵateŵeti ŵanandi ŵa Yehova ŵakulongora mzimu wa upositole panji kuti umishonale. Para ŵapempheka kuti ŵasazgireko mulimo wawo wakupharazga, ŵakuzomera kuti: “Ndine pano. Nitumani!” (Yes. 6:8) Ŵabali ŵanyake kusazgapo awo ŵali kumalizga Sukulu ya Giliyadi, ŵasamira ku vyaru vinyake vyakutali. Ŵanyake ŵakusamukira ku malo ghanyake mu charu chawo chenechicho. Ŵanyake ŵasambira chiyowoyero chinyake kuti ŵakateŵetere mu mipingo na magulu agho ghakovwira ŵanthu ŵachiyowoyero icho. Ŵabali na ŵadumbu awo ŵakusamira uko  ŵapharazgi mbachoko, panji awo ŵakusambira chiyowoyero chinyake, nawo ŵakukumana na masuzgo. Nyengo zinyake chikuŵa chipusu yayi kusama panji kusambira chiyowoyero chinyake. Kweni iwo ŵakujipata chifukwa cha kutemwa Yehova na ŵazengezgani ŵawo. Para ŵanozgekera makora, ŵakujipeleka kuti ŵakawovwire. (Luka 14:28-30) Ŵabali na ŵadumbu aŵa ŵakovwira chomene.

Ndipouli, ni kaboni waliyose yayi uyo wangasamira ku charu panji malo ghanyake, nesi kusambira chiyowoyero chinyake. Ipo tingalongora wuli mzimu wa umishonale mu mpingo withu?

ŴANI MISHONALE MU MPINGO WINU

Mungawovwira

Nangauli Ŵakhristu ŵakwambilira ŵanandi ŵakasamira ku malo ghanyake yayi, kweni ŵakalongora mzimu wa umishonale mu misumba iyo ŵakakhalanga. Ulongozgi uwo Paulosi wakaphalira Timote ukaŵawovwira ndipo uchali wakovwira m’paka sono. Paulosi wakachiska Timote kuti: “Uchite mulimo wa mupharazgi, ufiske uteŵeti wako mwakukwana.” (2 Tim. 4:5) Ŵakhristu wose ŵakwenera kupulikira dango la kupharazga uthenga wa Ufumu na kupanga ŵasambiri. Nakuti pali vinandi ivyo tingachita mu mpingo withu kulongora kuti tili na mzimu wa umishonale.

Mwachiyelezgero, mishonale wakwenera kuzgoŵera malo ghachilendo. Vinthu vinandi vikuŵa vyachilendo pa uteŵeti wake. Kweni wuli usange tingakwaniska yayi kusamira uko kukukhumbikwira wovwiri? Tingaluwanga yayi kuti pa mpingo withu napo pali vinandi ivyo tingachita. Kasi tingasanga nthowa ziphya zakupharazgira mu chigaŵa cha mpingo withu? Mwachiyelezgero, mu 1940, ŵabali ŵakachiskika kuti zuŵa limoza sabata yiliyose ŵapharazgenge mu misewu. Kasi namwe mungachita upharazgi uwu pa mpingo winu? Kasi mungachitako upharazgi wa kuyala mabuku pa kashelufu ka matayala? Kasi imwe muli kuyezgapo nthowa ziphya zakupharazgira?

Mungawovwira ŵanji kuchita “mulimo wa mupharazgi”

Para tikuwona vinthu mwakwenelera, tilimbikirenge chomene ntchito yakupharazga. Kanandi ŵapharazgi awo ŵakulimbikira kupharazga, ndiwo ŵakujipeleka kusama panji kusambira chiyowoyero chinyake. Ntheura ŵakovwira chomene ŵabali na ŵadumbu mu mipingo iyo ŵasamira. Kweniso, ŵamishonale ndiwo kanandi ŵakudangilira mu mpingo m’paka pasangike ŵabali ŵakwenelera.  Usange ndimwe mubali wakubatizika, kasi mukunwekera kuteŵetera ŵabali na ŵadumbu mu mpingo winu?1 Tim. 3:1.

‘MUKHOZGENGE’ ŴANYINU

Mungawovwira ŵanji mwa kuŵanyamulirako ŵana

Tikwenera kulimbikira kupharazga na kuchita milimo yinyake mu mpingo. Ndipouli, pali vinandi ivyo tingachita kuti tovwire mpingo withu. Tose, kwali ndise ŵalara panji ŵana, ŵanalume panji ŵanakazi, ‘tingakhozga’ Ŵakhristu ŵanyithu.Kol. 4:11, mazgu gha musi.

Tingawovwira Ŵakhristu ŵanyithu para tikuŵamanya makora. Baibolo likuti para tawungana pamoza, “tighanaghaniranenge.” (Heb. 10:24) Mazgu agha ghakulongora kuti tikwenera kupatura nyengo yakuchezgera na ŵabali ŵithu kuti tiŵamanye makora kweniso kumanya ivyo ŵakukhumbikwira. Kweni tileke kunjilirapo pa nkhani zaŵene. Nyengo zinyake ŵabali ŵithu ŵangaŵa kuti ŵakukhumba wovwiri wakuthupi panji wauzimu. Mulimo wakovwira Ŵakhristu ŵanyithu ngwa ŵalara na ŵateŵeti ŵakovwira pera yayi. Mbunenesko kuti nyengo zinyake pakuŵa nkhani izo zikukhumbikwira wovwiri wa ŵalara. (Gal. 6:1) Kweni tose tikwenera kovwira ŵabali na ŵadumbu ŵachekuru, panji mbumba izo zasangana na masuzgo.

Mungawovwira awo ŵakusuzgika maghanoghano

Mwachiyelezgero, Salvatore wakasangana na suzgo la ndalama, mwakuti wakaguliska nyumba, na katundu wake munandi. Iyo wakenjerwanga umo wapwelelerenge mbumba yake. Kweni mbumba yinyake mu mpingo yikawona suzgo la Salvatore. Ntheura ŵakamupa ndalama. Kweniso ŵakamovwira iyo na muwoli wake kuti ŵasange ntchito. Mise yiliyose ŵakawoneseskanga kuti ŵakuchezga na kukhozga mbumba ya Salvatore. Ivi vikapangiska kuti ŵaŵe paubwezi, ndipo pasono mbumba zose ziŵiri izi ni zakukondwa.

Ivyo Ŵakhristu ŵaunenesko ŵakusambira, ŵakuphalirakoso ŵanji. Nga umo Yesu wakachitira, nase tikwenera kumanyiska waliyose vinthu viwemi ivyo Baibolo likulayizga. Kwali tingakwaniska kusama panji yayi, tose tikwenera kulimbikira kuchitira viwemi ŵanthu wose. Nakuti tingachita nthena nanga pangaŵa pa mpingo withu. (Gal. 6:10) Para tikovwira ŵanyithu, tisangenge chimwemwe chifukwa chakupeleka, ndipo tilutilirenge “kupambika vipambi mu mulimo wose uwemi.”Kol. 1:10; Mil. 20:35.