Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) FEBRUARY 2016

 KUFUMA MU NTHAMBA YITHU

Galimoto ya Masipika Iyo Yikamanyikwa na Ŵanthu Ŵanandi

Galimoto ya Masipika Iyo Yikamanyikwa na Ŵanthu Ŵanandi

Nathaniel A. Yuille wakati: “Mu Brazil muli galimoto yimoza iyo yikugwira ntchito pa mulimo wa Fumu, ndipo ŵanthu ŵanandi ŵakuyichema kuti, ‘Galimoto ya masipika ya Watch Tower.’”

NTCHITO ya Ufumu ku Brazil yikendanga pachokopachoko m’ma 1930. Kweni mu 1935, ŵapayiniya ŵaŵiri, Nathaniel na Maud Yuille ŵakalembera kalata Mubali Joseph F. Rutherford, uyo pa nyengo iyo wakalongozganga ntchito yakupharazga. Iwo ŵakajipeleka kuchita uteŵeti ndipo ŵakalemba kuti mbakunozgeka kuluta kulikose uko kukukhumbikwira wovwiri.

Pa nyengo iyi, Nathaniel wakaŵa na vyaka 62 ndipo wakaŵa kuti wapumura pa ntchito. Iyo wakaŵa mulaŵiliri wa uteŵeti mu mpingo wa Ŵakaboni ŵa Yehova ku San Francisco, California, U.S.A. Wakanozganga ndondomeko ya upharazgi ndipo wakagwiliskiranga ntchito vyakukuzgira mazgu pakupharazga makani ghawemi. Mubali Nathaniel wakaŵa waluso ndiposo wakujipeleka. Ivi vikamovwira chomene wati waŵa muteŵeti wa munthavi mu charu cha Brazil icho chili na ŵanthu ŵa viyowoyero vinandi.

Mu 1936, Nathaniel na Maud, pamoza na mupayiniya munyake, kweniso Antonio P. Andrade ŵakafika mu Brazil. Antonio wakamanyanga chiyowoyero cha ku Brazil ndipo wakaŵawovwiranga kung’anamulira. Ŵabali aŵa ŵakiza na magiramafoni 35 ndiposo galimoto ya masipika. Nangauli charu cha Brazil ntcha nambara 5 pa vyaru vikuruvikuru, kweni pa nyengo iyi chikaŵa waka na ŵapharazgi 60 ŵa Ufumu. Magiramafoni na galimoto ya masipika vikawovwira kuti ŵanthu ŵanandi ŵapulike makani ghawemi gha Ufumu mu vyaka vichoko waka.

Pakati pajumpha mwezi umoza kufuma apo Yuille na ŵanyake ŵakafikira mu Brazil, munthavi ukanozga kuti mu Brazil muchitike ungano wa uteŵeti wakwamba. Ungano uwu ukachitikira mu msumba wa São Paulo. Galimoto ya masipika yikenda mu msumba wose kumanyiska ŵanthu za ungano uwu. Pa ungano uwu pakiza ŵanthu 110. Maud wakwenera kuti ndiyo wakendeskanga  galimoto iyi. Ungano uwu ukakhuŵilizga ŵabali kuti ŵaŵike mtima pa ntchito yakupharazga. Ŵabali ŵakasambira umo ŵangapharazgira na mabuku, makadi, kweniso magiramafoni agho ghakaŵa na nkhani zakujambulika mu Chingelezi, Chijeremani, Chihangariya, Chipolishi, Chisipanishi, ndipo pamanyuma zikaŵaso mu Chiphwitikizi.

Galimoto ya masipika iyi yikawovwira kuti ŵanthu ŵanandi wapulike makani ghawemi mu Brazil

Mu 1937, ku São Paulo, Rio de Janeiro, na Curitiba kukachitika maungano gha uteŵeti agho ghakachiska ŵabali kuti ŵalimbikirenge chomene ntchito yakupharazga. Galimoto ya masipika pamoza na ŵabali awo ŵakiza pa maungano agha, ŵakenda nyumba na nyumba kupharazga uthenga. José Maglovsky, uyo pa nyengo iyo wakaŵa muwukirano wakalemba kuti: “Tikaŵikanga mabuku pa sitandi uku uthenga ukupharazgika pa galimoto ya masipika, ndipo tikadumbiskananga na ŵanthu awo ŵakafumanga mu nyumba zawo kuzakawona ivyo vikuchitika.”

Pa maungano agha, ubatizo ukachitikiranga mu milonga, ndipo mu mphepete mwa milonga iyi mukaŵa ŵanthu ŵanyake awo ŵakawotheranga zuŵa. Galimoto ya masipika yikawovwira chomene pa mulimo wakupharazga makani ghawemi. Mubali Rutherford wakadumba nkhani ya ubatizo iyo yikabanguranga mu masipika. Ŵanthu awo ŵakakopeka ŵakazgingirizga galimoto na kutegherezga nkhani ya ubatizo iyo yikang’anamurikanga mu Chiphwitikizi. Yikati yamara nkhani ya ubatizo, awo ŵakaŵa kuti ŵabatizikenge ŵakimba nawo sumu za Ufumu izo zikajambulika mu Chipolishi. Pakaŵa ŵabali na ŵadumbu ŵa viyowoyero vyakupambanapambana ndipo waliyose wakimbanga mu chiyowoyero chake. Buku Lapachaka la 1938, likati: “Ivyo vikachitika pa zuŵa ili, vikayana na ivyo vikachitika pa Pentekoste apo waliyose wakapulikanga mu chiyowoyero chake.”

Pamanyuma pa maungano agha, zuŵa lililose la Sabata, kwali kuŵe vula panji zuŵa, galimoto ya masipika yikapharazganga uthenga wakujamburika wa mu Baibolo. Uthenga uwu ukafikiranga ŵanthu mu malo ghakuchezgera, mu zinyumba, mu mafakitare gha mu São Paulo, na matawuni ghanyake ghapafupi. Kweniso kamoza pa mwezi, galimoto ya masipika yikalutanga kukapeleka uthenga ku gulu la ŵanthu ŵavyoni 3,000 awo ŵakakhalanga pa mtunda wa makilomita 97 kufuma ku São Paulo. Pamasinda, mpingo ukapangika ku malo agha. Nangauli ŵanthu aŵa ŵakaŵa na vyoni, kweni boma likaŵazomerezga kupharazga uthenga wakupembuzga wa mu Baibolo ku ŵavyoni ŵanyawo awo ŵakakhalanga ku malo ghanyake ghakusungirako ŵavyoni.

Mu 1938, uthenga wa Ufumu wakujambulika ukamba kusangikaso mu Chiphwitikizi. Pa zuŵa lakukumbukira ŵanthu ŵakufwa ku Brazil, galimoto ya masipika yikenda mu malaro ghanandi kupharazga uthenga wa mu Baibolo. Ŵanthu ŵakujumpha 40,000 ŵakategherezga nkhani zakuti, “Kasi ŵakufwa ŵali nkhu?,” “Yehova,” na “Usambazi.”

Ŵalongozgi ŵa matchalitchi ŵakakondwanga yayi, ndipo kanandi ŵakachiskanga ŵalara ŵa boma kuti ŵakanizge galimoto ya masipika kupharazga uthenga wa mu Baibolo. Mudumbu Yuille wakati nyengo yinyake wasembe wakakocha ŵanthu kuti ŵaswe galimoto iyi. Kweni pa nyengo iyi kukiza meya na ŵapolisi ndipo ŵakategherezga pulogiramu yose, ndipo pakuwera meya wakapoka buku. Ntheura chiŵembu cha wasembe chikatondeka. Nangauli pakaŵa ŵakususka, kweni Buku Lapachaka la 1940, likati chaka cha 1939 ntchito yakupharazga vya Chiuta na zina lake yikenda makora chomene mu charu cha Brazil.

Galimoto ya masipika ya Watch Tower yikawovwira chomene pa ntchito yakupharazga mu Brazil. Yikawovwira kuti uthenga wa Ufumu ufikire ŵanthu ŵanandi. Nangauli galimoto yakutchuka iyi yikaguliskika mu 1941, kweni Ŵakaboni ŵa Yehova ŵanandi ŵalutilira kupharazga makani ghawemi mu charu cha Brazil.Kufuma mu nthamba yithu ya ku Brazil.